Read majang Ijaag Wosɛytaanakoŋk 22 Bible Online

Ijaag Wosɛytaanakoŋk 22 - majang bible

Ijaag Wosɛytaanakoŋk 22

¹"Iinak manyaakak eeta a baabɛyak, inta tiyɛɛ any sinɛ kɔna wideerak sinɛ kolɗa ɛɛkik."

²Saaɓa tiyɛrɗi a tonɗi ad Ibiraysitik, nɛɓa dakɛr kɛ many a kaalɛŋ nɛɓa Paawuloos tuuke toni nɛɛk kɛ,

³"Eet iɗit Ayuuduk sinɛkan ɓartɛɛ katamɛɛ Tɛrseesik sinaanɛ ar Kelkiyaakek, makan ɓɔlɔɔra katamɛɛ sineene Yorsaleemuk. Rɔɔriytanɓa naak Gɛmaliyaal tamaarakan higi ɔrɛyakoŋk kɛ ɗɔm kɛnɔ ɓɛɛlɛ oko sini ijaagirɗɔ ɓeny sineenek kɛnɔ ijaaɗika nyeken Waakoyota.

⁴Eet iɗit sinɛkan epapay joop sigɛ kaar Gopɛ sineene Suumiyoŋk mɛlɛɛɗa retaak, korkokoɗakan moojak a peetak nɛ ara sɛɛg kɛnɔ guugunyar godeya korkoɗɔɔnoŋk.

⁵Nɔ ɗegerɗɛɛ sini kɛ eekeerik waasɛr eekeer gɛɛŋk ɔɗɔwer tapa ŋaadiyɛɛkoŋk a joop sigɔ gaɓɛr woorank. Boboŋakan wargatɛyɛ sɛɛge nɛ kɛɛɗa son lak ŋaadtaanak sigɛ atu Dɛmaaskoweek nɛ kɛɛɗa korkokorka sɛɛg nɛ ɗɔka sɛɛg Yorsaleema kɛnɔ goopɛ sɛɛg.

⁶Kɛɛɗaɓa Dɛmaaskowa nɛ saaɓa wɔɔŋkuɗa katamɛya nɛɛkaakik waawuy kɔɔr, nɛɓa a gorgorŋ tipeyɗiik ɗaawan sinɔ obiiŋɔŋk dari eete tookɛɛta.

⁷Nɛɓa ɗirka ɗooka nɛ tiya koŋgoy sinɔ tonu kɛ, 'Saaool! Saaool! Epapayinti agut jikon?'

⁸Nɛɓa tonguɗa kɛ, 'Suumi naakɛ, ma iin wooɗ?' Nɛɓata sɛŋk tonu kɛ, 'Eet Yeeseekɔ Naajireetik siniti epapayink.'

⁹Joop sigɛɓa eet a sɛɛgik dɛnɛrɓa ɗaawan nɛɛkiŋ, maɓa kir weenta saata tonɗiiɗ sɛŋkik.

¹⁰Nɛɓa tonguɗa kɛ, 'Suumi naakɛ, arana jikon?' Nɛɓata Suumii tonu kɛ, 'Ŋaari raŋana nɔ kɛɛɗin Dɛmaaskowa, tonɛɛ kɔɔna sooy any sinɛkan gaamɛɛ nɔkɔɔ ijaagink baŋɛk.'

¹¹Saaɓa tipeyiɗiiɗ ɗaawan nɛɛkɛkik nɛɓa kaa dɛnɗiit, nɛɓa joop sigɛɓa eet a sɛɛgik gaamur ari naak nɛti diiler mɛlɛɛɗa Dɛmaaskowa.

¹²Lakɛɓa saadi iɗit sinɔ riyɛ kɛ Haananiyaak sinɔɓa sɛɛn iɗit Ayuuduk sinɔ eemɛy higi Ayuuduk jɛtik, ɛ pɔɔsɛr joop Ayuuduk sigɛ beeɗir Dɛmaaskoweek baŋɛk.

¹³Nɛɓa sɛŋk kus son lak eetik nɛte ɛtɛ jɔk nɛta tonu kɛ, 'Iin manya eeta Saaool, in tayɗi taamɛ goonɛ kɛkar.' Nɛɓa tayɗi taamɛ gaanɛ sisa nɛ mermena sɛɛn.

¹⁴Nɛɓata sɛŋk tonu kɛ, 'Waakoyo ɔrɛyak gaŋkik daamɓani jeemɛ kɛnɔ ɗegerin ɗɛyan Nɛɛk kɛnɔ dɛnin Mentanka Nɛɛk, ɛ tiyin koŋgoy Nɛɛk.

¹⁵Nɔɓa ijaagiiɗ oko sinikik agut sinɔkan tiyɛɛɗin ɛkan dɛnink kɛnɔ waasin eekeer gɛɛŋk joope baŋɛ taamɛkɛ,

¹⁶nɛ sisɔ koorun jikon? Ŋaari raŋana nɔnu aadɛɛ maawɛ Waakoyotoŋk. Nɔ riyin Tiriya Yeeseek, nɔne aadiirɛ tikiyɛ gooŋk.'

