Read majang Roome 12 Bible Online

Roome 12 - majang bible

Roome 12

¹Agut sini iinak manyaakak eeta sigɛ dooytaanakik, kalɛya kɔnu maariyeet Waakoyotoŋk kɛnɔ wideetari ɛkan goŋk oko uduŋeet sinɔ bɔdɛɛk, ɛ geetitank ɛ boŋu Waakoyot ijaag noŋk sinɛ wɛɛŋakoŋk.

²Kat gayikari a ɗoo sini, mayakana in arɛɛ kalbiyɛ goŋk a tɔɔmɔk, kɛnɔ ɗegerɛ sinɔ kɛ ɓɛɛlɛ ɗɛyan Waakoyotoŋk ɛkik, sinɔ mentan, ɛ yaa, ɛ daktank.

³Tonɗiika kɔna baŋɛ wookaan sinaanɛkanta gaɓɛɛk kɛnɔ kat koɓiikari ɛkanɛɛkɛ goŋk a kaalɛ sinɛ kɔna ɗɛyɛk, mayakana kɛnɔ in koɓiikɛɛ ɛkanɛɛkɛ goŋk. In rɔmɛɛ ɛkan goŋk ŋaadiyɛɛkɛ sigaagɛkan kɔna gaɓɛ Waakoyotuk.

⁴Eteŋk a omoŋ omoŋ oko sinɛ lakiɗii eek sinɔɔnɛ omoŋɔŋk nyonitaak sigɔ ɓɔɔkaaŋɔŋk, nɛ moko latu nyonitaak sigi ijaag sinɔ omoŋɔŋk,

⁵ɛɓɔrɛ eteŋk omoŋ Keresee saa ɓɔɔkaakiɗiik. Eteŋk a omoŋ omoŋ nyonitaak ɛɛk sinɔ omoŋɔŋk.

⁶Lakii tigiyak a pakakataaŋ oko wookan sinɛkan tina gaɓɛ Waakoyotuk. Ɔkɔnkan gaɓɛɛ eta omalta tigi pɛrkaakoŋkuŋ, nɛ in tonu pɛrka oko ŋaadiyɛ gɛɛŋk.

⁷Ma ɔkɔn ijaagiŋ, nɛ in ijaagɗi, ma ɔkɔn rɔɔriyɔn, nɛ in rɔɔriya,

⁸ma ɔkɔn gaananit, nɛ in gaananɗi, ma ɔkɔn tɔkɔny sinɛ ɗɛyɛ joopa ɔgɔɔkakiŋ, nɛ in kɔnyɗi yaakat, ma ɔkɔn lowi joopoŋkuŋ, nɛ in lowuɗi kɛ ɗɔm, ma ɔkɔn maariyeetiŋ, nɛ in maariyɗi yaakat.

⁹Kat mɛyin noŋk lak tagay. In ɓooyɛɛ any sinɔ ŋɛɛwɛŋɔŋk, in gaagamikɛɛ a any sinɔ mentanŋɔŋk.

¹⁰In poporiikɛɛ ɛkanɛɛkɛ goŋk mɛyin masiikikeenoŋk, in emɛmɛyikɛɛ ɛkanɛɛkɛ goŋk a kaakalikɛŋ.

¹¹In ijaagɗikɛɛ a ɓaŋkawuŋ a kat dɔɔtɛyɛɛriɗ. In paakorɛɛ wɛɛŋakɛ, in ijaagɗikɛɛ Suumiya.

¹²In kɔna yaa ŋaadiyɛɛkɛ sigaagɛ kookorɛɛk, in ɓaŋkaawurɛɛ oolaan rakatɛɛk, in ɗanɗamaakɛɛ ɓɛɛnyɔwɛɛkɛ baŋɛ.

¹³In kɔnyɛɛ joop Waakoyotoŋk ant sinaanɛ sɛɛga ɗɛyɛk, in wɔɔrɛɛ konan.

¹⁴In geetɛɛ joop sigɛ kɔnu epapayark, in geetiɗikɛɛ, ma kat koonyɗikɛɛ.

¹⁵In kɔna yaa a joop sigɛ yaa sɛɛgak, in sanɗikɛɛ a joop sigɛ sanɗiik.

¹⁶In lakɛ koɓi sinɔ omoŋɔŋk ɛkanɛɛkɛ goŋk, kat ɓɔŋgɔɔrɛɛ ɛɛk rakaaya. In ɗɛyɛɛ ɓɛɛl a joop sigɛ beeɗii nɛŋk ar ɗookak, ma kat merɛɛ ɛɛk a koɓiir kɛ ɗegerari ɛɛk.

¹⁷Kat jumurari eta any sinɔ ŋɛɛwɛnŋɔŋk ant sinɔɔnɛ ŋɛɛwɛnŋɔŋk, in ijaagɛɛ any sinɛ mentanŋɔŋk joope baŋɛ taamɛkɛ.

¹⁸Ɔkɔn kɔna gayɛ goy noŋkuŋ, nɛ in beeɗɛ a joop baŋɛ bɔdɛɛɗ.

¹⁹Iinak sigɛ kɔnu poraak, kat tiijiɗikari adaktan, yakana in ŋɔɗɛɛ goopan Waakoyota kɛnɔ ariɗ agut sinɔ tonu Wargatɛ Waakoyotoŋk kɛ, "Tiijiɗika eet, jumura erɛ saak, tonu Suumii."

²⁰Maɓɔrɛ tonu Wargatɛ Waakoyotoŋk kɛ, "Ɔkɔn gumaaken nookɛ lak ŋaawuŋ, nɛ tigi ɗama, ɛ ɔkɔn lak paarŋ, nɛ tigi maawu, agut sinɔ saa ijaagiɗin any sinik, moɗun sɛɛn maɗ keenyoŋk."

²¹Katni lɔsɛɛ ant sinɔɔnɛ ŋɛɛwɛnŋɔŋk, ma lɔsu any sinɔ ŋɛɛwɛnŋɔŋk ant sinɔɔnɛ mentanŋɔŋk.