Read majang Ijaag Wosɛytaanakoŋk 13 Bible Online

Ijaag Wosɛytaanakoŋk 13 - majang bible

Ijaag Wosɛytaanakoŋk 13

¹Godeey Sambatɛyoŋk sinɔɔnɛ ar Ansokiyaakek, lakɛɓa joop pɛrkaakoŋk a rɔɔriytaanak. Joop sigi, Barnabaas, a Simion sinɛ kɔjuk, a Lukiyoos sinɛ iɗit ɗoo Kɛrenaak, a Minahee sinɛ ɔɗɔwen woriya Herodis sinɛɓa ikomu pakattan ɗoo aŋaneen nɛɛkik, a Saaool.

²Nɛɓa a atu ugumeet Suumiya ɛ soomɛr, nɛɓa tonur Wɛɛŋa sigɔ Geetitaanakik kɛ, "Inta pakatɛɛ Barnabaas a Saaool ijaaga sinaanakɔ daamguɗa sɛɛgik."

³Agut sini saaɓa soomɛrɗi ɛ ɗanɗamaak baŋiya, nɛɓa riiɓer sɛɛge arin raŋk nɛ ŋɔɗutar sɛɛgiŋ.

⁴Wosɛyɛrɓa Wɛɛŋa sigɔ Geetitaanakik Barnabaas a Saaool nɛ kaar Selewukiyaa. Nɛɓa saadi ɗoyitar Kopiroosa emɗ.

⁵Nɛɓa mɛlɛr katamɛya Silmanaak, nɛɓa rɔɔriyaaɗ pɛɛni Waakoyotoŋk godeyikɛ tolɛɛɗoŋk joop Ayuuduk. Markoos sinɛɓa riyɛ kɛ Yowanisik sɛɛnɓa ɓɔrɛ a sɛɛg kɛnɔ kɔnyɛ sɛɛg.

⁶Kaarɓa nɛɓa ŋawiiter asuulɛ Kopiroosuk baŋɛ nɛ mɛlɛr Paapuwa. Nɛɓa saadi laŋirki iɗit om Ayuuduk sinɔ riyɛ kɛ Baar Yeeseek sinɔɓa ŋɛyk, ɛ iɗit pɛrkaakoŋk sinɔ nyonkank.

⁷Beeɗirɓa a iɗit sinɔ suumi ɗookoŋkuk, sinɔ riyɛ kɛ Sɛrgiyoos Paawuloosuk sinɔɓa ɗeger ɛɛkik. Suumi sini riyɓa Barnabaas a Saaool nɛ ɗɛyɛ a tiyɛ pɛɛni Waakoyotoŋk.

⁸Yakana Baar Yeese sinɛɓa ŋɛyk sinɛɓa riyɛ ad Giriikik kɛ Elimaasik ɗɛyɛɓa suumi sinɛ ɗookoŋk kɛnɔ kat ŋaadiɗi, nɛɓa ɓooyu Barnabaas a Saaool.

⁹Saaool sinɛɓa riyɛ kɛ Paawuloosuk enyɛɛriɓa Wɛɛŋa sigɔ Geetitaanakik, nɛɓa mermen iɗit sinɛ jɛt nɛɓa tongeeɗ kɛ,

¹⁰"Iin tɔɔn diyabiloosuk, iin gumaaken eekeeroŋk baŋɛ siniɓa barɛ raamiyɛ a koɓi sinɔ ŋɛɛwɛnŋɔŋkuk. Kin toŋoɗ ruruŋ gopan Waakoyotoŋk sinɛ ɓɛɛlɛ kɛ sɛmk?

¹¹Dɛnko, sisɔ mɛlki kɔɔna goopan Suumiyoŋkuŋ, dakinkɔɔ a mot ɔɔtɛya sinɔɔna balaaŋɔŋk kinkɔɔ taanta pɛɗɛrka waawuyoŋk." Nɛɓa sisa miinye taamɛ gɛɛŋk gumoy a nyuugur. Nɛɓa weerɛ ɛɛk tookɛɛta nɛ tuke ɗaaɗapɛɛt a warɛ iɗit sinɔ gaamu sɛɛn ari nɛ puruuteŋɔŋk.

