Read majang Ijaag Wosɛytaanakoŋk 24 Bible Online

Ijaag Wosɛytaanakoŋk 24 - majang bible

Ijaag Wosɛytaanakoŋk 24

¹Ɗoŋikɛ sigɔɔgɛ tuulk baŋiya, ɔɗɔwen tapa ŋaadiyɛɛkoŋk, Haananiyaa, kaarɓa Keesaariyaaka, a gutarɛyɛ a omoŋ omoŋ, a iɗit sinɔ ɗeger higi Roomuk sinɔ riyɛ kɛ Tɛrtɛlusuk agut omoŋ kɛnɔ daariyɗi Paawuloosa taamɛkɛ Pilkisik.

²Saaɓa riyirkiɗɛɛ Paawuloosuk nɔɓa kus, nɛɓa Tɛrtɛlus tuke daariyeet kɛ, "Iin Pilkis sinɛ eemɛyɛɛk, laŋiikɔ yaaka sinɔ obiiŋɔŋk goy nookɛk, ɛkɔ laŋii ɓɔlɔɔrɛ joopa gaŋk lowiiɗ nookɛ sinɔɔnɛ mentanŋɔŋk a jeeɗo ɔɔtɛ nɛɛk.

³Boŋii ɔɗɔwikeen nook sini mentanŋɔŋk nyonitaakɛ a ɓɛɛnyɔwɛɛkɛ a pɔɔsiyɛ sigɔ ɓɔɔkaaŋɔŋk.

⁴Yakana sisɔ kalɛyaan ani kaa gaalɛɛt, kɛnɔ tina tiyin any sinina tona a diŋŋɔŋk oko mentanka nook.

⁵Ɗegerii kɛ iɗit sini dakɛ tina a gori sinɔ ŋɛɛwɛnŋɔŋk, boŋku ɗaakan joopa Ayuuduk sigaaga ɓɛɛlɛr ɗook raŋk baŋɛk. Sɛɛn ɔɗɔwen ponya joop Naajreetik sigaaga latu ŋaadiyɛ sigɔɓa kɛɛ pɛgɛdɛɛtik.

⁶Ɛkɔ laŋkii a arkɛ Gode sinɛ Geetitank a somkan nɛkɔ gaamkiiŋ, [koɓiikɔ kɛ gun pɛrɛɗii oko higi naŋk,

⁷yakanakɔ kus ɔɗɔwen amaasiniyɛ sigɔ kumɛk Lusiyoos, nɛkɔ tine ŋakiir arnɛ a ɓaŋkawuŋ,

⁸nɛkɔ tonu joopa sigaagakɔ daariyɗi sɛɛnak kɛnɔ kurak son lak iinik.] Oolun nɔ mermenin, nɔkɔɔ ɗegerɗin kɛ eekeer pɛɛni sinikɔ widikii sɛɛne raŋk baŋɛ."

⁹Nɛɓa joop Ayuuduk doomɛr kɛ, "Ege any sini baŋɛ eekeer."

¹⁰Ijoopɛɓa Pilkis Paawuloos nɛ pɛgɛdgeeɗ kɛnɔ tonɗi. Nɛɓa Paawuloos tonu kɛ, "Ɗegera kɛ iin iɗit sinɔ gaɓɛ wooran joopa Ayuuduk a emeyi ɓɔɔkaaŋɔŋk, nɛta yaaŋ jɛt saa widikiɗa kolan any sinɛkɔ widikɛɛ eeteek raŋk.

¹¹Oolun a ɗegerin kɛ kɛɛɗakan ugumeeta Yorsaleema a ki kaalɛt ɗoŋ sigɔ aarin a pɛɛyk.

¹²Kɛɛ iɗit sinɔ kɔtu laŋki Godeey sinaanɛ Geetitank a palamɗiikiiŋɔŋk, maŋk kiikakɔ boŋiiɗ ɗaakan joopa gɛɛnaak godeey tolɛɛɗoŋk Ayuuduk, maŋk katamɛɛ.

¹³Kirkɔ oolɛ a widerki any sinɔ ɗegerɗɛɛ daari sinɛkɔte widerkik baŋɛk.

¹⁴"Yakana ɗɛya ana yaaŋa any sinɛ riyar sɛɛk kɛ gopan sinɔ tɔɔnuk ŋaadiyɛ sigɔ nyonuk, ugumguɗa Waakoyo ɔrɛyak gaŋkik, ɛ ŋaada any sinɛɓa taapɛɛ higii Muuseek, a any baŋɛ sinɛɓa taapɛɛ Wargatɛyɛɛkɛ joop pɛrkaakoŋkuk.

