Read majang Ijaag Wosɛytaanakoŋk 7 Bible Online

Ijaag Wosɛytaanakoŋk 7 - majang bible

Ijaag Wosɛytaanakoŋk 7

¹Nɛɓa ɔɗɔwen sinɛ tapa ŋaadiyɛɛkoŋk kɔɔniy Istipaanoos kɛ, "Eekeer any sini tonur joop sigik?"

²Nɛɓa Istipaanoos jumur kɛ, "Iinak manyaakak eeta a baabɛyak, inta geleewɛɛ. Waakoyo eemɛyɔɔnoŋk yaaŋɛɓa ɛɛk ɔrɛya naŋk Abrahama Mɛspetoomiyaake, a inɓa ki ŋaarin beeɗita Kaarana.

³Tonuɓa Waakoyot Abrahama kɛ, 'Toŋoɗu ɗoo nook a tekaaneer gooŋk, nɔ ŋaarin ɗooka sinaana kɔɔna yaaŋak.'

⁴Nɛɓa Abraham ŋaarki ɗook joop Kɛlɛdaawiyaanik nɛ kɛɛ beeɗ Kaarane. Nɛ saaɓa rɛrɗi ɛpɛnaak baŋiya, nɛɓa boŋku Waakoyot nɛ ɗɔku ɗooka sineena beeɗirɗɔ ɓenysek.

⁵Yakanaɓa Waakoyot kiigeeɗ gaamit ɗoo sinɔ aasi tɛmŋɔŋk seedi. Nɛɓa kuumɗigeeɗ kɛ gageeɗkoy ɗoo sini baŋiya sɛɛna a komoya nɛɛka, yakana inɓa Abrahame kɛɛ tɔɔn.

⁶Tongeeɗɓa Waakoyot kɛ beeɗ koy komoy nɛɛkɛ ɗook gaatoŋk a sɛɛn koonat, a koy beeɗ ɗook sinaanɛ a sɛɛn laaŋoyɛ a emeyi ɗibɛɛ aŋan.

⁷Yakana tonuɓa kɛ,' Joop sigɛ laaŋoyɛr sɛɛgik baŋɛ goopaakoy sɛɛgiŋ. Nɛkoy saadi baŋiya ŋaararki yaakata, nɛkoy ugumer eeta seedi.'

⁸Nɛɓa Waakoyot gageeɗ kuumeet yawɛɛɗoŋk. Nɛ saaɓa ɓartɛɛɗɛɛ Isiyaakik, nɛɓa Abraham yawɛ ɗoŋikɛ sigɔɔgɛ tula jiitik, nɛɓa Isiyaak yawɛ tɔɔn nɛɛk Yaykoob, ɛɓa ɓɔrɛ yawɛ Yaykoob tɔɔmɔk gɛɛŋk sigɛ aarin a pɛɛyk sigɛ ɛpɛnaakak komoyɛkaak.

⁹"Epɛɛrarɓa tɔɔmɔk Yaykoobuk manya nɛŋk Yoosep, nɛɓa ɓalɗiɗ kɛnɔ kɛɛ dakɛ a laaŋoyin ɗook Gibsik, Yakanaɓa Waakoyo a sɛɛn agut omoŋ

¹⁰nɛɓa boŋku rakatɛɛ nɛɛkɛ baŋɛ. Nɛɓa gageeɗ ɗegerɔn ɛɛkoŋk a muusiyɛ taamɛkɛ Pɛr'oouk, suumii Gibsik, nɛɓa suumi nɛɛkɛ ari sɛɛn a ɔɗɔwen Gibse a ɓɔrɛ godeey nɛɛkɛk baŋɛ.

¹¹"Saaɓak lakɛɓa ŋaawu a rakatɛ sinɔ obiiŋɔŋk ɗook Gibsik a Kɛnɛaanik baŋɛ, kirɓa ɔrɛyak gaŋk laŋiiɗ ɗama.

¹²Tiyɛɓa Yaykoob kɛ lakɛ nɔ ɗama Gibseŋ, nɛɓa wosɛyɛ ɔrɛyak gaŋk ɔɗɔɔkɛ son.

¹³Saaɓa kaarɗi Gibsa kɛkark, nɛɓa Yoosep yaaŋɛ ɛɛk manyaakaka, nɛɓa ɗegerɛɛ agut joop wɛy nɛɛkik sooy lak Pɛr'oonuk.

¹⁴Saadi baŋiya, riykɓa Yoosep ɛpɛn Yaykoob a tekaaneer gɛɛŋk sɛɛg baŋɛ, getuɓa sɛɛk baŋɛ nɛɛkɛ pɔlpɔlɛ joop jiitik a aarin a tuul.

