Read majang Omoŋ Korontoosuk 11 Bible Online

Omoŋ Korontoosuk 11 - majang bible

Omoŋ Korontoosuk 11

¹In gaayɛɛ eet oko sinɛ gayɗa Kereseek.

²Pɔɔsa kɔnu agut sinɔtu koɓurɗɔ ɛ gaamurɗɔ rɔɔriyɔn sinɛkan boŋka nɔkan kɔna kɔɓɛɛraak.

³Ɗɛya kɛnɔ ɗegerari kɛ ege Keresee ɔɗɔ moojakoŋk baŋɛ, maɓɔrɛ ɔɗɔ jartiyoŋk mooy, ma ɔɗɔ moojoŋk Waakoyo.

⁴Iɗit sinɔ mooyk ɗanɗama maŋk waasɛ pɛɛni pɛrkaakoŋk, ma tuse ɔɗɔ nɛɛkik, daraayɛ Keresee sinɛ lak ɓaŋkawuka sɛɛne raŋk.[3]

⁵Maɓɔrɛ jarti sinɔ ɗanɗama maŋk waasɛ pɛɛni pɛrkaakoŋk, ma ki tuseeɗ ɔɗɔ nɛɛkik daraayɛ ɔɗɔ nɛɛk, agut sinɔ ikomiiɗɛɛ a ito baanytank.

⁶Ɔkɔn ki tuseeɗ jartii ɔɗɔ nɛɛkiŋ, nɛ in ogarɛɛ ami gɛɛŋk. Mayakana ɔkɔn ogarɛɛt maŋk baanyɛɛt any sinɔ ari sɛɛn a lageeɗ keenykiŋ, nɛ in tuse ɔɗɔ nɛɛk.

⁷Ki ɗɛyɛ mooja a tuse ɔɗɔŋ, agut sinɔ sɛɛn tagaytan Waakoyotoŋk ɛ yaaŋɛɛɗɛɛ eemɛyɔn Waakoyotoŋkuk. Mayakana ege jartii eemɛyɔn moojoŋk,

⁸Agut sinɔ riiɓɛɛɓa jarti mooje, ma mokoɓa riiɓɛɛ mooy jartii.

⁹Riiɓɛɛɓa jarti mooja, ma mokoɓa riiɓɛɛ mooy jartiya.

¹⁰Agut wosɛytaanak Waakoyotoŋk ɗɛyɛ jartiya a tuse ɔɗɔ nɛɛkiŋ, kɛnɔ yaaŋɛ soon kɛ lak ɓaŋkawukaak.

¹¹Beeɗit sinaanɛ arkiɗii Suumii Yeeseek, ki beeɗit jartii a kiiɗɛ mooy maɓɔrɛ ki beeɗit mooy a kiiɗɛ jarti.

¹²A eekeer oko sinɛɓa riiɓeeɗɛɛ jarti moojeek nɛɓɔrɛ ɓartɛɛ mooy jartii. Yakana mooy maŋk jarti a ola ɔgɔ baŋɛ laŋɛɛ sɛɛg Waakoyote.

¹³Intɔ pɛrɛdɛɛ sɔɔk, dɔɔs a ɗanɗama jartii Waakoyota maakɔ ki tuseeɗ ɔɗɔ nɛɛkiŋ?

¹⁴Ɔkɔn iɗit sinɔ mooyk ŋɔɗur ami gɛɛŋk a ɓɔɔkaaŋ, kikan kɔnu rɔɔriyɔɔn ɓɛɛl sinɛɓa goorɛk kɛ keerɛŋ?

¹⁵Yakana agut sinɔɓa gaɓɛɛɗɛɛ ami jartiya a miinyeeɗ ɔɗɔ nɛɛkik, nɛ ɔkɔn ŋɔɗur ami gɛɛŋk a ɓɔɔkaaŋ, nɛ eemɛyɔn sɛɛna.

¹⁶Ɔkɔn lakɛ iɗit sinɔ ɗɛyɛ palamɛ agut any sinikiŋ, kɛɛ tine barɛ sinɔ pakata sineenek, kɛygun eteŋk maŋk godeyi Sambatɛyoŋk Waakoyotoŋk.

¹⁷Kaa kɔnu pɔɔsɛɛt sekiyɛɛkɛ sigeege kɔna gaɓa sisɔk, agut sinɔ moko ege tolɛ noŋk any sinɔ kɔnyɗiiŋɔŋk, ma ege tolɛ noŋk any sinɔ kɔnu sɔɔkɛŋɔŋk.

