Read majang Ijaag Wosɛytaanakoŋk 25 Bible Online

Ijaag Wosɛytaanakoŋk 25 - majang bible

Ijaag Wosɛytaanakoŋk 25

¹Saaɓa Pistos mɛlɛɛɗ ɗokanɛɛka Keesaariyaak ɗoŋikɛ sigɔɔgɛ jiitik baŋiya, nɛɓa saadi ŋaar Yorsaleema.

²Nɛɓa saadi wideetar daari nɛŋk Paawuloose raŋk ɔɗɔwer tapa ŋaadiyɛɛkoŋk, a ɔɗɔwer Ayuuduk a omoŋ omoŋ,

³nɛɓa kalɛyir Pistos kɛ, "Ari tina any sinɔ mentanŋɔŋk a tina ɗɔkun Paawuloos Yorsaleema. Nɔɓa tonurɗu oko sinikik ɗɛyɛrɓa koorɛɛta Paawuloos gopɛ tak kɛnɔ ɓokotur."

⁴Nɛɓa Pistos tonu sɛɛga kɛ, "Ar Paawuloos Keesaariyaake a kookorɛɛ godeey korkoɗɔɔnoŋk. Weerikaakɔɔ ɓɔra sise kɛ gonyuŋ.

⁵Ɔkɔn lakɛ tikiyɛ sigɔkan ijaag Paawuloosukuŋ, in kɛɛɗii a eet agut omoŋ Keesaariyaaka a ɔɗɔweer goŋk agut omoŋ, ɛ in kɛɛɗɛɛ daariyɗiigiɗɛɛ sooy."

⁶Ŋaarɓa Pistos Keesaariyaaka ɗoŋikɛ sigɔɔgɛ tula jiitik, maŋk aarink baŋiya. Nɛɓa alɛ nɛɛkɛ dokuɗe barsum pirdiyoŋk nɛ tonu kɛnɔ widaagiɗɛ Paawuloos.

⁷Saaɓa widerkiɗ ɛɛk Paawuloosuk, nɛɓa joop Ayuuduk sigɛɓa kurak Yorsaleemek ɛtɛrɗi tookɛɛta, nɛɓa widerki daari sinɔ ɓaŋkawuŋɔŋk sinɔ obiiŋɔŋk, yakanaɓa kirgeeɗ laŋiiɗ any sinɔ ɗegerɗɛɛŋɔŋk.

⁸Nɛɓa Paawuloos jumur pɛɛni nɛɛk kolanoŋk kɛ, "Kɛɛ tikiyɛ sigɔkan ijaaga higii Ayuuduk, maŋk Godeey sinaanɛ Geetitank, maŋk suumii Roomuk raŋk."

⁹Ɗɛyɛɓa Pistos kɛnɔ yaa joopa Ayuuduk nɛ jumur Paawuloosa kɛ, "Doomun kɛnɔ kɛɛɗin Yorsaleema nɔne kɛɛɗɛɛ pɛrɛdɛɛ pɛɛni sini sooy taamɛkɛ gaanɛkiŋ?"

¹⁰Nɛɓa Paawuloos jumur kɛ, "Ɛta taamɛkɛ barsum pirdiyoŋk suumii Roomuk kɛnɔ gunte pɛrɛdɛɛ any sinɛte laŋkɛɛk. Nɛte kɛɛ tikiyɛ sigɔkan ijaaga joope Ayuuduk raŋk, oko sinɛ seŋk ɗegerɗin jɛtik.

¹¹Ɔkɔn eet tikitan maŋk, ɔkɔnkɔ ijaaga tikiyɛ sigɔ goopaagiɗɛ retkiŋ, nɛkaa toniiɗ kɛ in bɔda ret. Mayakana ɔkɔnkɔta daariyɗi sɔkɔn, nɛ kɛɛ iɗit sinɔ oolɛ ati gaɓɛ sɛɛgak. Kalɛyakɔ saak Keesaar kɛnɔ kɛɛ dɛnɛ tikiyɛ gaaŋk."

¹²Saaɓak waasiɗiiɓa Pistos a saakomak gɛɛŋk agut omoŋ, nɛɓa tonu Paawuloosa kɛ, "Dɔɔs. Ɔkɔnkɔ kalɛyin Keesaar kɛnɔ kɛɛ dɛnɛ tikiyɛ gooŋkuŋ." Nɛkɔɔ kɛɛɗin son Keesaarkiŋ.

¹³Ɗoŋikɛ sigɔɔgɛ tekeriŋɔŋk baŋiya, suumi Agirpaa a Bɛrnikee kurakɓa Keesaariyaaka nɛ tonur Pistosa kɛ, "Dɔɔs saa mɛlkiɗin bɔdɛɛɗik."

¹⁴Agut sinɔɓa beeɗirɗi saadi a ɗoŋ ɓɔɔkaaŋɔŋk nɛɓa Pistos yaaŋɛ pɛɛni Paawuloosuk suumiya Agirpaa kɛ, "Lakɛ iɗit a omoŋ sinɔkan ŋɔr Pilkis korkoɗɔɔn seedik.

