Read majang Ijaag Wosɛytaanakoŋk 3 Bible Online

Ijaag Wosɛytaanakoŋk 3 - majang bible

Ijaag Wosɛytaanakoŋk 3

¹Ɓeny omalte, kaarɓa Petros a Yowanis Godeya sinaana Geetitank ma sayitiyɛ tula aŋan waawuyoŋk, sayitii ɗanɗamɔɔnoŋk.

²Lakɛɓa iɗit om sinɔɓa ɓɛɛlɛ a nyɔŋtan a tukiɗik saaɓa ɓartɛɛɗɛɛk. Nɛɓa ɗɔɗɔkarki joop ɓɛɛnyɔwɛ gɛɛŋk baŋɛ nɛ ririɓar tugaat masarɛ Gode sinɛ Geetitank sinɔ riyɛ kɛ Tuga sinɔ Mentanŋɔŋk, kɛnɔ kalɛlɛy wori joope sigaagɛ guugunyar Godeya sinaana Geetitank.

³Nɛɓa iɗit sini dɛnɛ Petros a Yowanis saa guugunyarɗ Godeya sinaana Geetitank, nɛɓa kalɛyi sɛɛge wori.

⁴Nɛɓa Petros a Yowanis mermenar kɛ ɗɔm, nɛ tongeeɗ Petros kɛ, "Kolɛɛnya sen lak eteŋkik."

⁵Nɛɓa iɗit sinɛ mermen sɛɛg kɛ ɗɔm nɛɓa koɓkɛ kɛ gijer sɛɛn wori.

⁶Yakanaɓa Petros tongeeɗ kɛ, "Kɛɛte taamuniyɛ a worke, mayakana gaɓaakɔɔna any sinɛ lakakiŋ. Teŋa raŋana nɔ ŋawiitin tiriyaakɛ Yeese Keresee Naajireetik!"

⁷Nɛɓa gaamu ari nɛɛk gɔɔ sinɛ ɗiɗikik nɛ ɓɔŋgɔɔrɛŋ. Nɛɓa sisa ɓaŋkaawurar derak gɛɛnɛ a bɔgɔɔwak gɛɛŋkiŋ.

⁸Nɛɓa ɛtɛ raŋana kɛ sɛm. Nɛ ŋaarar a sɛɛg agut omoŋ Godeya sinaana Geetitank, aɓa ŋawite, a utaalɛ, a pɔɔpɔs Waakoyo.

⁹Nɛɓa dɛnɛr joop baŋɛ a ŋawite a pɔɔsɛ Waakoyo.

¹⁰Ɗegerarɓa kɛ ege sini iɗit sinikɔ beeber a kalɛlɛy wori tugaat masarɛ Gode sinɛ Geetitank sinɔ riyɛ kɛ Tugaat sinɔɔnɛ Mentanŋɔŋkuk, nɛɓa reemɗi sɛɛg ɓayɛtun a ŋaatir jɛt agut any sinɛɓa ijaagɛɛ ete sinaanɛk.

¹¹Iɗit sinɛɓa bɔdukuk, saaɓa gaamiɗ Petros a Yowanis kɛ ɗɔm kɛ kii sɛɛg pakakatiitik, nɛɓa joop baŋɛ reemɗi ɓayɛtun gɛŋk, nɛ reerki nɛ kurak son lak sɛɛgik soona riyɛ kɛ Nyon Weeweeroŋk Salamoonuk.

¹²Saaɓa Petros dɛnɛɛɗ joop gɛɛŋkik, nɛɓa tonu sɛɛga kɛ, "Iinak joop Israeelik, reemɗi kɔnu ɓayɛtun agut any sini agut jikon? Mermenari tin agut jikon koɓiir kɛ ijaagiikɔ iɗit sini a ŋawiiteŋ ɓaŋkawukaat naŋk, maŋk mentankaat naŋk?