¹²Saaɓa iɗit sinɛ suumi ɗookoŋk dɛnɛɛɗ any sinɛɓa ɓɛɛlɛk, nɛɓa reemɗi ɓayɛ nɛɛkɛ agut rɔɔriyɔn sinɛɓa tiyɛ agut Suumik nɛɓa ŋaadiɗiiŋ.

¹³Saadi baŋiya teeŋɛrɓa Paawuloos a piraakak gɛɛŋk emɗa nɛ ŋaarar Paapuwee, nɛ kaar Pergeya sinaana ar Pinpiliyaakek. Yakana Markoos sinɛɓa riyɛ kɛ Yowanisik, pakatɓa sɛɛge ɛɛk nɛ weeri Yorsaleema.

¹⁴Yakanaɓa sɛɛk ŋaarar Pergee nɛ kaar Ansokiyaaka sinaana ar Pisdiyaakek. Nɛɓa waawuy Sambatɛyoŋk Ayuuduk guugunyar godeya tolɛɛɗoŋk nɛ dokurɗe.

¹⁵Nɛɓa ambabɛɛ wargatɛyɛ higi Muuseek a Joop Pɛrkaakoŋk, nɛɓa ɔɗɔweer gode sinɛ tolɛɛɗoŋkuk wosɛyɗi son lak Paawuloosakik, nɛ kɛɛɗɛɛ tonɛɛ sɛɛga kɛ, "Iinak manyaakak eeta, ɔkɔn latukari pɛɛni sinɔ gaananɗiŋɔnkuŋ, intina tonɛɛ."

¹⁶Nɛɓa Paawuloos ŋaar raŋana, nɛ ijoopɛ joop gɛɛŋk ariit nɛ tonu kɛ, "Iinak joop Ayuuduk, a iinak joop sigɔ moko Ayuuduk sigɛ ɓurer Waakoyok baŋɛ, in tiyɛ.

¹⁷Waakoyo joop sigi Israeelik daamɓa ɔrɛyak gaŋkiŋ. Saaɓa atukuɗ ɗook Gibsik, ijaagɓa sɛɛg a joop sigɔ boobɛrŋɔŋk. Boŋkuɓa sɛɛg ɗook sinaanɛ ɓaŋkawukaat nɛɛkɛ sinɔɔnɛ obiiŋɔŋk.

¹⁸Nɛɓa lowu sɛɛg ɓakaawurɔɔn oolaanik emeyika sigɔɔga pɔlpɔlɛ joop pɛɛyk paaton tak.

¹⁹Nɛɓa aalɛ ɗook Kɛnɛaanik maŋgistiyɛ a tula pɛɛy, nɛ gaɓɛ ɗoo nɛɛk joopa gɛɛnaak.

²⁰Ɔɔtɛ sinɔɔnɛ emeyi ɗibɛɛ aŋan a pɔlpɔlɛ joop pɛɛyk a aarink. Saadi baŋiya gaɓɛɓa sɛɛga ɔɗɔweer mɛlɛɛɗa eta pɛrkaakoŋk Saamueela.

²¹Nɛɓa saadi joop kalɛyir Waakoyo kɛnɔ suume sɛɛga suumi, nɛɓa Waakoyot ari a suumɛɛ sɛɛga tɔɔn Kisinik Saaool, sinɛ komoy Biniyamuk emeyika sigɔɔga pɔlpɔlɛ joop pɛɛyk.

²²Nɛɓa ɔɔyɛ Saaool, nɛɓa suume sɛɛga Daawit. Nɛɓa Waakoyot waasiɗi agut Daawit nɛɓa tonu kɛ, "Laŋakɔ tɔɔn Iseyk Daawit sinɛ pora ɓayaayk, sinɛ ijaag any sinɛ ɗɛyakik baŋɛk."

²³Ɗɔkuɓa komoy iɗit sinik Yeesee sinɛ ebɔditan joop Israeelik okosinɛɓa kuumɗiiɗ Waakoyotuk.

²⁴A inɓa Yeese kiiki mɛlɛ, nɛɓa Yowanis rɔɔriy joop Israeelik baŋɛ kɛnɔ weeriik tikiyɛɛkɛ Waakoyota nɔ aadɛɛ sɛɛg.

