Read majang Omoŋ Korontoosuk 13 Bible Online

Omoŋ Korontoosuk 13 - majang bible

Omoŋ Korontoosuk 13

¹Kɛygun aasi lakaaya oolan toni ad joopoŋk a wosɛytaanak Waakoyotoŋkuŋ, mayakana ɔkɔnte kɛɛ mɛyin, nɛ ito eet sokoroy a takawaas sinɔ ɗooruŋɔŋk.

²Ɔkɔn laka tigi toni pɛrkaakoŋk ɛ ɔkɔnta mɛlɛ any sinɔ dugaaŋɔŋkuŋ, ɛ ɔkɔn ɓɔrɛ laka ɗegerɔn baŋɛŋ, ɛ laka ŋaadiyɛ sigɔ kɔɓɛr kurkum nyon omalte nyona omaltaaŋɔŋkuŋ, ma ɔkɔnte kɛɛ mɛyin, nɛ ɓɛɛla kanysɛya.

³Ɔkɔn kaasa any sinɛ lakaak sankaanaka baŋɛŋ, ɛ aasi gaɓa buusɛ naak maɗa kɛnɔ ɗam, ma ɔkɔnte kɛɛ mɛyin, nɛ kɛɛ any sinɔta kɔnykuk.

⁴Mɛyin lak ɓaŋkaawurɔn oolanik, mentan, ki epɛɛrɛ any etoŋk, ki meriiɗ ɛɛk, ki ɓɔŋgɔɔrɛɛt ɛɛk,

⁵mɛyin ki ijaagɛ any sinɔ moko likik, ki ɗɛyɛ tɔkɔny ɛɛk nɛɛkik dakɛɗak, ki ŋadi kɛ gonyuŋ, ki ikomiit tikiyɛ,

⁶mɛyin yaageeɗ any sinɔ eekeerik, ma kiigeeɗ yaaka any sinɔ ŋɛɛwɛnŋɔŋk,

⁷mɛyin oolɛ ola baŋɛ, ŋaadi ola baŋɛ, lak ŋaadiyɛ sigɛ kookork olaatɛ baŋɛ, ɓaŋkaawur olaatɛ baŋɛ.

⁸Iɗit sinɔ lak mɛyink kɛygun okoɗ ki ɗiirin, makoy ɗoyu tigi toni pɛrkaakoŋkuŋ, ɛkoy dakɛ oolan toni ad sinɔɔnɛ tɔɔnukuŋ, ɛkoy ɗoyu ɗegerɔn ɛɛkoŋk.

⁹Bitak ɗegerɔn naŋk, ɛ bitak toni naŋk pɛrkaakoŋk.

¹⁰Yakana saakoy mɛlkiɗ sinɛ daktank, nɛkoy aalɛ sinɛ bitakkiŋ.

¹¹Saaɓa eet tɔɔnuk, totonikaaɓa okokɔ toomoŋk, kokoɓikaaɓa okokɔ toomoŋk, mermemenikaɓa okokɔ toomoŋk. Ma saakan ɓɔlɔɔrɛɗaak, nɛkan ŋɔɗa ɓɛɛlɛt tɔɔnikeenoŋkuŋ.

¹²Dɛnɗiikii sisɔ oko sinɛ dɛnɗiiɗii ɓɛɛrawoyk a tiɗipaaŋ[4], mayakanakoy dɛnɗiikii saakoyk taamɛ takan kɛ ɗɔm. Ɗegera sisɔ ɛɛk a bitak, mayakanakoy laka ɗegerɔn sinɔ enyaaŋɔŋk oko sinɛti ɗegerɗi Waakoyotuk.

¹³Beeɗirkoy seedi son ola sigi jiitik, ŋaadiyɛ, ŋaadiyɛ sigɛ kookoriik, mɛyin, mayakana kaalɗi sigeege baŋɛ mɛyin.