Read majang Ijaag Wosɛytaanakoŋk 16 Bible Online

Ijaag Wosɛytaanakoŋk 16 - majang bible

Ijaag Wosɛytaanakoŋk 16

¹Kɛɛɓa Paawuloos Dɛrbeya nɛɓa ɗoyiir Listiraka. Nɛɓa lakɛ Listirake ŋaadtan sinɔ riyɛ kɛ Timotiyoosuk. Egeɓa ɛmɛsa ŋaadtan sinɔ iɗit Ayuuduk, maɓa ɛpɛna iɗit Giriikik.

²Tonɛɛɓa Timotiyoos a mentanŋ sooy lak ŋaadtaanak sigɛ atu Listirakeek a Ikoniyooneek.

³Nɛɓa Paawuloos ɗɛyɛ a diile Timotiyoosuŋ, nɛɓa ari kɛnɔ yawɛ, agut sinɔɓa joop Ayuuduk sigɛ atu saadik ɗegerarɗi kɛ ege ɛpɛna Timotiyoosa iɗit Giriik.

⁴Saaɓa sɛɛk ɗoyurɗu sinɔɔnɛ katamɛyoŋkuk, nɛɓa yaaŋɛr ŋaadtaanaka higiyɛ sigɛkan tonur wosɛytaanak, a gutarɛyɛ sigɛ atu Yorsaleemek, ɛɓa tonur sɛɛga kɛnɔ ijaagir.

⁵Nɛɓa dooytaanak ɓaŋkaawurar ŋaadiyɛɛkɛ nɛɓa tutukiik ikomiit nɛŋk wawuykɛ.

⁶Agut sinɔɓa ɓaararɗi Wɛɛŋa sigɔ Geetitaanakik Paawuloos a Siilaas kɛnɔ kat waasɛr pɛɛni nɛɛk Isiyaakeek, nɛɓa ɗoyur sinɔɔnɛ ɗoo Pirgiyaak a Gɛlatiyaak.

⁷Saaɓa mɛlɛrɗi daariya Misiyaak nɛɓa ɗɛyɛrkɛ ɛnyɛ Bitaniyaak, yakanaɓa Wɛɛŋa Yeeseek kir sɛɛga pɛkɛdɛɛt kɛnɔ kaar saana.

⁸Nɛɓa ɗoyur sinɔɔnɛ ɗoo Misiyaak nɛ ɓurɓuɗi katamɛya Tiroadaak.

⁹Nɛɓa saadi kaalt yaaŋɗikɛɛ Paawuloosa a dɛnɛ iɗit om Mɛkedooniyaak a kalɛyi sɛɛn kɛ, "Waɗire Mɛkedooniyaa nɔ tin kɔnyun."

¹⁰Saaɓa yaaŋɛɛɗɛ Paawuloosa any sinik baŋiya, nɛɓa sisa kopaayii Mɛkedooniyaaka agut sinɔ ɗegerɗii kɛ riykɔ tin Waakoyot kɛnɔ kɛɛɗii waasii Pɛɛni sinɔ Ɓɛlkɛɛstank joopa Mɛkedooniyaak.

¹¹Nɛɓa teeŋii emɗa Tiroadaake nɛ ŋaarii taamɛtakan Samotrakeyaa, nɛɓa alɛ nɛɛkɛ kɛɛɗii Napuleya.

¹²Nɛɓa ŋaarii saadi nɛ mɛlii Pilipisiyoosa, katamɛya sinaana obi Mɛkedooniyaakeek, ɛ ɗoo sinɔ ikomur joop Roomuk. Nɛɓa beebeɗii katamɛɛ sinaanɛ ɓɛɛnyɔwɛɛkɛ ɔgɔɔkɛ.

¹³Waawuy Sambatɛyoŋk Ayuuduk wariiɓa nyon ɗanɗamɔɔnoŋk, nɛɓa ŋaarkii katamɛɛ nɛɛkɛ walasa nɛ ɓurɓuɗikii gɔrɔwa omalta kɛntɛya. Nɛ dokiiɗe saadi nɛ tukii toni jartiyatɔka sigaagaɓa tolɗik.

¹⁴Lakɛɓa jartiyatɔkɛ sigaagɛɓa geleewɛrk kɔɔr sinɔ riyɛ kɛ Lidiyaak sinɔɓa kus katamɛɛ Tiyatiroonuk, nɛɓa sɛŋk ɓaɓaliiɗ abiyak sigɔ dɛɛtaŋɔŋk. Lidiya jarti sinɔɓa ugume Waakoyotak, nɛɓa ɓuuke Waakoyot ɓayɛ nɛɛk, nɛɓa tiyɛ any sinɛ tonu Paawuloosuk nɛ mɛlgeeɗiŋ.

