Read majang Ijaag Wosɛytaanakoŋk 9 Bible Online

Ijaag Wosɛytaanakoŋk 9 - majang bible

Ijaag Wosɛytaanakoŋk 9

¹A inɓa Saaol epɛpɛr ɛɛk kɛnɔ ɓokor nomtaanak Suumiyoŋk, nɛɓa kɛɛ son lak ɔɗɔwen tapa ŋaadiyɛɛkoŋk.

²Nɛɓa kalɛyi ɔɗɔwen sinɛ tapa ŋaadiyɛɛkoŋk kɛnɔ taapɛɛ wargatɛ godeyika tolɛɛɗoŋk Ayuuduk sigɛ atu Dɛmaaskoweek kɛnɔ gagiɗɛ, kɛnɔ saa laŋkiɗ joop sigɔ nomɛr gopɛ Suumiyoŋk, moojak a peetak nɔ oolɛ a korkokor sɛɛg nɔ diile sɛɛg Yorsaleema.

³Nɛɓa kɛɛ nɛ saaɓa wooŋkuɗ Dɛmaaskowak, nɛɓa sisa tipeyɗiik pɛɗɛrka dari sɛɛne tookɛɛta.

⁴Nɛɓa ɗiiri ɗooka nɛ tiyɛ koŋgoy sinɔ tonu kɛ, "Saaol, Saaol, epapayinti agut jikon?"

⁵Nɛɓa Saaol tonu kɛ, "Suumi, naakɛ, iin wooɗ?" Nɛɓa sɛŋk tongeeɗ kɛ, "Eet Yeesee sinɛti epapayink.

⁶Ŋaari raŋana sisɔ nɔ kɛɛɗin katamɛya, kɛɛɗɛ kɔɔna tonɛɛ sooy any sinɛna ɗɛyɛ a ijaaginŋɔŋk."

⁷Joop sigɛɓa sɛɛg a Saaol agut omoŋɔŋk tiyɛrɓa koŋgoy nɛɛk, ma kɛɛ iɗit sinɔ dɛnɛrk. Nɛɓa kir ɗegerɔɔn kɛ tonur ɛk nɛɓa ɛtɛr nɛ dakɛr kɛ many.

⁸Nɛɓa Saaol ŋaar raŋana saadiɓa ɗirgeɗik, nɛɓa ɓuuke taamɛ nɛ kɛɛ any sinɔ dɛnɛk. Nɛɓa joop gɛɛnɛ gaamur ari nɛɛk nɛ diiler Dɛmaaskowa.

⁹Nɛɓa beeɗ a ɗoŋ jiit a ki dɛnɗiit, ɛ ki ɗamiit, ɛ ki tuu maawu.

¹⁰Lakɛɓa nomtan om sinɔ riyɛ kɛ Haananiyaak Dɛmaaskowe. Nɛɓa Suumii yaaŋgeeɗ ɛɛk ɗooraan nɛ riy sɛɛn kɛ, "Haananiyaa!" Nɛɓa argeeɗ kɛ, "Yoo, Suumi naakɛ."

¹¹Nɛɓa Suumii tongeeɗ kɛ, "Mak gopana sinɔɔna riyɛ kɛ Ɓɛɛlɛ kɛ Sɛmk, nɔ kɛɛɗin warin iɗit Tɛrseesik sinɔ riyɛ kɛ Saaooluk woy Yuudaak. Ar sɛŋk ɗanɗaɗamɔɔn sisɔ.

¹²Nɛɓa sɛŋk dɛnɛ yaaŋiyɛɛkɛ iɗit sinɔ riyɛ kɛ Haananiyaak a guguunyur soon lak sɛɛnik, nɛ riiɓeeɗ ari nɛɛk raŋk kɛnɔ dɛnɗi taamɛ gɛɛnɛ kɛkar."

¹³Nɛɓa Haananiya tongeeɗ kɛ, "Suumi naakɛ, tiyaakɔ joope sigɔɔgɛ ɓɔɔkaaŋɔŋk kɛ iɗit sini ijaagkɔnɔ ŋaadtaanakɛ ola sigɔ ŋɛɛwɛŋɔŋk a ɓɔɔkaaŋ Yorsaleeme.

¹⁴Ma seedi boŋukɔ ɓaŋkawuka ɔɗɔweerɛ tapa ŋaadiyɛɛkoŋk kɛnɔ korkor joop sigɛ riyar tiriya gooŋkuk baŋɛ."

¹⁵Nɛɓa Suumii tonu Haananiyaa kɛ, "Mak son lak sɛɛnik, daamaakan sɛɛn kɛnɔ ijaagɗi eeta kɛnɔ yaaŋɛ tiriya gaaŋk joopa sigaaga moko Ayuuduk, a suumiyɛɛka, a joopa Israeelik.

