Read majang Ijaag Wosɛytaanakoŋk 10 Bible Online

Ijaag Wosɛytaanakoŋk 10 - majang bible

Ijaag Wosɛytaanakoŋk 10

¹Lakɛɓa iɗit om Keesaariyaake sinɔ riyɛ kɛ Kornelewoosuk. Sɛɛnɓa ɔɗɔwen amaasiniyɛ sigɔ ɗibɛk, pony amaasiniyɛɛkoŋk sinɔɔnɛ riyɛ kɛ Pony Itaaliyaak.

²Sɛɛnɓa iɗit sinɔ ɓaŋkaawur ɗanɗamɔɔnuk jɛt, ugumeɓa Waakoyota sɛɛn a joop wɛy nɛɛkik baŋɛ. Gigijɓa sankaanak sigɛ atu Ayuudek, ɛɓa ɗanɗama Waakoyota ɓɛɛnyɔwɛ gɛɛŋk baŋɛ.

³Ɓeny omalte ajigeya sayitiyɛɛkɛ sigɔɔgɛ tula aŋank, riyɛɛɓa sɛɛn kɛ, "Kornelewoos!" nɛ dɛnɛ yaaŋiyɛɛkɛ eekeerɛ wosɛytan Waakoyotoŋk a guugunyku son lak sɛɛnik.

⁴Nɛɓa ŋaati nɛ mermenaar son lak wosɛytan nɛɛkik jɛt, nɛ tongeeɗ kɛ, "Suumi naakɛ, jikon?" Nɛɓa wosɛytan nɛɛkɛ tongeeɗ kɛ, 'Koɓɛɛ kɔna sooy lak Waakoyok ɗanɗamɔn nook, a tigi sinɛkɔ gagaɓun sankaanakaakiŋ."

⁵Sisɔ wosɛyi joop Iyopeya nɔ kɛɛɗɛɛ riykɛ Simion sinɛ riyɛ kɛ Petrosuk.

⁶Sɛɛn sisɔ koonat woy Simion sinɛ wɛkɛkɛr tarmakik, sinaanɛ ar goroo sinɔɔnɛ obiiŋɔŋk kɛntɛɛk."

⁷Saaɓa ŋaarɗi wosɛytan sinɛkan tongeeɗ any sinik, nɛɓa riyiri Kornelewoos ijaageerɛ gɛɛnɛk a pɛɛy, a amaasiniyɛɛkɛ sigaagɛ atu sɛɛnek sinɔ ŋaadɛɛŋɔŋk a omoŋ.

⁸Nɛɓa tonu sɛɛga any baŋɛ nɛ wosɛyɛ sɛɛg Iyopeya.

⁹Alɛ nɛɛkɛ waawuy sayitiyɛɛkɛ sigɔɔgɛ tula omk, kaarɓa nɛ saaɓa woontukuɗ katamɛya nɛɛkaakik, nɛɓa Petros teeŋɛ pooka raŋana ɗanɗamɔɔna,

¹⁰nɛɓa lak ŋaawu nɛ ɗɛyɛ ɗama. Saaɓa arkiɗɛ ijaag ɗamatoŋkuk, nɛɓa tawuku ɗoŋ a tekerŋ nɛ yaaŋɗigiɗɛɛ dɛnɛɛɗ.

¹¹Any sinɛɓa dɛnɛ yaaŋiyɛɛkɛk, dɛnɛɓa a ɓuukiɗi dari, nɛ kus ɗooka any sinɔ gayi a abii sinɔ birittank sinɔkan gaamɛɛ a gɔɔteer aŋank.

¹²Lakɛɓa saadi nɛɛkɛ raŋk keegu sigɔ ɓɛɛlɛr kundiyaakɛk, a ola sigɔ pupuuter ɗookuk, a teetɔ sigɔ pirer rakaayk.

¹³Saaɓak tiyɛɓa sɛŋk koŋgoy sinɔ tonu kɛ, "Iin Petros, ŋaar raŋana nɔ ŋɔɔŋɔliikin nɔ ɗamikin."

¹⁴Yakanaɓa Petros tonu kɛ, "Suumi naakɛ, ki gayɛ. Inɓa kaa ada any sinɔɓa kɛɛ toniiɗ kɛ in ɗamɛɛk, maŋk any sinɔ somkaank."

¹⁵Nɛɓa tiyɛ kɛkar koŋgoy sinɔ tonu kɛ, "Any sinɔkan ijaag Waakoyot a mentanŋɔŋk kin seŋk toniiɗ kɛ somkan."

¹⁶Nɛɓa ɓɛɛlɛ oko sinik agut jiit baŋiya, nɛɓa boŋɛɛ any sinɛ gayi a abii sinɔ birittank dariya sisa.

¹⁷Saaɓa Petros koɓiiɗ kɛ wooran yaaŋiyɛ gɛɛŋk jikonk, maɓa joop sigɛɓa wosɛyɛ sɛɛg Kornelewoosuk kɔɔniyar wɛy Simionuk, nɛɓa laŋir nɛ ɛtɛtɛɗar tugaat.

