Read majang Ijaag Wosɛytaanakoŋk 19 Bible Online

Ijaag Wosɛytaanakoŋk 19 - majang bible

Ijaag Wosɛytaanakoŋk 19

¹Saaɓa Apiloos arkiɗ Korontooseek, nɛɓa Paawuloos ɗoyu sinɔɔnɛ ɗoo sinɛ ar edeenik nɛ mɛlɛ Epesoona. Nɛɓa saadi laŋi nomtaanak a tekerŋ.

²Nɛɓa kɔɔniy sɛɛg kɛ, "Saakan dooyɛrɗɔk, nɛkan boŋiir Wɛɛŋa sigɔ Geetitaanakiŋ?" Nɛɓa sɛɛk jumurargeeɗ kɛ, "Kiikan. In aasi kii weenta kɛ lakɛnɔ Wɛɛŋa sigɔ Geetitaanakikiŋ."

³Nɛɓa Paawuloos tonu sɛɛga kɛ, "Anɛkan kɔnu aadiiɗɛ aadi kɛ jikon?" Nɛɓa sɛɛk tonurgeeɗ kɛ, "Aadi Yowanisik."

⁴Nɛɓa Paawuloos tonu sɛɛga kɛ, "Aadi Yowanisik joopa sigɔɔgaɓa weerik tikiyɛɛkɛ Waakoyotak, maɓa sɛŋk tonu joopa kɛ, 'In ŋaadɛɛ iɗit sinɛkɔɔ mɛlki eete baŋik. Sɛɛn Yeesee.' "

⁵Saaɓa tiyɛrɗi sinik, nɛɓa aadɛɛ sɛɛk tiriyaakɛ Suumi Yeeseek.

⁶Nɛ saaɓa Paawuloos riiɓeeɗ sɛɛge ari raŋk, nɛɓa worworiik sɛɛga Wɛɛŋa sigɔ Geetitaanakik raŋana, nɛ tonɗi atutunɛ sigɔɔgɛ tɔɔmɔkuk nɛ tuker toni pɛrkaakoŋk.

⁷Atuɓa ɓɔɔkaaka joop gɛɛŋkik sigɔɔgɛ aarin a pɛɛyk.

⁸Kɛɛɓa Paawuloos godeya tolɛɛɗoŋk Ayuuduk nɛɓa waasiɗi a palamɗi a ɛyɛkeer jiit a ki ɓuriit, aɓa yaayaŋ joopa agut burɛ Waakoyotoŋk kɛnɔ ŋaadiɗi.

⁹Yakana egeɓa sɛɛge a omoŋ omoŋ diirkaanak ɛ kir ŋaadiɗiit, nɛɓa nyɔɔnar gopan Suumiyoŋk joope taamɛkɛ. Nɛɓa Paawuloos wide sɛɛge ɛɛk nɛ diile nomtaanak mowan godeya rɔɔriyɔɔnoŋk Tiranosuk, nɛ waawasi sɛɛga wawuykɛ.

¹⁰Ijaagɓa Paawuloos any sini emeyikɛ sigɔɔgɛ pɛɛyk. Agut sini oolɛrɓa a geleewɛr Pɛɛniya Suumiyoŋk joop Ayuuduk a joop sigɔ moko Ayuuduk sigɛ beeɗir Isiyaakeek baŋɛ.

¹¹Ijaagɓa Waakoyot sɔɔriyɛ sigɔ reemɗi ɓayɛ jɛtik ariit Paawuloosuk.

¹²Didilarɓa abii sinɔkɔ ɓeesɛ ɛɛk Paawuloosuk, a abii sinɛɓa pooposɗu tɔkiyank nɛ ɓeesɛrɗi gortaanak, nɛɓa bɔdɛrki goriɗakɛ gɛŋkiŋ ɛɓa ŋaaŋararki sɛɛge wɛɛŋa sigɔ somkaanakik.

¹³Ɛɓa ɓɔrɛ lakɛ joop Ayuuduk a omoŋ omoŋ sigɔ ŋawiiter nyonitaakak kɛnɔ ɔɔyɛrki wɛɛŋa sigɔ somkaanakik joope tiriyaakɛ Yeeseek. Nɛɓa paarir any sini a tonur sɛɛga kɛ, "Tonii kɔna kɛ in ŋaarkɛɛ tiriyaakɛ Yeesee sinɛkɔ rɔɔriyaaɗ Paawuloosuk."