¹⁸Olaatɛ baŋɛ ɔɗɔɔkɛ, tiyaakɔ kɛ lakɛnɔ kɔne kɔɔr pakakat saa tolɗiiɗɔɔ ijaag sinaanɛ ijaagiir ɓɔɔkaakatik. Nɛ ŋaada any sini kɛ ege gɔɔ omaay eekeer.

¹⁹Ɗɛyɛ kɔna a in ɓɛɛlɛ pakakat sini kɛnɔ pakatɛɛ joop sigɛ likikaanakik kɛnɔ ɗegerɛɛ sɛɛg kɛ wooɗak.

²⁰Saa tolɗiiɗɔɔk omaayikentik moko ɗamari ɗama sinɔ geetitank Suumiyoŋk.

²¹Agut sinɔ saa ɗamiɗɔɔk, nɛ iɗit omaay ɗami a ki koorɛɛt mɛɛno a meejakariŋ. Nɛ ant sinɔɔnɛ ito sinik lak iɗit omaay ŋaawu, ma iɗit omaay pɔyŋ.

²²A kɛɛ kɔne godeyi sigɔ ɗamiɗɔɔŋɔŋk a sigɔ utiɗiiɗɔɔŋɔŋk? Maŋk daraayɛɛr gode Sambatɛyoŋk Waakoyotoŋk? Maŋk ariir rakatɛkaana sigɛ kɛɛ sɛɛge anyk a latu keeny? Nɛɓɔ kɔna tona jikon? A pɔɔsa kɔnu agut any siniŋ? Kaa kɔnu pɔɔsɛɛt adaktan.

²³Ege sini kɔna kɔɓɛɛraak rɔɔriyɔn sinɛkan boŋa Suumiik. Ajige saakan gaɓɛɗɛɛk, ɓɔŋgɔɔrɛkan Suumi Yeese kiiwu nɛɛk,

²⁴nɛkan pɔɔsɛ Waakoyo nɛ ŋapati nɛ tɔnu kɛ, "Iyook, in ɗamɛɛ ege sini buusɛ naak sinɔ gayɛ iinakaak. In arɛɛ sini a kokoɓarkiɗɔ eet."

²⁵Makan ɓɔrɛ ɓɔŋgɔɔrɛ tuu nɛɛk ajigeyoŋk baŋiya nɛ tonu kɛ, "Ege sini tuu kuumiyɛ sigɔ tɔɔmɔkuk yɛrom naakik. Saa uterɗɔ sinik baŋɛk in arɛɛ sini a kokoɓarkiɗɔ eet."

²⁶Agut sinɔ saa ɗamarɗɔ kiiwu sinik ɛ uterɗɔ tuu sinik baŋɛ, nɛ waawasarkuunar rer Suumiyoŋk nɔkoy mɛlkiɗik.

²⁷Agut sini ɔkɔn lakɛ iɗit sinɔ ki gayɛ a gun ɗam kiiwu ɛ ute tuu Suumiyoŋkuŋ, nɛ lak asɛ buusɛ Suumiyoŋk a yɛrom nɛɛkɛkik.

²⁸Nɛ in tɛɛnan iɗit mermen ɛɛk nɛɛk kɛnɔ ɗam kiiwu sini ɛ ute tuu sini.

²⁹Iɗit sinɔ ki mermenɛ ɛɛk nɛɛk nɛ ɗam buusɛ Suumiyoŋk ɛ ute tuu nɛɛk, nɛ gaɓɛ ɛɛk nɛɛk goopana saa ɗamiɗik ɛ saa utiɗiiɗik.

³⁰Agut sini joop a ɓɔɔkaaŋ iinakɛ kɔɔr bɔɔlaakan ɛ kan gorur ɛ kan rɛrar agut any sini.

³¹Ɔkɔnkan pɛrɛdii ɛkanɛ gaŋkiŋ, gunkoy tine kɛɛ pɛrɛdɛɛt oko sinik.

³²Yakana tine pɛrɛdɛ Suumii atin koykoyɛŋ kɛnɔ kat koy tin goopɛɛ a ɗoo sini agut omoŋ.

³³Nɛ agut sini iinak manyaakak eeta sigɛ dooytaanakik, in kookorɛɛ ɛkan saa tolɗiiɗɔɔ ɗamata sinɔɔna Geetitank.

³⁴Ɔkɔn iinakɛ kɔɔr lakɛ iɗit sinɔ lak ŋaawukuŋ, in ɗamiik nyaki nɛɛkɛ, kɛnɔ mokɔɔ kɔnu goopɛɛ saa tolɗiiɗɔɔk. Saakɔɔ kɔrurkuɗak, gaɓakɔɔ kɔna rɔɔriyɔn agut any sinɛkɔ dakɛk.