Read majang Omoŋ Korontoosuk 10 Bible Online

Omoŋ Korontoosuk 10 - majang bible

Omoŋ Korontoosuk 10

¹Iinak dooytaanak, ɗɛya kɛnɔ koɓurkɔɔ kɛ atuɓa ɔrɛyak gaŋk tiimanakɛ goyse ɗeek ɛɓa ekaŋɛr Gɔrɔ sinɔ Obiiŋɔŋk Dɛɛŋɔŋk[2].

²Aadɛɛɓa sɛɛg tiimanakɛ a goroo sinaanɛ obiiŋɔŋk kɛnɔ sɛɛg nomtaanak Muuseek.

³Nɛɓa sɛɛk ɗamar ɗama wɛɛŋakoŋk sinɔ omoŋɔŋk sɛɛg baŋɛ.

⁴Ɛɓa ɓɔrɛ uter tuu wɛɛŋakoŋk sinɔ omoŋɔŋk sɛɛg baŋɛ talaaɗe wɛɛŋakoŋk sinaanɛɓa nonom sɛɛgek. Egeɓa talaaɗɛ sini Keresee.

⁵Kɛygunɓa aasi ɓɛlkɛ oko sinikiŋ nɛɓa ki yaaka Waakoyota agut sɛɛg a ɓɔɔkaaŋ, nɛɓa rɛrar nɛ dakɛr paaton tak.

⁶Dakɛɓa tina sini a rɔmɛ rɔɔrɔkɔɔnoŋk kɛnɔ kat lakii ŋɔɗɔkikeen anta sinɔɔna ŋɛɛwɛnŋɔŋk oko sinɛɓa sɛɛk latukuɗ ŋɔɗɔ anta sinɔɔna ŋɛɛwɛnŋɔŋkuk.

⁷Kat ɓɔrɔ ugumɛɛ raŋaawotaka oko sinɛɓa sɛɛk ugumerɗi raŋaawotakaak oko sinɛɓa taapɛɛɗɛɛ Wargatɛɛ Waakoyotoŋk agut sɛɛg kɛ, "Dokurɓaɗe joop nɛ ɗami nɛ utiɗi, ɛɓa ŋaarar raŋana kɛnɔ duubiyer."

⁸Kat ɓɔre ijaagii tikiyɛ ruunyikeenoŋk, oko sinɛɓa ijaagirɗi sɛɛk a omoŋ omoŋɔŋk, agut sinɔ saaɓa sɛɛk ijaagirɗi sinik nɛɓa sɛɛge rɛrar waawuy sinɔɔnɛ omoŋɔŋk a kumɛɛ ruumer iɗit a jiit.

⁹Kat ɓɔre paarii Suumi, oko sinɛɓa sɛɛk paarirɗi Sɛɛnik, agut sinɔ saaɓa sɛɛk ijaagirɗi sinik nɛɓa sɛɛk a omoŋ omoŋ kakawarɗi kookowɛk nɔɓa rɛrark.

¹⁰Kat ɓɔrɔ noonogaakɛɛ, oko sinɛɓa sɛɛk noonogaaɗi a omoŋ omoŋɔŋk, agut sinɔ saaɓa sɛɛk ijaagirɗi sinik nɛɓa sɛɛk sɔɔkɛɛr wosɛytan Waakoyotoŋk Retoŋk.

¹¹Nɔɓa laŋirkiɗ any sini baŋɛk kɛnɔ tina dakɛ a rɔmɛ rɔɔrɔkɔɔnoŋk. Taapɛɛɓa wargatɛɛ Waakoyotoŋk kɛnɔ tina dakɛ a rɔɔriyɔn eteŋka sigaaga arkii emeyika sigaaga pediyaak.

¹²Nɛ agut sini kɛygun wooɗ sinɛ gayigeeɗ a ɛtɛtɛrŋɔŋk, in koorɛ ɛɛk kɛnɔ kat ɗiiriɗ.

¹³Kirkɔɔkan laŋiiɗ paariit om paariit sinɔɔnɛ mɛlki etek sɔgɔɔsɔyk. Mentan Waakoyotuŋ agut sinɔ kiiɗ ɗɛyɛ a laŋirkɔɔ paariit sinɔ ar oolaan noŋk rakaaykiŋ. Saakɔɔ kɔnu paariɗɛɛk, ragadikɔɔ kɔna gopan sinɔ pordɛrɗɔŋɔŋk a kɔna gaɓɛ ɓaŋkawuka oolanoŋk.

¹⁴Agut sini iinak dooytaanak sigɛ kɔnu poraak, kat ugumɛɛ raŋaawotaka.

¹⁵Tona kɔna sini oko sinɛ toniiɗa joopa sigɔɔga ɗegerar ɛɛkik, in pɛrɛdɛɛ sɔɔk agut sinɛ tonaak.