¹⁸Nɛɓa riya nɛ kɔɔniya kɛ, "Simion sinɛ riyɛ kɛ Petrosuk ɓɛɛlɛ seediiŋ?"

¹⁹Saaɓa Petros arkiɗ koɓiiɗ yaaŋiyɛ gɛɛŋkik, nɛɓa tonurgeeɗ Wɛɛŋa sigɔ Geetitaanakik kɛ, "Wawararni joop a jiit.

²⁰Ŋaari raŋana nɔ ɓurɓuɗiikin nɔ kaari a sɛɛg agut omoŋ. Kat ɓakɛyɗiikin, agut sinɔ wosɛyɛɛrakɔ sɛɛg saak."

²¹Nɛɓa Petros ɓurɓuɗi nɛ tonu sɛɛga kɛ, "Eet iɗit sinɛ wawararik. Kurakɔɔkɔ agut jikon?"

²²Nɛɓa sɛɛk jumurgeeɗ kɛ, "Kusii sooy lak Kornelewoos sinɛ ɔɗɔwen amaasiniyɛ sigɔ ɗibɛk. Sɛɛn iɗit sinɔ mentan taamɛkɛ Waakoyotoŋk, ɛ ugume Waakoyota, ɛ porur sɛɛn joop Ayuuduk baŋɛ. Tongeeɗkɔ wosɛytan sinɔ geetitank kɛnɔnu waki nyaka nɛɛka kɛnɔ kɛɛ tiyɛ any sinɛ tonunk."

²³Nɛɓa Petros gaɓɛ sɛɛg nyaka nɛɛka nɛ wɔɔrɛ sɛɛg nɛ ɗeegararŋ. Nɛɓa alɛ nɛɛkɛ romiiɗ ŋaar raŋana nɛ kaar a sɛɛg agut omoŋ, ŋaadtaanak sigɛɓa atu Iyopeek a omoŋ omoŋ kaarɓa agut omoŋ.

²⁴Nɛɓa alɛ nɛɛkɛ mɛlɛr Keesaariyaaka, nɛɓa Kornelewoos tolɛ tekaaneer gɛɛŋk, a piraakak gɛɛŋk sigɛ atu jɔkuk nɛ koorɛr Petrosak.

²⁵Saaɓa Petros mɛlkiɗik, nɛɓa Kornelewoos wideer ɛɛk son lak sɛɛnik, nɛ oru ɛɛk derakɛ gɛɛnɛ goyse ɗeek nɛ ugumgeeɗiŋ.

²⁶Yakanaɓa Petros ɓɔŋgɔɔrɛ nɛ tongeeɗ kɛ, "Ŋaari raŋana! Eet ɓɔrɛ iɗit oko iin."

²⁷Saaɓa Petros guugunyɗu godeya ma waawasiŋɔŋk, nɛɓa laŋki joop a ɓɔɔkaaŋ a atu tolɛɛɗ.

²⁸Nɛɓa tonu sɛɛga Petros kɛ, "'Ɗegerari sɔɔk ɔɗɔka goŋk kɛ kɛɛ pɛgɛdɛɛt, higii ŋaadiyɛ gaŋkik kɛnɔ lotɛr ɛɛk iɗit Ayuuduk a iɗit sinɔ moko Ayuuduk nɔ guugunyar godeya sinɔɔna omoŋɔŋk, yakana yaaŋɛkɔta Waakoyot kɛnɔ kɛygun wooɗ kat tona kɛ kɛɛkan geetiit maŋk kɛ somkan.

²⁹Agut sini saakɔta wosɛyɗitarkiɗɛk nɛkɔ kusaa a kaa rootaan, nɛ sisɔ ɗɛya a ɗegera any sinɛkɔtu riygiɗɛɛkiŋ."

³⁰Tonuɓa Kornelewoos kɛ, "Kɔ ɗoŋikɛ sigɔɔgɛ aŋank ɔɔtɛ sineene sayitiyɛɛkɛ sigɔɔgɛ tula aŋank, ɗanɗamaakakɔ nyaki naakɛk, nɛkɔ sisa ɛtɛ iɗit om taamɛkɛ gaanɛk, sinɔ lak abii sinɔ nyaalɛŋɔŋkuk.

³¹Nɛta tonu kɛ, 'Iin Kornelewoos, tiyɛkɔ Waakoyot ɗanɗamɔn nookuŋ, koɓɛɛkɔ tigi sinɛ gagaɓun sankaanakaak taamɛkɛ Waakoyotoŋkuŋ.

³²Wosɛyi iɗit sisɔ Iyopeya nɔ kɛɛɗɛɛ riykɛɛ Simion sinɛ riyɛɛ kɛ Petrosuk. Sɛɛn sisɔ koonat woy Simion sinɛ ar goroo sinɔɔnɛ obiiŋɔŋk kɛntɛɛk sinɛ wɛkɛkɛr tarmakik.'

