Read majang Roome 15 Bible Online

Roome 15 - majang bible

Roome 15

¹Eteŋk sigɛ ɓaŋkawukii ŋaadiyɛɛkɛɛk ɗɛyɛ tina a ɓatakii bɔɔlaaka bɔɔlkaanakoŋkuŋ, ma moko arii a yaageeɗ ɛkan gaŋk dakɛɗa.

²Eteŋk a omoŋ omoŋ koy ijaagii any sinɔ ari iɗit om a ɓaŋkaawur ŋaadiyɛɛkɛ gɛɛnɛ ɛ kɔnyɛ sɛɛn ɛ ar sɛɛn a yaageeɗŋɔŋk.

³Agut sinɔ kiɓa aasi Kerese ariɗ ɛɛk nɛɛk a yaageeɗiŋ, yakanaɓa laŋki sinɛɓa taapɛɛ Wargatɛɛ Waakoyotoŋk kɛ, "Laŋkaakɔ nyɔɔna sigɛkanni nyɔɔnarɗik."

⁴Ola sigɛɓa taapɛɛ jeemɛ Wargatɛyɛɛkɛ Waakoyotoŋk tak baŋɛk taapɛɛɓa sɛɛg kɛnɔ tin rɔɔriyar, kɛnɔ koorii ŋaadiyɛ sigɛ kookoriik sigɛ tina mɛlɛrki ɓaŋkawurɔɔn a ɓaŋkawurɔɔn oolaanik.

⁵In kɔna gaɓɛ koɓi sinɔ omoŋɔŋk Waakoyot sinɛ gaɓɛ ɓaŋkawurɔn oolaanik a gaananitik oko sinɛ nomɛrɗɔ rɔmɛɛɗ Yeese Kereseek,

⁶kɛnɔ eemɛyari Waakoyo a Ɛpɛn Suumiya naŋk Yeese Kereseya a latukari ɓayɛ sinɔ omoŋɔŋk a ato sinɔ omoŋɔŋk.

⁷In boboŋɛɛ ɛkan goŋk, oko sinɛkan kɔnu boŋiiɗ Kerese eemɛyɔɔna Waakoyotoŋk, kɛnɔ dakɛ a eemɛyɔn Waakoyota.

⁸Agut sinɔ tona kɔna kɛ dakɛkan Kerese a ijaagen joopa Ayuuduk kɛnɔ yaaŋɛ sinɔ kɛ ŋaadɛɛ Waakoyoŋɔŋk, kɛnɔ ari kuumiyɛ Waakoyotoŋk a kurak ɔrɛyaka gɛŋk eekeerɛ,

⁹ɛɓɔrɛ kɛnɔ eemɛyar joop sigɔ moko Ayuuduk Waakoyo agut maariyeet nɛɛk, oko sinɛɓa taapɛɛɗɛ Wargatɛɛ Waakoyotoŋk kɛ, "Agut sini pɔɔsani joope sigɔɔgɛ moko Ayuuduk kɔɔr, iiliyaaka tiriyaaka goonaakiŋ."

¹⁰Ɛɓa tonɛɛ kɛkar kɛ, "Iinak joop sigɛ moko Ayuuduk, in kɔna yaa a joop gɛɛŋk agut omoŋ."

¹¹Ɛɓa tonɛɛ kɛkar kɛ, "Iinak sigɛ moko Ayuuduk baŋɛ, in pɔɔsɛɛ Suumi, ɛ iinak joop ɗokanɛkoŋk baŋɛ, in iiliyaakɛ pɔɔsiyɛɛkɛ sɛɛna."

¹²Ɛɓa tonu Isaayas kɛ, "Sinɛkoy kus komoy Iseyk, tapaaɗaniikoy joope sigɔɔgɛ moko Ayuuduk raŋk, latukoy joop sigɔ moko Ayuuduk ŋaadiyɛ sigɛ kookorɛɛk sɛɛne."

¹³In Waakoyo, sinɛ tuny ŋaadiyɛ sigɛ kookorɛɛk, enyɛr kɔnu yaakata bɔdɛɛɗoŋk agut sinɔ ŋaadiɗiiɗɔɔŋɔŋk, kɛnɔkɔɔ ŋaadiyɛ goŋk sigɛ kookorɛɛk kaar a ɓɔlɔɔrɛr ɓaŋkawukaat Wɛɛŋa sigɔ Geetitaanakik.

¹⁴Eet ɔɗɔwa naaka eekerkan, iinak manyaakak eeta sigɛ dooytaanakik, sinɛ enyaɗɔ mentankaat, a sinɛ latukuɗɔ ɗegerɔn ɛɛkoŋk sinɔ enyaaŋɔŋk ɛ gayɛrɗɔ sinɔɔna rɔɔriyɗ iɗit omaay iɗit omk ɛkanɛɛkɛ.

¹⁵Yakana taapɛɛra kɔna ola a omoŋ omoŋ diirikent jɛt gopɛ sinɔɔnɛ koɓurkuɗɔŋɔŋk, wookaan sinaanɛ kanta gaɓɛɛ Waakoyotek,

¹⁶kɛnɔ daka a ijaagen Yeese Keresee joopa sigɔɔga moko Ayuuduk tapaaɗiikent ŋaadiyɛɛkoŋk sinɔɔnɛ ijaagiɗa pɛɛni sinɔ ɓɛlkɛɛstank Waakoyotoŋk, kɛnɔ boŋɛɛ uduŋeet joop sigɔ moko Ayuuduk a yaaŋ, ɛ geetɛ sɛɛg Wɛɛŋakɛ sigɔɔgɛ Geetitaanakik.

