Read majang Roome 9 Bible Online

Roome 9 - majang bible

Roome 9

¹Tona eekeer agut sinɔ eet Kereseek, kaa toniiɗ nyon, waasɛta kalbi naakɛ wɛɛŋakɛ sigɔɔgɛ geetitaanakik.

²Lakɛ ɓayaay naakɛ san sinɔ obiiŋɔŋk, a ɓakɛ sinɔ ki yawuɗiitik.

³Ɗɛykaayakan aasi a gunkan daka a koonykan ɛ pakatika ɛɛk Keresee agut manyaakak eeta, sigɛ sɛɛg komoy naakik.

⁴Sɛɛg joop Israeelik. Ariɓa sɛɛg Waakoyot a tɔɔmɔk gɛɛŋk, yaaŋɛɓa sɛɛga eemɛyɔn nɛɛk, kuumɗiɓa sɛɛgaaŋ, gaɓɛɓa sɛɛga higiiŋ, yaaŋɛɓa sɛɛga ugumeet sinɔ eekeerkiŋ, ɛɓa gaɓɛ sɛɛga ŋaadiyɛ sigɛ kookorɛɛk.

⁵Kurakɓa sɛɛk ɓartiyɛɛkɛ gɛŋk tuukaan ɔrɛyak gɛŋk sigɛɓa daamɛɛkik. Kusɓa Kerese taare komoy nɛŋk. Sɛɛn sinɛ ar olaatɛ baŋɛ rakaay. Sɛɛn sɛŋk Waakoyo sinɔ geetitank nɔkoy nɔkoyk. Ameen.

⁶Yakana moko sinɔɔnɛ kɛ aalɛɛɓa Pɛɛni Waakoyotoŋkŋɔŋk. Agut sinɔ joop sigɛ ɓartɛɛ sɛɛg joope Israeelik moko sɛɛg joop Israeelik baŋɛ.

⁷Moko komoy Abrahamuk baŋɛ tɔɔmɔk Abrahamuk. Tonuɓa Waakoyot Abrahama kɛ, "Ikomɛɛkoy komoy nook Isiyaake."

⁸Ege sini sinɔ kɛ tɔɔmɔk sigɔ ɓartɛɛ sɛɛg taarek moko tɔɔmɔk Waakoyotoŋk. Mayakana tɔɔmɔk sigɛ ɓartɛɛ sɛɛg ant sinaanɛ laŋɛɛ kuumiyɛɛkɛ Waakoyotoŋkuk riyɛɛ sɛɛg kɛ komoy sinɔ eekerkank.

⁹Gageeɗɓa ŋaadiyɛ sigɛ kookorɛɛk kɛ, "Weerikaakɔɔ eme sinɔɔnɛ ɔɔtɛ sineene, makɔɔ Saara ɓartɛ tɔɔn sinɔ mooyk."

¹⁰Moko sini dakɛɗa. Gamɛɓa Ribikaa olakaanak a pɛɛy ɛpɛna nɛŋk sinɔɔna omoŋɔŋk, ɔrɛya naŋk Isiyaaka.

¹¹A inɓa kɛɛ ɓartɛɛt olakaanak gɛɛŋk ɛ inɓa kir ariɗ any sinɔ mentanŋɔŋk maŋk ŋɛɛwɛnŋɔŋk kɛnɔ yaaŋɛ koɓi Waakoyotoŋk daaman,

¹²moko agut ijaag mayakana agut iɗit sinɛ riyaak, tonuɓa Waakoyot Ribikaa kɛ, "Tiiɗikoy tɔn sinɛ bɔɔlɔŋk sinaana tɔɔnuk."

¹³Oko sinɛɓa taapɛɛɗɛ Wargatɛɛ Waakoyotoŋk kɛ, "Poraɓa Yaykoob, maɓa ɓooya Esaawu."

¹⁴Tonii sisɔ ɛk? A pakar Waakoyot joopuŋ? Ki ariɗ a daktan!

¹⁵Tonuɓa Waakoyot Muuseya kɛ, "Ɔkɔn ɗɛyaaŋ maariya iɗit sinɛ maariyakiŋ, maɓɔrɛ ɔkɔn ɗɛyaaŋ nɛta sanɗi iɗit sinɛta sanɗikiŋ."

¹⁶Agut sini moko ar sini ɗɛyaan maŋk ijaag etoŋk, ma ar maariyeet Waakoyotoŋk.

¹⁷Tonu Wargatɛ Waakoyotoŋk Pɛr'oona kɛ, "Agut any sini ɓɔŋgɔɔra kɔnu, kɛnɔ dɛnɛɛ ɓaŋkawuka naak iine ɛ waasɛɛ tiriya gaaŋk ɗoo baŋɛ."

