Read majang Ijaag Wosɛytaanakoŋk 11 Bible Online

Ijaag Wosɛytaanakoŋk 11 - majang bible

Ijaag Wosɛytaanakoŋk 11

¹Sisɔ wosɛytaanak a ŋaadtaanak ɔgɔ sigɛ atu ɗook Yuudaak, tiyɛrɓa kɛ joop sigɔ moko Ayuuduk boŋurɓa ɓɔrɛ pɛɛni Waakoyotoŋkuŋ.

²Nɛɓa Petros weeri Yorsaleema, nɛɓa ŋaadtaanak Ayuuduk gɔɔnyɛr sɛɛn kɛ,

³"Guugunyunkan waa joop sigɛɓa kɛɛ sɛɛg yawɛɗik nɔ aasi ɗamikari a sɛɛg agut omoŋ."

⁴Nɛɓa Petros tuke yaaŋɛɛta ola sigɛkan ɓɛɛlɛrk baŋɛ a omoŋ omoŋ kɛ,

⁵"Arkaakan ɗanɗamɔɔn Iyopee, nɛkan tawuka ɗoŋ a tekerŋ nɛkan dɛnɗika koɓiiɗ. Dɛnaakan koɓiiɗ any sinɔ gayi a biriittan abii sinɔ obiiŋɔŋk sinɔkan gaamɛɛ a gɔɔteer aŋank a kus dari ɗooka son lak eetik.

⁶Nɛkan mermena jɛt, nɛkan dɛna keegu sigɔ ɓɛɛlɛr kundiyaakɛk, a ola sigɔ pupuuter ɗookuk, a teetɔ sigɔ pirer rakaayk.

⁷Nɛkan tiya koŋgoy sinɔta tonu kɛ, 'Iin Petros, ŋaar raŋana nɔ ŋɔɔŋɔliikin nɔ ɗamikin.'

⁸"Yakanakan tona kɛ, 'Suumi naakɛ, ki gayɛ, inɓa kaa ada any sinɔ ŋɛɛwɛnŋɔŋk maŋk any sinɔ somkank.'

⁹"Nɛkan gut pɛɛyeene nɛɛkɛ tiya dari koŋgoy sinɔ tonu kɛ, 'Any sinɔkan ijaag Waakoyot a mentanŋɔŋk, kin seŋk toniiɗ kɛ somkan.'

¹⁰Nɛkan ɓɛɛlɛ oko sinik agut jiit, nɛkan boŋɛ any sinɛ gayi a abiik baŋɛ dariya.

¹¹"Nɛkan sisa mɛlɛrki godeya sinaana arkiɗiik joop a jiit, sigɔkan wosɛykɛɛ sɛɛg Keesaariyaake son lak eetik.

¹²Nɛkanta tonur Wɛɛŋa sigɔ Geetitaanakik kɛnɔ kɛɛɗii a sɛɛg agut omoŋ a kat rootaana. Ŋaadtaanak sigi tula omk kaarkan a eet agut omoŋ, nɛkan guugunyii waa Kornelewoosuk.

¹³Nɛkantina tonu seŋk kɛ dɛnɛkan wosɛytan Waakoyotoŋk a ɛtɛtɛr nyaki naakɛk, nɛkanta tonu kɛ, 'Wosɛyi iɗit Iyopeya nɔ kɛɛɗɛɛ riykɛɛ Simion sinɛ riyɛ kɛ Petrosuk.

¹⁴Tonukɔɔna sɛŋk pɛɛni sinɔkoy bɔdɛrɗɔ iin a joop wɛy nookuk baŋɛk.'

¹⁵"Saakan tukeeɗa toniik, nɛkan kurak Wɛɛŋa sigɔ Geetitaanakik sɛɛga raŋana oko sinɛkan kurakiɗ eteŋkaak tukik.

¹⁶Saakank koɓukakan pɛɛni sinɛɓa waasɛ Suumii kɛ, 'Aadikan kɔnu Yowanis maawɛ, mayakana iinak aadɛɛkɔɔ kɔnu Wɛɛŋakɛ sigɔɔgɛ Geetitaanakik.'

¹⁷Saa seek ŋaadiɗii Suumi Yeese Kereseek, nɛ tina Waakoyot gaɓɛ Wɛɛŋa sigɔ Geetitaanakik, nɛ ɔkɔn gaɓɛ sɛɛga tigi sinɛkan gaɓɛ eteŋkaakiŋ nɛ laka oolan sinɔ ɓaarɗa sɛɛnŋɔŋkuŋ?"