¹⁷Saadi baŋiya saaɓa weeriɗa Yorsaleemak nɛ saaɓa ɗanɗamaaɗa godeey sinaanɛ Geetitank, nɛɓata arɗiɗɛ nɛ dɛna,

¹⁸ata yaaŋɛ ɛɛk Suumii nɛta tonu kɛ, 'Ŋaari a gorgorŋ Yorsaleeme agut sinɔ kirɗi boŋiiɗ waasiyɛ sigɛ tonun agut Eetik.'

¹⁹Nɛɓa tonguɗa kɛ, 'Suumi naakɛ, ɗegerar kɛ ɗɔm kɛ ɛnyɛnyɛkakan saak sinɔɔnɛ godeyi tolɛɛɗoŋkuk nɛ korkokoɗa joop sigɛ ŋaadir iinik nɛ ɗiŋa sɛɛgiŋ.

²⁰Saakan ɓokotiiɗɛɛ Istipaanoos sinɛkan waawasi agut iinik ɛtɛtɛɗakan joope sigaagɛkan ɓokotɗiik jɔk, nɛkan koɓi naakɛ omoŋ eet a sɛɛg agut any sinɛ, ɛkan kookora abiyak gɛŋk.'

²¹Nɛɓata Suumi tonu kɛ, 'Mak. Wosɛyani son lak joop sigɛ moko Ayuuduk sigɛ atu ayowɛɛɗŋɔŋk.' "

²²Geleewɛrɓa joop gɛɛnɛ toniiɗa Paawuloosuk mɛlɛɛɗa seena, nɛɓa ooyɛr a ɗooruŋ kɛ, "In badɛ ɗook raŋk iɗit sinɔ ito sinik! Ki gayɛ a beeɗ wɛɛŋakɛ iɗit sinɔ ito sinikiŋ.'

²³Ooyɛrɓa a yiker abiyak gɛŋk, ɛ soowɛr ɗooki rakaaya,

²⁴Saaɓa ɔɗɔwen sinɛ amaasiniyɛ sigɔ kumɛk dɛnɛɛɗ any sinik, nɛɓa tonu kɛnɔ diiler Paawuloos nyona nɛŋk, nɔ mermenɛɛ a ɗiŋɛɛŋ kɛnɔ ɗeger ɔɗɔwen nɛɛkɛ kɛ ooyɛr joop gɛɛnɛ sɛɛne a ɛtɛ oko sinɛk agut jikon.

²⁵Saaɓa korkoɗarɗi nɔ gun ɗiŋerki, nɛɓa Paawuloos tonu ɔɗɔwenta amaasiniyɛ sigɔ ɗibɛk sinaanaɓa ɛtɛɛɗ jɔkuk kɛ, "Pɛgɛdɛɛɓa kɔna kɛnɔ ɗiŋɛɛ iɗit Roomuk a kiiɗɛ pirdiiŋ?"

²⁶Nɛɓa ɔɗɔwen sinɛ amaasiniyɛ sigɔ ɗibɛk tiyɛ any sini, nɛɓa kɛɛ son lak ɔɗɔwen amaasiniyɛ sigɔ kumɛk nɛ tongeeɗ kɛ, "Ege sini iɗit Roomuk kin rɔɔɗɛt."

²⁷Nɛɓa ɔɗɔwen sinɛ wideer ɛɛk son lak Paawuloosuk nɛ kɔɔniy kɛ, "Iin sɛɛn iɗit Roomuku? Tontako." Nɛɓa tongeeɗ kɛ, "Ii, eet sɛɛn."

²⁸Nɛɓa ɔɗɔwen sinɛ amaasiniyɛ sigɔ kumɛk tongeeɗ kɛ, "Sinɛ nɔ eet iɗit Roomuk ɓalaɓa wori sinɔɔnɛ obiiŋɔŋk." Maɓa sɛŋk Paawuloos tongeeɗ kɛ, "Maɓa sɛŋk eet iɗit Roomuk ɓartiyɛɛkɛ."

²⁹Nɛ agut sini joop sigɛɓa ragadir ɛɛk kɛnɔ mermenark widerɓa ɛɛk a yowɛɛɗiŋ sisa. Saaɓa ɔɗɔwen nɛɛkɛ ɗegerɗi kɛ korkoɗɛɛkɔ meltikɛ awɛytiiroŋk iɗit Roomuk, nɛɓa ɓuriiŋ.

³⁰Alɛ nɛɛkɛ ɗɛyɛɓa ɔɗɔwen amaasiniyɛ sigɔ kumɛk a ɗeger kɛ ɗɔm any sinɛkan joop Ayuuduk daariyɗiiɗ Paawuloosak kɛ jikon, nɛɓa tonu kɛnɔ tolɗi ɔɗɔwer tapa ŋaadiyɛɛkoŋk, a joop sigɔ gaɓɛr woorank agut omoŋ. Nɛɓa woorku Paawuloos korkoɗɔɔn nɛ diile taamɛka gɛŋk.