Read majang Omoŋ Korontoosuk 15 Bible Online

Omoŋ Korontoosuk 15 - majang bible

Omoŋ Korontoosuk 15

¹Sisɔ iinak manyaakak eeta sigɛ dooytaanakik, dɛya a kɔnu ara a koɓurkɔɔ Pɛɛni sinɔ Ɓɛlkɛɛstank sinɛkan kɔna waasaak, ɛkan boŋiir ɛ ɛtɛrɗɔ a ɓaŋkaawuŋɔŋk.

²Ɔkɔn gaamiir kɛ ɗɔm pɛɛni sinɛkan kɔnu rɔɔriyɗaakiŋ nɛkoy bɔdɛrɗɔɔŋ, ma ɔkɔnkɔɔŋ nɛ ŋaadiɗikari kanysɛya.

³Kɔɓɛɛra kɔna any sinɛ kaalɗiik sinɛkan ɓɛɛlɛ tukik sinɛkan boŋaak, kɔɓɛɛraakan iinaka any sinɔ tonu kɛ, "Oko sinɛɓa taapɛɛɗɛɛ Wargatɛɛ Waakoyotoŋk kɛ rɛrɓa Kerese agut tikiyɛ gaŋk,

⁴nɛɓa sɛɛn kɔɔwɛɛŋ, nɛɓa ŋaarki ɗoŋikɛ sigɔɔgɛ jiitik ret walasa oko sinɛɓa taapɛɛɗɛɛ Wargatɛɛ Waakoyotoŋkuk."

⁵Ɛɓa yaaŋɛ Suumii ɛɛk Petrosa, nɛɓa ɓɔrɛ yaaŋɛ ɛɛk baŋiya joopa sigaagaɓa aarin a pɛɛyk.

⁶Nɛɓa yaaŋɛ ɛɛk agut omoŋ nomtaanaka gɛɛna sigɔɔga kaalɛr ɗibɛɛ tuulk, ɓɛɛlɛr wɛɛŋakɛ sisɔwa joope sigaagɛɓak a ɓɔɔkaaŋ, mayakanaɓa rɛrar sɛɛge joop a omoŋ omoŋ.

⁷Nɛɓa yaaŋɛ ɛɛk saadi baŋiya Yaykooba, ɛɓa yaaŋɛ ɛɛk wosɛytaanaka baŋɛ.

⁸Nɛɓa ɓɔrɛ yaaŋɛ ɛɛk pediya eeta sinaana ito eet tɔɔn sinɔɓa paapalɛɛrɛŋɔŋk.

⁹Eet sinɛ arka ɗook wosɛytaanakɛ baŋɛ ɛ ki gayɛ ati riyɛ kɛ eet wosɛytan, agut sinɔ eet iɗit sinɔɓa epapaya joop gode Sambatɛyoŋk Waakoyotoŋkuk.

¹⁰Mayakana wookan Waakoyotoŋk dakɛɗa sinɛ kɔtu ari oko sinɛ ɓɛɛlɛɛɗa sisɔk, mokokanta gaɓɛɛ wookan Waakoyotoŋk kanysɛya, ɛkan ɓɔrɛ bɔɔlaaka ijaag a kaala wosɛytaanak ɔgɔ, mayakana ijaagɗi sini wookan Waakoyotoŋk sinɛ ar sooy lak eetik ma moko eet.

¹¹Sisɔ eet maŋk sɛɛg rɔɔriyaaɗii sini, maɓɔrɔ ŋaadiir sini.

¹²Ɔkɔn seek rɔɔriyaakii kɛ ŋaarkiɓa Kerese ret walasaŋ, nɛ iinakɛ a omoŋ omoŋ tonur joop ɔgɔɔk kɛ, "Kɛɛ ŋaarin ret walasak" ɛk?

¹³Ɔkɔn kɛɛ ŋaarin ret walasakiŋ, nɛɓatɔ Kerese kiiki ŋaarin ret walasa,

¹⁴Nɛ ɔkɔnɓa Kerese kiiki ŋaarin ret walasaŋ, nɛ rɔɔriyɔn naŋk maŋk ŋaadiyɛ goŋk ɓɛɛlɛr kanysɛya.

¹⁵Ɛɓɔrɛ eteŋk joop sigɔ tonur nyon Waakoyotek saa rɔɔriyaaɗii kɛ, "Boŋkuɓa Waakoyot Keresee ret walasaŋɔŋk." Ɔkɔn koyɓɔ kirki ŋaarin joop sigɛɓa rɛrarkiŋ, nɛɓatɔ kiiki Waakoyot boŋiiɗ Kerese ret walasa.

¹⁶Agut sinɔ ɔkɔn koy kirki ŋaarin ret walasa joop sigɛɓa rɛrarkiŋ, nɛɓatɔ kiiki Kerese ŋaarin ret walasa.

¹⁷Ɔkɔnɓa Kerese kiiki ŋaarin ret walasaŋ, nɛ ŋaadiɗiikii kanysɛya ɛ ito in kirkɔ bɔdɛ tikiyɛɛkɛ goŋk.

