Read majang Ijaag Wosɛytaanakoŋk 20 Bible Online

Ijaag Wosɛytaanakoŋk 20 - majang bible

Ijaag Wosɛytaanakoŋk 20

¹Saaɓa dakɛɛɗ ɗakan nɛɛkɛ kɛ manyki nɛɓa Paawuloos riy ŋaadtaanak agut omoŋ, nɛ gaananɛ sɛɛg pɛɛnii rɔɔriyɔɔnoŋk, nɛɓa pakakati nɛ ŋaar ɗooka Mɛkedooniyaak.

²Nyonitaakɛ sigaagɛɓa ɗoyiɗik ariɓa ŋaadtaanak a ɓaŋkaawurarŋ rɔɔriyɔɔn sinɔɔnɛ obiiŋɔŋk nɛ ŋaar ɗooka Giriikik,

³nɛɓa beeɗ saadi a ɛyɛkeer jiit. Saadi baŋiya koɓuɓa ɛnyɛ Sooriyaakak emɗ, yakana agut sinɔɓa ɗegerɗi kɛ giimar sɛɛn joop Ayuudukŋɔŋk, nɛɓa ɗɛyɛ a ɗoyu sinɔɔnɛ Mɛkedooniyaak.

⁴Joop sigɛɓa kaar a sɛɛn agut omoŋɔŋk, tɔɔn Pirhusuk Sopatros Beeriyaak, a Aristirokoos a Sikondus Tɛsɛlonkeek, a Gaayiyoos Dɛrbeek, a Timotiyoos, a Tikikoos a Tiropimos Isiyaak.

⁵Kaarkunkan sɛɛk eteŋkɛ ɔɗɔɔkɛ nɛ tin koorɛrkun Tiroadaake.

⁶Nɛkan seek teeŋii emɗa Pilipisiyoose Ba'aale Nasiyoŋk baŋiya, nɛ kɛɛɗii saana atukuɗ sɛɛkik nɛ mɛlii ɗoŋikɛ sigɔɔgɛ tuulk Tiroadaa, nɛkan saadi kaalii ɗoŋ a tula pɛɛy.

⁷Tolɗiikiiɓa agut omoŋ kidamii ajigeya[2], kɛnɔ nyɔɔkii kiiwu sinɔ geetitank. Nɛɓa Paawuloos waasiɗi joopa gɛɛna agut sinɔɓa ɗɛyɛɛɗ a ŋaar alɛ nɛɛkɛŋɔŋk, ariɓa waasiyɛ gɛɛŋk a jeeɗoŋ mɛlɛɛɗa nɔ kaay kɔɔr nɛɛk.

⁸Lakɛɓa ɗaawan jɛt pooke sinaanɛɓa tolɗiɗiik.

⁹Beeberkan ateeny omaay sinɔ riyɛ kɛ Ewutikosuk maskoote. Nɛ agut sinɔɓa Paawuloos waasiɗiiɗ kɛ manyk, nɛɓa ateeny sinɛ lak ɗoŋ jɛt nɛɓa lɔsɛr sɛɛniŋ nɛ ɗirki pooke jiiteene nɛɛkɛ ɗooka. Nɛ saaɓa ɓɔŋgɔɔrɛrɗi joopk, nɛɓa dɛnɛr a kɔ rɛrŋ.

¹⁰Nɛɓa Paawuloos kus ɗooka, nɛ kɔru nɛ gaamku nɛ tonu kɛ, "Kat ŋaatɛɛ. In ɓɛɛlɛrɗi wɛɛŋa gɛɛnɛŋ!"

¹¹Nɛɓa Paawuloos teeŋɛ kɛkar rakaaya nɛ kɛɛ ŋapati kiiwu nɛɛk nɛ ɗami a ŋaadtaanak agut omoŋ. Nɛɓa waawasi a joop gɛɛŋk mɛlɛɛɗa aayirɔɔna nɛ saadi baŋiya ŋaarŋ.