¹⁵Nɛɓa aadɛɛ sɛɛn a joop sigɛ atu nyaki nɛɛkɛkik, nɛɓa kalɛyi tin kɛ, "Ɔkɔn ɗegerari kɛ ŋaada Suumi eekeerɛŋ, nɛ in kusɛɛ nyaka naaka nɔ dokɛɛɗe." Nɛɓa tin moyu kɛnɔ kɛɛɗii nyaka nɛɛkak.

¹⁶Saaɓa kɛɛɗii ɓeny omalte nyona ɗanɗamɔɔnoŋkuk, nɛɓa laŋkii peet om sinɔ laaŋoyenk sinɔɓa lak wɛɛŋa sigɔ somkaanakik sinɔ waasɛ pɛrka ŋɛyikentik. Peet sini laŋlaŋɓa wori a obiiŋ ɗumaaga.

¹⁷Nɛɓa sɛŋk nomɛ Paawuloose a eteŋkɛ a oo'oy kɛ, "Ege joop sigi ijaageer Waakoyo sinɛ Obiik. Waasɛr kɔna gopan bɔdɛɗoŋk."

¹⁸Nɛɓa toton any sini a ɗoŋ ɓɔɔkaaŋ. Nɛɓa Paawuloos ŋadi nɛ kolɛnygeeɗiŋ, nɛ tonu wɛɛŋaka sigaaga somkaanakik kɛ, "Tona kɔna kɛ in ŋaarkɛɛ ete sineene tiriyaakɛ Yeese Kereseek!" Nɛɓa wɛɛŋa sigɛ somkaanakik ŋaarark sɛɛne sisa.

¹⁹Nɛɓa ɗuma gɛɛnɛ dɛnɛr a yawuɗi sɛɛge any sinɔ laŋirɗi worik, nɛɓa gaamur Paawuloos a Siilaas nɛɓa diiler sɛɛg soona bakaanyŋɔŋk, nɛ wideetar sɛɛg taamɛka ɔɗɔweeroŋk.

²⁰Nɛɓa diiler sɛɛg taamɛka ɔɗɔweer Roomuk nɛɓa tonur kɛ, "Ege sigi joop Ayuuduk sigi boŋurku ooyan katamɛɛ naŋkik.

²¹Rɔɔriyaaɗ any sinɔ kii boŋiiɗ eteŋk joop Roomuk, maŋk ki tina ɗɛyɛɛ a ijaagiiŋɔŋk."

²²Nɛɓa joop gɛɛnɛ lotɛr ɛɛk nɛ ŋaarar sɛɛga raŋana kaarin. Nɛɓa ɔɗɔweer tonur koortaanaka gɛɛna kɛnɔ Paawuloos a Siilaas boŋurku sɛɛge abiyak ɗooka nɔ boobolar sɛɛg gumboyikɛ.

²³Nɛɓa boobolar sɛɛg jɛt nɛɓa gaɓɛr sɛɛg godeya korkoɗɔɔnoŋk. Nɛɓa tonur ɔɗɔweer koortaana sinaana gode korkoɗɔɔnoŋkuk kɛnɔ koorɛ sɛɛg kɛ ɗɔm.

²⁴Saaɓa koortan nɛɛkɛ boŋiiɗ toni sinik baŋiya, nɛɓa gaɓɛɛr sɛɛg soona ar takik godeey sinaanɛ korkoɗɔɔnoŋk, nɛɓa korkor derak gɛŋk kɛɛnɛ kɔɔr.

²⁵Nɛɓa Paawuloos a Siilaas pɔɔsɛr Waakoyo ɗanɗamɔɔn a iiliyakɛ kaalt kɔɔr. Nɛɓa geleewɛr sɛɛga korkortaanak sigɛ ɔgɔɔkuŋ.

²⁶Nɛɓa a gorgorŋ lakɛ yike ɗookoŋk sinɔ obiiŋɔŋk, a yikiɗi nyon sinɛɓa kɛnyɗɛɛ gode sinɛ korkoɗɔɔnoŋk, nɛɓa sisa tayɗi tugaateer sigɛ gode korkoɗɔɔnoŋkuk nɛɓa woori ola sigɛɓa korkorɗɛɛ sɛɛgik baŋɛ.

