Read majang Ijaag Wosɛytaanakoŋk 6 Bible Online

Ijaag Wosɛytaanakoŋk 6 - majang bible

Ijaag Wosɛytaanakoŋk 6

¹Ɔɔtɛ saaɓak tutukiikɓa ɓɔɔkaaka nomtaanakoŋk, nɛɓa joop Ayuuduk sigɔ tonur ato Giriikik, laaganyar joop Ayuuduk sigɔɓa ɓartɛɛ sɛɛg ɗook Yuudaak ma tonur ato Aramaykik, laaganyarɓa sɛɛk agut sinɔɓa kirɗi gijeeɗ jartiyatɔk sigɛɓa rɛrar babuy gɛŋkik tɔkɔny sinɛ gagaɓɛɛ sɛɛga waawuykɛɛk.

²Nɛɓa wosɛytaanak sigɛ aarin a pɛɛyk, tolɛr nomtaanak baŋɛ nɛ tonur sɛɛga kɛ, "Ki tina ɗɛyɛɛ a ŋɔɗii ijaag naŋk rɔɔriyɔn pɛɛni Waakoyotoŋkuk agut kaasiyɛ ɗamatoŋkuŋ.

³Agut sini, iinak manyaakak eeta, in daamɛɛ joop a tula pɛɛy iinakɛ kɔɔr, sigɔ pɔɔsɛɛ sɛɛg kalbiyɛɛkɛ gɛŋkik, sigɔkan enyɛɛri Wɛɛŋa sigɔ Geetitaanakik ɛ ɗegerar ɛɛkik, nɛkɔɔ suumii sɛɛg agut ijaag sini,

⁴ma seek ɓaŋkaawurii a ɗanɗamaakii a rɔɔriyaaɗii pɛɛni Waakoyotoŋk."

⁵Nɛɓa pɛɛni sini yaa joopa baŋɛ, nɛɓa daamar Istipaanoos sinɛɓa enyɛɛri ŋaadiyɛɛkɛ a Wɛɛŋa sigɔ Geetitaanakik, a Pilipoos, a Pirokoroos, a Nikaronaa, a Tiimonaa, a Parmenaa, a Nikolawoos iɗit Ansokiyaak sinɛɓa guuguny Ayuudak.

⁶Nɛɓa ɗɔkarki joop sigɛ taamɛka wosɛytaanakoŋk, nɛɓa ɗanɗama ɛ riiɓer sɛɛge arin raŋk.

⁷Bakaanyirɓa pɛɛni Waakoyotoŋk, ɛɓa tutukiik ɓɔɔkaaka nomtaanakoŋk jɛt Yorsaleeme, ŋaadiɗiiɓa ɓɔrɛ tapa ŋaadiyɛɛkoŋk a ɓɔɔkaaŋ.

⁸Istipaanoos sinɛɓa enyɛɛri wookan a ɓaŋkawukaak, ijaagɓa ola sigɔ reemɗi ɓayɛk a sɔɔriyɛ sigɔ boobɛrŋɔŋk joope sigaagɛ ɓɔɔkaak kɔɔr.

⁹Saaɓak gode tolɛɛɗoŋk Ayuuduk, joop sigɔ riyɛ kɛ Gode tolɛɗoŋk Ayuuduk joop sigɔɓa Ŋaararki Yaakatak a joop katamɛɛ Kɛrenaak, a Iskindiriyaak, a joop ɗokan Kilkiyaak, a Isiyaak tolɗiɓa agut omoŋ, nɛ palamɗi a ɓooyur Istipaanoos.

¹⁰Yakanaɓa kir oolɛ a sɔɔkɛr ɗegerɔn a Wɛɛŋa sigɛkan totoni Istipaanoosekiŋ.

¹¹Agut sini ragadirɓa joop kɛnɔ in tonur kɛ, "Iɗit sini tiyiikɔ a tonu pɛɛni sinɔ nyɔɔnɗu Muusee a Waakoyok."

¹²Nɛɓa ragadir joop, a gutarɛyɛ, a rɔɔriytaanak higi Muuseek, nɛɓa kaar son lak Istipaanoosuk, nɛ gaamurku nɛ wideetar taamɛka joop sigɔ gaɓɛr woorank.

¹³Nɛɓa ɗɔkarki joop a omoŋ omoŋ sigɔ waasɛr nyon sɛɛne raŋk, nɛɓa sɛɛk tonur kɛ, "Iɗit sini toton ɓɛɛnyɔwɛ gɛɛŋk baŋɛ pɛɛni, sinɔ nyɔɔnɗu Gode sini Geetitank a higi Muuseek.

¹⁴Tiyiikan a tonu kɛ, 'Yeesee Naajreetik aalɛkɔɔ nɔ Gode sini Geetitankiŋ, nɛkɔɔ weerɛ barɛ sinɛɓa tina ŋɔr Muuseekiŋ."'

¹⁵Saaɓak joop sigɛɓa atu saadi arkiɗ iɗit sinɛ gaɓɛ woorank baŋɛ, mermenarɓa Istipaanoos, nɛɓa dɛnɛr taamɛ gɛɛŋk a ito wosɛytan Waakoyotoŋk.