¹⁵Nɛɓa Yaykoob kɛɛ Gibsa, nɛɓa rɛrar sɛɛn a ɔrɛyak saadi.

¹⁶Saadi baŋiya, diilɛɛɓa buusɛyɛ gɛŋk Sekeema, nɛɓa kɔɔwɛɛ sɛɛk nyon sinɔɔnɛɓa ɓali Abraham tɔɔmɔkɛ Emooruk.

¹⁷"Saaɓa wɔɔŋkuɗ ɔɔtɛ sinɔ dusanɛɛɗɛ any sinɛɓa kuumɗigeeɗ Waakoyot Abrahamaak, nɛɓa tutukiik jɛt ɓɔɔkaaka joop gaŋk sigɛ atu Gibseek.

¹⁸Saaɓak suumɛɛɓa suumi om Gibse sinɔɓa ki ɗegerɔɔn Yoosepuk.

¹⁹Nɛɓa ari ɔrɛyak gaŋk koɓiiɗ ɗɛgɛɛjoŋk a laaŋoyɛɛ sɛɛgiŋ, ɛɓa ari kɛnɔ boŋurku sasalɛɛ gɛŋk nɔ oriitar sɛɛg walasa nɔ rɛrar.

²⁰"Saaɓak ɓartɛɛɓa Muusee, sɛɛnɓa sasalɛ sinɔ mentanŋɔŋk. Aawoyarɓa ɛpɛna a ɛmɛs godeey nɛŋk tak a ɛyɛkeer jiit.

²¹Saaɓa oriiɗɛɛk, nɛɓa tɔn Pɛr'oonuk sinɔ peetik kɛɛ boŋku nɛ lowu a ito tɔɔn nɛɛk.

²²Barɛɓa Muuse ɗegerɔn joop Gibsik baŋɛ, nɛɓa ɓaŋkaawur toniiɗ nɛɛkɛ a ijaag nɛɛkɛ.

²³"Saaɓa Muuse emeyi gɛɛnɛ pɔlpɔlɛ joop pɛɛy, nɛɓa koɓu kɛ gun lɛɛwɛ tekaaneer gɛɛŋk joop Israeelik.

²⁴Saaɓa lɛɛwɛɛɗ sɛɛgik dɛnɛɓa iɗit om Gibsik a sɔɔkɛ iɗit om Israeelik, nɛ erɛ nɛ bite iɗit sinɛ Gibsik nɛ ɓokotuŋ.

²⁵Koɓuɓa kɛ ɗegerar tekaaner gɛɛnɛ kɛ boŋkukɔɔ sɛɛg Waakoyot yaakata goy nɛɛkɛkiŋ, yakanaɓa sɛɛk kir ɗegerɔɔn sini.

²⁶"Alɛ nɛɛkɛ dɛnɛɓa joop Israeelik a pɛɛy a ɗaaki eek nɛŋk, nɛ ɗɛyɛ sɛɛg taakita nɛ tonu sɛɛga kɛ, 'Iinak joop sigi iinak masiikeenak, ɗaakikar agut jikon?'

²⁷Iɗit sinɛɓa ɗiŋe mɛɛnok direɓa Muusee nɛ tongeeɗ kɛ, 'Wooɗ sinɛ kɔnu ari a ɔɗɔwen eteŋkɛ raŋk, nɔnu ari a pɛrɛdinŋɔŋk?

²⁸Ɗɛyinti ɓokotiita oko sinɛkɔ ɓokotiiɗin iɗit sinɛ Gibsik alɛk?'

²⁹Saaɓa Muuse tiyɛɛɗ sinik, nɛɓa gon ɗooka Midiyaamuk nɛɓa beeɗ a sɛɛn koonat, nɛɓa ɓartigiɗɛɛ tɔɔmɔk a pɛɛy saadi.

³⁰"Emeyikɛ sigɔɔgɛ pɔlpɔlɛ joop pɛɛyk baŋiya, yaaŋgeeɗɓa ɛɛk wosɛytan Waakoyotoŋk maɗ sinɔɔnɛ ɗam rukoy paaton nyon sinɔɔnɛ ar Dɛbirɛ Siinaak jɔkuk.