²⁷Nɛɓa koortan nɛɛkɛ ɓeɗiki ɗoŋɛ gɛɛnɛk, nɛ dɛnɛ tugaateer sigɛ gode korkoɗɔɔnoŋkuk a taytaanak. Nɛɓa koɓu kɛ badɛrkɔɔ korkortaanak, nɛɓa koyowuku aarɛ nɛɛk nɛ ɗɛyɛ ɓokotiita ɛɛk nɛɛk.

²⁸Yakanaɓa Paawuloos ooyɛ a ɗooruŋ kɛ, "Kat arin ɛɛk nook a meeŋ. Bɛɛlii seedi eteŋk baŋɛ."

²⁹Nɛɓa koortan nɛɛkɛ kalɛyiir any sinɔ ɗaawuŋɔŋk nɛ reeriir nɛ guugunyur takana. Nɛ piiɗe a ruuɗe ɛɛk taamɛkɛ Paawuloos a Siilaasik.

³⁰Nɛɓa boŋku sɛɛg walasa nɛ kɔɔniy sɛɛg kɛ, "Iinak suumiyɛ gaaŋk, ɗɛyɛta a ara jikon nɔkoy bɔdɛɛɗaak?"

³¹Nɛɓa sɛɛk tonurgeeɗ kɛ, "Ŋaadi Suumi Yeesee, bɔdunkoyŋ maɓɔrɛ joop wɛy nookuk bɔdɛrkoyŋ."

³²Tonurɓa Pɛɛni Suumiyoŋk sɛɛna a joopa sigaaga atu woy nɛɛkɛkik baŋɛ.

³³Nɛɓa kaalt sayitii sinaanɛ koortan sinɛ gode korkoɗɔɔnoŋkuk boŋku sɛɛg nɛ jawu doosoyɛ gɛŋk, nɛɓa sisa aadɛɛ sɛɛn a joop wɛy nɛɛkik baŋɛ.

³⁴Saadi baŋiya diileɓa Paawuloos a Siilaas nyaka nɛɛka nɛ kɛɛ gije sɛɛg ɗama. Nɛɓa yaa sɛɛga a joop wɛy nɛɛkik baŋɛ, agut sinɔ ŋaadirɗi Waakoyok.

³⁵Nɛɓa aayirki nɛ ɔɗɔwer Roomuk wosɛyɛrki amaasiniyɛ kɛ, "In kɛɛɗɛɛ woorirɛɛ joop sigɛ."

³⁶Nɛɓa koortan nɛɛkɛ tonu Paawuloosa kɛ, "Wosɛyɛɛrkikɔ ɔɗɔwer iɗit kɛnɔ kɔnu woorirɛɛ, nɛ sisɔ in ŋaarɛɛ digoya."

³⁷Yakanaɓa Paawuloos tonu amaasiniyɛɛka kɛ, "Eteŋk joop Roomuk nɛkɔ tin ɗiŋer ɔɗɔwer teete sinɔɔnɛ bakaanyŋɔŋk tak a kɛɛ pirdi nɛ tin gaɓɛr godeya korkoɗɔɔnoŋk. Nɛɓɔ tin sisɔ arir a ŋaaririi dugeeɗ? Ki gayɛ. In kurak sɛɛg ɔɗɔwa nɛŋk nɔ tin kurak wooritar.

³⁸Nɛɓa amaasiniyɛ gɛɛnɛ kaar tonur any sini ɔɗɔweera gɛɛnaak. Saaɓa ɔɗɔwer gɛɛnɛ ɗegerarɗi kɛ ege Paawuloos a Siilaas joop Roomuk, nɛɓa ɓuriiŋ.

³⁹Nɛɓa kurak nɛ kalɛyir sɛɛg kɛnɔ sɛɛge ŋɔɗiitar. Nɛ wooritar sɛɛg godeey sinaanɛ korkoɗɔɔnoŋk nɛ kalɛyir sɛɛg kɛnɔ ŋaarar katamɛɛ nɛɛkɛk.

⁴⁰Nɛɓa Paawuloos a Siilaas ŋaararki godeey sinaanɛ korkoɗɔɔnoŋk nɛ kaar waa Lidiyaak. Nɛɓa saadi laŋirki manyaakak nɛ gaananɛr sɛɛgiŋ, nɛ ŋaarar katamɛɛ nɛɛkɛŋ.