¹⁴Ijaagirɓa tɔɔmɔk ɔɗɔweerɛ tapa ŋaadiyɛɛkoŋk Ayuuduk omk Askewaak sigɔ tula pɛɛy oko sinɛk.

¹⁵Yakanaɓa wɛɛŋa sigɛ somkaanakik tonur sɛɛga kɛ, "Ɗegerii Yeeseeŋ, ɛ ɗegerii Paawuloos, ma sɔɔk iinak wooɗak?"

¹⁶Nɛɓa iɗit sinɛɓa gaamur wɛɛŋa sigɔ somkaanakik pireer sɛɛga nɛ gaamu sɛɛk nɛ lɔsɛ sɛɛgiŋ. Nɛɓa ari sɛɛg a koɗoosaaŋ nɛ gonarki godeey nɛɛkɛ a ɓɛɛlɛr konaanakɛ.

¹⁷Nɛɓa tiyɛr any sini joop Ayuuduk, a sigɛ moko Ayuuduk sigɛ beeɗir Epesoonekik, nɛɓa ɓuri sɛɛg baŋɛ, nɛɓa eemɛyar tiriya Suumi Yeeseek jɛt.

¹⁸Nɛɓa kurak ŋaadtaanak a ɓɔɔkaaŋ nɛ totonar tikiyɛ gɛŋk joope taamɛkɛ.

¹⁹Joop sigɔ ŋeytunk a ɓɔɔkaaŋ tolɛrɓa wargatɛyɛ gɛŋk nɛ moɗɛr sɛɛg taamɛkɛ joop sigɛ ɓɔɔkaak. Nɛɓa lotɛɛ wori nɛɛk nɛ laŋkɛɛ a biriyatɔk kumɛɛ pɔlpɔlɛ joop pɛɛyk a aarin.

²⁰Agut sini ɛnyɛnyɛɓa Pɛɛni Suumiyoŋk a bakaanyir ɛ lɔlɔsi.

²¹Saaɓa ɓɛɛlɛɛɗ oko sinik baŋiya, nɛɓa Paawuloos koɓu ɓayaay nɛɛkɛ kɛ gun ɗoyu sinɔɔnɛ Mɛkedooniyaak a Akayaak, nɛ ŋaar Yorsaleema nɛɓa tonu kɛ, "Ɔkɔnkɔɔ mɛla son, nɛkɔɔta ɗɛyɛ a ŋaara Rooma."

²²Nɛɓa boŋu joope sigɔɔgɛ ijaagɗiiŋɔŋk a pɛɛy Timotiyoos a Erastos nɛɓa wosɛyɛ sɛɛg Mɛkedooniyaaka, maɓa sɛŋk beeɗ Isiyaake a ɗoŋ tekerŋ.

²³Ŋaarkiɓa saaɓak ɗaakan sinɔ obiiŋɔŋk Epesoone agut Gopan Suumiyoŋk.

²⁴Iɗit om sinɔ riyɛ kɛ Dimetiroosuk sinɔ ɓɛɛɓɛr awɛ sinɔ riyɛ kɛ birik. Ijajagɓa tagaytan goroy Artemisik awɛyt sinɔɔnɛ riyɛ kɛ birik, nɛɓa lalaŋ wori a obiiŋ joopa sigaaga ɓɛɛraak.

²⁵Iɗit sini tolɛɓa joop sigi ɓɛɛraak, a joop ɔgɔ sigɔ latu ijaag sinɔ ito sinɛ nɛŋkik nɛ tonu sɛɛga kɛ, "Iinak joop sigi, ɗegerari kɛ laŋii wori ijaag sineene.

²⁶Dɛnɛɛrkɔ ɛ tiyɛɛr kɛ Paawuloos sini tonukan Epesoone a Isiyaake nyonitaakɛ sigɔɔgɛ tekeriŋɔŋk sɔgɔɔsɔyk baŋɛ kɛ tagaytan sinɔkan ijaagɛɛ ariit etoŋkuk moko Waakoyotoŋk, aɓa ari joop a ɓɔɔkaaŋ a babadar nɛ ŋaadirŋ.

²⁷Moko sini dakɛɗa daraayɛɓa ijaag sini naŋk goroyoŋk, raŋawo sinɛ obiikik Artemisik sinɛ ŋaadir joop Isiyaak a ɗoo nɛɛk baŋɛk, dakɛkɔɔ kanysɛya, aalɛɛkɔɔ obiika nɛɛkiŋ."

²⁸Saaɓa joop gɛɛnɛ tiyɛrɗi sinik, nɛɓa ŋadir nɛ ooyɛr kɛ, "Obi Artemis Epesoonuk!"