³¹Nɛɓa Muuse dɛnɛ sini, nɛɓa reemɗi ɓayɛ nɛɛkɛkiŋ. Saaɓa widerkiɗ ɛɛkik nɛɓa mermenaar, nɛ tiyɛ koŋgoy Waakoyotoŋk sinɔ tonu kɛ,

³²'Eet Waakoyo ɔrɛyak goŋkuk, Waakoyo Abrahamuk, Waakoyo Isiyaakik, Waakoyo Yaykoobuk.' Nɛɓa Muuse ɓuri a piiɗeŋ, a ki oolɛ a mermenaariŋ.

³³Nɛɓa tongeeɗ Waakoyot kɛ, 'Boŋak saamɛyɛ gooŋk agut sinɔ ege saan ɛtɛɛɗink geetitank.

³⁴Dɛnaakɔ eekeerɛ rakatɛ sinɔ ɓaŋkawuŋɔŋk joop gaaŋkik sigɛ atu Gibseek. Tiyaakɔ duri nɛŋk ɓakɛyoŋkuŋ, nɛkɔ kusa kɛnɔ boŋka sɛɛg rakatɛɛ. Waɗik sisɔ wosɛya kɔɔnu Gibsa kɛkar.'

³⁵"Nɛɓa joop Israeelik ɓooyur Muusee a tonurgeeɗ kɛ, 'Wooɗ sinɛni ari a ɔɗɔwen eteŋkɛ raŋk nɔnu ari a pɛrɛdinŋɔŋk?' Wosɛykiɓa Waakoyot Muusee sini kɛnɔ ari a ɔɗɔwen nɔ boŋku sɛɛg rakatɛɛ walasa, oko sinɛɓa yaaŋɛɛɗ ɛɛk goy wosɛytan Waakoyotoŋk rukoy takik.

³⁶Boŋkuɓa Muuse joop Gibse, aɓa ijaag ola sigɔ reemɗi ɓayɛk a sɔɔriyɛ Gibse a Goroo sinaanɛ Dɛɛŋɔŋk, a emeyi pɔlpɔlɛ joop pɛɛyk paaton tak.

³⁷"Ege sini Muusee sinɛɓa tonu joopa Israeelik kɛ, 'Ɓɔŋgɔrkkɔɔ kɔna Waakoyot iinakɛ kɔɔr iɗit pɛrkaakoŋk oko sinɛkan ɓɔŋgɔrkuɗ eetik.'

³⁸Muusee sinɛɓa sɛɛn a joop sigɛɓa tolɗi paaton takik, ɛɓa sɛɛn a wosɛytan Waakoyotoŋk sinɛɓa tonɗi kurkum Siinaak, ɛɓa sɛɛn a ɔrɛyak gaŋkik. Sɛɛn sinɛɓa boŋku pɛɛni bɔdɛɛɗoŋk nɛ ɗɔku eteŋkaak.

³⁹"Yakanaɓa ɔrɛyak gaŋk kirgeeɗ tiiɗit, nɛɓa ɓooyur a koɓur kɛ gun murar Gibsa.

⁴⁰Tonurɓa Aaroona kɛ, 'Agut sinɔ kii ɗegerɔɔn Muusee sinikan tin boŋku ɗook Gibsik kɛ laŋkikɔ jikon, ijaag tina jookak sigɔ tin diiler a ŋawiiter tine ɔɗɔɔkɛk.'

⁴¹Nɛɓa ijaagir joo sinɔ nyonuk sinɔ gayi a tɔɔn taŋoŋk. Nɛɓa wideetar uduŋeet nɛ eemɛyar a yaa sɛɛga ijaag nɛŋk ariitoŋkuŋ.

⁴²Yakanaɓa Pakati Waakoyot sɛɛge ɛɛk. Ŋɔɗurɓa sɛɛg kɛnɔ ŋaadir maryɔ dariyoŋk oko sinɛɓa taapɛɛɗɛ Wargatɛɛ joop pɛrkaakoŋk kɛ, 'Iinak joop Israeelik, widerkɔɔɓa paaton tak keegun sinɔkan ŋɔɔlɛɛŋɔŋk a uduŋeet a emeyi pɔlpɔlɛ joop pɛɛyk eeta?

⁴³Diileerɓa duukaanoy Molokiinik a tagaytan maryɔn joo noŋk Reepaanik, ege sigi jookak sigɛɓa ijaagiir sɛɛg kɛnɔ ugumeer sɛɛgaŋɔŋk. Agut sini araakɔɔ saak kɛnɔ kɔnu ɔɔyɛɛ Baabiloone.'

⁴⁴"Latuɓa ɔrɛyak gaŋk Duukaanoy Kuumeet Waakoyotoŋk paaton tak. Duukaanoy sini ijaagɗiɓa Muuse oko sinɛɓa yaaŋgeeɗ Waakoyotuk.