²⁵Saaɓa Yowanis arkiɗ ruumeet ijaag nɛɛkik, nɛɓa tonu kɛ, "Gayikii kɔna a wooɗ? Moko eet Keresee, mayakana mɛlkikɔɔ iɗit om eete baŋi. Kaa saak oolɛ a woora melti saamɛyɛ gɛɛŋkikŋ."

²⁶Iinak manyaakak eeta komoy Abrahamuk a iinak joop sigɛ ɓureer Waakoyok joop sigɔ moko Ayuuduk, wosɛykɛɛɓa pɛɛni sini bɔdɛɗoŋk eteŋka.

²⁷Yakana joop sigɛɓa beeɗir Yorsaleemek a ɔɗɔweer gɛŋk kirɓa ɗegerɔɔn kɛ ege Yeesee ebɔdtan. Nɛɓa sɛɛga ki mɛlɛ wargatɛ Pɛrkaakoŋk sinɛɓa ambabɛɛ wawuykɛ Sambatɛyɛɛkoŋk Ayuuduk nɛɓa pɛrɛdɛrɗi kɛnɔ dusanɛɛ pɛɛni joop Pɛrkaakoŋkuk.

²⁸Kɛygunɓa kirkiɗ laŋiiɗ any sinɔ ɗegeera a rɛrgiɗɛɛŋɔŋkuŋ, yakanaɓa kalɛyir Pilatoos kɛnɔ ɓokotu sɛɛga.

²⁹Saaɓa dusanɛrɗi any sinɛɓa taapɛɛ agut sɛɛgik baŋɛk baŋiya, nɛɓa woorurku laalawutant nɛ kɔwarŋ.

³⁰Yakanaɓa Waakoyot boŋku sɛɛn ret walasa.

³¹Nɛɓa Yeese yaaŋɛ ɛɛk joopa sigaagaɓa sɛɛg a sɛɛnik a ɗoŋ ɓɔɔkaaŋ a tukiɗi Gɛlilaake nɔ mɛlɛɛɗa Yorsaleema. Nɛ sisɔ sɛɛg joop sigɔ yaaŋɛr sɛɛn joopak.

³²Eteŋk ɓɔrɛ waasii kɔna Pɛɛni sinɔ Ɓɛlkɛɛstank, any sinɛɓa kuumɗigeeɗ Waakoyot ɔrɛyakak gaŋkik.

³³Agut sinɔkan boŋkuɗ Yeesee ret walasak, dusanɛɛ eteŋka kaakɛyɛɛka gɛŋk, any sinɛɓa kuumɗigeeɗ Waakoyot sɛɛgak. Taapɛɛɓa Iiliyakɛ pɛɛyeene nɛɛkɛ kɛ, 'Iin tɔɔn naak, ɓartakɔnu ɓenyse.'

³⁴Maɓɔrɛ kɛnɔ yaaŋɛ sinɔ kɛ boŋkuɓa sɛɛn Waakoyot ret walasa kɛnɔ kat mojɛɗ, tonuɓa kɛ, 'Gaɓaakoy kɔna Pɛɛni kuumiyɛɛkoŋk sinɔ geetitank ɛ ŋaadɛɛŋɔŋk sinɛɓa gaɓɛɛ Daawitaak.'

³⁵Maɓɔrɛ tonu Iiliyakɛ ɔgɔɔkɛ kɛ, 'Kin seŋk ijaagɛ buusɛ Tɔɔn Nookuk sinɛ Geetitank kɛnɔ mojɛɗ.'

³⁶Saaɓa Daawit arkiɗ wɛɛŋakɛk, nɛɓa ruume koɓi sinɛɓa gaamgeeɗ Waakoyotukuŋ. Nɛɓa rɛr nɛɓa kɔɔwɛɛ a ɔrɛya gɛɛŋk agut omoŋ, nɛɓa mojɛ buusɛ nɛɛkɛŋ.

³⁷Yakana Yeesee sinɛɓa boŋku Waakoyot ret walasak kiɓa mojɛ buusɛ nɛɛkɛk.

³⁸Sisɔ iinak manyaakak eeta, in ɗegerɛɛ kɛ waasɛɛkɔ kɔna kɛ laŋɛɛ sooy lak Yeeseek tɔŋɔɗ tikiyɛɛkoŋk.

³⁹Iɗit sinɔ ŋaadiɗi sɛɛnek baŋɛ ŋaarki tikiyɛɛkɛ, sigɔɔgɛ ki oolɛ higi Muuseek a boŋu sɛɛnŋɔŋk.

