Read majang Omoŋ Korontoosuk 1 Bible Online

Omoŋ Korontoosuk 1 - majang bible

Omoŋ Korontoosuk 1

¹Ege sini wargatɛ sinɔ taapɛɛrɛɛ seey lak Paawuloos sinɛɓa riyɛ a sɛɛn wosɛytan Yeese Kereseek oko ɗɛyan Waakoyotoŋkuk a manya eteŋka Sostens,

²dooytaanaka sigaaga atu Korontooseek joopa sigaaga geetitaanak Yeese Kereseek, sigaagaɓa riyɛ sɛɛg a dooytaanak, a sigaaga riyar tiriya Suumi naŋk Yeese Kereseek sinɛ Suumi naŋk ɛ nɛŋkik nyonitaakɛk agut omoŋ.

³In wookan a bɔdɛ iinaka sooy lak Ɛpɛn eteŋka Waakoyok a Suumi Yeese Kereseek.

⁴Pɔɔsa Waakoyo ɓɛɛnyɔwɛ gɛɛŋk baŋɛ agut sinɔɓa kɔna gaɓɛɛɗ wookan nɛɛk goy Yeeseek.

⁵Ɓɔlɔrɛɛrkan Keresee ant baŋɛ, waasiyɛɛkɛ a ɗegerɔɔn ɛɛkoŋk.

⁶Liki kɔne waasiyɛ eekeeroŋk sigɛɓa kɔna tonii agut Kereseek.

⁷Nɛkɔɔ kɔne kat bitakɗi tigi wɛɛŋakoŋk sigɛ ɗɛyɛɛrik, saa kookorarɗɔ murun Yeese Kereseek.

⁸Koorɛkoy kɔnu sɛŋk a ɓaŋkaawurari mɛlɛɛɗa pediya kɛnɔkoy kɔnu laŋɛɛ a kɔne kɛɛ any sinɔ kɔnu laaganyɗɛɛk, ɓeny saakoy murkuɗ Suumi naŋk Yeese Kerese kɛnɔ kus pɛrɛdɛ joopek.

⁹Eekerkan Waakoyo sinɛɓa kɔnu riy kɛnɔ latukari omaayikeen a Tɔɔn nɛɛk Suumi naŋk Yeese Kereseekiŋ.

¹⁰Yakana iinak manyaakak eeta sigɛ dooytaanakik, kalɛya kɔnu tiriyaakɛ Suumi naŋk Yeese Kereseek kɛ, "In lakɛɛ omaayikeen, kat kɔne lakɛ pakakat kɔɔr. In beeɗɛɛ a ɓaŋkawuŋ a ɓayɛ omoŋ a koɓi omoŋ."

¹¹Iinak manyaakak eeta, tiyaakan joope wɛy Kɛloeek kɛ lakɛnɔ kɔne kɔɔr ɗaakan a pakakat.

¹²Iinak a omoŋ omoŋ toniir kɛ, "Eet sɛŋk Paawuloosuk," ma ɔgɔɔk tonur kɛ, "Eet sɛŋk Apiloosuk," ma ogɔɔk tonur kɛ, "Eet sɛŋk Petrosuk," ma ogɔɔk tonur kɛ, "Eet sɛŋk Kereseek."

¹³Anɛ Kerese kaakastan? Laalawɛɛɓa Paawuloos laalawutant raŋk agut iinakiŋ? Maŋk aadɛɛɓa kɔnu tiriyaakɛ Paawuloosuku?

¹⁴Pɔɔsa Waakoyo agut sinɔ kɔne kɛɛ iɗit sinɔɓa aadaak Kɛrispoose a Gaayiyoose sɔgɔɔsɔyk.

¹⁵Agut sini kɛɛ iɗit sinɔ oolɛ a tonu kɛ, "Aadɛɛɓa kɔnu tiriyaakɛ Paawuloosuk."

¹⁶Ii, aadaaɓa joop wɛy Istipaanoosukuŋ, ma joope sigeege kɛɛ joop ɔgɔ sigɔɓa aadaak.

¹⁷Wosɛykiɓati Kerese kɛnɔ waasa Pɛɛni nɛɛk sinɔ Ɓɛlkɛɛstank, ma moko kɛnɔ aadiɗiika, moko waasa Pɛɛni sinɔ Ɓɛlkɛɛstank ɗegerɔɔn sinɔɔnɛɓa laŋɛɛ toniiɗ etoŋkuk, ma kɛnɔ moko dakɛ kanysɛya ret sinɛɓa laalawuɗɛɛ Keresee laalawutant raŋk.