¹⁸Agut sini maariye Waakoyot iɗit sinɛ ɗɛyɛkiŋ, ma ari a kilarŋ iɗit sinɛ ɗɛyɛkiŋ.

¹⁹Kaɗɛ kɔɔta tonu iɗit omaay iinakɛ kɛ, "Anɛ tin gɔɔnyɛ Waakoyot agut jikon? Agut sinɔ wooɗ sinɛ oolɛ a ɓooyu ɗɛyan nɛɛkik?"

²⁰Yakana iin wooɗ sinɛ tonun Waakoyota oko sinikik? Tonu suɓoy eta sinaana kɛnyiik kɛ, "Kɛnyin kɔtu oko sinik agut jikon?"

²¹A kɛɛ ete sinaanɛ kɛny suɓoyk ɓaŋkawuka sinɔ kɛnyɗi suɓoy a kebetɔk a omoŋ omoŋ a omaay eemɛyɔɔna, ma om ijaaga sinɔɔna kiiɗɛ ɔɔtɛk?

²²Maɓɔrɛ ɗɛyɛɓa sɛŋk Waakoyot kɛnɔ yaaŋɛ goopan nɛɛk, ɛ yaaŋɛ ɓaŋkawuka nɛɛk. Ma ɔkɔnɓa ɓaŋkaawur oolaan olaatɛ gɛɛnɛ goopanoŋkuŋ, ma seŋk ɗegerin jikon?

²³Nɔɓa ariɗ sinik ɗɛyɛɓa kɛnɔ yaaŋɛ eemɛyɔn nɛɛk sinɛ obiiŋɔŋk, sinɛɓa gupatik eteŋka raŋana sigaaga eteŋk ola gɛɛŋk maariyeetoŋkuk, sigaagaɓa tin ragadi kɛnɔkoy boŋii eemɛyɔn nɛɛkik,

²⁴eteŋk sigɛɓa tin riyk, mokoɓa joope Ayuuduk kɔɔr dakɛɗa mayakanaɓa ɓɔrɛ joope sigɔɔgɛ moko Ayuuduk kɔɔruŋ.

²⁵Oko sinɛɓa toniiɗ Hosee kɛ, "Riyaakoy joop sigɛɓa moko gaaŋkik kɛ, 'Joop gaaŋk,' makoy riya sinɛɓa kɛɛ poriiɗik kɛ 'Porɛɛŋ."

²⁶Maɓɔrɛ saadikan sɛɛga toniiɗɛ kɛ, "Moko sɔɔk iinak joop gaaŋkik, ma saak riya sɛɛg kɛ, 'Tɔɔmɔk Waakoyo sinɛ bɔdɛɛk.' "

²⁷Ooyɛɓa Isaayas agut joop Israeelik kɛ, "Kɛygun aasi ɓɔɔkaaka nɛŋk ito kɛɛwɛ sinɛ ar goroo sinɔɔnɛ obiiŋɔŋkuŋ, makoy bɔdɛr a tekerŋ."

²⁸Agut sinɔ dusanɛkoy Suumii ɗook raŋk goopan nɛɛk a gorgorŋ a pedtan.

²⁹Oko sinɛɓa toniiɗ Isaayas jeemɛ kɛ, "Ɔkɔnɓa tina Waakoyot ki toŋoɗ komoyŋ, nɛ gunɓa badii oko katamɛ Sɛdoomuk a Gɛmooraak."

³⁰Tonii sisɔ ɛk? Laŋirɓa joop sigɔ moko Ayuuduk mentanka taamɛkɛ Waakoyotoŋk sinɔɓa kirgeeɗ ijaagɗitik, ege sini mentanka taamɛkɛ Waakoyotoŋk sinɔ laŋɛɛ ŋaadiyɛɛkɛɛk.

³¹Yakana joop Israeelik sigɛɓa nomɛr higiik a ɗɛyɛrkɛ mentanka taamɛkɛ Waakoyotoŋk nɛɓa kir mɛlɛ mentankaata taamɛkɛ Waakoyotoŋk agut sinɔɓa kirɗi oolɛ koorɛɛt higiyoŋkuk.

³²Kirɓa mɛlɛ agut jikon? Agut sinɔ mokoɓa ɗɛyɛr mentanka taamɛk Waakoyotoŋk ŋaadiyɛɛkɛ mayakanaɓa ijaag. Gaŋirɓa sɛɛk giɗe sinaanɛ gaŋiɗoŋk.

³³Oko sinɛɓa taapɛɛɗɛ Wargatɛɛ Waakoyotoŋk kɛ, "Riiɓaakoy Siyoone raŋk giɗe sinɔ gaŋirɗi joopk talaaɗɛ sinɔ ari sɛɛg a ɗiirarŋɔŋk, mayakana iɗit sinɔ ŋaadiɗi sɛɛnek kiiɗɛkoy keeny."