Read majang Omoŋ Korontoosuk 14 Bible Online

Omoŋ Korontoosuk 14 - majang bible

Omoŋ Korontoosuk 14

¹In nomɛɛ mɛyin tuki nɛɛkɛk. In ɗɛyɛɛ a ɓaŋkawuŋ tigiyak Wɛɛŋa sigɔ Geetitaanakik, a kaalɛŋ tigi toni pɛrkaakoŋk.

²Iɗit sinɔ tonɗi ad sinɔɔnɛ tɔɔnuk, tonɗi Waakoyota ma moko eta, agut sinɔ toniiɗ any sinɔ dugtan Wɛɛŋakɛ sigɔɔgɛ Geetitaanakik, nɛ kɛɛ iɗit sinɔ ɗeger pɛɛni sinɛ tonuk.

³Mayakana iɗit sinɔ tonu pɛrkaak tonɗi eta, nɛ ari a ɛtɛŋ, ɛ ari a ɓaŋkaawurŋ, a aawoyŋ.

⁴Iɗit sinɔ tonɗi ad sinɔɔnɛ tɔɔnuk nɛ ari ɛɛk nɛɛk dakɛɗa a ɛtɛŋ, mayakana iɗit sinɔ tonu pɛrkaak ari gode Sambatɛyoŋk a ɛtɛŋ.

⁵Ɗɛya a tonɗiikari ad sinɔɔnɛ tɔɔnuk iinak baŋɛ, a kaalɛŋ toni pɛrkaakoŋk. Ɔkɔn tonɗiikari ad sinɔɔnɛ tɔɔnuk kɛnɔ ari gode Sambatɛyoŋk a ɛtɛŋ, nɛ ɔkɔn kɛɛ iɗit sinɔ doomɛ sinɛkɔ tonɛɛ ad sinɔɔnɛ tɔɔnukuŋ, nɛ iɗit sinɛ tonɗi ad sinɔɔnɛ tɔɔnuk ki kaalɛt iɗit sinɛ tonu pɛrkaak.

⁶Sisɔ iinak manyaakak eeta sigɛ dooytaanakik, saa kɔrurkuɗa son lak iinakik ɔkɔn kɔna tonɗiika ad sinɔɔnɛ tɔɔnukuŋ, nɛkɔna kɔnyka jikon? A kaalɛŋ kɔnyɛ kɔnu saakɔna diilerkiɗa yaaŋiyɛ any Waakoyotoŋk sinɔ dugaaŋɔŋk, a ɗegerɔn, a pɛrka, a rɔɔriyɔnk.

⁷Ola iiliyakoŋk seetɛ a soŋguy sigɔ kɛɛ sɛɛge wɛɛŋak ɔkɔn kɛɛ sɛɛge ɗooran sinɔ pakataaŋɔŋkuŋ, nɛ ɗegerɛɛ ɗooran sinɛ gaɓɛrk kɛ jikon ɛk?

⁸Ɔkɔn gotɛɛ luuri ɗooraan sinɔɔnɛ pakataaŋɔŋkuŋ, nɛ wooɗ sinɛ ragadi ɛɛk kaarinaak?

⁹Maɓɔrɔ ɔkɔn kiir tonɗiit ad sinɔɔnɛ ɗegerɛɛŋɔŋk, nɛ wooɗ sinɛ oolɛ a ɗeger any sinɛ toniirik? Dakɛɛrkɔɔ a ito tonɗiigiɗɛɛ walɛ.

¹⁰Lakɛ ɗook raŋk atutun sigɔ pakakataaŋɔŋkuŋ a ɓɔɔkaaŋ, yakana kɛɛ ato sinɔ kiiɗɛ doomɛtik.

¹¹Ɔkɔn sisɔ kaa ɗegerɔɔn doomɛt ato sinɛ tonɛɛkiŋ, nɛ eet koonat eta sinaana tonɗiigiɗaak, maɓɔrɛ sɛɛn koonat eeta.

¹²Agut sinɔ ɓɔrɔ ɗɛyɛrɗɔ tigiyak Wɛɛŋa sigɔ Geetitaanakik a ɓaŋkawuŋɔŋkuk, nɛ in ɗɛyɛɛ tigiyak sigɔ arir dooytaanak a ɛtɛrŋɔŋk a kaalɛŋ.

