Read majang Roome 14 Bible Online

Roome 14 - majang bible

Roome 14

¹In boŋɛɛ iɗit sinɛ bɔɔla ŋaadiyɛɛkɛ iinakɛ kɔɔrk, ma kat pɛrɛdɛrɗɔ koɓiiɗ nɛɛkɛk.

²Rɔmɛɛɗ, lakɛ iɗit sinɔ ŋaadiɗi ma ɗam ola sigɛ ɓɛɛlɛrk baŋɛk, mayakana ɗam iɗit sinɛ bɔɔl ŋaadiyɛɛkɛɛk ola sigɛɓa waayɛɛk dakɛɗa.

³Nɛ kat daraayɛ iɗit sinɛ ɗam ola sigɛ ɓɛɛlɛrk iɗit sinɛ ki adak, kat ɓɔrɛ pɛrɛdɛ iɗit sinɛ ki adak ete sinaanɛ ɗamk. Agut sinɔ boŋukan sɛɛn Waakoyotuŋ.

⁴Iin wooɗ sinɛ pɛrɛdin laaŋoyente iɗit omuk? Ɛtɛŋ maŋk ɗiiriŋ suumiya nɛɛkaak kɛygun ɗiiriŋ. Nɛkoy ɛtɛ kɛkarŋ, agut sinɔ oolɛ a ari sɛɛn Suumi nɛɛkɛ a ɛtɛŋ.

⁵Kaɗɛɛŋ koɓu iɗit omaay kɛ kaalɛ ɓɛɛnyɔ omaay ɓɛɛnyɔ om, ma koɓu iɗit omaay kɛ ege ɓɛɛnyɔwɛ sigɛ baŋɛ omoŋ. Nɛ in mɛlɛ eta a omoŋ omoŋ nɔ ruume kalbii nɛɛkɛk.

⁶Iɗit sinɔ eemɛy ɓɛɛnyɔ sinɔ omoŋɔŋk a kaalɛ ɓɛɛnyɔ omk, eemɛy ɓɛɛnyɔ agut Suumi. Ma iɗit sinɔ ɗamiŋɔŋk, ɗami agut Suumi, agut sinɔ pɔɔsɛɛɗ Waakoyok. Ma iɗit sinɔ ki ɗamitik, ki ɗamit agut Suumi, agut sinɔ pɔɔsɛɛɗ Waakoyok.

⁷Kɛɛ aasi eteŋkɛ iɗit sinɔ beeɗ ɛɛka nɛɛkaakik, ɛ kɛɛ iɗit sinɔ rɛr ɛɛka nɛɛkaakik.

⁸Ɔkɔn beeɗiiŋ, nɛ beeɗii Suumiya Yeeseya, ma ɔkɔn ɓɔrɛ rɛɛriiŋ, nɛ rɛɛrii Suumiya Yeeseya. Agut sini kɛygun beeɗiiŋ kɛygun rɛɛriiŋ, nɛ eteŋk Suumiyoŋk Yeeseek.

⁹Agut sinɔ rɛrɓa Kerese nɛɓa ŋaarki bɔdɛɛɗa kɛnɔ dakɛ a Suumi bɔdtaanakoŋk a reteeroŋk.

¹⁰Anɛ pɛrɛdin masookoye agut jikon? Maŋk daraayin masookoy agut jikon? Wideeriikoy ɛɛk eteŋk baŋɛ taamɛka barsuma pirdiyoŋk Waakoyotoŋk.

¹¹Agut sinɔ taapɛɛɓa Wargatɛɛ Waakoyotoŋk kɛ, "Tonu Suumii kɛ, 'Eet bɔdɛ, ɛtɛrkoy joop baŋɛ korontunɛ eeta nɛ ugumerŋ, makoy ɓɔrɛ kaɗater joop baŋɛk tonur kɛ Eet Waakoyo.' "

¹²Saakoyk nɛkoy gaɓii eteŋk a omoŋ omoŋ jumuran Waakoyota agut any sinɛkan ijaagiik.

¹³Agut sini koy ŋɔɗii pɛrɛɛdan ɛkanɛɛkɛ gaŋkik. Ɛ in nyɛyɛ iɗit sinɔ riiɓeeɗ manya any sinɔ gaŋiɗŋɔŋk maŋk tuutuk.

¹⁴Ɗegera ɛta mɛlɛ Suumii Yeesee kɛ kɛɛ any sinɔ somkan ɔɗɔwa nɛɛkaakik, yakana somkan eta sinaana koɓu kɛ somkank.

¹⁵Ɔkɔn arin masookoy a sanɗi agut ɗama sinɛ ɗamunkuŋ, nɛ moko arkin ijaag mɛyinoŋk. Kat sɔɔkun masookoy sinɛɓa rɛrgeeɗ Kereseek ɗamat sinaanɛ ɗamunk.

¹⁶Nɛ kat arin any sinɔ mentanŋɔŋk a nyɔɔnɛɛ a tonɛɛ kɛ ŋɛɛwɛn.

¹⁷Agut sinɔ moko burɛ Waakoyotoŋk any sinɔ laŋiɗɛ ɗama a tuuk, ma mentanka taamɛkɛ Waakoyotoŋk, a bɔdɛ, a yaaka sinɛ ar Wɛɛŋakɛ sigɔɔgɛ Geetitaanakik.

¹⁸Iɗit sinɔ ijaagɗi Kereseya oko sinikik, nɛ ari Waakoyo a yaageeɗiŋ, ɛ sɛɛn eemɛyɛ joope.

¹⁹Agut sini koy nomii ant sinɔɔnɛ laŋiiɗɛ bɔdɛɛk a sinɔ kɛnyɗi ɛkan gaŋkik.

²⁰Kat aalin ijaag Waakoyotoŋk agut ɗama. Kɛɛ ɗama sinɔ ŋɛɛwɛnk. Yakana moko liki eta sinaana ɗam ɗama nɔ ari iɗit om a gaŋiŋɔŋk.

²¹Liki sinɔ kiiɗin ada taar ɛ kiiɗin tuu ola sigɛ ɓaayɛrk maŋk kiiɗin ijaagɛ any sinɛ ɓɛɛlɛk sinɛ ari masookoy a gaŋiŋɔŋk.

²²Kooru ŋaadiyɛ sigɛ lakin agut any sinik sigɛ kɔne atu kɔɔr iin a Waakoyok. Geetitan iɗit sinɔ sɛɛn ki gɔɔnyɛt koɓi nɛɛkɛ, saa ijaagiɗ any sinɔ koɓu kɛ ege any sinɛ likik.

²³Yakana ɔkɔn lakɛ iɗit sinɔ ɗami ma lak koɓiɗak a pɛɛykiŋ, nɛ pɛrɛdɛɛɗ Waakoyotuŋ, agut sinɔ moko ɗamiɗ ŋaadiyɛɛkɛɛk. Tikiyɛ any sinɛ kɛɛ ariɗ ŋaadiyɛɛkɛɛk baŋɛ.