Read majang Ijaag Wosɛytaanakoŋk 28 Bible Online

Ijaag Wosɛytaanakoŋk 28 - majang bible

Ijaag Wosɛytaanakoŋk 28

¹Nɛɓa mɛlii walasa bɔdɛɛɗ, nɛɓa ɗegerii asuulɛ sinɛkɔ mɛlgiɗiik kɛ riyɛ kɛ Maltaa.

²Joop sigɛ beeɗir asuulɛɛ sinaanɛk ijaagirɓa tina mentanka sinɔ reemɗi ɓayɛk. Agut sinɔɓa ɛɛkɛɛɗ tulk nɛ saloŋɔŋk, nɛɓa adir maɗ nɛ tin boŋurŋ.

³Nɛɓa Paawuloos tolɛ temaak nɛ oriir sɛɛg maɗa, nɛɓa ŋaarki kooko agut paakan nɛɛk, nɛ gaamɗitargeeɗ nɛ lallawiɗ ariit.

⁴Saaɓa dɛnɛrɗi joop maltaak kooko a lalalawi ariit Paawuloosuk, nɛɓa tonur ɛkanɛɛkɛ gɛŋk kɛ, "Ege sini iɗit sinɔ ɓokokotiiŋɔŋk eekeerɛ. Kɛygunkɔ ŋaaraakɛ goroo sinɔɔnɛ obiiŋɔŋk bɔdɛɛɗiŋ, kikoy bɔdɛ pirdii Jookoŋk nɔkoy oolɛ nɔ beeɗ wɛɛŋakɛ."

⁵Yakanaɓa Paawuloos oriir kooko nɛɛk maɗa, aɓa kiik laŋiiɗ soon meeŋɔŋk.

⁶Nɛɓa koorɛr joop kɛ ŋayorkɔɔ ɛɛk nɛɛkɛ sise, maŋk ɗiirikɔɔ reta a gorgorŋ. Yakana saaɓa koorɛrɗi kɛ manyk nɛ dɛnɛr a kɛɛ rakatɛ sinɔ laŋkik, nɛɓa weerɛr koɓiɗak gɛŋk nɛ tonur kɛ, "Ege sini joo."

⁷Saadiɓa arkiɗiik jɔk, lakɛɓa ɗoo iɗit Pupiliyoos sinɔ ɔɗɔwen asuulɛ nɛɛkik. Nɛɓa tin boŋu nyaka nɛɛka nɛ tin wɔɔrɛ a mentanŋ a ɗoŋ jiit.

⁸Saaɓak ɛpɛn Pupiliyoosa goruɓa paakan ɛɛkoŋk a paayan nɛ ɗuɗuŋɗe, nɛɓa Paawuloos guugunyuru son lak sɛɛnik nɛ ɗanɗamaaɗiŋ nɛ riiɓeeɗ ari nɛ ebɔdɛŋ.

⁹Nɛɓa saadi baŋiya, kurak gortaanak ɔgɔɔk sigɛ beeɗir asuulɛɛ nɛɛkɛkik nɛ bɔdɛrŋ.

¹⁰Eemɛyarɓa tin joop gɛɛnɛ a tina ɗɔkarki tigi sinɔ obiiŋɔŋk. Nɛ saaɓa kopaayɛɗii kɛnɔ ŋaarii emɗik, nɛɓa tina gaɓɛɛtar emɗa any sinɛ tina ɗɛyɛk baŋɛ.

¹¹Nɛkan beeɗii a ɛyɛkeer jiit, nɛ ŋaarii emɗ sinɔɔnɛ kus Iskindiriyaakeek, sinaanakan kaalɛ baŋgi nɛɛk asuulɛɛ Maltaak, lakɓa sɛŋk yaaŋtan diyoskorosuk sinɔ riyɛ kɛ Jookak sigɔ Olakaanakik.

¹²Nɛɓa mɛlii katamɛya Sirkusuk, nɛɓa beeɗii saadi a ɗoŋ jiit.

¹³Nɛɓa saadi ŋaarii nɛ mɛlii Regiyuuma. Nɛɓa alɛ nɛɛkɛ, lakɛ yoŋgoy sinɔ kus goyse ɗiɗikaak. Nɛɓa anytinaan nɛɛkɛk kɛkar, mɛlii Putiyoluusa.

¹⁴Nɛɓa laŋkii dooytaanak sigɔ tin kaaɓur kɛnɔ beeɗii a sɛɛg agut omoŋ a ɗoŋ tula pɛɛy, nɛɓa ŋaarii Rooma.

¹⁵Nɛɓa tiyɛr dooytaanak gɛɛnɛ sigɛ atu Roomeek agut eteŋk, nɛɓa kurak mɛlɛɛɗa Gabiyeya Apiyoosuk a soona riyɛ kɛ Nyonitaak Ɗeegarɔɔnoŋk sigɔ Jiitik kɛnɔ tin boŋur. Nɛ saaɓa Paawuloos dɛnɛɛɗ sɛɛgik, nɛɓa pɔɔsɛ Waakoyo, ɛ gaanaanɛ ɛɛk nɛɛk.

¹⁶Saaɓa mɛlɛɛɗii Roomaak, nɛɓa pɛgɛdɛɛ Paawuloosa kɛnɔ beeɗ mowan nɛɓa gagiɗɛɛ amaasini sinɔ koorɛ sɛɛnŋɔŋk.

