Read majang Ijaag Wosɛytaanakoŋk 27 Bible Online

Ijaag Wosɛytaanakoŋk 27 - majang bible

Ijaag Wosɛytaanakoŋk 27

¹Saaɓa ruumeeɗii kɛ ŋaariikɔɔ emɗ Itaaliyaak, nɛɓa gaɓɛɛ Paawuloos a korkortaanak ɔgɔ ɔɗɔwenta amaasiniyɛ sigɔ ɗibɛk sinɔɔna riyɛ kɛ Yuliyosuk, ar sɛŋk pony amaasiniyɛɛkoŋk suumii Roomuk.

²Nɛɓa teeŋii emɗa sinɔɔna kus Adiramitiyonek sinɔɔna kɛɛ sinɔɔnɛ gɔrɔ sinɔ obiiŋɔŋk kɛntɛ nɛɛkik, dɛdɛrɛka sigɔɔga atu Isiyaakeek nɛ ŋaariiŋ. Aristirokoos sinɛ iɗit Mɛkedooniyaak sinɛ beeɗ Tɛsɛlonkeek sɛɛnɓa a eteŋk agut omoŋ.

³Nɛɓa alɛ nɛɛkɛ mɛlii Sidoonaa, nɛɓa mentan ɓayɛ Yuliyosuk Paawuloosaaŋ. Nɛɓa pɛgɛdgeeɗ nɔ lɛɛwɛ piraakak gɛɛŋk kɛnɔ kɔnyɛr sɛɛn oko sinɛ ɗɛygeeɗik.

⁴Nɛɓa ŋaarii saadi nɛ kɛɛɗii sinɔɔnɛ gɔrɔ sinɔ obiiŋɔŋk, nɛ raɓii asuulɛ Kopiroosuk agut sinɔɓa tine yoŋgoyɛɛɗ ɔɗɔɔkɛŋɔŋk.

⁵Nɛɓa ekaŋii gɔrɔ sinɔ obiiŋɔŋk sinɔ ar ɗokanɛkɛ Kilkiyaak a Pinpiliyaak jɔkuk, nɛɓa mɛlii katamɛya Muuraak sinaana ar ɗook Likiyaak.

⁶Nɛɓa saadi laŋki ɔɗɔwen sinɛ amaasiniyɛ sigɔ ɗibɛk emɗ sinɔ kus Iskindiriyaakeek nɛ kɛɛ Itaaliyaak, nɛ tin ari kɛnɔ teeŋgiɗii.

⁷Nɛɓa kɛɛɗii kɛ lɔt a ɗoŋ ɓɔɔkaaŋ nɛɓa pediya nɛɛka mɛlii katamɛya Kɛnidoosuk jɔka rakatɛɛ sinɔɔnɛ obiiŋɔŋk. Nɛɓa ɗoyii sinɔɔnɛ Sɛlmoona kɛntɛ nɛɛkik nɛ raɓii asuulɛ Kɛrteesik, agut sinɔɓa tin ariiɗ yoŋgoy nɛɛkɛ a kii deran ɔɗɔɔkak.

⁸Nɛɓa raɓii kɛntɛ nɛɛk nɛ mɛlii rakatɛɛ sinɔɔnɛ obiiŋɔŋk soona riyɛ kɛ dɛdɛr Sinɔ Mentanŋɔŋk, arɓa katamɛ Laasiyaak saadi jɔk.

⁹Ɗoyuɓa tine ɔɔtɛ a jeeɗoŋ, nɛɓa tin ooɗɛ ŋawit gɔrɔ sinɔ obiiŋɔŋk agut sinɔɓa ɗoyiɗ ɔɔtɛ soomukŋɔŋk. Nɛɓa sɛɛga rɔɔrɔka Paawuloosuŋ kɛ,[3]

¹⁰"Iinak joop sigi! dɛna a kɔɔ ŋawit naŋk laŋkii rakatɛ sinɔ obiiŋɔŋk, moko emɗ nɛɛk a ola sigɛ lakik dakɛɗa, laŋirkikɔɔ ɓɔrɛ wɛɛŋa gaŋk rakatɛŋ."

