Read majang Ijaag Wosɛytaanakoŋk 17 Bible Online

Ijaag Wosɛytaanakoŋk 17 - majang bible

Ijaag Wosɛytaanakoŋk 17

¹Nɛɓa Paawuloos a Siilaas ɗoyur sinɔɔnɛ katamɛɛ Anpipolis a Apoloniyaak nɛ kaar Tɛsɛlonkeya. Nɛɓa saadi lakɛ gode tolɛɛɗoŋk joop Ayuuduk.

²Nɛɓa Paawuloos guuguny godeya tolɛɛɗoŋk oko sinɛɓa barɛɛɗik, nɛɓa totoni joopa gɛɛnaak a Sambatɛyɛ Ayuuduk jiit a yaayaŋki Wargatɛɛ Waakoyotoŋk.

³Waasɛɓa a yaaŋɛ kɛ laŋkikɔ Keresee rakatɛ ɛkɔ ŋaarki ret walasa, tonuɓa kɛ, "Any sini kɔnu rɔɔriyɗaak sinɔ kɛ ege Yeese Kereseek."

⁴Mɛlɛɓa pɛɛni nɛɛkɛ joopa Ayuuduk a omoŋ omoŋ, a joopa Giriikik sigɔɔga ŋaadir Waakoyok a ɓɔɔkaaŋ, a jartiyatɔka sigɔɔga ɗegerɛɛ sɛɛg katamɛɛ nɛɛkɛkik a ɓɔɔkaaŋ, nɛɓa lotɛr ɛɛk a Paawuloos a Siilaas.

⁵Arirɓa joop Ayuuduk nyeken, nɛɓa tolɛrki joop sigɔ ŋɛɛwɛŋɔŋk sinɔɔnɛ gopan takank, nɛ kurak ɓeesɛr joop sigɛ ɓɔɔkaak, nɛ arir kɛnɔ ŋaarki ɗaakan katamɛɛ nɛɛkɛ. Nɛɓa duulerki waa Iyasoonuk kɛnɔ boŋurku Paawuloos a Siilaas nɔ gaɓɛr sɛɛg joopa sigaaga ɓɔɔkaak.

⁶Yakana saaɓa sanɛrɗ sɛɛgik, nɛɓa puruuterki Iyasoon a ŋaadtaanak ɔgɔ, nɛ diiler sɛɛg kɛnɔ kaar wideetar sɛɛg ɔɗɔweera sigaaga katamɛ nɛɛkik nɛɓa ooyɛr kɛ, "Joop sigi sɔɔkɛr ɗoo baŋɛk, kurakkɔ sisɔ seena,

⁷nɛkɔ Iyason boŋu sɛɛg nyaka nɛɛkaak. Ege sigi baŋɛ joop sigɔ sɔɔkɛr higi Keesaarik, a tonur kɛ lakɛnɔ suumi om sinɔnɔ riyɛ kɛ Yeeseek."

⁸Joop gɛɛŋk, a ɔɗɔweer saaɓa tiyɛrɗi any sinik nɛɓa ŋaatirŋ.

⁹Nɛɓa arir ɔɗɔwer gɛɛnɛ Iyasoon a ŋaadtaanak ɔgɔ a riyar waasi nɛɓa ŋɔɗurɛɛ sɛɛgiŋ.

¹⁰Wosɛyɛrɓa ŋaadtaana Paawuloos a Siilaas Beeriyaaka kaalt sinaanɛ a gorgorŋ. Saaɓa mɛlɛrɗi saanak, nɛɓa guugunyar godeya tolɛɛɗoŋk Ayuuduk.

¹¹Joop Ayuuduk sigɛ atu Beeriyaakek boŋurɓa pɛɛni nɛɛk yaakaat sinɔɔnɛ obiiŋɔŋk, agut sinɔɓa tayaaɗ kalbiyɛ gɛŋk a kaalɛr sigɛ atu Tɛsɛlonkeek, nɛɓa mermenar Wargatɛ Waakoyotoŋk ɓɛɛnyɔwɛ gɛɛŋk baŋɛ kɛnɔ ɗegerar eekeer pɛɛni sinɛɓa tonu Paawuloosuk.