⁴⁰In koorɛɛ ɛɛk kɛnɔkoy kat laŋirkɔɔ any sinɛɓa tonur joop pɛrkaakoŋk kɛ,

⁴¹'Iinak joop sigi anyaayikaanakik, in ŋaatɛɛ, in badɛɛ, araakɔɔ eme noŋk any sinɔkɔɔ kiir ŋaaditik, kɛygunkɔɔ kɔna tonɗi wooɗuk.' "

⁴²Nɛɓa Paawuloos a Barnabaas ŋaararki godeey sinaanɛ tolɛɛɗoŋk Ayuuduk, nɛɓa kalɛyir sɛɛg joop gɛɛnɛ kɛnɔkɔɔ tonur sɛɛga kɛkar Sambatɛɛ Ayuuduk sinaanɛkɔɔ mɛlkik.

⁴³Saaɓa kɛɛtiɗiiɗ joop sigɛɓa tolɗik baŋiya, nɛɓa joop Ayuuduk a ŋaadtaanak sigɔɓa guugunyar ŋaadiyɛɛka joop Ayuuduk a ɓɔɔkaaŋ nomɛrɗi Paawuloos a Barnabaas. Nɛɓa Paawuloos a Barnabaas waasɛr joopa gɛɛnaak nɛ kalɛyir sɛɛg jɛt kɛnɔ beeɗir a ɓaŋkaawurar wookan Waakoyotoŋk ɔɗɔɔka.

⁴⁴Sambatɛɛ pɛɛyeene nɛɛkɛ, tolɗiɓa joop a ɓɔɔkaaŋ katamɛ nɛɛkik a dakɛrki a tekerŋ kɛnɔ tiyɛr pɛɛni Waakoyotoŋk.

⁴⁵Saaɓa ɔɗɔweer joop Ayuuduk dɛnɛrɗi joop sigɔ ɓɔɔkaaŋɔŋkuk, nɛɓa ɛnyɛɛri nyeken, nɛɓa ɓooyur toni Paawuloosuk nɛ nyɔɔnarŋ.

⁴⁶Yakanaɓa Paawuloos a Barnabaas tonur sɛɛga a kir ɓuriit kɛ, "Ɗɛyɛ tɛɛnan jeemɛ a tonɛɛ pɛɛni Waakoyotoŋk iinaka. Ɔkɔn sɔɔk toniir ɗuma kɛ ki kɔna ɗɛyɛ wɛɛŋa sigɛkoy nɔkoy nɔkoykuŋ, nɛ seek weeri ɛɛk nɛ kɛɛɗii sinɔɔnɛ lak joop sigɛ moko Ayuuduk.

⁴⁷Agut sinɔ tonuɓa Suumii kɛ, 'Arakanni a pɛɗɛrka joopa sigaaga moko Ayuuduk, kɛnɔ bɔdɛr joop ɗookoŋk baŋɛ iine.' "

⁴⁸Saaɓa joop sigɛ moko Ayuuduk tiyɛrɗi sinik, nɛɓa yaa sɛɛgaŋ nɛ eemɛyar pɛɛni Waakoyotoŋk. Nɛɓa ŋaadiɗi joop sigɛɓa daamɛɛ sɛɛg wɛɛŋaka sigaagakoy nɔkoy nɔkoyk baŋɛ.

⁴⁹Bakaanyirɓa pɛɛni Suumiyoŋk ɗook sinaanɛ baŋɛ.

⁵⁰Yakana ɔɗɔweer joop Ayuuduk ɓeesɛrɓa joop sigɛ latu worik, a jartiyatɔk sigɔ ŋaadir Waakoyok, a joop katamɛ nɛɛkik sigɛ boobɛrk, nɛɓa arir kɛnɔ ŋaarki epaayan Paawuloose a Barnabaase raŋk, nɛɓa ɔɔyɛrki sɛɛg ɗook nɛŋk.

⁵¹Nɛɓa tɛntɛŋɛɛtar Paawuloos a Barnabaas duudur derakɛ gɛŋk nɛ ŋaarar Ikoniyooka.

⁵²Nɛɓa nomtaanak gɛɛnɛ enya yaaka a Wɛɛŋa sigɔ Geetitaanakik.