Read majang Ijaag Wosɛytaanakoŋk 4 Bible Online

Ijaag Wosɛytaanakoŋk 4 - majang bible

Ijaag Wosɛytaanakoŋk 4

¹Saaɓa Petros a Yowanis atukuɗ waasiyɛɛkɛ joopa gɛɛnaakik, nɛɓa tapaɗ ŋaadiyɛɛkoŋk a ɔɗɔwen koortaanak Gode sinɛ Geetitank a ɓɔrɛ joop Saaduukuk kurak son lak sɛɛgik.

²Nɛɓa sɛɛk ŋadir jɛt agut sinɔɓa wosɛytaanak a pɛɛy rɔɔriyaaɗ ŋaarin ret walasak sinɛɓa laŋɛɛ goy Yeeseek.

³Nɛɓa ɔɗɔweer Ayuuduk gaamur Petros a Yowanis nɛ gaɓɛr sɛɛg godeya korkoɗɔɔnoŋk, nɛ ɗeegartar mɛlɛɛɗa alaaya nɛɛka, agut sinɔɓa ege ɔɔtɛ nɛɛkɛ ajigek.

⁴Yakana joope sigaagɛɓa tiyɛr pɛɛni nɛɛkik, ŋaadiɗiiɓa a ɓɔɔkaaŋ. Tuukiɗiiɓa ɓɔɔkaaka moojakoŋk a atu sigɔɔgɛ kumɛɛ tuulk.

⁵Alɛ nɛɛkɛk ɔɗɔweer Ayuuduk, a gutarɛyɛ, a rɔɔriytaanak higi Muuseek tolɗiɓa Yorsaleeme.

⁶Joope sigaagɛɓa tolɗik ɓɛɛlɛrɓa ɔɗɔwerɛ tapa ŋaadiyɛɛkoŋk Haanaa, a Kɛyaapaa, a Yowanis, a Iskindiroos, a tekaaneer ɔɗɔwen sinɛ tapa ŋaadiyɛɛkoŋkuk.

⁷Nɛɓa sɛɛk arir Petros a Yowanis a ɛtɛr sɛɛge taamɛkɛ nɛ kɔɔniyar sɛɛg kɛ, "Ijaagiir any sini ɓaŋkawukaat jikoŋk maŋk tiriyaakɛ wook?"

⁸Saaɓak enyɛɛriɓa Petros Wɛɛŋakɛ sigɔɔgɛ Geetitaanakik, nɛ tonu sɛɛga kɛ, "Iinak ɔɗɔweer joopoŋk a gutarɛyɛ,

⁹ɔkɔn tin kɔɔniyaar ɓenyse agut any sinɔ mentanŋɔŋk, sinɛkɔ ijaagɛɛ eta sineena nyɔŋtank, a sinɔ kɛ bɔdukukɔ ɛkikiŋ.

¹⁰Mayakana, in ɗegerɛɛ iinak a joop Israeelik baŋɛ kɛ iɗit sini bɔdukukɔ nɔkɔne ɛtɛ taamɛkɛ tiriyaakɛ Yeese Keresee Naajreetik sinɛkan laalawarik nɔkan Waakoyot boŋku ret walsak.

¹¹Sɛɛn giɗee sinɛɓa daraayɛɛr iinak sigɛ kɛnyar godeyik giɗeekɛk, sɛɛn sinɛ obi giɗeekɛ baŋɛk.

¹²Laki bɔdɛ sɛɛn dakɛɗa. Kɛɛ dari goyse ɗeek iɗit sinɔɓa gagiɗɛ tiriya sigɔkoy bɔdɛɛɗiiŋɔŋk sɛɛne sɔgɔɔsɔyk."