¹⁶Yaaŋgiɗakɔɔ kɛ ɗɛygeeɗ a laŋk rakatɛ sinɔ ɛtɛ ɛkik agut sinɔ rɔɔriyɗi joop tiriyaakɛ gaanɛkik."

¹⁷Nɛɓa Haananiya kɛɛ nɛ guuguny godeya sinaana arkiɗ Saaolk, nɛ riiɓe ari nɛɛk sɛɛne raŋk nɛ tongeeɗ kɛ, "Iin manya eeta Saaool, Suumi Yeesee sinɛ kɔna yaaŋɛ ɛɛk gopɛ saakɔ kusuɗunk, wosɛykikɔtu son lak iinik kɛnɔ dɛnɗiikin kɛkar, ɛ kɛnɔ enyɛɛrikin Wɛɛŋa sigɔ Geetitaanakik."

¹⁸Nɛɓa sisa ɗiirarkiɗ taamɛkɛ ola sigɔ ito pakalakik, nɛ dɛnɗi kɛkar. Nɛ ŋaar raŋana nɛ aadɛɛŋ,[1]

¹⁹nɛɓa ɗami nɛ ɓaŋkaawurŋ. Nɛɓa Saaol beeɗir a nomtaanak sigɛ atu Dɛmaaskoweek agut omoŋ a ɗoŋ tekerŋ.

²⁰Sisa tukeɓa Saaol rɔɔriyɔn Dɛmaaskowe godeyikɛ tolɛɗoŋk Ayuuduk kɛ, "Ege Yeese Tɔɔn Waakoyotoŋk."

²¹Joop sigɛɓa tiyɛrk baŋɛ reemɗiɓa ɓayɛtun gɛŋk nɛ tonur kɛ, "Iɗit sini moko kanto sɔɔkɛ joop sigɛ riyar tiriya Yeeseek Yorsaleeme? Mokokanto kus seena kɛnɔ korkokor sɛɛg kɛnɔ diile sɛɛg son lak ɔɗɔweer tapa ŋaadiyɛɛkoŋkuk?"

²²Nɛɓa Saaol ɓaŋkaawur rɔɔriyɔɔn nɛɛkɛ a ɛnyɛnyɛ ɔɗɔɔka. Nɛɓa kɔnyɗiiɗ sinɔ kɛ ege Yeese Kereseek, aɓa ari joop Ayuuduk sigɛ beeɗir Dɛmaaskoweek a kɛɛ iɗit sinɔ jumurgeeɗ any omk.

²³Ɗoŋikɛ sigɔɔgɛ ɓɔɔkaaŋɔŋk baŋiya, waasiɗiiɓa joop Ayuuduk kɛnɔ ɓokotur Saaool.

²⁴Yakanaɓa sɛŋk ɗeger kɛ ɗɛyɛr sɛɛn ɓokotiita, koorɛrɓa gopak sigɛ mɛlɛɛɗɛ katamɛya nɛɛkaakik waawuy a kaay kɛnɔ ɓokotur Saaool.

²⁵Agut sini kaalt omalte gaɓɛrɓa nomtaana gɛɛnɛ kantɛya nɛ soosowutar sɛɛn rektant nɛɛkɛ tool ɗooka.

²⁶Saaɓa kɛɛɗ Saaol Yorsaleemak, nɛɓa paari lotɛɛɗa ɛɛk a nomtaanak sigɛ atu saadik. Yakanaɓa ɓurer sɛɛg baŋɛ agut sinɔɓa kiiɗi sɛɛga gayit a sɛɛn ŋaadtan Keresek eekeerɛk.

²⁷Yakanaɓa ɗɔku Barnabaas Saaool nɛ wideer son lak wosɛytaanakik nɛ tonu sɛɛga kɛ yaaŋgeeɗkan Suumii ɛɛk gopɛ Dɛmaaskook, ɛkan tonɗigeeɗ, ɛkan waasiɗi tiriyaakɛ Yeeseek Dɛmaaskowe a ki ɓuriit.

²⁸Agut sini Saaool sɛɛnɓa a sɛɛg agut omoŋ. Nɛɓa weeweri Yorsaleeme nyonitaak baŋɛ nɛɓa waasiɗi tiriyaakɛ Yeeseek a ki ɓuriit.

²⁹Tonɗiiɓa a palamɗi a joop Ayuuduk sigɛ tonur ato Giriikik, yakanaɓa sɛɛk gaamurgeeɗ ɔɔtɛ kɛnɔ ɓokotur.

