Read majang Ijaag Wosɛytaanakoŋk 5 Bible Online

Ijaag Wosɛytaanakoŋk 5 - majang bible

Ijaag Wosɛytaanakoŋk 5

¹Lakɛɓa iɗit om sinɔ riyɛ kɛ Haananiyaak, sɛɛn a jarti nɛɛk sinɔ riyɛ kɛ Sɛpiiraak, nɛɓa ɓalɗiiɗi ɗoo.

²Nɛɓa ŋɔr wori nɛɛk, ma diile gɔɔ om a tɛm nɛ kɛɛ gaɓɛ wosɛytaanaka, a ɗeger jarti nɛɛkɛ any siniŋ.

³Nɛɓa Petros tongeeɗ kɛ, "Iin Haananiyaa, guugunykɔna setan ɓayaaya nɛ kɔnu ari kɛnɔ raamun Wɛɛŋa sigɔ Geetitaanakik nɔ ŋɔrkun wori nɛɛk nyon om sinɛkɔ ɓalɗiiɗin ɗookuk agut jikon?

⁴Mokokɔ ɗoo nɛɛkɛ nook a inkɔ kiiɗin ɓalɗiit, nɛ saakɔ ɓalɗiiɗink baŋiya mokokɔ wori nɛɛkɛ nook? Anɛkɔ koɓun any sini ɓayaay nookɛ agut jikon? Raamunkɔ Waakoyo, ma moko iɗit."

⁵Saaɓa Haananiya tiyɛɛɗ pɛɛni sinik, nɛɓa ɗiiri nɛ rɛrŋ. Nɛɓa joop sigɛɓa tiyɛr any sinik baŋɛ ɓuri jɛt.

⁶Nɛɓa atiinyii ŋaarar raŋana, nɛ ɓuwer buusɛ nɛɛk nɛ diiler nɛ kaar kɔwarŋ.

⁷Nɛɓa sayitiyɛɛkɛ sigɔɔgɛ jiitik baŋiya, mɛlki jarti nɛɛk Sɛpiiraa saana, aɓa ki ɗegerɔɔn any sinɛkɔ laŋki baabuy nɛɛkɛkik.

⁸Nɛɓa Petros tongeeɗ kɛ, "Ɗoo noŋk ɓalɗiiɗɔɔkɔ a ɛtɛ wori nɛɛkɛ oko sinik dakɛɗak?" Nɛɓa Sɛpiiraa jumurgeeɗ kɛ, "Ii, ɛtɛ wori nɛɛkɛ oko sinik dakɛɗa."

⁹Saaɓak tongeeɗɓa Petros kɛ, "Mɛyigiɗɔɔkɔ ɛk kɛnɔ paariir Wɛɛŋa Suumiyoŋk? Ɔsigɔy joop sigɔ kurak tɔkɔw baabuy nookuk atu tugaatik, diilerkɔɔ ɓɔrɛni tɔkɔwa."

¹⁰Nɛɓa sɛŋk ɗiiri sisa derakɛ gɛɛnɛ goyse ɗeek nɛ rɛrŋ. Nɛɓa mɛlɛrki atiinyii nɛ kurak laŋirki a kɔ rɛrŋ, nɛ diiler nɛ kaar kɔwar baabuy nɛɛkɛ jɔk.

¹¹Nɛɓa ɓurii jɛt joop gode Sambatɛyoŋkuk baŋɛ, a joop sigɛɓa tiyɛr any sinik baŋɛ.

¹²Ijaagirɓa wosɛytaana sɔɔriyɛ a ola sigɔ reemɗi ɓayɛk, a ɓɔɔkaaŋ joope gɛɛnɛ kɔɔr. Nɛɓa tolɗi ŋaadtaana baŋɛ agut omoŋ, soodi riyɛ kɛ nyon Weeweeroŋk Salamoonuk.

¹³Eemɛyarɓa sɛɛg joop gɛɛnɛ, maɓa kɛɛ iɗit sinɔ paari beeɗit a sɛɛgik sɛɛge sɔgɔɔsɔyk.

¹⁴Joop sigɛ ŋaadir Suumi Yeeseek baŋɛ, moojak a jartiyatɔk, tutukiikɓa a ɓɔɔkaaŋ jɛt.

¹⁵Ɗɔkarkiɓa joop gortaanak a ɓɔɔkaaŋ gopana takana, nɛɓa riiɓer sɛɛg bɛroykɛ a beeɗiyɛɛkɛ, ijaagirɓa oko sinik kɛnɔ saa ɗoyiɗ Petros sinaanɛk, kɛnɔ laŋi sɛɛg tipi nɛɛkɛk.

