Read majang Ijaag Wosɛytaanakoŋk 2 Bible Online

Ijaag Wosɛytaanakoŋk 2 - majang bible

Ijaag Wosɛytaanakoŋk 2

¹Tolɗiiɓa ŋaadtaana a nyon omoŋ agut omoŋ baŋɛ, waawuy Pentekosteek.

²Nɛɓa sisa mɛlki koŋgoy dari a ito wɛɛr sinɔ ɓaŋkawuŋɔŋk, nɛɓa enyɛr gode sinɛɓa atukuɗuk.

³Nɛɓa dɛnɛɛ ola sigɔ ito kaɗateer maɗoŋkuk, nɛɓa kaakasar ɛɛk nɛ dokur sɛɛge raŋk a omoŋ omoŋ.

⁴Nɛɓa enyɛɛri Wɛɛŋakɛ sigɔɔgɛ Geetitaanakik sɛɛg baŋɛ, nɛɓa tuker a tonɗi atutunɛ ɔgɔɔkɛ oko sinɛɓa sɛɛga gaɓɛrɗi oolan nɛɛkik Wɛɛŋa sigɔ Geetitaanakik.

⁵Saaɓak joop Ayuuduk sigɔɓa ɓaŋkaawar ɗanɗamɔɔnuk sigɔɓa kurak ɗokanɛɛkɛ sigaagɛ ɓɛɛlɛr ɗook raŋk ɓɛɛlɛrɓa Yorsaleeme.

⁶Saaɓa tiyɛrɗi ɗooran sinik, nɛɓa tolɗitar joop a ɓɔɔkaaŋ. Nɛɓa tiyɛr a tonɗi joop sigɛ atutunɛ gɛŋk a omoŋ omoŋ, nɛɓa reemɗi ɓayɛtun gɛŋk sɛɛg baŋɛ.

⁷Reemɗiɓa ɓayɛtun gɛŋk a ŋaatir nɛ tonur kɛ, "A moko joop Gɛlilaak sigi tonɗi oko sinikik?

⁸Anɛ tiyii a tonɗi atutunɛ ɗokan sigɛɓa tin ɓartɛɛɗɛɛk ɛk?

⁹Eteŋk joop Parteek, a Meedik, a Eelaamuk, a Mɛspetoomiyaak, a Yuudaak, a Kɛpɛdookiyaak, a Pantoosuk, a Isiyaak,

¹⁰a Pirgiyaak, a Pinpiliyaak, a Gibsik, a nyonitaak sigɛ atu ɗook Libiyaak sigɛ atu Kɛreenaake jɔkuk, a joop sigɔkan guugunyar joopa Ayuuduk, a joop Ayuuduk sigɔkan kurak Roomeek,

¹¹a joop Kɛrteesik, a Arɛbik. Nɛ sisɔ tiyii joop sigi baŋɛ a tonur ijaag Waakoyotoŋk sinɔ obiiŋɔŋk atutunɛ gaŋk!"

¹²Nɛɓa reemɗi ɓayɛtun gɛŋk sɛɛg baŋɛ nɛ kir ɗegerɔɔn kɛ tonur ɛk, nɛ totoni ɛkanɛɛkɛ gɛŋk kɛ, "Ege sini any sinɔ ɓɛɛlɛ ɛkik?"

¹³Maɓa ɔgɔɔk daraayɛr sɛɛg nɛ tonur kɛ, "Uterkɔ ogool wɛynik a ɓɔɔkaaŋ nɛ pɔyarŋ."

¹⁴Saaɓak ɛtɛrɓa Petros a nomtaanak sigɛ aarin a omoŋɔŋk, nɛ tonu a ɗooruŋ joopa sigaaga ɓɔɔkaak kɛ, "Iinak joop ɗoo Yuudaak a joop sigɛ beeɗir Yorsaleemek, in geleewɛɛ kɛ ɗɔm anta sineena kɔna tonaak!

¹⁵Kir joop sigi tɔpɔy oko sinɛ koɓurɗɔɔk, in ege ɔɔtɛ nɛɛkɛ sayitiyɛ jiit romiɗoŋk.

¹⁶Mayakana nɔ ɓɛɛlɛɛɗ sinik kɛnɔ dusanɛɛ pɛɛni sinɛɓa tonu iɗit pɛrkaakoŋk Yooelk.

