Read majang Roome 7 Bible Online

Roome 7 - majang bible

Roome 7

¹Iinak manyaakak eeta sigɛ dooytaanakik, tonɗiika joopa sigaaga ɗegerar higiik, a kiir ɗegerɔɔn kɛ lak higii ɓaŋkawuka ete raŋk ɔɔtɛya sinaana ɓɛɛlɛɛɗ wɛɛŋakɛk dakɛɗa?

²Rɔmɛɛɗ, ege jartii korkortan higii waawanoŋk ɔɔtɛya sinaana ɓɛɛlɛɛɗ baabuy nɛɛkɛ wɛɛŋakɛk, mayakana ɔkɔn rɛr baabuy nɛɛkɛkiŋ, nɛɓɔ sɛɛn woortan higii waawanoŋk.

³Ɔkɔn waawu baabuya omalta ma in ɓɛɛlɛ baabuy nɛɛkɛŋ, nɛ riyɛɛ kɛ ibiɗiikɔŋ. Mayakana ɔkɔn rɛr baabuy nɛɛkɛkiŋ, nɛ sɛɛn woortan higii sinaanɛ ɛ kɛɛ toniiɗ kɛ ibiɗiikɔŋ kɛygun aasi waawu baabuya omaltaaŋ.

⁴Oko sinik iinak manyaakak eeta, rɛrarikan higiya goy buusɛ Yeese Kereseek. Nɛ agut sini eteŋk Kereseek sinɛɓa ŋaarki ret walasak kɛnɔ gaɓii taamɛ ijaaga Waakoyotoŋk.

⁵A inɓa ki rerin buusɛ naŋk sini tikitank nɛɓa ijaajagɗi buusɛɛ naŋk tak ɗɛyan tikiyɛɛkoŋk sinɛ ɓeeɓeski higiik kaakastaanakɛ ɛɛk naŋkik, nɛɓa gaɓii taamɛ retoŋk.

⁶Yakana sisɔ rɛɛriikan higiya sinaanakan tin korkokork nɛkan ŋaarkii yaakata, kɛnɔ ijaagɗikii beeɗit sinɔɔnɛ tɔɔnuk ikekeɓ Wɛɛŋa sigɔ Geetitaanakik, a moko sinaanɛɓa taapɛɛ higii saaɓa bɔɔlɔŋk.

⁷Anɛɓɔ tonii ɛk? Ege higii tikiyɛ? Moko adaktan. Kaagunɓa ɗegerɔɔn kɛ tikiyɛ jikonak, ɔkɔn moko goy higiyoŋkuŋ. Kaagunɓa ɗegerɔɔn ɗɛyan, ɔkɔnɓa ki toniiɗ higii kɛ, "Kat ɗɛyin."

⁸Yakana laŋir tikiyɛɛk milki sekiyɛɛkɛ, nɛte ijaagir tak ɗɛyaanak baŋɛ sigɔ pakakataaŋɔŋk. Ege tikiyɛɛk reteer a kiiɗɛ higi.

⁹Eetɓa bɔdtan saaɓa kiiɗɛ higiik, mayakana saaɓa mɛlɛrkiɗ sekiyɛɛkik, nɛɓa tikiyɛɛk bɔdtaanak ɛɓa rɛɛra.

¹⁰Sekiyɛ sigɛɓa kuumɗigiɗɛɛ kɛ laŋiiɗɛɛkoy bɔdɛɛk nɛɓɔta ɗɔkarki rer.

¹¹Laŋirɓa tikiyɛɛk milki goy sekiyɛɛkoŋk nɛɓati raamɛr, nɛɓati ɓokotur sekiyɛɛkɛ.

¹²Agut sini ege higii geetitan, ɛɓɔrɛ sekiyɛɛk geetitaanak, ɛ liki, ɛ mentaana.

¹³Anɛta any sinɔ mentanŋɔŋk dakɛ a rer? Ki dakɛ adaktan. Ijaagir tikiyɛɛk rer eete tak goy higi sinɔ mentanŋɔŋk kɛnɔ yaaŋɛ kɛ tikiyɛ jikonak, nɛ agut sini ege tikiyɛɛk tikitaanak a kaalɛŋ goy sekiyɛɛkoŋk.

¹⁴Ɗegerii kɛ kuskan higii sooy lak Waakoyok, yakana eet iɗit taaroŋk sinɔkan ɓalɗiiɗɛɛ tikiyɛɛkaak a ito laaŋoyenk.

¹⁵Kaa ɗegerɔɔn any sinɛ araak. Agut sinɔ kaa ariɗ any sinɛ ɗɛya a araaŋɔŋk, mayakana ara sinɛ kaa ɗɛyɛɛk.

¹⁶Ɔkɔn ara sinɛ kaa ɗɛyɛkiŋ, nɛ dooma sinɔ kɛ mentan higiiŋɔŋk.

¹⁷Nɛ ɔkɔn ɓɛɛlɛ oko sinikiŋ, nɛ moko ara sini saak, ma arɗi tikiyɛ sigɛ beeɗir eete takik.

¹⁸Nɛ ɗegera kɛ kɛɛ eete tak any sinɔ mentanŋɔŋk taare naakɛ tak. Kɛygun aasi ɗɛykaaya ijaaga any sinɔ mentanŋɔŋk eek naakɛ takiŋ nɛ kaa oolɛ a ara sɛɛniŋ.

¹⁹Agut sinɔ kaa ariiɗ any sinɔ mentanŋɔŋk sinɛ ɗɛyaak, mayakana ara any sinɔ ŋɛɛwɛnŋɔŋk sinɛ kaa ɗɛyɛɛk.

²⁰Ɔkɔn ijaaga any sinɛ kaa ɗɛyɛ a gun ijaagaŋɔŋkuŋ, nɛ moko ariɗika any sinɛ eet, ma arɗi tikiyɛ sigɛ beeɗir eete takik.

²¹Mɛlɛkɔta kɛ ijajagi higi siniŋ. Saa ɗɛykɛɗa ijaaga any sinɔ mentanŋɔŋk, ma eet a any sinɔ ŋɛɛwɛnŋɔŋk agut omoŋ.

²²Yaati ɓayɛ jɛt higii Waakoyotoŋk.

²³Yakana dɛna a lakɛ higi om sinɔ ijaagɗi nyonitaakɛ gaanɛ ɛɛkoŋk takik, a tima a higi kalbi naakik nɛti ari a eet korkortan higiya tikiyɛɛkoŋk sinɛ ijaagɗi nyonitaakɛ gaanɛ ɛɛkoŋk takik.

²⁴Eet rakatkan sinɔ ɓɛɛlɛ ɛkik! Wooɗ sinɛ oolɛ ati ebɔduku taare sineene dilɗi retaak?

²⁵In dakɛr pɔɔsiyɛɛk Waakoyota goy Suumi naŋk, Yeese Kerese sinɛ kan tin ebɔdukuk. Nɛ agut sini tiiɗika higiya Waakoyotoŋk kalbii naakɛk, yakana tiiɗika taare naakɛ higiya tikiyɛɛkoŋk.