¹³Saaɓa joop sigɛ gaɓɛr woorank dɛnɛrɗi Petros a Yowanis a tonɗi a kir ɓuriitik, nɛɓa reemɗi ɓayɛtun gɛŋk, agut sinɔ ɗegerar kɛ ege sigi joop sigɔ kɛɛ sɛɛge ɔɔtɛk aɓa kir tamaarɛɛtik. Ɗegerarɓa kɛ sɛɛg kan a Yeesee.

¹⁴Saaɓa dɛnɛrɗi iɗit sinɛkan bɔdukuk a ɛtɛtɛɗar a wosɛytaanak sigɛk, nɛɓa sanɛr any sinɔ tonurŋɔŋk.

¹⁵Nɛɓa tonur kɛnɔ tɛɛnan boŋiirɛ sɛɛg walasa saadi lak joop sigɛ gaɓɛr woorank, nɛɓa waasiɗi ɛkanɛɛkɛ gɛŋk kɛ,

¹⁶"Sisɔ ijaagi joop sigi ɛk? Ɗegerar joop Yorsaleemuk baŋɛ, kɛ ijaagɛɛkɔ sɔɔriyɛ sigi reemɗigeeɗ ɓayaayk ariit nɛŋk, nɛ kii oolɛ a tonii kɛ kɛɛkɔ ijaagɛɛŋ.

¹⁷Yakana kɛnɔ mokɔɔ bakaanyir joope gɛɛnɛ, koy tonii sɛɛga a ɓaŋkawuŋ, kɛnɔ kat lakɛ iɗit sinɔ tonɗiigeeɗ a riyar tiriya Yeeseek."

¹⁸Nɛɓa saadi riytar sɛɛg kɛkar nɛ tonur sɛɛga a ɓaŋkawuŋ, kɛnɔ kat lakɛ iɗit sinɔ tonɗi a riy tiriya Yeeseek, maŋk kɛnɔ kat lakɛ iɗit sinɔ rɔɔriyark.

¹⁹Yakanaɓa Petros a Yowanis jumurar sɛɛga kɛ, "Ɔɔtɛ sinaana gun tiiɗiɗi Waakoyotak nɛ tiiɗigiɗii iinakik, nɛ liki sini taamɛkɛ Waakoyotoŋk? Intɔ tonɛɛ sɔɔk.

²⁰Kii seek dakɛ kɛ many, a kii toniiɗ any sinɛkan dɛniik a sinɛkan tiyiik."

²¹Ɔɗɔweer joopoŋk a joop sigɔ gaɓɛr woorank tonurɓa sɛɛga a ɓaŋkawuŋ a kaalɛŋ, nɛ ŋɔɗutar sɛɛgiŋ. Kirkiɓa sɛɛge laŋiiɗ any sinɔ goopaagiɗɛŋɔŋk, agut sinɔɓa joop gɛɛnɛ pɔɔsɛrɗi Waakoyo agut any sinɛkan ɓɛɛlɛk.

²²Iɗit sinɛɓa ebɔdɛɛ sɔɔriyɛɛkɛ sigeegek atuɓa emeyi gɛɛnɛ sigɔɔgɛ pɔlpɔlɛ joop pɛɛyk ɛdɛɛna.

²³Saaɓa woorurkuɗɛɛ sɛɛgik baŋiya, nɛɓa Petros a Yowanis weeri son lak tekaaneer gɛŋkik, nɛ kaar tonur sɛɛga any sinɛkan tonur sɛɛga ɔɗɔwer tapa ŋaadiyɛɛkoŋk a gutarɛyɛɛkik.

²⁴Saaɓa sɛɛk tiyɛrɗi any sinik, nɛɓa ɗanɗama Waakoyota a tiyɛɛŋ agut omoŋ kɛ, "Iin Waakoyo sinɛ Obiik sinɛɓa riiɓin dari a ɗook, a gɔrɔ sinɔ obiiŋɔŋk, a ola sigɛ beeɗir sɛɛge takik baŋɛk,

²⁵tonunɓa Wɛɛŋakɛ sigɔɔgɛ Geetitaanakik ijaagente nookɛ ɔrɛye naŋk, ad Daawitik kɛ, 'Ŋadirɓa joop sigɔ moko Ayuuduk agut jikon? Joop sigɛ ɓɔɔkaak giima kanysɛya agut jikon?