³⁰Saaɓa ɗegerarɗi ŋaadtaana sinik, nɛɓa diiler Keesaariyaaka nɛ kaar saadi arir a ŋaar Tɛrseesa.

³¹Ŋaadtaanak sigɛ atu ɗook Yuudaak, a Gɛlilaak, a Sɛmaariyaak baŋɛ laŋirɓa yaaka ɓɛɛlɛtoŋk, ɛɓa ɓaŋkaawurar, ɛɓa tutukiik ɓɔɔkaakat nɛŋk a eemɛyar Suumi ɛ laŋir gaananit Wɛɛŋakɛ sigɔɔgɛ Geetitaanakik.

³²Saaɓa Petros ŋawiiteeɗ ɗooka nɛɛkaak, nɛɓa kɛɛ son lak ŋaadtaanak sigɛ atu katamɛɛ Lidaak.

³³Nɛɓa saadi kɛɛ laŋki nyɔŋtan sinɔ riyɛ kɛ Eeniyaak sinɔkan ɗuɗuŋɗe bɛɛroy a emeyi tula jiitik.

³⁴Nɛɓa Petros tongeeɗ kɛ, "Iin Eeniyaa, ebɔdɛkɔɔnu Yeese Kereseeŋ. Ŋaar raŋana nɔ epatin bɛɛroy nook." Nɛɓa sɛŋk ŋaar raŋana sisa.

³⁵Joop sigɛ beeɗir katamɛɛ Lidaak a tetee sinɔɔnɛ riyɛ kɛ Saronaak baŋɛ dɛnɛrɓa Eeniya nɛɓa ŋaadir Suumi.

³⁶Lakɛɓa katamɛɛ Iyopeek nomtan sinɔ riyɛ kɛ Taabitaak, maŋk ad Giriikik Dorkaak, wooran tiriya gɛɛŋkik sinɔ kɛ moogunk. Sɛɛn jarti sinɔɓa ijajag any sinɔ mentanŋɔŋk, ɛɓa gigij sankaanak ɓɛɛnyɔwɛ gɛɛŋk baŋɛk.

³⁷Saaɓak goruɓa sɛŋk nɛ rɛrŋ, nɛɓa aadɛɛ buusɛ nɛɛk nɛ riiɓɛɛ rakaay pooke tak.

³⁸Wɔɔŋkuɓa katamɛɛ Lidaak katamɛya Iyopeekiŋ, nɛɓa nomtaanak sigɛ atu Iyopeek tiyɛr kɛ ɓɛɛlɛ nɔ Petros Lidaakeeŋ. Nɛɓa wosɛyɛrgeeɗ joop a pɛɛy nɛ kaar tonurgeeɗ kɛ, "Waɗiŋ a gorgor a kat gaalaakin."

³⁹Nɛɓa Petros ŋaar raŋana nɛ kurak a joop sigɛkɔ wosɛykɛɛk agut omoŋ. Saaɓa mɛlkiɗik, nɛɓa diiler pooka raŋana. Nɛɓa jartiyatɔ sigɛɓa rɛrar babuy gɛŋkik baŋɛ ɛtɛr sɛɛne tookɛɛta, a wuɗaaŋ, a yaaŋɛrgeeɗ abiyak sigɛɓa ijaag sɛɛg saakan ɓɛɛlɛɛɗ wɛɛŋakɛk.

⁴⁰Nɛɓa Petros ɔɔyku sɛɛg walasa baŋɛ, nɛ ɛtɛ korontunɛ nɛ ɗanɗamaaŋ. Nɛ weerɛ taamɛ son lak buusɛ nɛɛkik nɛ tonu kɛ, "Taabita, ŋaar raŋana!" Nɛɓa sɛŋk ɓuuke taamɛ nɛ dɛnɛ Petros. Nɛ ŋaar raŋana nɛ beeɗiŋ.

⁴¹Nɛɓa sɛŋk ker ari nɛɛk nɛ gaamu nɛ ɓɔŋgɔɔrɛŋ. Nɛɓa riy jartiyatɔk sigɛɓa rɛrar babuy gɛŋkik, a ŋaadtaanak ɔgɔ nɛ wideer sɛɛga taamɛka a ɓɛɛlɛ bɔdɛɛɗ.

⁴²Ɗegerɛɛɓa any sini Iyopee baŋɛ, joop a ɓɔɔkaaŋ ŋaadirɓa Suumi.

⁴³Petros beeɗirɓa Iyopee a ɗoŋ ɓɔɔkaaŋ a iɗit sinɔ riyɛ kɛ Simionuk sinɔɓa wɛkɛkɛr tarmakik.