¹⁵Saakan arkiɗa Yorsaleemek, nɛkan ɔɗɔweer tapa ŋaadiyɛɛkoŋk a gutarɛyɛ joop Ayuuduk, yaaŋɛr pɛɛni iɗit sinik, nɛkanti kɔɔniyar kɛnɔ pɛrɛdɛɗa."

¹⁶Yakanakan jumura sɛɛga kɛ, "Moko barɛ joop Roomuk sinɛ gaɓɛɛɗɛ iɗit sinɛkɔ daariyɗiigiɗɛɛk, a in kɛɛ waasiyɛ kolanoŋk sigɔ waasɛk agut any sinɛkɔ daariyɗiigiɗɛ sɛɛnak, kɛnɔ ɛtɛr a iɗit sinɛkɔ daariyɗiik agut omoŋɔŋk.

¹⁷Agut sini saakan tolɗiɗ joop sigɛkan daariyɗiik nɔ kurak seenak nɛkan alɛ nɛɛkɛ dokaaɗe barsum pirdiyoŋk a kaa gaalaat, nɛ tona kɛnɔ widikɛ Paawuloos taamɛka gaanak.

¹⁸Nɛkan joop sigɛkan daariyɗiik ɛtɛr sɛɛne jɔkuk, nɛkan kirki wideeɗ any sinɔ ɗegeera a daariyɗiigiɗɛɛŋɔŋk, okosinɛkan koɓiɗa kɛ ijaagkan tikiyɛɛk.

¹⁹Nɛkan palalamar Paawuloos a sɛɛg agut ŋaadiyɛ gɛŋk, a iɗit sinɔ riyɛ kɛ Yeesee sinɛkan rɛrk, ma sɛŋk Paawuloos tonu kɛ ɓɛɛlɛ wɛɛŋakɛ.

²⁰Agut sinɔtu ooɗɛɛɗ mermenɔn any sinɔ ɛtɛ oko sinikŋɔŋk, nɛkan tona Paawuloosa kɛ, 'Doomun nɔ kɛɛɗin Yorsaleema nɛne kɛɛɗɛɛ pɛrɛdɛɛ sooy agut any siniŋ?'

²¹Yakana agut sinɔkan sɛŋk ɗɛyɛɛɗ Paawuloos a in dɛngeeɗ tikiyɛ gɛɛŋk suumi Roomuk, nɛkan tona kɛnɔ beeɗikun godeey korkoɗɔɔnoŋk mɛlɛɛɗa nɔkɔɔ wosɛyɛɛɗa son lak Keesaarik."

²²Nɛɓa Agirpaa tonu Pistosa kɛ, "Ɗɛya ɓɔra a tiya saa tonɗiiɗ iɗit sinikiŋ." Nɛɓa tongeeɗ Pistos kɛ, "Tiyinkɔɔ alɛ."

²³Nɛɓa alɛ nɛɛkɛ Agirpaa a Bɛrnikee kurak eemɛyɔɔn sinɔɔnɛ obiiŋɔŋk a tuunɛyɛrki sɛɛg ɔɗɔweer amaasiniyɛɛkoŋk, a joop sigɔ boobɛr katamɛɛ nɛɛkɛkik nɛ guugunyar godeya sinɔɔna bakaanyŋɔŋk tolɛɛɗoŋk. Nɛɓa Pistos riyiri Paawuloos.

²⁴Nɛɓa tonu Pistos kɛ, "Iin suumi Agirpaa, a ɓɔrɛ iinak joop sigi ɓɛɛlɛr seedik baŋɛ, dɛnɛɛr iɗit siniŋ! Joop Ayuuduk sigɛ atu katamɛɛ sineenek a Yorsaleemek kalɛyir kɔtu a ooyɛr kɛ kiigeeɗ ɗɛyɛɛ a beeɗ iɗit sini wɛɛŋakɛɛŋ a tukiɗi sisɔ.

²⁵Nɛkan saak kiikiɗa laŋiiɗ tikiyɛ sigɔ goopaagiɗɛ retik. Agut sinɔkan kalɛyiɗ suumi Roomuk kɛnɔ dɛngeeɗ tikiyɛ gɛɛŋkik, nɛkɔ ruuma kɛ wosɛya son Rooma.

²⁶Yakana kɛɛ any sinɔ ɗegerɗa nɔ taapɛɛra son lak suumi naakik. Nɛkɔ widika sɛɛn taamɛka goŋk baŋɛ, a suumi Agirpaa kɛnɔ mermenɛɛ kɛ ɗɔm, ɛ oolɛ a laŋkiɗɛɛ any sinɔ taapaaŋɔŋk.

²⁷Agut sinɔ saa wosɛyɛɛɗɛ korkortan suumiya Roomuk a kiiɗɛ yaaŋɛɛt any sinɛkɔ daariyɗiiɗɛ sɛɛnak, dɛna nɛta gayi a gaagɛyikeen."