¹²Nɛɓa joop gɛɛnɛ diiler ateeny sinɛkɔ bɔdukuk nyaka nɛɛkaak nɛɓa gaananɛr ɛɛk a yaa sɛɛgaŋ.

¹³Yakanakan seek ɗoykuunii ɔɗɔɔkɛ son lak emɗ nɛɛkik kɛnɔ kɛɛɗii boŋii Paawoloos, nɛɓa saadi ŋaarii emɗ Asoona, nɔɓa ijaagiiɗi oko sinikik agut sinɔɓa Paawuloos ɗɛyɛɛɗ a kɛɛ derɛ ɗookuk.

¹⁴Nɛɓa lalaŋikii a sɛɛn Asoone, nɛ gaɓɛɛrii emɗa nɛ kɛɛɗii Mitiliniya agut omoŋ.

¹⁵Nɛɓa alɛ nɛɛkɛ ŋaarii saadi nɛ kaalii asuulɛ Kiyosuk. Nɛɓa alɛ nɛɛkɛ ekaŋii nɛ mɛlii asuulɛya Saamoosuk nɛ romiɗ nɛɛkɛ mɛlii Mitiliniya.

¹⁶Ɗɛyɛɓa Paawuloos a ɗoyu Epesoone a gopan kɛnɔ kat moɗɛɛ ɔɔtɛ Isiyaake, agut sinɔ saa ɗoyiɗ Ba'aale Pentekosteek sinaanɛkɔɔ eemɛyɛɛk ɗɛyɛɓa a ɔkɔn gaygeeɗiŋ gun laŋɛɛ sɛɛn Yorsaleeme.

¹⁷Wosɛyɛɓa Paawuloos iɗit Militine Epesoona kɛnɔ riykɛɛ gutarɛyɛ gode Sambatɛyoŋkuk.

¹⁸Saaɓa kurakiɗ son lak sɛɛnik, nɛɓa tonu sɛɛga kɛ, "A tukiɗi ɓenysinaanɛkan mɛlkiɗa Isiyaakaak ɗegerari kɛ beeɗiikan a iinak agut omoŋ.

¹⁹Kɛygun laŋakaaya rakatɛ giiman joop Ayuudukuŋ nɛ ijaagɗikaa Suumiya rikiteet ɛɛkoŋk a pileetakɛ.

²⁰Saakan kɔnu rɔɔriyɗa soogiyakɛ totoliiɗ joopk maŋk sinɔɔnɛ nyaki goŋkuk, nɛkan kɔna tona any sinɔ kɔnu kɔnyɛŋɔŋk baŋɛ, ma kɛɛ any sinɔkan ŋɔɗaak ara.

²¹Joop Ayuuduk a sigɛ moko Ayuuduk waasaakan sɛɛga a ɓaŋkawuŋ kɛnɔ guugunyar anta sinɔɔna mentanŋɔŋk nɔ weerik Waakoyota nɔ ŋaadir Suumi naŋk Yeesee.

²²"Maɓɔrɛ sisɔ tonurkɔta Wɛɛŋa sigɔ Geetitaanakik, kɛnɔ kɛɛɗa Yorsaleema a kaa ɗegerɔɔn kɛ laŋkaakɔɔ jikon saakɔɔ mɛlɛɛɗa saanak,

²³tonurkɔta Wɛɛŋa sigɔ Geetitaanakik kɛ laŋkaakɔɔ katamɛɛkɛ korkoɗɔn a rakatɛ.

²⁴Yakana kaa aasi saak koɓiit wɛɛŋaka gaanak, nɔkoy ruumeeɗa ijaag naak wookan Waakoyotoŋk a rɔɔriyɔn Pɛɛni sinɔ Ɓɛlkɛɛstank ɛ nɔkoy ruumeeɗa ijaag sinɛɓata gaɓɛ Suumi Yeeseek.

