Read majang Roome 1 Bible Online

Roome 1 - majang bible

Roome 1

¹Ege sini wargatɛ sinɔ taapiɗiir Paawuloos sinɛ laaŋoyen Yeese Kereseek, sinɛɓa daamɛɛ Waakoyote a sɛɛn wosɛytan, ɛɓa wosɛyɛɛ kɛnɔ waasɛ Pɛɛni sinɔ Ɓɛlkɛɛstank Waakoyotoŋk.

²Ege Pɛɛni sini Ɓɛlkɛɛstank pɛɛni ŋaadiyɛ sigɛ kookoriik, sinɛɓa gaɓɛ Waakoyot jeemɛ wargatɛɛkɛ Waakoyotoŋk goy joop pɛrkaakoŋk.

³Ege Pɛɛni sini Ɓɛlkɛɛstank agut Tɔɔn nɛɛk Yeesee, sinɛɓa kus a iɗit komoy Daawitik,

⁴nɛɓa yaaŋɛ Suumi naŋk Yeese Kerese ɓaŋkawukaat sinɔɔnɛ obiiŋɔŋk, kɛnɔ dakɛ a sɛɛn Tɔɔn Waakoyotoŋk ŋaarin ret nɛɛkɛ walasak, ɓaŋkawukaat Wɛɛŋakɛ gɛɛnɛk sigaagɛɓa geetɛɛk.

⁵Boŋaakan goy nɛɛkɛ wookan sinɔtu ari a gaya a wosɛytank, nɛ agut sini ara kɛnɔ ŋaadiɗi, ɛ tiiɗi joop sigɔ moko Ayuuduk baŋɛ agut tiriya gɛɛŋk.

⁶Ɓɛɛlɛɛr ɓɔrɔ kɔɔr joope sigaagaɓa riyɛɛ kɛnɔ sɛɛg Yeese Kereseek.

⁷Iinaka sigaaga kɔnu poru Waakoyotuk baŋɛ sigaaga atukari Roomeek, sigaagaɓa kɔnu riyɛɛ kɛnɔ iinak geetitaanakik, in kɔna dakɛ a mɛyin a maariyeet Waakoyotoŋk, a bɔdɛ sooy lak Ɛpɛn eteŋka Waakoyok a Suumi Yeese Kereseek.

⁸Ɔɗɔɔkɛ pɔɔsa Waakoyo naak agut iinak baŋɛ goy Yeese Kereseek, agut sinɔ tiyɛɛkɔ ŋaadiyɛ goŋk ɗoo baŋɛ.

⁹Ɗegerti Waakoyo sinɛ ijaagɗigiɗa ɓayɛ baŋɛk, a waasa Pɛɛni sinɔ Ɓɛlkɛɛstank Tɔɔn nɛɛkik, a sinɛ koɓukuɗa kɔnu ɗanɗamɔɔn naakɛk ɓɛɛnyɔwɛ gɛɛŋk baŋɛ.

¹⁰Ɗanɗamaaka ɓɛɛnyɔwɛ gɛɛŋk baŋɛ kɛnɔta kemɗi gopan naakɛ, oko ɗɛyan Waakoyotoŋk nɔkɔɔ pedtaana mɛlɛɛra son lak iinakik.

¹¹Agut sinɔ laka kɔna ŋɔɗɔ sinɔ gun kɔnu dɛnɛɛɗa, nɛ kɔna kaasa tigi wɛɛŋakoŋk sinɔ kɔnu ari a ɛtɛɛr ŋaadiyɛɛkɛɛk,

¹²kɛnɔ kɔkɔnyikii ɛkanɛɛkɛ eet a iinak ɔɔtɛ sinɔɔnɛ omoŋɔŋk, iinak ŋaadiyɛɛkɛ gaanɛ, maɓɔrɛ eet ŋaadiyɛɛkɛ goŋk.