¹¹Yakana toniiɗ sineenekan tonu Paawuloosuk nɛɓa ɔɗɔwen sinɛ amaasiniyɛ sigɔ ɗibɛk gelewugeeɗ any sinɛ tonu iɗit sinɛ kɛɛwuɗik a ɗumaat emɗa nɛɛkaak kɛ ɗɔm.

¹²Agut sinɔɓa dɛdɛr sinɛ kiiɗ yaaka a kaalɛ baŋgi saadiŋɔŋk, nɛɓa joop a ɓɔɔkaaŋ ɗɛyɛr kɛnɔ ɔkɔn gayɛŋ nɛgun ŋaarii nɔ kɛɛɗii kaalii baŋgi dɛdɛr sinaanɛ riyɛ kɛ Pinkeek sinɛ ar Kɛrteesek goyse ɗiɗikakaak a goyse ɗiirirgeeɗ waawuyk.

¹³Saaɓa yoŋgoyɛɛɗ yoŋgoy gɔɔ sini ɗiɗikaak sinɔ balaaŋɔŋkuk, nɛɓa gayi sɛɛga a kɔɔ ɓɛɛlɛ oko sinɛkɔ koɓurɗuk, nɛɓa ɓɔŋgɔɔrɛrki awɛytiir sigɔ ɗilatuŋɔŋk sigɔ kaaɓiɗɛ emɗuk nɛ ŋaarar asuulɛɛ nɛɛkɛ nɛ ɗoyur sinɔɔnɛ Kɛrteesik jɔkoŋk nɛ raɓɛr kɛntɛ nɛɛk.

¹⁴Yakana ɔɔtɛ sinɔɔnɛ dinyŋɔŋk baŋiya, ŋaarkiɓa asuulɛɛ nɛɛkɛ yoŋgoy sinɔ ɓaŋkawuŋɔŋk sinɔ riyɛ kɛ Yoŋgoy gɔɔ sini Kantunaak nɛ mɛlki sɛɛga gɔrɔwa sinaana obiiŋɔŋk.

¹⁵Agut sinɔɓa yoŋgoy nɛɛkɛ gaamiɗ emɗ nɛɛkik, nɛɓa ki oolɛ a direer ɛɛk son lak yoŋgoy nɛɛkkiŋ, nɛɓa ŋɔɗii gopan nɛ tin diile yoŋgoy nɛɛk.

¹⁶Nɛɓa kɛɛɗii a raɓii asuulɛ sinɔ tɛmŋɔŋk riyɛ kɛ Keedak, nɛɓa gaamii emɗ togonoŋk rakatɛɛ. Nɛɓa oolii a ikomii seek.

¹⁷Saaɓa ijaager emɗ nɛɛkik puruuteetarkiɗ emɗ sinɛ togonoŋk emɗa nɛɛkaakik baŋiya, nɛɓa emɗ nɛɛkɛ marɛrɗi melt emɗ sinaanɛ obiik tookɛɛta. Ɓurerɓa any sinɔ kat emɗ nɛɛkɛ ɗiiriri nyona sinɔɔna riyɛ kɛ Sirtisik soona ɓɛɛlɛ a kɛɛwɛɛk, nɛɓa woorurkuɗ abii sinɛɓa kerɛɛ emɗ nɛɛkɛkik nɛ kaar a diile sɛɛg yoŋgoy.

¹⁸Nɛɓa tina yoŋgoy nɛɛkɛ siisipikiŋ, nɛɓa alɛ nɛɛkɛ diil sinɛɓa diilɛɛ emɗ nɛɛkɛkik tuker a o'ortar sɛɛg gɔrɔwa sinaana obiiŋɔŋk.

¹⁹Ɗoŋikɛ jiiteene nɛɛkɛ, o'ortarɓa ola sigɛ kɔnyɗi emɗa nɛɛkaakik sɛɛg ɗuma gɔrɔwa sinaana obiiŋɔŋk.

²⁰Kiiɓa taanta waawuy maŋk maryɔ a ɗoŋ ɓɔɔkaaŋ, nɛɓa ɛnyɛnyɛ yoŋgoy nɛɛkɛ a ɓaŋkawuŋ, nɛɓa jibaatii sinɔɔnɛ bɔdiikoyɓɔ seedi son.