¹²Nɛɓa ŋaadiɗi sɛɛge joop a ɓɔɔkaaŋ, ɛɓa ŋaadiɗi jartiyatɔk Giriikik sigɔ ɗegerɛɛ sɛɛgŋɔŋk, a moojak Giriikik a ɓɔɔkaaŋ.

¹³Nɛɓa joop Ayuuduk sigɛ atu Tɛsɛlonkeek ɗegerar kɛ waasɛ Paawuloos Pɛɛni Waakoyotoŋk Beeriyaake, nɛɓa kurak sisa nɛ ɓeesɛr joop gɛɛŋk nɛ boŋurku ɗaakan.

¹⁴Nɛɓa sisa wosɛyɛr ŋaadtaana Paawuloos kɛnɔ kɛɛ gɔrɔwa sinɔɔna obiiŋɔŋk kɛntɛya, maɓa Siilaas a Timotiyoos dakɛrki Beeriyaake.

¹⁵Ɗiiɗerɓa Paawuloos joop sigɛɓa diiler sɛɛnik mɛlɛɛɗa Ateenaaka nɛɓa ɗɔkarki sekiyɛ Paawuloosuk kɛ, "In kurak Siilaas a Timotiyoos a gorgorŋ son lak eetik", nɛɓa weeriki Beeriyaaka.

¹⁶Saaɓa Paawuloos arkiɗ Ateenaake a kookor Siilaas a Timotiyoosuk, nɛɓa dɛnɛ a enya katamɛɛ nɛɛkɛ saloyɛ nɛɓa ŋadi ɓayɛ nɛɛkɛ jɛt.

¹⁷Totoniɓa godeey tolɛɛɗoŋk a joop Ayuuduk a joop sigɔ moko Ayuuduk sigɔ ŋaadir Waakoyok, ɛɓa totoni a joop sigɛ laŋi sɛɛg soogiyakɛ bakaanyjuŋɔŋk ɓɛɛnyɔwɛ gɛɛŋk baŋɛk.

¹⁸Nɛɓa kurak joop sigɔ ɗegerar ɛɛkik sigɔ riyɛ sɛɛg kɛ Epikorosos a Istoykosuk son lak sɛɛnik nɛ palamɗiiŋ, tonurɓa a omoŋ omoŋ kɛ, "Iɗit sini wokɛ oko sinikik ɗɛyɛ a ɓɛɛlɛ ɛk?" Ma ɔgɔɔk tonur kɛ, "Gayi a yaaŋɛ jookak sigɔ tɔɔmɔkuk." Tonurɓa oko sinik agut sinɔɓa Paawuloos rɔɔriyaaɗ Pɛɛni sinɔ Ɓɛlkɛɛstank Yeeseek, a ŋaarin nɛɛk ret walasak.

¹⁹Nɛɓa diiler Paawuloos tolɛɛɗa sinɔɔna ar soodi riyɛ kɛ Ariyospagosuk nɛ tonurgeeɗ kɛ, "Oolii a ɗegerii rɔɔriyɔn sini tɔɔnuk sini rɔɔriyaaɗink kɛ jikon?

²⁰Tonunkɔ tina ola sigɔ tɔɔmɔkuk a omoŋ omoŋ nɛ ɗɛyii a ɗegerii ola sigi kɛ jikonakiŋ."

²¹Ɗɛyɛrɓa joop Ateenaak a joop sigɔɓa kurak ɗook omalteek sigɛ beeɗir Ateenaake a kaalɛr wawuyk gɛŋk a totonar a tiitiyar ola sigɔ tɔɔmɔkuk dakɛɗa.

²²Nɛɓa ɛtɛ Paawuloos tolɛɛɗ sinɔɔnɛ ar Ariyospagosek joope gɛɛnɛ taamɛkɛ nɛ tonu kɛ, "Iinak joop Ateenaak mɛlɛkɔta kɛ ɓaŋkaawakari ŋaadiyɛɛkɛ gɔɔ baŋɛ.