¹⁶Kurakɓa joop a ɓɔɔkaaŋ katamɛɛkɛ sigaagɛ atu Yorsaleeme tookɛtaak, nɛɓa ɗɔkarki gortaanak a joop sigɔ rakatɛr wɛɛŋakɛ sigɔɔgɛ somkaanakik nɛɓa bɔdɛr baŋɛ.

¹⁷Ɔɗɔwen tapa ŋaadiyɛɛkoŋk a komoy joop Saaduukuk baŋɛ, sigɛɓa sɛɛg a sɛɛnik enyɛrɓa sɛɛg nyeken nɛ ŋaarar sɛɛga raŋana.

¹⁸Nɛɓa gaamur wosɛytaanak, nɛ gaɓɛr sɛɛg godeya korkoɗɔɔnoŋk.

¹⁹Yakanaɓa wosɛytan Waakoyotoŋk tayɛ gode sinɛ korkoɗɔɔnoŋk kaalt, nɛ boŋku sɛɛg nɛ tonu sɛɛga kɛ,

²⁰"In ŋaarɛ Godeya sinaana Geetitank, nɔ kɛɛɗɛ ɛtɛɛ nɔ tonɛɛ pɛɛni sini wɛɛŋakoŋk joopa baŋɛ."

²¹Nɛɓa boŋur wosɛytaana gɛɛnɛ sekiyɛ sigi, nɛ guugunyar Godeya sinaana Geetitank gibi, nɛ tuker rɔɔriyɔɔna joop. Saaɓak ɔɗɔwen sinɛ tapa ŋaadiyɛɛkoŋk a joop sigɛɓa sɛɛg a sɛɛnik, kurakɓa nɛ tolɛr joop sigɔ gaɓɛr woorank, a gutarɛyɛ Ayuuduk baŋɛ agut omoŋ, nɛɓa wosɛyɛr joop godeya korkoɗɔɔnoŋk, kɛnɔ kaar ɗɔkarki sɛɛga wosɛytaanak.

²²Nɛɓa joop sigɛɓa wɔsɛyɛɛk kaar godeya korkoɗɔɔnoŋk, nɛɓa kir laŋiiɗ nomtaanak saadi. Nɛɓa murarki nɛ kurak tonur sɛɛga kɛ,

²³"Korɛɛkɔ tuga gode sinɛ korkoɗɔɔnoŋk a ɓaŋkawuŋ, nɛkɔ koortaanak ɛtɛtɛɗar tugaat nɛɛkɛ jɔk, yakana saakɔ tayɛɛɗii tuga nɛɛkik, nɛ kɛɛ iɗit sinɔkɔ laŋii takik."

²⁴Ɔɗɔwen koortaanak Gode sinɛ Geetitank, a ɔɗɔweer tapa ŋaadiyɛɛkoŋk saaɓa tiyɛrɗi any sinik, nɛɓa reemɗi ɓayɛtun gɛŋk kɛ, egekɔɔ sini any sinɔ ɓɛɛlɛ ɛkik?

²⁵Saaɓak mɛlkiɓa iɗit om nɛ kus tonu sɛɛga kɛ, "In dɛnɛɛ, joopkɔ gaɓɛɛr sɛɛg godeya korkoɗɔɔnoŋkuk, ɔsigɔy ɛtɛtɛɗar Godeey sinaanɛ Geetitank nɛ rɔɔriyar joopuk."

²⁶Ɔɗɔwen koortaanak Gode sinɛ Geetitank, a amaasiniyɛ gɛɛŋk kaarɓa nɛ ɗɔkarki sɛɛgiŋ. Mokoɓa ɗɔkarki sɛɛg ɓaŋkawukaat, maɓa ɗɔkarki sɛɛg kɛ lɔt. Nɔɓa ijaagirɗi oko sinikik, ɓurerɓa joop gɛɛŋk kɛnɔmo baabaalar sɛɛg giɗeekɛ.

²⁷Ɗɔkarkiɓa sɛɛg nɛ kurak arir a ɛtɛr taamɛkɛ joop sigɔ gaɓɛr woorank. Nɛɓa ɔɗɔwen sinɛ tapa ŋaadiyɛɛkoŋk kɔɔniy sɛɛg kɛ,

²⁸"Toniikan kɔna a ɓaŋkawuŋ kɛnɔ kat rɔɔriyaakari a riyari tiriya Iɗit sinikiŋ. Yakana sisɔ rɔɔriyɔn noŋk enyɛɛrari Yorsaleem, ɛ ɗɛyɛɛr a yɛrom iɗit sinɛk riiɓeer eteŋkɛ raŋk."