²⁹Nɛɓa sisa ɓeesiɗi katamɛ nɛɛkɛ baŋɛ. Nɛɓa reerir joop gɛɛnɛk nyona ibaaloŋk a puruuter piraakak Paawuloosuk a pɛɛy Gaayiyoos a Aristirokoos sigɛɓa ɓartɛɛ sɛɛg Mɛkedooniyaakeek.

³⁰Ɗɛykɛɓa Paawuloos ɛnyɛ son lak joop gɛɛŋkik, yakanaɓa ŋaadtaanak gɛɛnɛ kaaɓur kɛnɔ kat kɛɛ.

³¹Maɓɔrɛ ɔɗɔweerɛ Isiyaak sigaagɛ porur sɛɛnik a omoŋ omoŋ wosɛyɛɛrkiɓa iɗit son lak Paawuloosuk nɛ tonguɗɛɛ kɛ, "Kɛɛɗin nyona sinaana ibaaloŋk nɛ kat yaaŋin ɛɛk."

³²Nɛɓa joop gɛɛnɛ ooyɛr a iɗit omaay tonu any om, maɓɔrɛ iɗit omaay tonu any om. Nɛɓa durkuusɗi olaat baŋɛ, nɛɓa aasi joop a ɓɔɔkaaŋ kir ɗegerɔɔn kɛ tolɗigeeɗkɔ jikon.

³³Joop Ayuuduk a omoŋ omoŋ direrɓa iɗit sinɔ riyɛ kɛ Iskindirk nɛ wideetar ɔɗɔɔka, nɛɓa joope sigaagɛ gɛɛnɛ a omoŋ omoŋ tonurgeeɗ kɛnɔ palamɗi sɛɛga jɛt. Nɛɓa Iskindir ijoopɗi nɛ koykoɗi nɛ ragad ɛɛk kɛnɔ palamɗi.

³⁴Yakana saaɓa joop gɛɛnɛ ɗegerarɗi kɛ ege Iskindir iɗit Ayuuduk, nɛɓa ooyɛr sɛɛg baŋɛ agut omoŋ a sayitiyɛ pɛɛy kɛ, "Obi Artemis sinɛ raŋawo Epesoonuk!"

³⁵Nɛɓa pediya nɛɛka iɗit sinɛ taatapi katamɛ nɛɛkik koykoyɛ joop sigɛ ɓɔɔkaak nɛ tonu sɛɛga kɛ, "Iinak joop Epesoonuk, ɗegerɛɛ joop baŋɛ kɛ joop katamɛ Epesoonuk koorɛr goroy sinɛ Artemisik sinɛ obiik a tagaytan sinɛɓa worworiiki darik.

³⁶Kɛɛ iɗit sinɔ kaadɛ sinik, ɗɛyɛ kɔna a koorɛɛr ɛɛk kɛnɔ dakɛɛr kɛ many, a kat lakɛ iɗit sinɔ teejɛ anta sinɔɔna ŋɛɛwɛnŋɔŋkuk.

³⁷Diilerkɔɔkɔ seena joop sigɔkɔ yakana kir boŋiiɗ olaaturu goroyoŋk, ɛkɔ kir nyɔɔnɛ raŋawo naŋkik.

³⁸Dimetiroos a joop sigɛ sɛɛg a sɛɛnik, ɔkɔn lakɛ iɗit sinɔ daariyɗiigiɗɛŋɔŋkuŋ ɓɛɛlɛr wawuy sigɔ pɛrɛdɛɗɛɛŋɔŋkuŋ, ɛ ɓɛɛlɛr suumiyɛɛk, in kaar palamɗi saadi.

³⁹Ma ɔkɔn lakɛ any om sinɔ ɗɛyɛɛr sineene walasiŋ, nɛ mermenɛɛ joope sigɔɔgɛ gaɓɛr wooran higiik.

⁴⁰Ɓurii sinɔkɔɔ tina daariyɗiɗɛɛ kɛ, 'Ŋaarkikɔ ɗaakan ant sineenekɔ ijaagɛɛ ɓenysek.' Ɔkɔnkɔɔ tin kɔɔniyɛ kɛ, 'Ŋaarkikɔ teejɛt sini agut jikonkuŋ,' nɛkɔɔ kɛɛ any sinɔ jumuriik."

⁴¹Nɛɓa tonu sini, nɛ ari a kɛɛtiɗi joop sigɛkan tolɗiikiŋ.