Read majang Ijaag Wosɛytaanakoŋk 26 Bible Online

Ijaag Wosɛytaanakoŋk 26 - majang bible

Ijaag Wosɛytaanakoŋk 26

¹Tonuɓa Agirpaa Paawuloosa kɛ, "Pɛgɛdɛɛkɔna kɛnɔ koolun ɛɛk nookkuŋ." Nɛɓa Paawuloos ker arin gɛɛŋk nɛ kol ɛɛk nɛɛk kɛ,

²"Iin suumi Agirpaa, yaata jɛt, saa kolɗa ɛɛk naak ɓenyse iine taamɛkɛk, agut any sinɛ kɔta daariyɗiigeeɗ joop Ayuuduk baŋɛk.

³Agut sinɔ ɗegerin seŋk barɛ a palamɛ joop Ayuuduk kɛ ɗɔm baŋɛ, nɛni kalɛya nɔta geleewun kɛ lɔt.

⁴"Ɗegerar joop Ayuuduk baŋɛ beeɗit naak a tukiɗi tɔɔnikent naakɛkiŋ. Ɗegerar beeɗit naak sinɛɓa beeɗiɗa joope gaanɛ a Yorsaleemekiŋ.

⁵Ɗegerarɓa nɛ ɔkɔn ɗɛyɛr waasɛtaaŋ, kɛ a tukiɗi tuki nɛɛkɛ beeɗaaɓa a eet iɗit Paarisik sinɔ joop sigɔ koorɛr higi naŋk sinɔ ɓaŋkawuŋɔŋk ŋaadiyɛɛkoŋkuk.

⁶Nɛ sisɔ ɛta seedi pirdiya, agut sinɔ ŋaadiɗa any sinɛɓa kuumɗigeeɗ Waakoyot ɔrɛyakaak.

⁷Ege any sinɛɓa tonu Waakoyot kɛ gaɓɛkoy komoyeera gaŋk sigɛ aarin a pɛɛyk sigɛ ugumer Waakoyota waawuy a kaayk, sinɛ kookorark kɛnɔkoy dɛnɛrɗik saa dusanɛɛɗɛk ŋaadiyɛ gɛɛŋk sɛɛg sigi. Iin suumi, daariyɗiita joop Ayuuduk agut ŋaadiyɛ sigi.

⁸Iinak joop Ayuuduk, kiir oolɛ a ŋaadiir kɛ boŋɗiik Waakoyot ret walasaŋ agut jikon?

⁹"Koɓakan saak kɛ gun ɓooya ŋaadiyɛ tiriya Yeesee Naajreetik oko sinɛ oolɛɗakiŋ.

¹⁰Ijajagaaɓa Yorsaleeme any sini. Boŋaɓa ɓaŋkawuka sooy lak ɔɗɔweer tapa ŋaadiyɛɛkoŋkuk, nɛɓa ara ŋaadtaanak a ɓɔɔkaaŋ a guugunyar godeya korkoɗɔɔnoŋk, nɛɓa ɓɔra dooma saaɓa ɓokorɗɛɛ sɛɛgkiŋ.

¹¹Araɓa agut ɓɔɔkaaŋ kɛnɔ goopɛɛ sɛɛg sinɔɔnɛ godeyi tolɛɛɗoŋk Ayuuduk kɛnɔ nyɔɔnar Yeesee. Ŋadaɓa sɛɛga jɛt, nɛɓa epaaya sɛɛg mɛlɛɛɗa katamɛɛka sigɔɔga atu walasik.

¹²"Boŋaɓa ɓeny omalte, ɓaŋkawuka a sekiyɛ sooy lak ɔɗɔwer tapa ŋaadiyɛɛkoŋk agut any sini, nɛ kɛɛɗa Dɛmaaskowa.

¹³Suumi naakɛ, saaɓa arkiɗa gopɛk dɛnaaɓa ɗaawan waawuy kɔɔr, sinɔ kaalɛ ɗaawan waawuyoŋkuk, a tipeyɗikik dari eete tookɛɛta a joope sigaagɛɓa kɛɛɗii agut omoŋɔŋk.

¹⁴Nɛɓa ɗiirii ɗooka eteŋk baŋɛ, nɛ tiya koŋgoy sinɔ tonu ad Ibiraysitik kɛ, 'Saaool! Saaool! Epapayinti agut jikon? Ɔkɔn epaayin eetiŋ, nɛ arin ɛɛk nook a meeŋ.'

¹⁵Nɛɓa kɔɔniya kɛ, 'Suumi naakɛ, iin wooɗ?' "Nɛta tonu kɛ, 'Eet Yeesee siniti epapayink.

¹⁶Ŋaari raŋana nɔ ɛtin. Yaaŋa kɔna ɛɛk kɛnɔnu daama kɛnɔta dakin a ijaagen nɔ waasin joopa any sinɛkɔ dɛnin agut eetik a sinɛkɔɔna yaaŋa ɔɗɔɔkak.

