Read majang Roome 13 Bible Online

Roome 13 - majang bible

Roome 13

¹Ɗɛyɛ joopa baŋɛ a tiiɗi ɔɗɔweera maŋgistiyoŋkuŋ, agut sinɔ laŋiiɗɛ ɔɗɔwikeen ɗɛyaan Waakoyotoŋkuk, ɛkan daamɛɛ ɔɗɔweer sigɛ ɓɛɛlɛr sisɔk Waakoyotek.

²Agut sini iɗit sinɔ ɓooyu ɔɗɔwenk nɛ ɓooyu sekiyɛ Waakoyotoŋk, nɛ joop sigɛ ɓooyur ɔɗɔweerk baŋɛ ɗɔkarki goopan ɛɛka nɛŋk.

³Ɓuri ɔɗɔweer joop sigɔ ijaagir any sinɔ ŋɛɛwɛnŋɔŋk, ma moko joop sigɔ ijaagir any sinɔ mentanŋɔŋk. Ɗɛyin a kin tuɓur ɔɗɔwen? Ɔkɔn ɗɛyin, ijaag any sinɔ mentanŋɔŋk, nɛkɔɔ laŋin pɔɔsiyɛ sɛɛne.

⁴Agut sinɔ sɛɛn sɛŋk ijaagen Waakoyotoŋk kɛnɔ ijaag any sinɔ mentanŋɔŋk iina. Mayakana ɔkɔn ijaagin any sinɔ ŋɛɛwɛnŋɔŋkuŋ nɛ ɓura, agut sinɔ mokokan kadi aarɛ nɛɛk sɔkɔn. Sɛɛn ijaagen Waakoyotoŋk sinɔ any goopanoŋk kɛnɔ goop iɗit sinɛ ijaag any sinɔ ŋɛɛwɛnŋɔŋk.

⁵Agut sini ɗɛyɛ a tiiɗikɛɛ ɔɗɔweeraŋ agut gɔɔnyɛt kalbiyoŋk, ma moko agut sinɔ ɓureeɗɛ goopanik dakɛɗak.

⁶Agut any sini in koyɛ gibiri sinɛ kɔne ɗɛyɛr ɔɗɔwer maŋgistiyoŋk, agut sinɔ ijaagir ɔɗɔwer ijaag sini kɛnɔ ijaagɗi Waakoyota.

⁷In koyɛɛ any sinɛ kɔne ɗɛyɛr ɔɗɔwer maŋgistiyoŋk, in ɓɔrɛ koyɛɛ gibiri kɛygun wori sinɔ yawɛɛŋɔŋk, in ɓurɛɛ iɗit sinɛ ɗɛygeeɗ a ɓurɛɛŋɔŋk, ɛ in eemɛyɛɛ iɗit sinɛ ɗɛygeeɗ a eemɛyɛɛŋɔŋk.

⁸Kat latukari asɛ popor ɛkanɛɛkoŋk sɔgɔɔsɔyk, iɗit sinɛ poru iɗitik dusanɛ higi.

⁹Sekiyɛ sigɔ tonur kɛ, "Kat ibiɗiikink, kat ɓokotɗiikink, kat agalɗikink, kat ɗɛyin any etoŋkuk," a sekiyɛ ɔgɔ baŋɛ sonysoomɛɛ sɛɛg sekiyɛɛkɛ sigɔɔgɛ omoŋɔŋk tonur kɛ, "Poru dooytaanak oko sinɛ poriiɗin ɛɛk nookuk."

¹⁰Ki ariɗ mɛyin any sinɔ ŋɛɛwɛnŋɔŋk ete. Agut sini ege mɛyin any dusanɛtoŋk higiyoŋk.

¹¹In arɛɛ sini, ma koɓɛɛ eme nɛɛkiŋ. Gayɛkan sayiti sinɔ ɓeɗirɗɔ ɗoŋɛ goŋkuŋ, agut sinɔ wɔɔŋku bɔdɛ naŋk sisɔ a kaalɛ sinɛɓa ŋaadɗiiɗii tukik.

¹²Ɗeyikɔɔ kaay nɛɛkɛ, maɓɔ wɔɔŋku waawuy nɛɛkɛŋ. Agut sini koy orii ijaag nyuuguroŋk, nɔ kadii beya any pɛɗɛrkaatoŋk.

¹³Nɛkoy weeweriikii kɛ ɗɔm oko sinɛ weeweriiɗii waawuyk, a moko duubiyeet sinɔ badɛk a tɔpɔy, a moko ruunyikent a molkotɔɔn, a moko ɗaakan a nyeken.

¹⁴Mayakana, in kadɛɛ Suumi Yeese Keresee, ma kat koɓiikari taara kɛnɔ dusanɛɛ ɗɛyan nɛɛk.