¹³Nɛ agut sini iɗit sinɔ tonɗi ad sinɔɔnɛ tɔɔnuk, in ɗanɗama kɛnɔ lak oolan doomɛtoŋk.

¹⁴Agut sinɔ ɔkɔn ɗanɗamaaka ad sinɔɔnɛ tɔɔnukuŋ nɛ ɗanɗama wɛɛŋa gaanɛkiŋ, a kalbi naakɛ dakɛ a kɛɛ any sinɔ ɗegerak.

¹⁵Anɛta dɔɔs a ara jikon? Ɗanɗamaaka wɛɛŋakɛ gaanɛkiŋ, maɓɔrɛ ɗanɗamaaka kalbii naakɛkiŋ. Iiliyaaka wɛɛŋakɛ gaanɛkiŋ, maɓɔrɛ iiliyaaka kalbii naakɛkiŋ.

¹⁶Saa pɔɔsɛɛɗin Waakoyo wɛɛŋakɛ dakɛɗak, Nɛ oolɛ iɗit a ari kɛ Ameen pɔɔsiyɛɛka ɗanɗamɔn nookuk ɛk? Ma ki ɗegerɔɔn any sinɛ tonunkuk.

¹⁷Agut sinɔ gaɓunkɔ ɗanɗamɔn pɔɔsiyɛɛkoŋk a mentan jɛt, mayakana ki ariiɗ iɗit om a ɛtɛŋ.

¹⁸Pɔɔsa Waakoyo agut sinɔ tonɗiiɗa ad sinɔɔnɛ tɔɔnuk a kɔnu kaala baŋɛk.

¹⁹Mayakana ɗɛya a tona pɛɛniyɛ a tuul godeey Sambatɛyoŋk kɛnɔ rɔɔriya joop ɔgɔ ɔɔtɛ sinɔɔnɛ gun toniiɗa pɛɛniyɛ a kumɛɛ ɓɔɔkaaŋ ad sinɔɔnɛ tɔɔnuk.

²⁰Iinak manyaakak eeta sigɛ dooytaanakik, kat ɓɛɛlɛɛ a tɔɔmɔk koɓiɗakɛ goŋk, ma in ɓɛɛlɛɛ a tɔɔmɔk anta sinɔɔna ŋɛɛwɛnŋɔŋk, ma in ɓɛɛlɛɛ koɓiɗakɛ goŋk a aaɗikariŋ.

²¹Taapɛɛɓa higii kɛ, "Tonu Suumii Waakoyot kɛ, 'Tonɗiika joopa sigeega ad sinɔɔnɛ tɔɔnuk, a ad joop sigɔ gaatiyaatɛk, nɛ a ɓɛɛlɛ oko sinik nɛta kir weenta.' "

²²Nɛ agut sini ege toni ad sinɔɔnɛ tɔɔnuk yaaŋtan joopa sigɔɔga kir ŋaadiɗiitik, ma moko joopa sigɔɔga ŋaadiɗiiŋɔŋk. Ma ege toni pɛrkaakoŋk yaaŋtan joopa sigɔɔga ŋaadiɗiiŋɔŋk, ma moko joopa sigɔɔga kir ŋaaditaanakik.

²³Ɔkɔn tolɗi dooytaanak baŋɛ ɛ tonɗi ad sinɔɔnɛ tɔɔnuk, ɛ guugunytar joop sigɔ kir ɗegerɔɔnuk maŋk joop sigɔ kir ŋaadiɗiitik nɛ kir toniiɗ kɛ, "Maraatɛrŋ?"

²⁴Mayakana ɔkɔn joop baŋɛ tonur pɛɛni pɛrkaakoŋk, ɛ guugunytar joop sigɔ kir ŋaadiɗiitkiŋ maŋk joop sigɔ kir ɗegerɔɔnkuŋ, nɛ sɛɛg gɔɔnyɛɛ pɛɛnii sinaanɛ tiyɛrk baŋɛ, ɛ sɛɛge pɛrɛdɛɛ pɛɛnii sinaanɛ tiyɛrk baŋɛ.

²⁵Nɛkɔɔ yaaŋɛ ɛɛk any sinɛkɔ dugiɗi ɓayaay nɛɛkɛkiŋ, nɛkɔɔ muke tepeen nɛɛkɛ ɗoo nɛ ugume Waakoyota a tonu kɛ, "Ɓɛɛlɛ kɔne Waakoyot kɔɔr eekeerɛ!"