¹⁷Agut sini laka goy Yeese Kereseek ɔɔtɛ sinɔ meriiɗa ɛɛkik ijaag naakɛ Waakoyotakiŋ.

¹⁸Mera ɛɛk agut sinɔkan ariɗ Kerese joop sigɔ moko Ayuuduk pɛɛnii naakɛ a ijaag naakɛ a tiɗii Waakoyotak.

¹⁹Ɛɓɔrɛ mera ɛɛk agut sinɔkan ariɗ joop sigɔ moko Ayuuduk a tiiɗi Waakoyota Wɛɛŋakɛ sigɔɔgɛ Geetitaanakik sɔɔriyɛɛkɛ sigɔɔgɛ boobɛrŋɔk a olaatɛ sigɔɔgɛ reemɗi ɓayɛɛk, ant sineene waasakan pɛɛni sinɔ ɓɛlkɛɛstank Kereseek a weeweriika sinɔɔnɛ Yorsaleemuk mɛlɛɛɗa Ilwaarikoona.

²⁰Egekan ɗɛyan naakɛ ɓɛɛnyɔwɛ gɛɛŋk baŋɛ sinɔ laaganyɗa pɛɛni sinɔ ɓɛlkɛɛstank Kereseek soodi inɓa kiiɗɛ weentak, kɛnɔ moko kɛnyiika nyon sinɔɔnɛkan kɛnyiikunɗ iɗit omaayŋɔŋk.

²¹Oko sinɛɓa taapɛɛɗɛ Wargatɛɛ Waakoyotoŋk kɛ, "Dɛnɛrkoy joop sigɛkan kɛɛ sɛɛga toniiɗ agut sɛɛnkiŋ, ɛkoy koɓur joop sigɛkan kir weentak."

²²Agut any sini kaaɓɛkanti agut ɓɔɔkaaŋ kɛnɔ kat kɔra son lak iinakik.

²³Yakana sisɔ kiiɗɛɛ any sinɔ ijaaga seedik ɛ agut sinɔ ɗɛyɛɛɗa a emeyi ɓɔɔkaaŋ kɛnɔ gun kɔnu dɛnaak,

²⁴nɛ koɓa kɛ kɛɛɗakɔɔ kɔnu dɛnɛɛra a gopan saakɔɔ kɛɛɗa Ispeenak, nɛ kɔɔta yaa baŋiya sooy lak iinakik a bala ɔɔtɛ nɛɛkɛŋ ɛ kɔɔtu kɔnyɛɛr ant sinaanata ɗɛyɛ ŋawiita naakaakik.

²⁵Yakana sisɔ diila tɔkɔny Yorsaleema sinɔkɔɔ gaɓɛɛ ŋaadtaanakak.

²⁶Agut sinɔ gaamurkan ŋaadtaanak Mɛkedooniyaak a Akayaak kɛ wosɛyɛrkɔɔ tɔkɔny sankaanaka sigaaga atu ŋaadtaanakɛ Yorsaleemuk kɔɔrk.

²⁷Yaakan sɛɛga ɔɗɔwa nɛŋk kɛnɔ ijaagir any sini, nɛ ɗɛyɛ sɛɛga eekeerɛ a kɔnyɛr sankaanak sigɛŋ. Agut sinɔkan joop Ayuuduk kaastaanak geet wɛɛŋakoŋk a joop sigɔ moko Ayuuduk agut omoŋɔŋk, joop sigɔ moko Ayuuduk ɗɛyɛ a ijaagɗi joopa Ayuuduk geet woriyoŋk.

²⁸Agut sini saakɔɔ ruumeeɗa sinik, ɛkɔɔ gaɓa sɛɛga tɔkɔny sinɛkan tolɛɛk, nɛkɔɔ kɛɛɗa ɗoya sinɔɔnɛ lak iinakik Ispeena.

²⁹Saakɔɔ kɔrurkuɗa son lak iinakik, ɗegera kɛ mɛlɛɛrakɔɔ enyaakaat geet Kereseek.

³⁰Iinak manyaakak eeta sigɛ dooytaanakik, kalɛya kɔnu Suumii naŋk Yeese Kereseek a mɛyin sinaanɛ gaɓɛr Wɛɛŋa sigɔ Geetitaanakik, in arɛɛ ɗɔŋkɔɔlɛ a eet agut omoŋ ɗanɗamɔɔn Waakoyotak.

³¹Ɗanɗamaakarita kɛnɔ kɔɔtu koorɛ joope sigɔɔgɛ kir ŋaadiɗiitik atu Yuudaakek, ɛ kɛnɔkɔɔ boŋɛɛ ijaag naak a yaaŋ joope Waakoyotoŋk Yorsaleeme.

³²Ɔkɔn oko ɗɛyan Waakoyotoŋkuŋ, nɛkɔɔ mɛlɛɛra son lak iinakik yaakat, nɛ ɗɛya a kɔɔ kɛɛɗii imiinyii a iinak agut omoŋ.

³³In Waakoyo sinɛ gaɓɛ bɔdɛɛk a iinak baŋɛ agut omoŋ. Ameen.