¹⁷Ebɔda kɔɔnu joope Israeelik, a joope sigaagɛ moko Ayuuduk, joope sigaaga kɔɔnu wosɛya son lak sɛɛgik.

¹⁸Arakɔɔnu kɛnɔ ɓuukun taamɛ gɛŋk, nɔ boŋkun sɛɛg nyuugur pɛɗɛrkaata kɛnɔ jumurkun sɛɛg ariit setanik son lak Waakoyok. Nɛkɔɔ sɛɛk laŋir tɔŋɔɗ tikiyɛɛkoŋk, nɛkoy laŋir nyon joope sigaagɛkan daamɛɛk kɔɔr agut ŋaadiyɛ eeteek.'

¹⁹"Suumi naakɛ Agirpaa, kaakan rootaan anta sinaana kanta yaaŋɛɛ darik.

²⁰Waasaakan jeemɛ nɛɛkɛ joopa sigaaga atu Dɛmaaskoweek, a ɓɔrɛ sigaaga atu ɗook Yorsaleemuk, a Yuudaak baŋɛ, a joop sigɛ moko Ayuuduk kɛnɔ weerik tikiyɛɛkɛ Waakoyota, ɛ kɛnɔ ijaagir any sinɔ ɗegerɗɛɛ kɛ weerikkɔ tikiyɛɛkɛ Waakoyotak.

²¹Gaamurkukanti joop Ayuuduk ma arka Godeey sinaanɛ Geetitank, nɛti ɗɛyɛr ɓokotiita agut any sini.

²²Kɔnyɛkanti Waakoyot nɔ mɛlɛɛɗa sisɔwa. Agut sini waasa joopa baŋɛ, a joopa sigaaga boobɛrk a sigaaga balaatuk, tona any sinɛɓa tonur joop pɛrkaakoŋk a Muusee kɛ dusanɛɛkoyŋɔŋk dakɛɗa.

²³Tonurɓa sɛɛk kɛ, 'Laŋkikoy Keresee rakatɛ, ŋaarkikoy ɔɗɔɔkɛ ret walasa sɛɛn. Nɛkoy yaaŋɛ pɛɗɛrka bɔdɛɛɗoŋk joopa Israeelik, a joopa sigaaga moko Ayuuduk.' "

²⁴Saaɓa Paawuloos toniiɗ sinik, nɛɓa Pistos tongeeɗ a ɗooruŋ kɛ, "Iin Paawuloos, a maraatinŋ, arini rɔɔriyɔn sinɛkanni rɔɔriyɗɛ jɛtik a maraatinŋ."

²⁵Yakanaɓa Paawuloos jumur kɛ, "Iin Pistos sinɛ eemɛyɛɛk, Kaa maraatɛt, ma tona any sinɔ eekeerik a likik.

²⁶Suumi naak Agirpaa sinɛ toniiɗa any sini taamɛkɛk ɗeger any siniŋ, tonɗiika taamɛkɛ gɛɛnɛ a kaa ɓuriit agut sinɔkan moko ijaagiiɗɛɛ any sini dugeeɗik ŋaada kɛ mɛlɛ tapaɗa nɛɛkaaŋ.

²⁷Suumi naakɛ Agirpaa, moko ŋaadin joop pɛrkaakoŋkuŋ? Ɗegera kɛ ŋaadin sɛɛgiŋ."

²⁸Nɛɓa Agirpaa tonu Paawuloosa kɛ, "Ɗɛyin ati arin a dooytan sise kɛ gonyuŋ?"

²⁹Nɛɓa Paawuloos tonu kɛ, "Kɛygun a jeeɗo, maŋk a diŋ ɔɔtɛ nɛɛkɛŋ, kalɛya Waakoyo kɛnɔ moko iin dakɛɗa joop sigɛta geleewɛr sisek baŋɛ kɛnɔkɔɔ ɓɛɛlɛr a ŋaadtaanak oko eet, korkoɗɔɔn naakɛ sɔgɔɔsɔyk."

³⁰Saadi baŋiya ŋaararɓa raŋana Agirpaa, a suumi sinɛ ɗookoŋk Bɛrnikee, a joop ɔgɔ sigɛɓa beebeɗar agut omoŋ,

³¹nɛ ŋaarar saadi, nɛɓa tonur ɛkanɛɛkɛ gɛŋk kɛ, "Iɗit sini kɛɛ any sinɔkɔ ijaagik sinɔ ɗegeera a rɛrgiɗɛ, maŋk korkoɗagiɗɛɛŋɔŋk."

³²Nɛɓa Agirpaa tonu Pistosa kɛ, "Ɔkɔnkɔ iɗit sini ki kalɛyit Keesaar kɛnɔ dɛngeeɗ tikiyɛ gɛɛŋkiŋ, gunkɔ ŋɔɗurɛɛ yaakaat."