²⁶Suumiyɛ ɗookoŋk ɛtɛr raŋana, ɔɗɔweer tolɛr ɛɛk agut omoŋ nɛ arir ɛɛk a gumaakeer Waakoyota, a Kereseya sinaanaɓa daam Waakoyotuk.'

²⁷"Eekeerɛ Herodis, a Pentenawi Pilatoos tolɗiɓa a joop sigɔ moko Ayuuduk, a joop Israeelik katamɛɛ sineene Yorsaleemuk, nɛ ŋaarar raŋana koɓiiɗ sinɔɔnɛ ŋɛɛwɛnŋɔŋk, ijaagente nookɛ Yeesee sinaanɛ geetitank sinaanɛkan ɗonyunk.

²⁸Nɔ ɓɛɛlɛɛɗ sinik, kɛnɔ dusanɛɛ any sinɛɓa gaamun ɓaŋkawukaat nookɛ, a koɓiiɗ nookɛkik jeemɛ ɗeeŋk.

²⁹Sisɔ Suumi naŋk, mermeni kalkalka nɛŋk. Ari ijaageer gooŋk a in waasɛr pɛɛni nook a kir ɓuriit.

³⁰Keri ari nook kɛnɔ ebɔdun gortaanak, ɛ ijaagɛɛ sɔɔriyɛ a ola sigɔ reemɗi ɓayɛk tiriyaakɛ Yeeseek, ijaagen nook sinɛ geetitank."

³¹Saaɓa ɗanɗamaaɗik baŋiya, nɛɓa yikiɗi saanɓa atukuɗukuŋ. Nɛɓa enyɛɛri Wɛɛgakɛ sigɔɔgɛ Geetitaanakik sɛɛg baŋɛ, nɛɓa waasɛr pɛɛni Waakoyotoŋk a kir ɓuriit.

³²Ŋaadtaanak baŋɛ latuɓa ɓayɛ a omoŋ a koɓi omoŋ. Kɛɛɓa iɗit sinɔ tonu kɛ, "Ege sini any naakik." Any baŋɛ sɛɛge kɔɔr nɛŋkɓa sɛɛg baŋɛ.

³³Wosɛytaanak ɓɔrɛ waasɛrɓa ŋaarin Yeeseek ret walsak ɓaŋkawukaat sinɔɔnɛ obiiŋɔŋk. Lakɛɓa sɛɛge baŋɛ raŋk wookan Waakoyotoŋk sinɔ obiiŋɔŋk.

³⁴Kɛɛɓa sɛɛge kɔɔr rakatkan a iɗit sinɔ a lak ŋaawuk sinɔ omoŋɔŋk, agut sinɔɓa joop sigɛ latu ɗook maŋk godeyik ɓaɓaliiɗ nɛ ɗɔkarki wori nɛɛkŋɔŋk.

³⁵Nɛɓa ɗɔkarki wori nɛɛk nɛ kurak gaɓɛr wosɛytaanaka, nɛɓa kaakasɛɛ sɛɛga a omoŋ omoŋ oko sinɛ ɗɛyɛɛɗ sɛɛgak.

³⁶Lakɛɓa iɗit om Leewiik sinɔ riyɛ kɛ Yoosepuk sinɔɓa beeɗ Kopiroosek. Nɛɓa riyar wosɛytaana kɛ Barnabaas, wooran nɛɛk sinɔ kɛ tɔɔn gaananitɔŋk.

³⁷Nɛɓa sɛŋk ɓalɗiiɗ ɗook nɛɛk a tɛm nɛ ɗɔku wori nɛɛk nɛ kus gaɓɛ wosɛytaanaka.