¹⁷Tonu Waakoyot kɛ, 'Wawuykɛ sigaagɛkoy pediyoŋk ɓɛɛlɛkoy oko sinik, gupatɛɛrakoy Wɛɛŋa gaaŋk joopa baŋɛ. Tɔɔmɔk goŋk sigɛ moojakik a sigɛ peetakik waasɛrkoy pɛrka, joop goŋk sigɔ atiinyiik dɛnɛrkoy pɛrkiyɛ, gutarɛyɛ goŋk pɛrkiɗiikoyŋ.

¹⁸Ɓɛɛnyɔwɛɛkɛ sigaagɛkoyk, gupatɛɛrakoy wɛɛŋa gaaŋk ijaageera gaana sigaaga moojakik a sigaaga peetakik, nɛkoy sɛɛk waasɛr pɛrka.

¹⁹Yaaŋakoy ola sigɔ reemɗi ɓayɛk a sɔɔriyɛ rakaay dari a ɗook goyse ɗeek, lakɛkoy yɛrom a maɗ a duuŋan tooroŋk.

²⁰Kɔjurkukoy waawuyŋ, makoy ɛyɛn gayi a yɛrom, a in kiiki mɛlɛɛ waawuy sinɛ obi a reemɗigeeɗ ɓayaayk sinɛkoy goopaaɗ Suumiik.

²¹Joop sigɛ riyar tiriya Suumiyoŋk baŋɛ bɔdɛrkoyŋ.'

²²"Iinak joop Israeelik, in tiyɛɛ kɛ ɗɔm. Lak Yeese Naajireetik ɓaŋkawuka sinɔ ito Waakoyotoŋkuk, yaaŋɛɓa Waakoyot goy Yeeseek iinakɛ kɔɔr sɔɔriyɛ, a ola sigɔ reemɗigeeɗ ɓayaayk, a ola sigɔ boobɛrŋɔŋk, oko sini ɗegerarɗɔɔk.

²³Gaɓɛɛɓa Yeesee ariita noŋk koɓiiɗ Waakoyotoŋk sinaanɛɓa ɗeeŋk, a ɗegerɔɔn nɛɛkɛ, nɛɓa laalawari ariit joop sigɔ ŋɛɛwɛŋɔŋk nɛ ɓokotiiriŋ.

²⁴Yakanaɓa Waakoyot aalɛ ɓaŋkawuka retoŋkuŋ, nɛɓa boŋku sɛɛn ret walasa agut sinɔ kiirɓa sɛɛn ret gaamit a dakɛɛriŋ.

²⁵Tonuɓa Daawit agut sɛɛn kɛ, 'Dɛna Waakoyo ɓɛɛnyɔwɛ gɛɛŋk baŋɛ taamɛkɛ gaanɛk. Nɛ kaa ŋaatan, agut sinɔ ar sɛŋk ɗiɗikakɛ gaanɛk.

²⁶Agut sini yaa ɓayɛ naakɛkiŋ, tonɗi ato naakɛ yaakaat, beeɗ taar naakɛ ŋaadiyɛɛkɛ sigaagɛ kookorɛɛk.

²⁷Kiirinti toŋoɗ sioola takana. Kiirin toŋoɗ geetitan nook kɛnɔ dakɛɛr utula retoŋk kɛnɔ mojɛɗ.

²⁸Yaaŋinkɔta gopan wɛɛŋakoŋk, yaata jɛt agut sinɔ iin a eetik.'

²⁹Iinak manyaakik eeta, oola a tona kɔna kɛ ɗɔm kɛ ɔrɛyak gaŋk sigɛɓa ɗeeŋk om Daawit rɛrɓa nɔɓa kɔɔwɛɛ, a ɓɛɛlɛ pii nɛɛkɛ seedi lak eteŋkik mɛlɛɛɗa sisɔwa.

³⁰Sɛɛnɓa iɗit pɛrkaakoŋk, nɛɓa ɗeger kɛ kuumɗigeeɗɓa Waakoyot kɛ komoy nɛɛkɛ om riiɓekoy barsum nɛɛkɛ raŋk.

³¹Sɛɛn dɛnɛɓa any sini jeemɛ, nɛɓa tonu ŋaarin ret walsak kɛ kiirkoy Kerese dakɛ utula retoŋk, kikoy mojɛ buusɛ nɛɛkɛk.

³²Boŋkuɓa Waakoyot Yeesee ret walasa. Eteŋk misikiriyɛ any sinik baŋɛ.