¹⁷Saaɓa mɛlɛɛɗ Roomaak ɗoŋikɛ sigɔɔgɛ jiitik baŋiya, riyɓa Paawuloos ɔɗɔweer Ayuuduk. Nɛɓa tolɗi, nɛ tonu sɛɛga kɛ, "Iinak manyaakak eeta, kɛɛ tikiyɛ sigɔkan ijaaga joope Israeelik a barɛɛɗ ɔrɛyak gaŋkik raŋk, makanti korkoɗɛɛ Yorsaleeme nɛkanti gaɓɛɛ joopa Roomuk.

¹⁸Nɛɓati mermenar nɛɓa ɗɛyɛrkɛ a guntu ŋɔɗutar sɔkɔn, agut sinɔ kante kirkiɗ laŋiiɗ any sinɔ goopaagidɛ retik.

¹⁹Yakana joop Ayuuduk ɓooyurkan saa guntu ŋɔɗurkuɗɛ sɔkɔnk, nɛkanti remɛr kɛnɔ kalɛya Keesaar nɔta dɛnɛ tikiyɛ gaaŋk. Makante kɛɛ any sinɔ daariyɗiiɗa joopa gaanakik.

²⁰Riya kɔnu nɔkɔnu dɛna nɔkɔna tona any sini. Korkoɗɛɛkɔtu meltikɛ awɛytiiroŋk agut ŋaadiyɛ sigɛ kookorɛɛk sigɛɓa gaɓɛɛ joopa Israeelik."

²¹Nɛɓa sɛɛk jumurargeeɗ kɛ, "Kiikikan tina mɛlɛɛ wargatɛ sinɔkan taapɛɛ agut pɛɛni nookuk ɗook Yuudaak, joope sigaagɛkan kurak seenak kɛɛ iɗit sinɔkan tonu any sinɔ ŋɛɛwɛnŋɔŋk agut iinik.

²²Pakattan ŋaadiyɛɛkoŋk sigi nomɛɗink ɗegerii kɛ ɓooyur joop nyonitaakɛŋ, agut sini ɗɛyii a tiyii koɓi nook kɛ ɓɛɛlɛ ɛkiŋ."

²³Agut sini gaamurɓa waawuy, nɛɓa kurak nyaka nɛɛka a ɓɔɔkaaŋ. Nɛɓa sɛŋk yaaŋɛ sɛɛga koɓi nɛɛk a sɛɛga waasɛ agut burɛ Waakoyotoŋk a tukiɗi romiɗ mɛlɛɛɗa ajigeya. Yaaŋɛɓa sɛɛga agut Yeesee a mermenki Wargatɛɛ Higi Muuseek a Joop Pɛrkaakoŋkuk.

²⁴Joop a omoŋ omoŋ ŋaadirɓa any sinɛ tonukuŋ, ma ɔgɔɔk kir ŋaadit.

²⁵Nɛɓa sɛɛk pakakati a kir mɛyit. Saaɓa Paawuloos tonɗiiɗ pediya nɛɛkaakik, a inɓa kir pakakatiit nɛɓa tonu kɛ, "Liki pɛɛni sinɛɓa tonur Wɛɛŋa sigɔ Geetitaanakik ete pɛrkaakoŋk Isaayaseek ɔrɛyaka goŋkuk.

²⁶Tonuɓa kɛ, 'Mak son lak joop sigik nɔ kɛɛɗin tonun sɛɛga kɛ, Tiyan tiiɗikariŋ, nɛ kiir koɓiiɗ. Dɛnɛ dɛnɗiikariŋ, nɛ kiir mermenɛɛ.

²⁷Joop sigi ɓɔɔkaak kilararɓa ɓayɛtun gɛŋkiŋ, kir tiiɗit ween gɛŋk, minyerɓa taamɛ gɛŋkiŋ kɛnɔ kat dɛnɗi. Ɔkɔnɓa ki ɓɛɛlan oko sinikiŋ, gunɓa dɛnɛr taamɛkɛ gɛŋk, ɛ tiyɛr weenɛ gɛŋk, ɛ koɓur ɓayɛtunɛɛkɛ gɛŋk, nɛ gunɓa weerik son lak Eetik, nɛ gunɓa ebɔda sɛɛgiŋ.'

²⁸Sisɔ, in ɗegerɛɛ kɛ wosɛykɛɛkan wosɛ bɔdɛɛɗoŋk Waakoyotoŋk joopa sigaaga moko Ayuudukuŋ, nɛkoy sɛɛk boŋur a arirgeeɗ kɛ dɔɔs!

²⁹[Saaɓa toniiɗ sinik, nɛɓa joop Ayuuduk palamɗi ɛkanɛɛkɛ gɛŋk jɛt nɛ ŋaararŋ.]

³⁰Beeɗɓa Paawuloos godeey sinaanɛɓa kɛraayɛk a emeyi pɛɛy baŋɛ. Nɛɓa boŋu joop sigɛɓa kurak son lak sɛɛnik baŋɛ.

³¹Waasiɗiiɓa agut burɛ Waakoyotoŋk, rɔɔriyaaɓa agut Suumi Yeese Keresee, a kɛɛ iɗit sinɔ ɓaarɗi sɛɛnik a ki ɓuriit.