³³Nɛ agut sini nɛkɔ wɔsɛyɛɛrana joop a gorgorŋ. Nɛ mentan sinɛkɔ mɛlkiɗikiŋ. Tolɗiikiikɔ sisɔ eteŋk baŋɛ taamɛkɛ Waakoyotoŋk, kɛnɔ tiyii any sinɛ kɔna tonu Waakoyot kɛnɔ waasink.

³⁴Tukeɓa Petros toniiɗa kɛ, "Mɛlɛkɔta eekeerɛ kɛ ki Waakoyot pakaatɛ joop.

³⁵Kɛygun iɗit ɗoo wonk ɔkɔn ɓure Waakoyoŋ ɛ ijaag any sinɔ mentan taamɛkɛ gɛɛnɛkiŋ, nɛ boŋu sɛɛn Waakoyotuŋ.

³⁶Ɗegerɛɛ kɛ wosɛykikan Waakoyot pɛɛni nɛɛk joopa Israeelikiŋ, mɛlkikan sɛɛga Pɛɛni sinɔ Ɓɛlkɛɛstank yaakatoŋk goy Yeeseek. Ege Yeese Keresee Suumi joop baŋɛk.

³⁷Nɛ ɗegerari any sinɛkan ɓɛɛlɛ a tukiɗi Gɛlilaake nɔ ɗooka Yuudaak baŋɛk, a tukiɗi saaɓa Yowanis rɔɔriyaaɗ agut aadiik baŋiya.

³⁸Ɛɓɔrɛ ɗegerari kɛ ɗonyɛɓa Waakoyot Yeesee Naajreetik Wɛɛŋakɛ sigɔɔgɛ Geetitaanakik, a ɓaŋkawukaat. Nɛɓa weeweri a ijaag any sinɔ mentanŋɔŋk, a ebɔdɛ joop sigɛ atu ɓaŋkawukaat setanik goyse ɗeekik, agut sinɔɓa Waakoyo a sɛɛn agut omoŋɔŋk.

³⁹Waasii seek eekeer any sinɛɓa ijaag sɛŋkik sinɔɔnɛ kɛntɛ ɗoo Yuudaak a katamɛ Yorsaleemuk. Nɛɓa sɛɛk joop laalawar keet raŋk nɛ ɓokoturŋ.

⁴⁰Yakanaɓa Waakoyot boŋku sɛɛn ret walasa ɗoŋikɛ sigɔɔgɛ jiitik, nɛɓa ari a yaaŋɛ ɛɛk.

⁴¹Mokokan yaaŋɛ ɛɛk joopa baŋɛ, yaaŋɛkan ɛɛk eteŋka sigaagakan ɗamiikii ɛ utiɗikii a sɛɛn agut omoŋɔŋk saakan ŋaarkiɗ ret walsak baŋiyaak, eteŋk joop sigɛkan daam tin Waakoyot kɛnɔ waasii eekeer joopa agut sɛɛnik.

⁴²Sekɛɓa tina kɛnɔ waasii eekeer joopa, kɛ tonuɓa Waakoyot kɛnɔ koy pɛrɛdɛ bɔdtaanakɛ a reteerɛ.

⁴³Waasɛrɓa joop pɛrkaakoŋk baŋɛ kɛ joop sigɛ ŋaadiɗi sɛɛnek baŋɛ, kɛnɔkoy laŋir tɔŋɔɗ tikiyɛɛkoŋk tiriyaakɛ gɛɛnɛk."

⁴⁴Saaɓa Petros toniiɗ any sinik, nɛɓa kurak Wɛɛŋa sigɔ Geetitaanakik joopa sigaagaɓa tiyɛr pɛɛni nɛɛkik raŋana baŋɛ.

⁴⁵Joop Ayuuduk sigɔ ŋaadtaanakik sigɛɓa kurak a Petrosuk, saaɓa dɛnɛrɗi a gaɓɛ Waakoyot Wɛɛŋa sigɔ Geetitaanakik, joopa sigɔɔga moko Ayuuduk, nɛɓa reemɗi ɓayɛtun gɛŋkiŋ.

⁴⁶Nɔɓa ɗegerarɗi kɛ gaɓɛɛkɔ Wɛɛŋa sigɔ Geetitaanakik joopa sigɔɔga moko Ayuuduk, tiyɛrɓa a tonɗi atutunɛ sigɔɔgɛ kɛɛ ɗegerɔɔnuk ɛ eemɛyar Waakoyo pɔɔsiyɛɛkɛ. Nɛɓa tonu Petros kɛ,

⁴⁷"Joop sigi boŋurkɔ Wɛɛŋa sigɔ Geetitaanakik oko eteŋk, nɛ wooɗ sinɛ ɓaariiɗ kɛnɔ kat sɛɛg aadɛɛ maawɛɛk?"

⁴⁸Nɛɓa tonu kɛnɔ aadɛɛ sɛɛg tiriyaakɛ Yeese Kereseek. Saadi baŋiya kaaɓurɓa Petros kɛnɔ beeɗ a ɗoŋ tekerŋ a sɛɛg agut omoŋ.