³³Nɛɓa sɛŋk ɓɔŋgɔɔrɛ ɛɛk rakaaya nɛ beeɗ ɗiɗikakɛ Waakoyotoŋk, nɛɓa boŋu Wɛɛŋa sigɔ Geetitaanakik sigɛɓa tongeeɗ Ɛpɛna Waakoyotuk kɛ gaɓaakoy naŋɔŋk nɛ gupatiki any sini dɛnɛɛrik a sini tiyɛɛrik.

³⁴Sisɔ kiɓa sɛŋk Daawit ŋaarin dariya. Tonuɓa sɛŋk ɔɗɔwa nɛɛka kɛ,

³⁵" 'Tonuɓa Waakoyot Suumiya naaka kɛ, "Beeɗ ɗiɗikakɛ gaanɛk, nɔkoyna ariiɗa gumaakeer gooŋk, a atu ɓaŋkawukaat nookɛ goyse ɗeekik.' "

³⁶Sisɔ in ɗegerar joop Israeelik baŋɛ kɛ ɗɔm kɛ Yeesee sinɛɓa laalawarik ariɓa Waakoyot a Suumi ɛ Keresee,!"

³⁷Saaɓa joop gɛɛnɛ tiyɛrɗi sinik, nɛɓa ɓeesɛ sɛɛg ɓayɛtun jɛt. Nɛ tonur Petrosa a wosɛytaanaka sigaaga ɔgɔɔk kɛ, "Iinak manyaakak eteŋka, anɛ ijaagii jikon?"

³⁸Nɛɓa Petros tonu sɛɛga kɛ, "In weerikɛ tikiyɛɛkɛ Waakoyota nɔ kɔnu aadɛɛ a omoŋ omoŋ tiriyaakɛ Yeeseek, nɔkɔɔ kɔne ranyjɛɛrɛ tikiyɛ goŋk. Boŋiirkɔɔ Wɛɛŋa sigɔ Geetitaanakik sigɛ tigiik.

³⁹Kuumeet sini iinaka a tɔɔmɔka goŋk, a joopa sigaagakoy riy sɛɛg Suumii naŋk Waakoyot ɛɛka nɛɛkakik sigaaga ɓɔrɛ atu a yowɛɛɗŋɔŋk.

⁴⁰Waasɛɓa sɛɛga Petros ola a ɓɔɔkaaŋ a jeeɗo ɔɔtɛ nɛɛk jɛt, tonuɓa sɛɛga kɛ, "In koolɛɛ ɛɛk noŋk goopan sinaanɛkoy mɛlki ɓartiyɛɛka sigeega ŋɛɛwɛŋɔŋk."

⁴¹Boŋurɓa sɛɛge joop a ɓɔɔkaaŋ pɛɛni nɛɛk nɛɓa aadɛɛ sɛɛgiŋ. Ɓeny sinaanɛɓak tuukiɗiikɓa ŋaadtaana a atu sigɔɔgɛ kumɛɛ jiitik.

⁴²Tiitiyarɓa sɛɛk rɔɔriyɔn wosɛytaanakoŋk, nɛɓa arir omaayikeen, nɛɓa nyɔɔkiɗi ɛ ɗami agut omoŋ ɓɛɛnyɔwɛ gɛɛŋk baŋɛ.

⁴³Saaɓak agut sinɔɓa ijaagiiɗɛɛ sɔɔriyɛ, a ola sigɔ reemɗigeeɗ ɓayaayk a ɓɔɔkaaŋ ariit wosɛytaanakoŋkuk, nɛɓa ɓuri joop baŋɛ.

⁴⁴Nɛɓa ɓɛɛlɛr joop sigɛɓa ŋaadiɗiik agut omoŋ, any sinɛɓa latuk baŋɛ nɛŋkɓa sɛɛg baŋɛ.

⁴⁵Ɓaɓaliiɓa ɗook nɛŋk a wori nɛŋk nɛ wori nɛɛk kaakasar ɛkana gɛŋk oko sinɛ sɛɛga ɗɛyɛɛɗik.

⁴⁶Totoliiɓa ɓɛɛnyɔwɛ gɛɛŋk baŋɛ agut omoŋ Godeey sinaanɛ Geetitank, ɗamarɓa kiiwu nyaki nɛŋk yaakaat a ɓayaay sinɔɔnɛ mentanŋɔŋk,

⁴⁷pɔɔsɛrɓa Waakoyo nɛɓa eemɛyar sɛɛg joop baŋɛ. Nɛɓa tuukuku Suumii joop sigɔ bɔdɛrŋɔŋk ɓɛɛnyɔwɛ gɛɛŋk baŋɛ tolɛɛɗa nɛŋk.