¹³Iinak manyaakak eeta sigɛ dooytaanakik, ɗɛykaaya ɓɔrɛ a gun laŋa ŋaadtaanak a ɓɔɔkaaŋ iinakɛ kɔɔr, oko sinɛkan laŋiiɗa ŋaaditaanak a ɓɔɔkaaŋ joope sigɔɔgɛ moko Ayuuduk kɔɔruk. Yakana ɗɛya kɛnɔ ɗegerari kɛ gaamakan ɔɔtɛ agut ɓɔɔkaaŋ, nɛ yakanakanti ɓaarɗɛ nɔ mɛlɛɛɗa sisɔwa.

¹⁴Laka asɛ sinɔ rɔɔriyɗa joop Giriikik a joop sigɔ moko Giriikik, a joop sigɔɓa rɔɔriyɛɛ sɛɛg a joop sigɔɓa kɛɛ sɛɛg rɔɔriyɛɛk.

¹⁵Agut sini ɗɛya jɛt a gun kɔna waasa Pɛɛni sinɔ Ɓɛlkɛɛstank iinak sigɛ atukari Roomeek.

¹⁶Kɛɛte keeny Pɛɛniya sinɔɔna Ɓɛlkɛɛstank, agut sinɔ ege sini ɓaŋkawuka Waakoyotoŋk, sinɛ bɔdɛ joopa sigaaga ŋaadiɗi baŋɛk, tuki nɛɛkɛ joopa Ayuuduk ɛ ɓɔrɛ joopa sigaaga moko Ayuuduk.

¹⁷Yaaŋɛɛɓa etɛyɛɛt Waakoyotoŋk Pɛɛnii sinɔɔnɛ Ɓɛlkɛɛstank, etɛyɛɛt nɛɛk sinɛ ɓɛɛlɛ ŋaadiyɛɛkɛ tuktant nɔ mɛlɛɛɗa pediyaak, oko sinɛɓa taapɛɛɗɛ kɛ, "Beeɗi iɗit sinɔ mentan taamɛkɛ Waakoyotoŋk ŋaadiyɛɛkɛk."

¹⁸Yaaŋɛ ɛɛk goopan Waakoyotoŋk dari joopa sigaaga ubuŋer eekeer Waakoyotoŋk ŋɛɛwɛnkaat nɛŋk a ant sinɔɔnɛ ɓooyurɗu Waakoyok a ŋɛɛwɛnkaat nɛŋk.

¹⁹Goopɛɛkoy sɛɛg agut sinɔɓa sɛɛga yaaŋɛɛɗ Waakoyot any sinɛ ɗɛyɛ a ɗegerarɗi sɛɛnkiŋ.

²⁰A tukiɗi saaɓa riiɓeeɗɛɛ ɗook nɛɓa dɛnɛr joop ɗoo a dari a ola sigɛɓa riiɓe Waakoyotuk baŋɛ. Dɛnɛrkan sɛɛk kɛ ɗɔm ɓɛɛlɛt nɛɛk goy ola sigɛɓa riiɓɛɛ sɛɛgik sinɛ kɛɛ taantak a ɓaŋkawuka nɛɛk sinɛkoy nɔkoy nɔkoyk a Waakoyotikeen nɛɛk, kɛnɔ kat lakɛ iɗit sinɔ kol ɛɛk kɛ, "Kaa ɗegerɔɔn Waakoyo olaatɛ baŋɛk."

²¹Agut sinɔ kɛygunɓa aasi ɗegerarkɛ Waakoyoŋ, nɛɓa kirgeeɗ gaɓɛɛɗ eemɛyɔn a pɔɔsiyɛ sigɛ ɗɛyɛ sɛɛnak. Ɓɛɛlɛrɓa koɓiɗa gɛŋk kanysɛya, kilararɓa ɓayɛtun gɛŋk sigɛ kir koɓiitkiŋ.

²²Tonur kɛ ɗegerii ɛɛk, mayakana sɛɛg gaagɛyɛ.

