Read majang Omoŋ Korontoosuk 12 Bible Online

Omoŋ Korontoosuk 12 - majang bible

Omoŋ Korontoosuk 12

¹Iinak manyaakak eeta sigɛ dooytaanakik, ɗɛya sisɔ kɛnɔ ɗegerari eekeer tigi Wɛɛŋa sigɔ Geetitaanakik.

²Ɗegerari kɛ saaɓa iinak joop sigɔ kir ugumeet Waakoyotak, nɛɓa didilɛɛ kɔnu ant sinɔɔnɛ kiir ɗegerɔɔnuk son lak raŋaawotak sigɔ kir oolɛ tonik.

³Agut sini tona kɔna kɛnɔ ɗegerari kɛ kɛɛ iɗit sinɔ ikekeɓigeeɗ Wɛɛŋa sigɔ Geetitaanakik kɛ, "Ege Yeese koonykank," ɛ kɛɛ iɗit sinɔ tonu kɛ, "Ege Yeese Suumik," ikekeɓ Wɛɛŋa sigɔ Geetitaanakik sɔgɔɔsɔyk.

⁴Lakɛ tigiyak Wɛɛŋa sigɔ Geetitaanakik a ɓɛɛlɛr kundiyaakɛ, mayakana ege Wɛɛŋa sigɔ Geetitaanakik omoŋ.

⁵Lakɛ ijaagak a ɓɛɛlɛr kundiyaakɛ, mayakana ege Suumii omoŋ.

⁶Lakɛ komoyɛ ijaagakoŋk a ɓɛɛlɛr kundiyaakɛ, mayakana Waakoyo omoŋ sinɛ gaɓɛ oolanak joopa baŋɛ ijaagaka gɛŋkik.

⁷Ege tigi yaaŋɛtoŋk sinɛ gaɓɛr Wɛɛŋa sigɔ Geetitaanak tɔkɔny joopa a omoŋ omoŋ.

⁸Gaɓɛr Wɛɛŋa sigɔ Geetitaanakik sigɛ omaanakŋɔŋk eta omalta toni pɛɛni ɗegerɔn sinɔ dugaaŋɔŋk, ma eta omalta toni pɛɛni ɗegerɔn ɛɛkoŋk,

⁹ma eta omalta gaɓɛ ŋaadiyɛ sigɔ kaalɛrŋɔŋk, ma eta omalta tigi ebɔdɛɛtoŋk,

¹⁰ma gaɓɛr eta omalta ɓaŋkawuka sinɔ ijaagiɗ sɔɔriyɛɛk, ma eta omalta toni pɛɛni pɛrkaakoŋk, ma eta omalta oolan sinɔ pakatiiɗ Wɛɛŋa sigɔ Geetitaanakik a sigɔ somkaanakik, ma eta omalta toni atutunɛɛkɛ sigɔɔgɛ tɔɔmɔkuk, maɓɔrɛ eta omalta oolan sinɔ doomɛɗɛɛ sinɔ tonɛɛ atutunɛɛkɛ sigɔɔgɛ tɔɔmɔkuk.

¹¹Ege sigi Wɛɛŋa omaanakiŋ dakɛɗa sigɛ gaɓɛr joopa baŋɛ tigiyak sigɔ ɓɛɛlɛr kundiyaakɛk oko sinɛ ɗɛyɛrɗik.

¹²Lak eek nyonitaak a ɓɔɔkaaŋ, mayakana kɛygun ɓɔɔkaakɛɛ nyonitaak gɛɛnɛŋ, ma laŋɛɛ sɛɛg eek sinɔɔnɛ omoŋɔŋk. Nɛɓɔrɛ Kerese ito ɛɛk omoŋ sinɔ lak nyonitaak a ɓɔɔkaaŋɔŋk.

¹³Kɛygun eteŋk joop Ayuuduk, Kɛygun eteŋk joop Giriikik, kɛygun eteŋk laaŋoyeer, kɛygun eteŋk joop sigɔ arkii yaakatik aadɛɛɓa tin Wɛɛŋakɛ sigɔɔgɛ Geetitaanakik kɛnɔ dakii a eteŋk ɛɛk omoŋ, ɛɓa utii eteŋk baŋɛ wɛɛŋa sigɔ omaanakŋɔŋk.

¹⁴Ijaagɛɛɓa ɛɛk nyonitaakɛ ɛɛkoŋk sigɔɔgɛ ɓɔɔkaaŋɔŋk, ma mokoɓa eek sinɔɔnɛ omoŋɔŋk dakɛɗa. Moko ege nyon ɛɛkoŋk ɛɛk baŋɛ.

¹⁵Ɔkɔn tonu derant kɛ, "Agut sinɔ moko eet ariik, nɛ moko eet kaastan ɛɛkoŋk," anɛ dakɛ a moko sɛɛn kaastan ɛɛkoŋk?

¹⁶Maɓɔrɛ ɔkɔn tonu weent kɛ, "Agut sinɔ moko eet taamak, nɛ moko eet kaastan ɛɛkoŋk," anɛ dakɛ a moko sɛɛn kaastan ɛɛkoŋk?

