Read majang Ijaag Wosɛytaanakoŋk 18 Bible Online

Ijaag Wosɛytaanakoŋk 18 - majang bible

Ijaag Wosɛytaanakoŋk 18

¹Saadi baŋiya ŋaarɓa Paawuloos Ateenaake nɛ kɛɛ Korontoosa.

²Nɛɓa saadi laŋki iɗit Ayuuduk sinɔ riyɛ kɛ Akiilaak sinɔɓa ɓartɛɛ Pantooseek. Akiila a jarti nɛɛk Piriskila inɓa aasi mɛlataakɛ Itaaliyaake Korontoosa, agut sinɔɓa suumi Roomuk Kɛlawudewoos, toniiɗ kɛnɔ ŋaarar joop Ayuuduk baŋɛ Roomeek. Nɛɓa kɛɛ Paawuloos son lak sɛɛgik kɛnɔ kaar ɗegegeri a sɛɛg.

³Agut sinɔɓa ijaag nɛɛkɛ ɓeenan duukaanoyɛɛkoŋk oko sɛɛgik, nɛɓa beeɗir a sɛɛg nɛ ijaagɗi agut omoŋ.

⁴Sambatɛyɛɛkɛ Ayuuduk lalaŋɛɛɓa sɛɛn godeey tolɛɛɗoŋk nɛ waasiɗi nɛ kɔnyɛɛɗ joop Ayuuduk a Giriikik.

⁵Saaɓa mɛlɛrkiɗ Siilaas a Timotiyoos Mɛkedooniyaakeek, nɛɓa Paawuloos kaalɛ ɔɔtɛ nɛɛk a waawas a rɔɔriy joop Ayuuduk kɛ, "Ege Yeese Keresee."

⁶Saaɓa ɓooyurɗu ɛ nyɔɔnarɗi joop Ayuuduk, nɛɓa tɛntɛŋɛɛr Paawuloos duudur sinɛ lak abiyek nɛ tonu sɛɛga kɛ, "Ɔkɔnkɔɔ kɔnu goopɛɛŋ agut tikiyɛ goŋk, kɛɛ eete ɔɗɔwikeen. Kɛɛɗa a tukiɗi sisɔ son lak joop sigɛ moko Ayuuduk."

⁷Nɛɓa pakati sɛɛge ɛɛk nɛ ŋaar waa iɗit sinɔ moko Ayuuduk sinɔ riyɛ kɛ Tiitoos Iyoostoosuk. Ŋaadiɓa iɗit sini Waakoyo, arɓa wɛy nɛɛkɛ godeey tolɛɛɗoŋk Ayuuduk jɔk.

⁸Ɔɗɔwen gode tolɛɛɗoŋkuk sinɔ riyɛ kɛ Kɛripoosuk ŋaadirɓa Suumi sɛɛn a joop wɛy nɛɛkik baŋɛ. Joop Korontoosuk a ɓɔɔkaaŋ tiyɛrɓa pɛɛni nɛɛk nɛɓa ŋaadiɗi nɛ aadɛɛ sɛɛgiŋ.

⁹Kaalt omalte tonɗiɓa Suumii Paawuloosa yaaŋiyɛɛkɛ kɛ, "Kat ɓuriikin, tona, Kat dakin kɛ many.

¹⁰Agut sinɔ Eet a iin agut omoŋ, laka joop katamɛɛ sineene a ɓɔɔkaaŋ, kɛɛ iɗit sinɔkɔɔ arini a meeŋɔŋk."

¹¹Nɛɓa Paawuloos beeɗ saadi a eme omoŋ a ɛyɛkeer tula om, a rɔɔriy joop Pɛɛnii Waakoyotoŋk.

¹²Saaɓa Gaaliyoos sɛɛn ɔɗɔwen ɗoo Akayaak, nɛɓa lotɛr ɛɛk joop Ayuuduk nɛ ŋaarar raŋana Paawuloose raŋk nɛ diiler soona gaɓɛɛɗɛ woorank,

¹³nɛ kaar tonur kɛ, "Ari iɗit sini joop a ugumer Waakoyota gopɛ sinɔɔnɛ ki pɛgɛdɛɛt higiik."

¹⁴Saaɓa Paawuloos arkiɗ ragad ɛɛkoŋk kɛnɔ tonɗiik, nɛɓa Gaaliyoos tonu joopa Ayuuduk kɛ, "Iinak joop Ayuuduk, ɔkɔnkɔ kɔnu tikɛɛŋ maŋk kɔne arɛɛ rakatɛ sinɔ ɓaŋkawuŋɔŋk, nɛgun tiya daari noŋkuŋ.