²⁵"Weeweriikaakan iinakɛ kɔɔr nɔ mɛlɛɛɗa sisɔwa a rɔɔriyaaɗa burɛ Waakoyotoŋk. Mayakana a tukiɗi sisɔ ɗegera kɛ kɛɛ iinakɛ iɗit sinɔkoy dɛnɛ taamɛ gaaŋkik kɛkark.

²⁶Agut sini yaaŋa kɔna waawuy sineene ɓenysek kɛ ɔkɔnkɔne badɛ iɗit a omoŋ kɛɛte ɔɗɔwikeen nɛɛk.

²⁷Agut sinɔ waasaakɔ kɔna koɓi Waakoyotoŋk baŋɛ, a kɛɛ any sinɔkɔ ŋɔɗaak.

²⁸Daamarkan kɔnu Wɛɛŋa sigɔ Geetitaanakik a iinak koortaanak pony nɛɛkik, nɛɓɔ in koorɛɛ ɛɛk noŋk a pony nɛɛk. In lowɛɛ joop Waakoyotoŋk sigɛkan sɛɛga gaɓɛ yɛrom Tɔɔn nɛɛkik a any gaamitoŋk.

²⁹Saakɔɔ ŋaarɗak baŋiya, ɗegera kɛ guugunyarkikɔɔ kɔna kɔɔra joop sigɔ kalkaalar a ito tuwookakik sigɔ sɛɛga ki sanɗit pony nɛɛkɛkik.

³⁰Maɓɔrɛ ŋaararkikɔɔ iinakɛ kɔɔr joop a omoŋ omoŋ nɛ rɔɔriyaaɗ rɔɔriyɔn sinɔ ruruŋaaŋɔŋk nɛ puruuterki ŋaadtaanak a ɓɔɔkaaŋ son lak sɛɛgik.

³¹Agut sini in koorɛɛ ɛɛk a ɗegerari kɛ iinak a omoŋ omoŋ rɔɔriyaakan kɔnu a gupatika pileetak gaaŋk kaay a waawuy a emeyi jiit.

³²"Sisɔ gaɓaakankɔnu a adarat Waakoyota a pɛɛniya wookan nɛɛkik sinɔ ari kɔnu a ɛtɛɛriŋɔŋk, ɛ oolɛ akɔna gaɓɛ any sinɛɓa ŋɔɗɛɛk geetitaanakɛ kɔɔruk.

³³Kaaɓa saak ɗɛyɛɛ goorɛ nɛɛkɛ worke a wori, maŋk abiyak etoŋk.

³⁴Ɗegerari kɛ ijaagɗikaakan saak arnɛ gaanɛ nɛ kɔnya ɛɛk naak, a joop sigɛ eet a sɛɛgik.

³⁵Yaaŋakan kɔna gopakɛ sigɔɔgɛ ɓɔɔkaaŋɔŋk kɛ ɗɛyɛ tina a ijaagɗikii arnɛ gaŋk, nɛ kɔnyii joop sigɛ bɔɔlaatak a koɓukii pɛɛni Suumi Yeeseek sinɛɓa tonu kɛ, 'Geetitan iɗit sinɛ gijiɗiik a kaalɛ iɗit sinɛ gijɛɛk.' "

³⁶Saadi baŋiya ɛtɛrɓa Paawuloos korontunɛ a sɛɛg baŋɛ agut omoŋ nɛ ɗanɗamaaŋ.

³⁷Nɛɓa kuɗer sɛɛg baŋɛ nɛ gaamurku Paawuloos nɛ samɓoyarŋ.

³⁸Ɓakɛyɗiɓa kɛ ɗɔm a kaalɛŋ agut sinɔɓa toniiɗ sɛɛga kɛ a tukiɗi sisɔ kiirkoy taanta taamɛ gaaŋkik. Nɛɓa tuunɛyɛr mɛlɛɛɗa emɗa nɛɛkaak.