¹³Waakoyo ɔrɛyak gaŋkik, Waakoyo Abrahamuk, a Isiyaakik, a Yaykoobuk, eemɛyɓa Tɔɔn nɛɛk Yeeseeŋ. Yakanakan sɔɔk gaɓɛɛr kɛnɔ ɓokotɛ, ɗɛykɛkan sɛŋk Pilatoos kɛnɔ gun ŋɔɗuruɗ nɛkan toniir taamɛkɛ Pilatoos kɛ, 'Kii ɗɛyɛɛ.'

¹⁴Kalɛyiirkan sɔɔk kɛnɔ kɔna ŋɔɗurɛ iɗit sinɔ ɓokokot joopuk, ma toniir kɛ kii ɗɛyɛ iɗit sinɔ Geetitank ɛ Mentan taamɛkɛ Waakoyotoŋkuk.

¹⁵Ɓokotiirkan iɗit sinɔ gaɓɛ wɛɛŋakiŋ, yakanakan Waakoyot boŋku ret walasa. Eteŋk misikiriyɛ any sinik.

¹⁶Iɗit sini dɛnɛɛr ɛ ɗegerarik bɔdukukɔ ŋaadiyɛɛkɛ sigaagɛ laŋɛɛ tiriyaakɛ Yeeseek, agut sinɔkɔ ŋaadiɗiiɗ tiriyaakɛ Yeeseek, nɛkɔ laŋ bɔdɛ sinɔ pedtank iinakɛ baŋɛ taamɛkɛ.

¹⁷"Kɛkar iinak manyaakak eeta, ɗegera kɛ ijaagiirkan any sinɛkan ijaagiir Yeesee raŋk, a kiir ɗegerɔɔn oko ɔɗɔweer goŋk.

¹⁸Yakanakan Waakoyot ijaag kɛnɔ dusanɛɛ pɛɛni, sinɛɓa tonu jeemɛ joope pɛrkaakoŋk baŋɛ, kɛ Keresee ɗɛygeeɗ a laŋk rakatɛk.

¹⁹Sisɔ kɛnɔkɔɔ kɔne ranyjɛɛrɛ tikiyɛ goŋk in weeriikɛ tikiyɛɛkɛ goŋk, nɔ weerikɛɛ son lak Suumik.

²⁰Mɛlkikoy kɔna eme sinɔ ariɗɛɛ ola a tɔɔmɔkuk sooy lak Waakoyok, wosɛykikoy kɔna Yeese Keresee sinɛɓa daam iinaka jeemɛk.

²¹Beeɗ sɛŋk dari mɛlɛɛɗa nɔkoy ariiɗɛɛ ola baŋɛ a tɔɔmɔkuk, oko sinɛɓa toniiɗ Waakoyot jeemɛ joope gɛɛnɛ pɛrkaakoŋk sigɔɔgɛ geetitaanakik.

²²Tonuɓa Muuse kɛ, 'Suumi noŋk Waakoyo ɓɔŋgɔrkukoy iinakɛ kɔɔr iɗit Pɛrkaakoŋk oko sinɛ kanti ɓɔŋgɔrkuɗuk. In koy tiyɛɛ any sinɛkoy kɔna tonuk.

²³Iɗit sinɔkoy ki tiiɗit eta sineena Pɛrkaakoŋkuk in badɛ joope gɛɛnɛ kɔɔr.'

²⁴"Joope pɛrkaakoŋk baŋɛ a tukiɗik Saamueele, sigɛɓa ɓɛɛlɛr sɛɛge baŋik tonurɓa ɓɔrɛ oko sinɛk agut eme sini.

²⁵Iinak joop sigɔ boŋur nyon joop pɛrkaakoŋkuk, a ɓɔrɛ tɔɔmɔk sigɛɓa kuumɗigeeɗ Waakoyot ɔrɛya noŋkuk. Tonuɓa Waakoyot Abrahama kɛ, 'Geetaakoy joop ɗookoŋk baŋɛ komoy nookɛk.'

²⁶Wosɛykɓa Waakoyot Tɔɔn nɛɛk son lak iinakik tuki nɛɛkɛk kɛnɔ weeriikɔɔ tikiyɛɛkɛ goŋk, kɛnɔ kɔnu geetiɗ."