¹⁷A ɔkɔnɓa ege ɛɛk baŋɛ taamaŋ, nɛgun tiiɗikɛɛ jikoy? A ɔkɔnɓa ege ɛɛk baŋɛ weenaŋ, nɛgun eeŋaɗaakɛ jikoy?

¹⁸Yakanakɔ sisɔ ijaag Waakoyot oko sinɛ ɗɛyɛɛɗik kɛnɔ in nyonitaak ɛɛkoŋk a omoŋ omoŋ gaamur nyon nɛŋk sinɔ dɔɔsuk.

¹⁹Ɔkɔnɓa ege ɛɛk nyon ɛɛkoŋk omoŋ, nɛ gunɓa laŋɛɛ ɛɛk baŋɛ eet?

²⁰Yakana sisɔ lakɛ nyonitaak ɛɛkoŋk a ɓɔɔkaaŋ, mayakana ege ɛɛk omoŋ dakɛɗa.

²¹Ki oolɛ a tonu taamt ariita kɛ, "Kita iin ɗɛyɛɛŋ," maɓɔrɛ ki oolɛ a tonu ɔɗɔ deranta kɛ, "Kita iin ɗɛyɛɛŋ."

²²Ɗɛyɛ aasi a kaalɛŋ nyonitaak ɛɛkoŋk sigɛ dɛnɛɛ sɛɛg a gayi a bɔɔlaaŋɔŋk.

²³Gaɓii eemɛyɔn a kaalɛŋ nyonitaaka ɛɛkoŋk sigaaga dɛnɛɛ sɛɛg a latu eemɛyɔn sinɔ tɛmŋɔŋk, ɛ gaɓii eemɛyɔn a kaalɛŋ a koorii sɛɛge ɛɛk nyonitaakɛ ɛɛkoŋk sigaagɛ dɛnɛɛ sɛɛg a lagiɗɛɛ keenyk,

²⁴yakana ki ɗɛyɛ sini baŋɛ nyonitaaka ɛɛkoŋk sigaaga latu eemɛyɔnk. Agut sini tootokɓa Waakoyot nyonitaak ɛɛkoŋk sigɛ dɛnɛɛ sɛɛg a ito bɔɔlaaŋɔŋk nɛ gaɓɛ sɛɛga eemɛyɔn a kaalɛŋ.

²⁵Ijaagɓa sini kɛnɔ kat lakɛ ɗaakan nyonitaakɛ ɛɛkoŋk kɔɔr, a ijaagɗi a kokoɓar ɛkan gɛŋk.

²⁶Ɔkɔn rakatɛ nyon ɛɛkoŋk sinɔ omoŋɔŋk, nɛɓɔrɛ rakatɛr nyonitaak ɛɛkoŋk ɔgɔɔk baŋɛ a sɛɛn agut omoŋ. Ɔkɔn eemɛyɛɛ nyon ɛɛkoŋk sinɔ omoŋɔŋkuŋ, nɛɓɔrɛ eemɛyɛɛ nyonitaak ɛɛkoŋk ɔgɔ a sɛɛn agut omoŋ.

²⁷Iinak ɓɔrɔ ɛɛk Kereseek, iinak a omoŋ omoŋ iinak nyonitaak ɛɛk nɛɛkik.

²⁸Daamɓa Waakoyot godeey Sambatɛyoŋk joop a omoŋ omoŋ, tuki nɛɛkɛ wosɛytaanak, pɛɛyeene nɛɛkɛ joop pɛrkaakoŋk, jiiteene nɛɛkɛ rɔɔriytaanak, a joop sigɔ ijaagir sɔɔriyɛɛk, a sigɔ latu tigi ebɔdɛɛtoŋk, a joop sigɔ latu tigi sinɔ kɔnyɛɗɛɛ joopuk, a joop sigɔ latu oolan lowiiɗoŋk, pediya nɛɛka joop sigɔ latu oolan sinɔ tonɗiiɗɛɛ ad sinɔɔnɛ tɔɔnuk.

²⁹Sɛɛg wosɛytaanak baŋɛ? Ɛ sɛɛg joop pɛrkaakoŋk baŋɛ? Ɛ sɛɛg rɔɔriytaanak baŋɛ? Ɛ sɛɛg joop sigɔ ijaagir sɔɔriyɛɛk baŋɛ?

³⁰Ɛ latu tigi ebɔdɛtoŋk sɛɛg baŋɛ? Ɛ latu oolan sinɔ tonɗiiɗɛɛ ad sinɔɔnɛ tɔɔnuk sɛɛg baŋɛ? Ɛ latu oolan sinɔ doomɛɗɛɛ sinɛkɔ tonɛɛ ad sinɔɔnɛ tɔɔnuk sɛɛg baŋɛ?

³¹Mayakana in ɗɛyɛɛ a kaalɛŋ tigiyatɔk sigɛ kaalɗi baŋɛk. Yaŋakɔɔ kɔna sisɔ gopan sinɛ kaalɗi olaatɛ baŋɛkiŋ.