¹⁸Ege pɛɛni laalawɔn nɛɛkik gaagɛyikeen joopa sigaagakoy badɛrk, mayakana ege eteŋka sigaagakoy bɔdiik ɓaŋkawuka Waakoyotoŋk.

¹⁹Agut sinɔ taapɛɛɓa Wargatɛɛ Waakoyotoŋk kɛ, "Sɔɔkaakoy ɗegerɔn joop sigɛ ɗegerar ɛɛkkiŋ, ɔɔyakoy koɓi joop sigɛ ɗegerar ɛɛkkiŋ."

²⁰Anɛ iɗit sinɛ ɗeger ɛɛkik eet? Ma rɔɔriytan higiyoŋk eet? Ma iɗit sinɛ mermen any eme sinik eet? Akiɓato ariiɗ Waakoyot ɗegerɔn ɗoo sinik a gaagɛyikeen?

²¹Koruɓa Waakoyot ɗegerɔn joop ɗoo sinik ɗegerɔɔn nɛɛkɛ kɛnɔ kat ɗegerar sɛɛn ɗegerɔɔn nɛŋk. Yakanaɓa ɗɛyan Waakoyotoŋk kɛnɔ ebɔdɛ joop sigɛ ŋaadir sɛɛnik goy wosɛ pɛɛni gaagɛyikeenoŋk sinɛ Waasiik.

²²Ɗɛyɛr joop Ayuuduk dɛnɛ sɔɔriyɛɛkoŋk, maɓɔrɛ ɗɛyɛr joop sigɔ moko Ayuuduk ɗegerɔn etoŋk.

²³Mayakana seek waasii Keresee sinɛɓa laalawɛɛk. Nɛ ege Waasiyɛ sigi joopa Ayuuduk gaŋtan, ma joopa sigɔɔga moko Ayuuduk gaagɛyikeen.

²⁴Ege Kerese ɓaŋkawuka ɛ ɗegerɔn Waakoyotoŋk joopa sigaagaɓa riyɛɛk, joopa Ayuuduk kɛygun joopa sigɔɔga moko Ayuuduk.

²⁵Kaalɗi any sinɛ gayi a gaagɛyikeen Waakoyotoŋk ɗegerɔɔn etoŋk, kaalɗi any sinɛ gayi a bɔɔlaaka Waakoyotoŋk ɓaŋkawukaat etoŋk.

²⁶Iinak manyaakak eeta, in koɓɛɛ sinɔ kɛ iinakɓa joop sigɔ ɓɛɛlɛr ɛkik saaɓa kɔnu riyɗi Waakoyotuk. Oko koɓi etoŋk, kɛɛɓa iinakɛ kɔɔr joop a ɓɔɔkaaŋ sigɔ ɗegerar ɛɛkik, a sigɔ ɓaŋkaawarŋɔŋk, a joop wɛy sinɔ kaalɗiŋɔŋk.

²⁷Mayakana daamɓa Waakoyot joop sigɛ ikomɛɛ ɗook raŋk a gaagɛyɛɛk kɛnɔ ari joop sigɛ ɗegerar ɛɛkik a latu keeny, ɛɓa daam joop sigɛ ikomɛɛ ɗook raŋk a bɔɔlakik kɛnɔ ari joop sigɛ ɓaŋkaawark a latu keeny.

²⁸Daamɓa ɗook raŋk any sinɛ ar goyse ɗeekik ɛ daraayɛɛk ɛ dɛnɛɛ a ɓɛɛl kanysɛyaak kɛnɔ sɔɔkɛ any sinɛ dɛnɛɛ joope ɗookoŋk a eemɛytank.

²⁹Nɔɓa ariiɗ sinik kɛnɔ kat lakɛ iɗit sinɔ meri ɛɛk taamɛkɛ Waakoyotoŋkuk.

³⁰Yakanaɓa kɔnu ari Waakoyot kɛnɔ latukari omaayikeen a Yeese Keresee. Agut sini ariɓa Waakoyot Yeese Keresee a ɗegerɔn naŋk, a mentanka naŋk, a geetiit naŋk, a koyi guma naŋkik.

³¹Sisɔ oko sinɛ toniiɗ Wargatɛ Waakoyotoŋk kɛ, "Iɗit sinɛ meri ɛɛkik, in meri ɛɛk ant sinaanɛkan ijaag Suumiik."