²⁹Nɛɓa Petros a wosɛytaanak ɔgɔ jumurar kɛ, "Ɔɔtɛ saagun tiiɗiɗii etaak nɛ tiiɗikii Waakoyota.

³⁰Waakoyo ɔrɛyak gaŋkik boŋkukan Yeesee ret walasa, sinɔkan ɓokotiirk nɛ laalawari keet raŋk.

³¹Riiɓekan Waakoyot sɛɛn ɗiɗikakɛ gɛɛnɛk, eemɛyɔɔn a sɛɛn Ɔɗɔwen a Ebɔdtan, kɛnɔ gaɓɛ weerɛɛt tikiyɛɛkɛk a ranyjɛt tikiyɛɛkoŋk joopa Israeelik.

³²Nɛɓa seek dakii a misikiriyɛ any sinik, ma ɓɔrɛ miskiriyɛ Wɛɛŋa sigɔ Geetitaanakik sigɛkan gaɓɛ sɛɛg Waakoyot joopa sigaaga tiiɗigeeɗik.

³³Joop sigɛ gaɓɛr woorank saaɓa tiyɛrɗi any sinik, nɛɓa ŋadir jɛt nɛɓa ɗɛyɛr a ɓokootar wosɛytaanakiŋ.

³⁴Yakana iɗit Paarisik sinɔ riyɛ kɛ Gɛmaliyaalik, sinɔ eemɛyar joop baŋɛk, ɛ sɛɛn rɔɔriytan higi Muuseek, ŋaarɓa raŋana joope sigaagɛ gaɓɛr woorank kɔɔr, nɛ tonu kɛnɔ wideerɛ wosɛytaanak gɛɛŋk walasa, ɔɔtɛya sinɔɔna balaaŋɔŋk.

³⁵Tonuɓa joopa sigaaga gaɓɛr woorank kɛ, "Iinak joop Israeelik, in koorɛɛ ɛɛk agut any sinikɔɔ ijaagiir joope sigeegek.

³⁶Jeemɛ ŋaarɓa raŋana Tewodaas nɛ tonu kɛ "Eet iɗit sinɔ obiiŋɔŋk" nɛkan nomɛrɗi joop sigɔ atu ɗibɛɛkɛ sigɔɔgɛ aŋank. Yakanakan ɓokotɛɛŋ, nɛkan kɛɛtiɗi nomtaana gɛɛnɛŋ, nɛkan dakɛ any sinɛkan ɗɛykɛɛk a kiiɗɛ ɔɔtɛ.

³⁷Saadi baŋiya eme sinaanɛkan ikomiiɗɛɛ joopuk, Yuudaa sinɛkan iɗit Gɛlilaak pirekan ɗuka nɛkan ari kɛnɔ nomɛrɗi joop sigɔ ɓɔɔkaaŋɔŋk. Yakanakan ɓokotɛɛŋ, nɛkan kɛɛtiɗi joop sigɛɓa nomɛrɗik baŋɛ.

³⁸Agut sini tona kɔna kɛnɔ ŋɔɗutaarɔ joop sigi nɔ wideer ɛɛk sɛɛge, agut sinɔ ɔkɔnkan koɓi sini maŋk ijaag sini kus eteŋ badɛkoyiŋ,

³⁹ma ɔkɔnkan kus Waakoyoteŋ nɛ kiir oolɛ a sɔɔkɛɛr joop sigiŋ. Arikɔɔ kɔna ɛɛk a ɗaakan a Waakoyok." Nɛɓa joop sigɔ gaɓɛr woorank boŋur waasiyɛ Gɛmaliyaalikiŋ.

⁴⁰Nɛɓa riyarki wosɛytaanak gɛɛŋk son lak sɛɛgik, nɛ kurak arir a ɗiŋɛ sɛɛgiŋ. Nɛ tonur sɛɛga kɛnɔ kat waasiɗi a riyar tiriya Yeeseek, nɛ ŋɔɗutar sɛɛgiŋ.

⁴¹Nɛɓa ŋaararki wosɛytaana saadi ma yaa sɛɛgaŋ, agut sinɔkan ariiɗ Waakoyot a gayɛr nɔ daraayɛɛ sɛɛg agut tiriya Yeeseek.

⁴²Kirɓa nyɛyɛ rɔɔriyɔn a waasiyɛ Pɛɛni sinɔ Bɛlkɛɛstank ɓɛɛnyɔwɛɛkɛ, sinɛ Yeesee sinɛ Kereseek Godeey sinaanɛ Geetitank, a wɛykɔkɛ joopoŋk.