²¹Beeɗirɓa joop gɛɛnɛ a ɗoŋ ɓɔɔkaaŋ a kɛɛ any sinɔ ɗamark, nɛɓa Paawuloos ɛtɛ sɛɛge kɔɔr nɛ tonu sɛɛga kɛ, "Iinak joop sigi, ɔkɔnkɔ tiyɛɛr any sinɛkɔ kɔna tonaak ɛkɔ kirkɔ ŋaarin Kɛrteeseŋ, gunse kirkɔ laŋiiɗ rakatɛ sini, a sɔɔkiyɛ sigi baŋɛ.

²²Kɛɛ any, gaanaana kɔnu sisɔ kɛ kat ɓuriikɛɛ. kɛɛ iɗit sinɔkɔɔ badɛ iinakɛk, makɔɔ sɔɔkiɗi emɗ nɛɛk dakɛɗa.

²³Kaaltkɔ alɛk ɛtɛkɔ eete wosɛytan Waakoyo sinɛ eet nɛɛkik ɛ ugumguɗaak jɔk,

²⁴nɛta tonu kɛ, 'Iin Paawuloos, kat ɓuriikin. Ɗɛyɛna a ɛ tin taamɛkɛ Keesaarikiŋ. Gaɓɛkɔna Waakoyot joop sigɛ kaar a iin agut omoŋɔŋk baŋɛ.'

²⁵Agut sini iinak joop, kɛɛ any. Ŋaada Waakoyo kɛ ijaagkɔɔ any sini kɔta tonukuŋ.

²⁶Yakana diilekɔɔtin yoŋgoy nɛɛkɛ nɛ tin oriir asuulɛya omalta kɛntɛya."

²⁷Kaalt aarin a aŋane nɛɛkɛk, kɛɛɗiiɓa sinɔɔnɛ gɔrɔ sinɔ obiiŋɔŋk Meditiraniyaanik raŋan nɛɛkik a tin winysɛsɛy yoŋgoy, nɛɓa ijaager amɗ nɛɛkɛkik kaalt koor koɓur kɛ woontu walasa.

²⁸Nɛɓa oriitar melt sinɔ looloɓɛɛɗɛɛ ɓukurka gɔrɔwoŋkuk, nɛɓa laŋirki ɓukurka nɛɛk a meetera pɔlpɔlɛ joop pɛɛyk. Nɛ beeɗir a balaaŋ nɛ oriitar any sinɛ looloɓɛɛtoŋk kɛkar, nɛ laŋirki ɓukurka nɛɛk a meetera ruumer iɗit a aarin.

²⁹Nɛɓa ɓurer ijaager emɗ nɛɛkik any sinɔ kat dumamani emɗ nɛŋk a giɗeek sigɛ atu goroo nɛɛkɛ kɛntɛɛk. Nɛɓa emɗ nɛɛkɛ goysɔ baŋiyaak oriitar awɛytiir sigɔ ɗilatuŋɔŋk sigɔ kaaɓiɗɛɛ emɗuk a aŋan gɔrɔwa nɛɛka. Nɛɓa tuker ɗanɗamɔn kɛnɔ aayirki sɛɛga.

³⁰Agut sinɔɓa ijaageer sigɛ emɗ nɛɛkik ɗɛyɛrkɛyɗ togonk, nɛɓa ŋaarark emɗ nɛɛkɛ walasa, koɓurkɛɓa kɛ oriitar awɛytiir sigɔ ɗilatuŋɔŋk sigɔ kaaɓiɗɛ emɗuk gɔɔtaasɔ ɔɗɔɔkak, ma kaɗan oriitar emɗ togonoŋk sinɛkan ar takik.

³¹Tonuɓa Paawuloos ɔɗɔwenta amaasiniyɛ sigɔ ɗibɛk a amaasiniyɛɛka gɛɛna kɛ, "Joop sigi ɔkɔnkɔɔ kir dokiiɗe emɗ nɛɛkɛ takiŋ, nɛkɔɔ kiir oolɛ a bɔdɛɛriŋ."

³²Nɛɓa amaasiniyɛ gɛɛnɛ yawɛr melt sinɛɓa lak emɗ togonoŋk, nɛɓa ŋɔɗutar kɛnɔ lɛɛliya maawɛ gɛɛnɛ raŋk.

