Read majang Roome 11 Bible Online

Roome 11 - majang bible

Roome 11

¹Agut sini kɔɔniyaakaaŋ, oruɓa Waakoyot joop gɛɛŋkiŋ? Kiɓa sɛɛg oriiɗ adaktan. Eet ɔɗɔwa naaka iɗit Israeelik, sinɔ komoy Abrahamuk, tuukan Biniyamuk.

²Ki oriiɗ Waakoyot joop sigɛɓa sɛɛg ɗeger jeemɛk. Kin ɗegerɔɔn kɛ tonu Wargatɛ Waakoyotoŋk ɛk agut Eeliyaas sinɛɓa wideer daari Waakoyota agut joop Israeelik?

³kɛ,"Iin Suumi, ɓokootarkanre joop gooŋk pɛrkaakoŋkuŋ ɛkan aalɛr nyonitaak gooŋk uduŋeetoŋkuŋ, dakikakɔre mowan, nɛ ɓɔrɛti ɗɛyɛr ɓokotiita."

⁴Yakanaɓa jumurgeeɗ Waakoyot ɛk? Tongeeɗɓa kɛ, "Ŋɔɗaakan ɛɛka naaka joop a kumɛyɛ tula pɛɛy sigɔkan kir ɛtɛ korontunɛ nɔ ugumer raŋaawota sinaana kɛ Ba'aalik."

⁵Oko sinik lakɛ ɔɔtɛ sineene sisɔk ŋaaytaanak sigɔkɔ sɛɛg daamɛɛ wookaankiŋ.

⁶Ɔkɔnɓa ar daaman wookaaniŋ, nɛ gunɓa dakɛ ijaagiŋ. Ma ɔkɔnɓa ar ijaagiŋ, nɛ gunɓa dakɛ wookaan a kiiɗɛ ɔɔtɛ.

⁷Anɛkɔɔ ɓɛɛlɛ ɛk? Kirɓa joop Israeelik laŋiiɗ sinɛɓa ɗɛyɛrk. Laŋirɓa joop sigɛɓa sɛɛg daamɛɛk, mayakanaɓa kilarar sigɛɓa ŋayɗiikikiŋ,

⁸oko sinɛɓa taapɛɛɗɛ Wargatɛɛ Waakoyotoŋk kɛ, "Gaɓɛɓa sɛɛga Waakoyot wɛɛŋa kilarɔɔnoŋk, kɛnɔ kat dɛnɗi taamɛ gɛŋk, kɛnɔ ɓɔrɛ kat tiiɗi ween gɛŋk, mɛlɛɛɗa ɓɛɛnyɔwa sineena."

⁹Tonuɓa ɓɔrɛ Daawit kɛ, "In sɛɛga dakɛ nyɔɔkiyɛ gɛŋk a kaŋtan, a goomoy, a gaŋi, a rakatɛ sinɔ obiiŋɔŋk.

¹⁰In miinyɗi taamɛ gɛŋk a kat dɛnɗi, in ruŋɗi ɓeetɔ gɛŋk nɔkoy nɔkoy."

¹¹Kɔɔniyaaka kɛkar, gaŋirkan joop Ayuuduk mɛlɛɛɗa ɗiirina? Moko adaktan. Yakana agut sinɔ kirɗi tiiɗit higiyaak mɛlkikan bɔdɛ joopa sigɔɔga moko Ayuuduk, kɛnɔ arɛɛ joop Israeelik a nyekenkaanakik.

¹²Ɗɔkuɓa any sinɛ kirɗi tiiɗit joop Ayuuduk geet sinɔ obiiŋɔŋk ɗooka, ɛɓa ɗɔku ɗiirin nɛŋk geet sinɔ obiiŋɔŋk joopa sigɔɔga moko Ayuuduk, nɛ ɗɔku enyaaka nɛŋk geet sinɔ obi a kaalɗi a ɛtɛ ɛkik!

¹³Tonɗiika kɔnaaŋ iinak joop sigɔ moko Ayuuduk. Yoguka eemɛyɔn, agut ijaag naak oko sinɛ eet wosɛytan joop sigɔ moko Ayuuduk,

¹⁴kɛnɔ ara tekaaneer gaaŋk sigɛ joop Ayuuduk a nyekenkaanak, nɛ agut sini kɛnɔ ebɔda sɛɛge a omoŋ omoŋ.

¹⁵Saa oriiɗ sɛɛg Waakoyotuk nɛ ɔkɔn taaki joop ɔgɔ a Waakoyoŋ nɛ saa boŋiiɗ sɛɛg Waakoyotuk nɛkɔna gayi a jikon? Ito ege sini ŋaarin ret walasak.

¹⁶Ɔkɔn malɛytant sinɔɔnɛ omoŋɔŋk nyon sinɛ tuktank geetitan, nɛ ege malɛytan nɛɛkɛ baŋɛ geetitan. Ɛ ɔkɔn kɛɛt tiltilɛ gɛɛnɛ geetitaanakiŋ, nɛ ɓɔrɛ rɛkɛnak gɛɛnɛ geetitaanak.

¹⁷Ɔkɔn bɔsɔɔta rɛkɛnak yuuyɛ sinɔkan waayɛɛŋɔŋk a omoŋ omoŋ ɛ ɗaabɛɛrɛ nyona nɛɛka yuuyɛ ɗukoŋkuŋ, iinak joop sigɔ moko Ayuuduk ito ɓɔrɔ iinak yuuyɛ sinɛ ɗukoŋk sinɛkan ɗaabɛɛrɛk, ɛ sisɔ iinak kaastaanak geet nɛɛkik nɛ kaasɛɛr ɓaŋkawuka nɛɛk a wori joop Ayuuduk.