¹⁸Sinɔɔnɛ kɛ badɛrɓa joop sigɛ rɛrar ma ŋaadiɗiikiŋ.

¹⁹Ɔkɔn arii ŋaadiyɛ sigɛ kookorii Keresee agut beeɗit ɗoo sinik dakɛɗaŋ, nɛ sanɗikii a kaalii joop baŋɛ.

²⁰Yakana ŋaarkiɓa Kerese ret walasa kɛnɔ dakɛ a rɔmɛ ŋaarin ret walasaak tukik joopa sigaagaɓa rɛrark.

²¹Oko sinɛɓa mɛlkiɗ ret ete sinaanɛɓa omoŋɔŋk Adameek, ma mɛlki ŋaarin ret walasak ete sinaanɛ omoŋɔŋk Keresee.

²²Oko sinɛ rɛrarɗi joop baŋɛ agut Adamuk, nɛɓɔrɛ laŋir joop baŋɛ bɔdɛ agut Keresee.

²³Ɓɛɛlɛkoy sini baŋɛ momogunɛɛkɛ. Ege Kerese rɔmɛ ŋaarin ret walasa tukik. Ŋaararkikoy ret walasa joop sigɛ gɛɛŋk saakoy mɛlkiɗikiŋ.

²⁴Saadi baŋiya saakoy aalɛɛɗ ɓali ɗookoŋk a ɔɗɔwikeen a ɓaŋkawuka ɓeny saakoy gaɓɛɛɗ burɛ Ɛpɛna eteŋka Waakoyota, nɛkoy ɓaane pedtan ɗookoŋk.

²⁵Agut sinɔ ɗɛyɛ a tapaaɗani Kereseeŋ mɛlɛɛɗa nɔkoy sɛɛna Waakoyot ariiɗ gumaakeer gɛɛŋk a atu derakɛ gɛɛnɛ goyse ɗeekik.

²⁶Gumaaken sinɛkoy ranyjɛɛ pediyaak rer.

²⁷Agut sinɔ taapɛɛɓa Wargatɛɛ Waakoyotoŋk kɛ, "Arikoy a ar ɓaŋkawukaat nɛɛkɛ goyse ɗeek." Mayakana saa toniiɗɛ kɛ, "Argeeɗɓa ola baŋɛ a atu ɓaŋkawukaat nɛɛkɛ goyse ɗeekik," Eekeer sinɛ kɛ kiir tuukɛ Waakoyo sinɛ Ɛpɛn eteŋkak sinɛkan argeeɗ ola baŋɛ a atu ɓaŋkawukaat nɛɛkɛ goyse ɗeekik.

²⁸Ɔkɔnkoy atu olaat baŋɛ ɓaŋkawukaat goyse ɗeekiŋ, nɛkoy Keresee ar goyse ɗeek Waakoyote sinaanɛɓa argeeɗ ola baŋɛ kɛnɔ atu ɓaŋkawukaat nɛɛkɛ goyse ɗeekik, nɛkoy Waakoyot tapaaɗani olaatɛ baŋɛ raŋk.

²⁹Ɔkɔnkoy kirki ŋaarin reterŋ nɛ sigɛ aadɛɛ agut reteerk arirki jikon? Ɔkɔnkoy kirki ŋaarin reterŋ adaktan, nɛ aadɛɛ joop ɔɔtɛ nɛŋk agut jikon?

³⁰Kɛygun eteŋk beeɗii sayitiyɛ gɛɛŋk baŋɛ a lalaŋkii rakatɛ agut jikon?

³¹Iinak manyaakak eeta sigɛ dooytaanakik, lalaŋka rer ɓɛɛnyɔwɛ gɛɛŋk baŋɛ, yaaŋa eekeer gɛɛŋk meriiɗ ɛɛkoŋk sinɛ laka iinakɛ raŋk Suumii Yeese Kereseek.

³²Ɔkɔnkan arii ɗɔŋkɔɔlɛ Epesoone a joop sigɔ ito keegu ɗukoŋk taareŋ nɛ koy laŋa jikon? Ɔkɔnkoy kirki ŋaariin joop sigɛɓa rɛrarkiŋ, nɛ dakɛ oko sinɛɓa taapɛɛɗɛɛ Wargatɛɛ Waakoyotoŋk kɛ, "Koy ɗamikii, Koy utiɗiikii agut sinɔkɔɔ rɛrɗii alɛŋɔŋk."

³³Kat kɔnu raaramɛɛ. "Piraa sinɔ ŋɛɛwɛnŋɔŋk sɔɔkɛ kalbi sinɛ mentank."

³⁴In murkɛɛ anta sinɔɔna mentanŋɔŋk, kat ijaagɛɛ tikiyɛ. Lakɛ iinakɛ kɔɔr joop a omoŋ omoŋ sigɔ kir ɗegerɔɔn Waakoyok. Tona sini kɛnɔ latukari keeny.