¹⁵Ŋaadiɗiika Waakoyote oko joop sigi ŋaadir kɛ ŋaararkikoy joop baŋɛ sigɛ mentaanak, a sigɛ tikitaanakik ret walasa.

¹⁶Agut sini koora ɛɛk naak ɓɛɛnyɔwɛ gɛɛŋk baŋɛ kɛnɔ laka kalbi sinɔ mentanŋɔŋk taamɛkɛ Waakoyotoŋk a joopoŋk.

¹⁷"Saaɓa ŋaarkiɗa Yorsaleemek emeyikɛ sigɔɔgɛ ɓɔɔkaaŋɔŋk baŋiya, nɛkan weerika a ɗɔka wori sinɔ tɔkɔny tekaaneera gaana, ɛ tigi sinɔ gaɓɛɛ Waakoyotak.

¹⁸Laŋirkikanti Godeey sinaanɛ Geetitank makɔ ŋaɗikuuna ɛɛk naakiŋ. Kɛɛkan joop a ɓɔɔkaaŋ a eet agut omoŋ, kɛɛkan ɗaakan.

¹⁹Mayakana ɓɛɛlɛrkan saadi joop Ayuuduk a omoŋ omoŋ sigɔkan kurak Isiyaakeek. Ɔkɔn lakɛ any sinɔ daariyɗiiɗ eetaakiŋ, intɔ wideetar ɛɛk taamɛka goonaak nɔ waasɛr.

²⁰Sisɔ saa widerkiɗa ɛɛk joopa sigaaga gaɓɛr woorank, ɔkɔn lakɛ tikiyɛ sigɔkan ijaagaaŋɔŋkuŋ intɔ waasɛr joop sigi ɓɛɛlɛr seedik.

²¹Tonaakɔ any sini dakɛɗa, ɛtakan sɛɛge taamɛkɛ nɛkan oo'oyaa kɛ, 'Goopariti ɓenyse agut sinɔ ŋaadiɗa kɛ ɓɛɛlɛ ŋaarin ret walsakiŋ,"' kɛɛ any sinɔkan ara sineene sɔgɔɔsɔyk.

²²Agut sinɔɓa Pilkis ɗegerɗi Gopan Suumiyoŋk kɛ ɗɔmk, nɛɓa ŋɔɗur sɛɛg ma tonu sɛɛga kɛ, "Ɔkɔnkɔɔ mɛlki ɔɗɔwen amaasiniyɛ sigɔ kumɛk, Lusiyoosuŋ, nɛkɔɔ gaɓa wooran pɛɛniya noŋkuŋ."

²³Nɛɓa Pilkis tonu ɔɗɔwenta amaasiniyɛ sigɔ ɗibɛk kɛ, "Kooru Paawuloos kɛ ɗɔm, mayakana tɔŋɔrgeeɗ yaaka. Saa tekaaner gɛɛnɛ ɗɔkaatageeɗ any sinɛ ɗɛyɛkik, kat ɓaarɗin sɛɛn.

²⁴Ɗoŋikɛ sigɔɔgɛ tekeriŋɔŋk baŋiya, kurakɓa Pilkis a jarti nɛɛk sinɔ iɗit Ayuuduk sinɔ riyɛ kɛ Dirusilak. Nɛɓa riytar Paawuloos nɛ tiyɛr saa toniiɗ ŋaadiyɛ Yeese Kereseek.

²⁵Nɛɓa Paawuloos tonu ɔɔtɛ mentanka taamɛkɛ Waakoyotoŋkuk, a ɓali ɛɛkoŋkuk, a goopan sinɛkoy mɛlkik, nɛɓa Pilkis ɓuri nɛ tongeeɗ kɛ, "Ŋaari sisɔ, riyira kɔɔnu ɓɛɛnyɔ om saakɔɔta yaakiɗik.

²⁶Ŋaadiɓa Pilkis kɛ boŋukɔɔ wori dugeeɗ Paawuloose, nɛɓa ririyri Paawuloos agut ɓɔɔkaaŋ nɛ waawasiŋ.

²⁷Daamɛɛɓa Porkiyos Pistos nyona Pilkisik, emeyikɛ sigɔɔgɛ pɛɛyk baŋiya. Nɛɓa Pilkis ŋɔɗuru Paawuloos korkoɗɔɔna kɛnɔ yaa joopa Ayuuduk.