¹⁸Saaɓa tiyɛrɗi any sinik, nɛɓa nyɛyɛr palamɛ nɛɛk nɛ dakɛr kɛ many. Nɛɓa pɔɔsɛr Waakoyo kɛ, "Sisɔ gaɓɛkɔ Waakoyot joopa sigɔɔga moko Ayuuduk weerɛɛt tikiyɛɛkɛk, sinɔ ari sɛɛg a laŋir wɛɛŋa sigɛkoy nɔkoy nɔkoyk."

¹⁹Kɛɛtiɗiiɓa ŋaadtaanak a ɓɔɔkaaŋ, agut epaayan saaɓa ɓokotiiɗɛɛ Istipaanoosuk baŋiya. Nɛɓa kaar ɗooka Pinkeek, a sinɔɔnɛ Kopiroosuk, a katamɛya Ansokiyaak, nɛɓa waasɛr Pɛɛni sinɔ Ɓɛlkɛɛstank joopa Ayuuduk dakɛɗa maɓa kir waasɛɛt joopa ɔgɔɔka.

²⁰Sɛɛge a omoŋ omoŋ sigɛɓa kurak Kopiroose a Kɛrenaakek, nɛɓa kaar Ansokiyaaka nɛ ɓɔrɛ waasɛr joopa sigɔɔga moko Ayuuduk Pɛɛni sinɔ Ɓɛlkɛɛstank agut Suumi Yeeseeŋ.

²¹Nɛɓa kɔnyɛ sɛɛg Suumiiŋ, nɛɓa ŋaadiɗi joop a ɓɔɔkaaŋ nɛ weerik son lak Suumik.

²²Saaɓa tiyɛrɗi any sinik joop gode Sambatɛyoŋk Yorsaleemuk, wosɛyɛrɓa Barnabaas Ansokiyaaka.

²³Nɛ saaɓa kɛɛɗik dɛnɛɓa a kɔ gaɓɛ Waakoyot wookan nɛɛk joopa gɛɛnaakik, nɛɓa yaageeɗiŋ. Nɛɓa rɔɔriy sɛɛg kɛnɔ beeɗir a sɛɛg ŋaadɛɛ Waakoyote sɛɛg baŋɛ, ɓayɛ nɛŋk baŋɛ.

²⁴Sɛɛnɓa iɗit sinɔ mentanŋɔŋk, sinɔ enya Wɛɛŋa sigɔ Geetitaanakik a ɓaŋkaawur ŋaadiyɛɛkɛk. Weeriikiɓa joop a ɓɔɔkaaŋ son lak Suumik.

²⁵Saadi baŋiya kɛɛɓa Barnabaas Tɛrseesa a warɛ Saaool.

²⁶Saaɓa laŋkiɗik, nɛɓa ɗɔku Ansokiyaaka. Sɛɛg a getu pɛɛy beeɗirɓa a joop gode Sambatɛyoŋk agut omoŋ a eme omoŋ baŋɛ, nɛɓa rɔɔriyar joop a ɓɔɔkaaŋ jɛt. Nomtaanak tuki nɛɛkɛ riyɛɓa sɛɛg Ansokiyaake kɛ Dooytaanak.

²⁷Saaɓak joop pɛrkaakoŋk a omoŋ omoŋ kaarɓa Yorsaleeme Ansokiyaaka.

²⁸Sɛɛge iɗit a omoŋ sinɔ riyɛ kɛ Agaboosuk ŋaarɓa raŋana, nɛ tonu pɛrka Wɛɛgakɛ sigɔɔgɛ Geetitaanakik kɛ lakɛ koy ŋaawu sinɔ obiiŋɔŋk ɗook baŋɛ. Eekeerɛ ɓɛɛlɛɓa oko sinik eme suumi Roomuk Kɛlawudewoosuk.

²⁹Agut sini waasiɗiiɓa nomtaana baŋɛ, nɛ boŋurku wori sɛɛg a omoŋ omoŋ oko sinɛ oolɛrɗik kɛnɔ wosɛyɛr tɔkɔny manyaakaka sigaaga atu ɗook Yuudaak.

³⁰Tolɛrɓa wori nɛɛk nɛ wosɛyɛr gutarɛyɛɛka gode Sambatɛyoŋk Yorsaleemuk ariit Barnabaas a Saaooluk.