²⁶Iinak manyaakak eeta sigɛ dooytaanakik, dɔɔs sisɔ a arɛɛ jikon? Saa tolɗiiɗɔɔk lak iinakɛ iɗit omaay tigi iiliyakoŋk, ma lak iɗit omaay tigi rɔɔriyɔɔnoŋk, ma lak iɗit omaay tigi sinɔ yaaŋɛɛɗ any sinɔ ar dugeeɗik, ma lak iɗit omaay tigi sinɔ tonɗiiɗ ad sinɔɔnɛ tɔɔnuk, ma lak iɗit omaay tigi doomɛtoŋk. Ege sini any sinɔ ari dooytaanak a ɛtɛrŋɔŋk.

²⁷Ɔkɔn lakɛ joop sigɔ tonɗi ad sinɔɔnɛ tɔɔnukuŋ, in pɛɛy maŋk ɔkɔn ɓɔɔkaaŋ nɛ in jiit, Nɛ in tonɗi momogunɛɛkɛ, in doomɛ iɗit omaay any sinɛ tonur joop sigɛk.

²⁸Mayakana ɔkɔn kɛɛ iɗit sinɔ doomɗiŋɔŋkuŋ, nɛ in dakɛr kɛ many joop sigɛ tonɗi ad sinɔɔnɛ tɔɔnuk godeey Sambatɛyoŋk tak, in tonɗi ɛkana gɛŋk a Waakoyota dakɛɗa.

²⁹In tonɗi joop sigɔ tonur pɛrkaak a pɛɛy maŋk jiit, mayakana in joop ɔgɔɔk pakatir any sinɛkɔ tonɛɛk.

³⁰Ɔkɔn yaaŋɛɛ any om joopa sigaaga atu tolɛɛɗik kɔɔr eta omaltaaŋ, nɛ in dakɛ kɛ many iɗit sinɛkɔ tonɗi tukik.

³¹Oolɛɛr a toniir wosɛ Waakoyotoŋk iinak baŋɛ momogunɛɛkɛ kɛnɔ joop baŋɛ barɛr ɛɛk ɛ gaananɛr ɛɛk.

³²Tiiɗi wɛɛŋa joop pɛrkaakoŋk joopa pɛrkaakoŋkuŋ,

³³Agut sinɔ ege Waakoyot Waakoyo bɔdɛɗoŋk, ma moko Waakoyo ooyanoŋk. Oko sinɛ ɓɔrɛ ɓɛɛlɛɛɗ dooytaanakɛ Waakoyotoŋk baŋɛk,

³⁴nɛ in dakɛr jartiyatɔk kɛ many tolɛɛɗ dooytaanakoŋk. Agut sinɔ kɛɛɓa sɛɛga pɛgɛdɛɛt kɛnɔ in tonɗi, ma in tiiɗi oko sinɛ sekɛɛɗ higi Muuseek.

³⁵Ɔkɔn ɗɛyɛr any a omoŋ omoŋ a ɗegerarŋ, In kɔɔniyar babuy gɛŋk wɛykɔkɛ, agut sinɔ moko liki sinɔ tonɗiiɗ jartii godeey Sambatɛyoŋkuk.

³⁶Tukerkɔɔɓa Pɛɛni Waakoyotoŋk sɔɔku? Maŋk mɛlɛɛrɓa Pɛɛni Waakoyotoŋk son lak iinakik dakɛɗa?

³⁷Ɔkɔn lakɛ iɗit sinɔ tonu kɛ sɛɛn iɗit pɛrkaakoŋk, maŋk lak tigi Wɛɛŋakoŋkuŋ, in ɗeger kɛ ege sigi kɔna taapɛɛrak sekiyɛ Suumiyoŋk.

³⁸Ɔkɔn lakɛ iɗit sinɔ ki ɗegerɔɔn sinikiŋ, kat ɓɔrɛ sɛɛn ɗegerɛɛ.

³⁹Agut sini iinak manyaakak eeta sigɛ dooytaanakik, in ɗɛyɛɛ toni pɛrkaakoŋk a ɓaŋkawuŋ, maɓɔrɛ kat kaaɓɛ toni ad sinɔɔnɛ tɔɔnuk.

⁴⁰Mayakana in ijaagɛɛ any baŋɛ a ɓɛɛlɛ kɛ ɗɔm a lak ikomiit.