²³Agut sinɔ ŋawiitakɔ sinɔɔnɛ katamɛ noŋkuk nɛ saakɔ mermenɗa nyon noŋk ugumeetoŋk nɛkɔ laŋka nyon uduŋeetoŋk sinɔkan taapɛɛɗɛɛ kɛ Waakoyota sinɔɔna Kɛɛ Ɗegerɔɔnuk. Tonɗika kɔna sisɔ agut sɛɛn sinɛ ŋaadiir ma kiir ɗegerɔɔnuk.

²⁴"Sɛɛn Waakoyo sinɛɓa riiɓe ɗook a ola sigɛ ɓɛɛlɛr ɗook nɛɛkɛ baŋɛk. Sɛɛn Suumi dari a ɗook. Ki sɛŋk beeɗit goroyɛɛkɛ sigɔɔgɛkan ijaagɛɛ ariit etoŋkuk.

²⁵Kɛɛ any sinɔ sɛɛne bitakik ɛ kiigeeɗ ɗɛyɛɛ tɔkɔny etoŋk agut sinɔ gaɓii wɛɛŋa, a wɛɛŋan, a ola ɔgɔ joopa baŋɛ sɛɛn.

²⁶Nɛɓa Sɛŋk riiɓe komoy joopoŋk baŋɛ ete sinɔɔnɛ omoŋɔŋk. Nɛɓa ari kɛnɔ beeɗir ɗook raŋk baŋɛ, gaɓɛɓa sɛɛga emeyik sigɛɓa sɛɛga gaamuk, a nyonitaak sigɔ beeɗirɗiŋɔŋk.

²⁷Nɔɓa Waakoyot ijaagiiɗ oko sinikik kɛnɔ joop ɗɛyɛr sɛɛn, ɛ kɛnɔ ɗɛyɛr a ɗaaɗapɛr a mermenarŋ kɛnɔ laŋir. Yakana Sɛŋk ki yowɛrka eteŋkɛ a omoŋ omoŋ,

²⁸oko sinɛɓa toniiɗ iɗit omaay kɛ, 'Laŋii wɛɛŋa ɛ ɓeesii ɛɛk, ɛ beeɗi sɛɛne, ɛ oko sinɛɓa ɓɔrɛ tonurɗu joop goŋk sigɛ ŋaraatɗik kɛ, 'Eteŋk tɔɔmɔk gɛɛŋk a omoŋ omoŋ.'

²⁹"Agut sinɔ eteŋk tɔɔmɔk gɛɛŋkik, ki tina ɗɛyɛɛ a koɓii kɛ gayi Waakoyot a tagaytan sinɔɓa ijaagɛɛ worke, a biri, maŋk giɗee, ɗegerɔɔn a koɓiɗ etoŋkuk.

³⁰Sisɔ ola sigɛɓa ijaagir joop a kir ɗegerɔɔnuk ŋɔɗurɓa sɛɛk Waakoyot a sɛɛga ki nayɛ, yakana sisɔ tonukɔ kɛnɔ joop sigɛ atu ɗokanɛkɛk, weerik tikiyɛɛkɛ son lak Sɛɛnik.

³¹Gaamuɓa ɓɛɛnyɔ sinɛkoy pɛrɛdɛɛɗ eekeerɛk ɗook raŋk baŋɛk, Ete sinaanɛkan daam sɛŋkik. Isiiseɓa sini aɓa boŋku Iɗit sinɛɓa daamk ret walasa."

³²Saaɓa tiyɛrɗi pɛɛni sinɛ kɛ, "Ŋaarin ret walsak," nɛɓa a omoŋ omoŋ daraayɛrŋ, maɓa ɔgɔɔk tonur kɛ, "Tiyiikɔɔ ɓeny omalte saa tina tonɗiiɗin agut any sinik."

³³Saadi baŋiya ŋaarkiɓa Paawuloos tolɛɛɗ nɛɛkɛ nɛ ŋaarŋ.

³⁴Nɛɓa joop a omoŋ omoŋ lotɛr ɛɛk a sɛɛn nɛ ŋaadiɗiiŋ. Joope gɛɛnɛ egeɓa omaay iɗit sinɔ riyɛ kɛ Diyonisiyosuk, sinɔ ar tolɛɛɗ sinaanɛ Ariyospagosuk, a jarti om sinɔ riyɛ kɛ Dɛmarisik, a joop ɔgɔ.