¹⁸Agut sini kat ŋaɗɛɛr ɛɛk rɛkɛnakɛ sigaagɛkan bɔsɔɔtak. Ɔkɔn ŋaɗɛɛr ɛɛk sɛɛgeŋ, ma in ɗegerɛ kɛ iinak rɛkɛnak moko diileeri tiltilɛ, ma diiler tiltilɛɛk iinak.

¹⁹Kaɗɛ tonun kɛ, "Bɔsɔɔtɛɛkan rɛkɛnak gɛɛnɛkiŋ nɛkɔɔ ɗaabiɗiira nyona nɛŋkiŋ."

²⁰Eekeer sini. Bɔsɔɔtɛɛkan sɛɛk agut sinɔkan kirɗi ŋaadiɗiitik, yakanakan seŋk ɛ tin agut sinɔkan ɓaŋkaawurɗun ŋaadiyɛɛkɛk. Agut sini kat ŋaɗin ɛɛk, mayakana ɛti a ɓuriikinŋ tuɓur eemɛyɔɔnoŋk.

²¹Agut sinɔ ɔkɔnɓa kir Waakoyota sanɗit rɛkɛnak sigi tukiŋ, nɛ ɓɔre kiigiɗin sanɗit.

²²Mermen mentanka a kalkalka Waakoyotoŋk, ar kalkalka nɛɛkɛ joope sigaagɛɓa ɗiirark raŋk. Mayakana mentanka nɛɛk iina, ɔkɔn nɛ ɛti a ɓaŋkawuŋ, ma ɔkɔn kɔɔŋ nɛkɔɔ ɓɔrɛni yawɛɛrɛŋ.

²³Ɔkɔn joop Ayuuduk ŋɔɗar any sinɔ kirɗi ŋaadiɗiitik ɛ murarkiŋ, nɛkɔɔ murar nyona nɛŋk sinaanaɓa jeemekiŋ, agut sinɔ lak Waakoyot ɓaŋkawuka sinɔ jumurɗu sɛɛg nyona nɛŋk sinaanaɓa jeemɛkiŋ.

²⁴Agut sinɔ iin iɗit sinɔ moko Ayuuduk ɔkɔnnu yawukɛ keet sinaanɛ ege tuki nɛɛkɛ yuuyɛ ɗukoŋk, ɛni ɗaabɛɛrɛ yuuyɛta sinɔɔnaɓa waayɛɛŋɔŋk sinɔɔna moko nookukuŋ, nɛ joop Ayuuduk ki sɛɛga gayɛ ɛk sinɔ ɗaabiɗiitarkiɗ yuuyɛta sinaanakan atukuɗ tukik.

²⁵Iinak manyaakak eeta sigɛ dooytaanakik, kaa ɗɛyɛ a dakɛɛr a kiir ɗegerɔɔn any sini dugaaŋɔŋkuŋ kɛnɔ kat koɓiir kɛ ɗegerari ɛɛk. Ɗeyikan Israeel sinɔɔnɛ kilarɔn sinɔ balaaŋɔŋk takank mɛlɛɛɗa ɔɔtɛya sinaanakoy guugunyarkiɗ joop sigɔ moko Ayuuduk baŋɛk.

²⁶Agut sini bɔdɛrkoy joop Israeelik baŋɛ oko sinɛɓa taapɛɛɗɛ Wargatɛɛ Waakoyotoŋk kɛ, "Ŋaarkikoy ebɔdtan Siyoone, ɔɔyɛkoy ŋɛɛwɛnka Yaykoobe.

²⁷Ege sigi kuumiyɛ sigɛ guugunygiɗii a sɛɛgik, saakɔɔ sɛɛge ɔɔyɛɗa tikiyɛ gɛŋkik."

²⁸Ɔkɔn agut Pɛɛni nɛɛk sinɛ Ɓɛlkɛɛstankiŋ, nɛ sɛɛg gumaakeer Waakoyotoŋk agut iinak sigɛ joop sigɔ moko Ayuuduk. Mayakana ɔkɔn agut daaman, nɛ sɛɛg poru sɛŋk agut komoy ɔrɛyak gɛŋkik.

²⁹Ki Waakoyot weewerɛ koɓi nɛɛk wookaan a daaman nɛɛkɛk.

³⁰Oko sinɛɓa jeemɛ kirɗɔ tiiɗit Waakoyotak, nɛkɔ sisɔ laŋiir maariyeet agut sinɔ kirɗi tiiɗitik.

³¹Oko sinɛkan laŋirɗɔ maariyeetik, nɛ ɓɔrɛ sisɔ kir tiiɗit Waakoyota kɛnɔ laŋir maariyeet.

³²Agut sinɔ ariɓa Waakoyot joop baŋɛ a korkortaanak sigɔ kir tiiɗitik, kɛnɔkoy yaaŋɛ sɛɛga baŋɛ maariyeet nɛɛk.

³³Ɓukuur ɛk sinɔ sɛɛn ɗumaat olaata baŋɛk a ɗegerɔn a ɗegerɔn ɛɛkoŋk Waakoyotoŋk! Kɛɛ mermenɔɔn pirdi nɛɛk, kɛɛ ɗegerɔɔn gopan nɛɛk.

³⁴"Wooɗ sinɛ ɗeger ɓayɛ Suumiyoŋkuk? Wooɗ sinɛ rɔɔriy sɛɛnik?"

³⁵"Wooɗ sinɛ jeemɛ masiɗi Waakoyota nɔ koyɗigeeɗ Waakoyotuk?"

³⁶Agut sinɔ laŋɛɛɓa ola baŋɛ sɛɛne ɛ goy nɛɛkɛk nɛ sɛɛna. In dakɛ eemɛyɔɔn sɛɛna nɔkoy nɔkoyk. Ameen.