¹⁶A kiir ɗegerɔɔn tuu sinɔ Geetitank sinɛ kaasii ma pɔɔsuguɗii Waakoyok kɛ latu omaayikeen a yɛrom Kereseek? Ma moko ɓɔrɛ latu kiiwu sinɛ Geetitank sinɛ ɗamiik omaayikeen a buusɛ Kereseek?

¹⁷Ege kiiwu nɛɛkɛ omoŋ. Agut sinɔ ŋaparɗii eteŋk baŋɛk, nɛ kɛygun ɓɔɔkaakayiiŋ nɛ eteŋk ɛɛk sinɔ omoŋɔŋk.

¹⁸In dɛnɛɛ sinɛɓa ijaagir joop Israeelik. A mokoɓa latu omaayikeen a nyon sinɛ uduŋeetoŋk? a joop sigɛɓa ɗamar ɗama sinɛɓa uduŋɛɛk.

¹⁹Anɛ tona ɛk? Ege raŋaawot raŋaawo, maɓɔrɛ taar sinɔkɔ uduŋɛɛ raŋaawotaak taar.

²⁰Moko wideetar joop sigɔ moko Ayuuduk uduŋeet Waakoyota, ma wideetar setana, nɛ agut sini kaa ɗɛyɛ a latukari omaayikeen a setan agut omoŋ.

²¹Kiir oolɛ a loorikari a Suumi ɛ loorikari a setan ant tuutoŋk sinɔɔnɛ omoŋɔŋkuŋ, ɛ kiir oolɛ a nyɔɔkiɗiikari a Suumi ɛ nyɔɔkiɗiikari a setaniŋ ant ɗamatoŋk sinɔɔnɛ omoŋɔŋkuŋ.

²²Anɛ arii Suumi a ŋadiŋ? Ɓaŋkaawurii a kaalii Sɛɛniŋ?

²³Pɛgɛdɛɛɓa ola baŋɛ, mayakana moko kɔnyɗi olaat baŋɛ. Pɛgɛdɛɛɓa ola baŋɛ, mayakana moko arɗi olaat baŋɛ a ɓaŋkaawurɛɛŋ.

²⁴Kat iɗit ɗɛyɛ any sinɔ kɔnyɛ ɛɛk nɛɛk dakɛɗak, ma in ɗɛyɛ any sinɔ kɔnyɛ joop ɔgɔɔk.

²⁵In ɗamɛɛ taar sinɔkɔ ɓalkɛɛ gabiyoyk a kɔne kɛɛ kɔɔniyɔn kalbii.

²⁶Agut sinɔ tonɛɛɓa Wargatɛɛ Waakoyotoŋk kɛ, "Ege ɗook a ola sigɛ lakik baŋɛ Suumiyoŋk."

²⁷Ɔkɔn kɔnu wɔɔrɛ iɗit sinɔ moko dooytankiŋ ɛ boŋiir wɔɔr nɛɛkiŋ, nɛ in ɗamɛɛ ɗama sinɛ kɔna widikik a kɔne kɛɛ kɔɔniyɔn kalbiyɛɛkɛ goŋk.

²⁸Mayakana ɔkɔn kɔna tonu iɗit omaay kɛ, "Ege sini taar sinɔkɔ uduŋɛɛ raŋaawotaakiŋ," nɛ kat ɗamɛɛ agut iɗit sini a kalbi nɛɛk.

²⁹Saa kɔna toniiɗa kɛ kalbik sinɔ kɛ kalbi iɗit sinɛk, ma moko kalbi noŋkuk. Anɛ eete pɛrɛdɛ kalbi iɗit omk agut yaaka naak agut jikon?

³⁰Ɔkɔn pɔɔsa Waakoyo anta sinaana ɗamaakiŋ, nɛti gɔɔnyɛɛ anta sinaanakɔ pɔɔsuguɗa Waakoyok agut jikon?

³¹Agut sini saa ɗamiɗɔɔk, maŋk saa utiɗiiɗɔɔk, maŋk any sinɛ ijaagiirik baŋɛ, in ijaagɛɛ baŋɛ eemɛyɔɔna Waakoyotoŋk.

³²Kat arɛɛ iɗit a gaŋiŋ, kɛygun joop Ayuuduk, maŋk joop sigɔ moko Ayuuduk, maŋk gode Sambatɛyoŋk Waakoyotoŋk.

³³In ijaagɛɛ oko sinɛ ijaagiɗaak. Ara joop baŋɛ a yaa sɛɛga ant baŋɛ a kaa ɗɛyɛ tɔkɔny naak, ma ɗɛya tɔkɔny joop ɔgɔɔk kɛnɔ bɔdɛr joop baŋɛ.