¹⁵Yakana agut sinɔ palamɗiiɗɔ agut pɛɛni, a tiriya agut higi noŋkuk, nɛ ege sini giroy noŋk. Kaa saak ɗɛyɛɛ a pɛrɛda ant sineeneŋ."

¹⁶Tonuɓa oko sinɛk nɛ ŋɔrku sɛɛg saadi gaɓɛɛɗɛ woorankiŋ.

¹⁷Saaɓak gaamurɓa joop gɛɛnɛ baŋɛ ɔɗɔwen sinɛ gode tolɛɛɗoŋkuk Ayuuduk sinɛ riyɛ kɛ Sostens nɛ ɗiŋer ete sinaanɛ gaɓɛ woorank taamɛkɛ. Yakanaɓa Gaaliyoos ki nayɛɛ agut any sini.

¹⁸Seedi baŋiya beeɗirɓa Paawuloos a ŋaadtaanak a ɗoŋ ɓɔɔkaaŋ Korontoose, nɛɓa ŋaar ɗooka Sooriyaak emɗ. Piriskila a Akiila sɛɛgɓa a sɛɛn. Nɛɓa tuulɛ ɔɗɔ nɛɛk soodi riyɛ kɛ Kinkiriyaak agut sinɔɓa lakiɗ warejɛɛtik a inɓa ki ŋaarin.

¹⁹Nɛɓa mɛlɛr Epesoona, nɛɓa ŋɔr Piriskila a Akiila saadi, maɓa sɛŋk guuguny godeya tolɛɛɗoŋk nɛ tonɗi joopa Ayuuduk.

²⁰Kalɛyirkɛɓa kɛnɔ gun beeɗ kɛ many a sɛɛg agut omoŋ, nɛɓa ki sɛɛga doomɛt.

²¹Yakanaɓa sɛɛga tonu kɛ, "Ɔkɔn oko ɗɛyan Waakoyotoŋkuŋ weerikaakɔɔ ɓeny omalte." Nɛɓa teeŋɛ emɗa Epesoone nɛ ŋaarŋ.

²²Saaɓa mɛlɛɛɗ Keesaariyaakak, nɛɓa saadi kɛɛ Yorsaleema, nɛɓa gaɓɛ digoy joopa gode Sambatɛyoŋkuk, nɛ weerik Ansokiyaaka.

²³Nɛɓa beeɗ saadi a balaaŋ, nɛɓa weeweri nyonitaaka ɗokanɛɛkɛ Gɛlatiya a Pirgiyaak nɛ ari ŋaadtaanak baŋɛ a ɓaŋkaawurarŋ.

²⁴Kusɓa iɗit om Ayuuduk Epesoona sinɔ riyɛ kɛ Apiloosuk sinɔɓa ɓartɛɛ Iskindiriyaakeek. Iɗit sini lakɓa oolan waasiyɛ any sinɔ mentanŋɔŋk ɛɓa tamaarɛ Wargatɛ Waakoyotoŋk kɛ ɗɔm.

²⁵Tamaarɛɓa gopan Suumiyoŋk ɛɓa enyɛɛri ɓaŋkawukaat Wɛɛŋakoŋk jɛt, nɛɓa waasiɗi a rɔɔriya agut Yeesee kɛ ɗɔm, yakanaɓa sɛŋk ɗeger aadi Yowanisik dakɛɗa.

²⁶Tukeɓa sɛŋk waasiyɛ godeey tolɛɛɗoŋk a ki ɓuriit. Yakana saaɓa tiyɛrɗi Piriskila, a Akiilaak, nɛɓa diiler nyaka nɛŋk nɛ kaar yaaŋɛrgeeɗ gopan Waakoyotoŋk kɛ ɗɔm a kaalɛ sinɛkɔ jeemɛk.

²⁷Nɛɓa Apiloos ɗɛyɛ ɛnyɛ Akayaakak nɛɓa ŋaadtaana moyur sɛɛniŋ, nɛɓa taapɛrgeeɗ wargatɛ kɛnɔ sɛɛn kaar boŋur ŋaadtaana sigɛ atu Akayaakek a mentanŋ. Nɛɓa mɛlɛ saana lak joop sigɛɓa laŋir wookan Waakoyotoŋkuk nɛ ŋaadiɗiiŋɔŋk nɛɓa kɔnyɛ sɛɛg jɛt.

²⁸Nɛɓa lɔsɛ joop Ayuuduk palamɛɛ sinɔɔnɛ ɓaŋkawuŋɔŋk, a kɔnyɗiiɗ pɛɛni Wargatɛ Waakoyotoŋk sinɔ kɛ ege Yeese Kereseek.