⁴⁵Saadi baŋiya, saaɓa Iyaasu diileɗ ɔrɛyak gaŋk kɛnɔ boŋur ɗoo joop sigɔ moko Ayuuduk sgɛɓa sɛɛga ɔɔyɛ sɛɛg Waakoyot taamɛkɛ gɛŋkik, nɛɓa ɗɔkarki duukaanoy nɛɛk saana. Nɛɓa beeɗ saadi mɛlɛɛɗa emeya Daawitik.

⁴⁶"Laŋiɓa Daawit muusiyɛ taamɛkɛ Waakoyotoŋk, nɛɓa kalɛyi ɗanɗamɔɔn kɛnɔ kɛny gode Waakoyota Yaykoobuk

⁴⁷Yakanaɓa kɛnyii gode Waakoyota Salamoon.

⁴⁸Mayakana kɛygun, Waakoyo sinɛ Obiik ki beeɗiit godeey sinɔɔnɛkan kɛnyɛɛ ariit etoŋkuk, oko sinɛɓa toniiɗ iɗit pɛrkaakoŋk kɛ,

⁴⁹Tonu Waakoyot kɛ, 'Ege darii barsum naak, ma ɗoo soon riiɓeeɗa derakik. Anɛ kɔɔta kɛnyari gode sinɔ ɛtɛ ɛkik? Imiinyeeɗakɔɔ nyon sinɔ ɛtɛ ɛkik?

⁵⁰Amokokan ijaagaa ola sigi baŋɛ ariit naakɛk?'

⁵¹"Iinak sigiɓa kilarar ŋɔɗɔker goŋkuk! Iinak sigiɓa bibiɗi ɓayɛtun goŋkuk, ɛ kir tiiɗit ween goŋkuk. Ɓooyiir Wɛɛŋa sigɔ Geetitaanakik ɓɛɛnyɔwɛ gɛɛŋk baŋɛ oko ɔrɛyak goŋk.

⁵²Wooɗ sinɛɓa ɔrɛyak goŋk kir epaayɛk joope pɛrkaakoŋk kɔɔrk? Ɓokootarɓa sɛɛk joop sigɛɓa waasɛr mɛlɛɛ Iɗit sinɛ mentan taamɛkɛ Waakoyotoŋkuŋ, maɓɔrɛ sisɔ gaɓɛɛrkɔɔ Iɗit sini mentan taamɛkɛ Waakoyotoŋkuk nɛ ɓokotiiriŋ.

⁵³Iinak boŋiirkan higi sinɛɓa kɔna gaɓɛ Waakoyot goy wosɛytaanakoŋkuŋ, yakanakan kiir koorɛɛt."

⁵⁴Saaɓa tiyɛrɗi joop sigɛ gaɓɛr woorank any sinik, nɛɓa ŋadirŋ jɛt a dɛɛta taamɛ gɛŋk.

⁵⁵Yakanaɓa sɛŋk Istipaanoos enyɛɛri Wɛɛŋa sigɔ Geetitaanakik, nɛɓa mermena dariya nɛ dɛnɛɛr eemɛyɔn Waakoyotoŋk, ɛɓa dɛnɛɛr Yeesee a ɛtɛtɛr Waakoyote ɗiɗikakɛ.

⁵⁶Nɛɓa tonu sɛɛga kɛ, "In dɛnɛko, dɛna a ɓuukiɗi dari nɛ dɛnɛɛra Tɔɔn Etoŋk a ɛtɛtɛr Waakoyote ɗiɗikakɛ!"

⁵⁷Saaɓak miinyerɓa ween gɛŋk nɛ ooyɛr a ɗooruŋ, nɛ reeriitar son lak sɛɛnik agut omoŋ,

⁵⁸nɛɓa boŋiitar katamɛɛ walasa nɛ baabaalar giɗeekɛ. Joop sigɛ miskiriyɛɛk boŋurɓa abiyak gɛŋk nɛ riiɓer sɛɛg derakɛ ateeny omk sinɔ riyɛ kɛ Saaooluk.

⁵⁹Saaɓa atukuɗ baabaal nɛɛkɛkik, nɛɓa Istipaanoos ɗanɗama kɛ, "Iin Suumi Yeesee, boŋure wɛɛŋa gaaŋk."

⁶⁰Ɛtɛɓa korontunɛ nɛ tonu a ɗooruŋ kɛ, "Suumi naakɛ, kat sɛɛga ikomun tikiyɛ sigi." Tonuɓa oko sinik nɛ rɛrŋ.