³³Saaɓa kolɛɛtak kalɛyiɓa sɛɛg Paawuloos kɛnɔ ɗamar ɗama sɛɛg baŋɛ, nɛɓa sɛɛga tonu kɛ, "Beeɗiirkɔ a kookorikari a ɗoŋ aarin a aŋan a kiir ɗamit.

³⁴Nɛkɔnu kalɛya kɛnɔ ɗamari ɗama nɔ bɔdɛɛriɗ. Gaɓɛkɔɔ kɔna ɓaŋkawuka kɛɛ aasi any sinɔ meeŋɔŋk sinɔkɔɔ laŋirkɔɔk adaktan."

³⁵Saaɓa toniiɗ sinik baŋiya, nɛɓa ɓɔŋgɔɔrɛ kiiwu nɛ pɔɔsɛ Waakoyo sɛɛge baŋɛ taamɛkɛ nɛ ŋapati nɛ tuke ɗama.

³⁶Nɛɓa gaananɛr ɛɛk nɛ ɗamar ɗama sɛɛg baŋɛ.

³⁷Geeɗiiɓa ɗibɛɛ pɛɛy a pɔlpɔlɛ joop jiitik a aarin a tula om emɗ nɛɛkɛ tak.

³⁸Saaɓa ɗamiɗik nɔ ɓooɗorark baŋiya, nɛɓa oriitar ɗama sinɛɓa ar takik gɔrɔwa sinaana obiiŋɔŋk nɛ arir emɗ nɛɛk a pɔyɔɔwurŋ.

³⁹Saaɓa aayirkiɗik kirɓa ɗegerɔɔn saanɓa mɛlɛrgeeɗik, yakanaɓa dɛnɛɛtar kɛɛwɛ kɛntɛ nɛɛk soon kiiɗɛ giɗeek, nɛɓa ruumer kɛ ɔkɔn gayɛŋ gun diiler emɗ nɛɛk saana.

⁴⁰Nɛɓa yawɛɛtar awɛytiir sigɔ ɗilatuŋɔŋk sigɔ kaaɓiɗɛɛ emɗuk nɛ ŋɔɗutar sɛɛg gɔrɔwa sinaana obiiŋɔŋk. Woorurɓa melti sigɛ any kɛɛwɛɛtoŋkuk sisa a abii sinɛɓa kerɛɛ emɗ nɛɛkɛkik sinɛ ar goy sinɔɔnɛ ɔɗɔɔkak ɓɔŋgɔɔrɛrɓa yoŋgoya, nɛɓa kaar kɛnɔ ŋaartar gɔrɔwa sinaana obiiŋɔŋk kɛntɛya.

⁴¹Yakanaɓa emɗ nɛɛkɛ dumamani a kɛɛwɛ sinɔ bosiɗiŋɔŋk nɛɓa gupatɗiŋ, nɛɓa dakɛ goysɔ ɔɗɔɔkak kuŋguruusii a ki ɓeesiɗiit, nɛ goyse baŋiyaak tuke a ɓadaayaaŋ agut sinɔɓa direeɗ beliyaŋ nɛɛkɛkik.

⁴²Koɓurɓa amaasiniyɛ gɛɛnɛ kɛ gun ɓokootar korkortaanak gɛɛŋk baŋɛ kɛnɔ aasi kat lakɛ sinɔ omoŋɔŋk ley nɔ bɔdɛk.

⁴³Yakana ɔɗɔwen amaasiniyɛ sigɔ ɗibɛk kiɓa boŋiiɗ koɓi nɛŋk, agut sinɔɓa ɗɛyɛɛɗ Paawuloos a bɔdɛŋɔŋk. Nɛɓa tonu kɛnɔ tetemarki joop sigɛ oolɛr teleyk emɗ nɛɛkɛ gɔrɔwa sinaana obiiŋɔŋk jeemɛ kɛnɔ ŋaarar walasa,

⁴⁴ma sigɛ ŋayɗiikik ŋaararki parakɛ sigaagɛkan ŋuuŋuliikik a ola sigɛ lak emɗ nɛɛkɛ walasa. Nɛɓa mɛlɛrki baŋɛ a ɓɛɛlɛr bɔdɛɛɗ oko sinik.