²³Ŋɔɗarɓa ugumeet Waakoyota sinaanakoy ki rerink sinaanakoy nɔkoy nɔkoyk, maɓa ugumergeeɗ jookak sigɔ nyonuk sigɔɓa ijaagɛ a gayi a iɗit sinɔkoy rɛrŋɔŋk a teetɔ a keegu a ola sigɛ pupuuter ɗookuk.

²⁴Nɛ agut sini gaɓɛɓa sɛɛga Waakoyot ɗɛyan ɓayɛtunɛɛka gɛŋk sigaaga somkaanakik, kɛnɔ ijaagir any sinɔ ari taarak gɛŋk a lagiɗɛ keenyk.

²⁵Agut sinɔ weerɛrɓa eekeer Waakoyotoŋk nyona, ɛ ugumer ɛ ijaagɗi olaata sigaagaɓa riiɓɛɛk ɔɔtɛ Iɗit sinɛɓa riiɓiik, in eemɛyɔn Sɛɛna nɔkoy nɔkoyk. Ameen.

²⁶Agut any sini gaɓɛɓa sɛɛg Waakoyot ŋɔɗɔkikeena sinɔɔna keerɛɛŋɔŋk, weerɛrɓa aasi jartiyatɔ ɗuŋun sinɛɓa goorɛk ɗuŋuna sinɔɔna moko sinɛɓa goorɛk,

²⁷nɛ ɓɔrɛ oko sinik ŋɔɗarɓa mooja ɗuŋun sinɛɓa goorɛk a jartiyatɔk gɛŋk ɛ moɗɛr taarak gɛŋk ɗɛyaan ɛkanɛɛkɛ gɛŋk. Ijaagirɓa joop any sinɔ keerɛŋɔŋk ɛkanɛɛkɛ gɛŋk, ɛ boŋur goopan ɛkanɛɛka gɛŋk oko any sinɛ ijaagirk ŋɛɛwɛnŋɔŋk.

²⁸Agut sinɔɓa joop kirɗi ɗɛyɛ a ɗegerar Waakoyoŋɔŋk, nɛɓa gaɓɛ sɛɛg kalbiya sinɔɔna ki gayɛk kɛnɔ ijaagir any sinɔ keerɛŋɔŋk, sinɔ gun kɛɛ ijaagɛɛk.

²⁹Nɛ agut sini enya sɛɛge ŋɛɛwɛnkaata sigɔ ɓɛɛlɛr kundiyaakɛk, a any sinɔ ɓooyurɗu Waakoyok, a goltetikeen, a kalbi sinɔ ŋɛɛwɛŋɔŋk, a nyeken, a ɓokootan, a kaarin, a raamiyɛ, a ɗɛgɛ, ɛ laaganya,

³⁰a nyɔɔnaaŋ, a ɓooyur Waakoyoŋ, a kir koorɛɛt ɛɛk nɛŋk, a ɓɔŋgɔɔrɛr ɛkan gɛŋk rakaaya, a merir ɛɛk, a warɛr ɗɛgɛ sinɛ ijaagirɗi any sinɔ ŋɛɛwɛnŋɔŋk, a kir tiiɗit bɔɔlɔŋeera gɛŋk,

³¹kir sɛɛk koɓiit, ɛ kɛɛ sɛɛge ŋaadiyɛ, ɛ kɛɛ sɛɛge mɛyin, ɛ kir kɛkoyɛɛt joopa.

³²Kɛygun aasi joop sigi ɗegerarkɛ higi Waakoyotoŋk sinɔ mentanŋɔŋk sinɛ tonu kɛ rɛrarkoy joop sigɛ ijaagir ola sigikiŋ nɛ ijaagir ola sigiŋ. Nɛ moko ijaagir sini dakɛɗa, maɓɔrɛ ariir joop sigɛ ijaagir ola sigik kɛnɔ in ɓaŋkaawurar.