³⁵Kaɗɛ iɗit omaay kɔɔniya kɛ, "Ŋaararkikoy reter ɛk? Latukoy ɛɛk sinɔ ɓɛɛlɛ ɛkik saakoy ŋaararkiɗik?"

³⁶Iin gaagɛ sini, ɔkɔn ki rerin ɗama sinɛ soowunkuŋ nɛ kiiki ɗiigarɔn.

³⁷Saa soowɛɗin maakoloy maŋk wɛykon omk, moko kɔɔ tɛɛnan ɗiigarki sinɛkɔ soowunk baŋɛ makɔɔ tɛɛnan ɗiigarki giid.

³⁸Yakana gaɓɛ Waakoyot ɛɛk wɛykonta nɛɛka oko sinɛ ɗɛyɛɛɗik, gaɓɛ ɓɔrɛ wɛykonta a omoŋ omoŋ ɛɛk sinɔ pakakataaŋɔŋk.

³⁹Moko buusɛɛ baŋɛ komoy omoŋ. Ege buusɛ etoŋk komoy omoŋ, ma ege buusɛ keeguntoŋk komoy om. Ege buusɛ teetɔɔkoŋk komoy om, ma ege buusɛ oltoŋk komoy om.

⁴⁰Lakɛ ɓɔrɛ ɛɛk dariyoŋkuŋ. Maɓɔrɛ lakɛ ɛɛk ɗookoŋkuŋ, mayakana ege eemɛyɔn ɛɛk dariyoŋk komoy omoŋ. Maɓɔrɛ ege eemɛyɔn ɛɛk ɗookoŋk komoy om.

⁴¹Ege eemɛyɔn waawuyoŋk komoy omoŋ, ma ege eemɛyɔn ɛyɛnoŋk komoy om. Ege ɓɔrɛ eemɛyɔn maryɔkoŋk komoy om, agut maryɔn om lak eemɛyɔn sinɔ pakata maryɔnt omalteŋɔŋk.

⁴²Ɓɛɛlɛr joop sigɛkoy ŋaararki ret walasak oko sinik. Kɔɔwɛɛ buusɛ sinɔ rɛr nɛ mojɛŋɔŋk, nɛkoy ŋaarki buusɛ sinɔ bɔdtank sinɔkoy ki badɛɛk.

⁴³Soowɛɛ a daraayɛɛŋ, nɛkoy ŋaarki eemɛyɔɔn, soowɛɛ a bɔɔlaaŋ, nɛkoy ŋaarki a ɓaŋkawuŋ.

⁴⁴Ɔkɔn kɔɔwɛɛ buusɛ ɛɛk nɛɛkiŋ, nɛkoy ŋaarki ɛɛk sinɔ wɛɛŋak. Ɔkɔn lakɛ buusɛ sinɔ ɛɛkkiŋ, nɛ maɓɔrɛ lakɛ ɛɛk sinɔ wɛɛŋakiŋ.

⁴⁵Nɛ agut sini taapɛɛɓa Wargatɛɛ Waakoyotoŋk kɛ, "Adam iɗit sinɛɓa riiɓɛɛ tuki a lak wɛɛŋak," ma Adam sinɛ pediyaak Kerese sinɛ gaɓɛ wɛɛŋa sigɔ bɔdɛɛk.

⁴⁶Mayakana mɛlkiɓa tuki sinɔ taarik, ma moko wɛɛŋa. Mɛlkiɓa sinɛ wɛɛŋak sinaanɛ taarik baŋiya.

⁴⁷Riiɓɛɛɓa iɗit sinɛɓa tukik ɗook nɛ sɛɛn iɗit ɗookoŋk, ma pɛɛyeen nɛɛk iɗit sinɛɓa kus darik.

⁴⁸Ɓɛɛlɛr sigɛ ɗookoŋk oko sinɛɓa riiɓɛɛ ɗookuk, ma ɓɛɛlɛr sigɛ dariyoŋk oko sinɛɓa kus darik.

⁴⁹Oko sinɛ gayiɗii tagay ɛɛk ɗookoŋkuk, nɛɓɔrɛ kadii tagay ɛɛk dariyoŋk.

⁵⁰Iinak manyaakak eeta sigɛ dooytaanakik, tona kɔna sini. Kirkoy moonɛɛt taar a yɛrom Burɛ Waakoyotoŋk, makoy ɓɔrɛ ki moonɛɛt ɛɛk sinɛkoy badɛk sinɛ retenk ɛɛk sinɛkoy ki badɛɛk sinɛ bɔdtank.

⁵¹Tonakɔna any sinɔ dugaaŋɔŋk a omoŋ. Kiikoy rerin eteŋk baŋɛ, mayakana weeriikoy ɛɛk eteŋk baŋɛ.

⁵²Saakoy gotɛɛɗɛɛ luuri sinɛkoy pediyoŋkuk, nɛkoy ŋaararki joop sigɛɓa rɛrark aɓa kir mojɛ a sɛɛg bɔdtaanak. Gotɛɛkoy luuri nɛɛkiŋ makoy ɓɔre weerii ɛɛk a ito malɛɛ taama.

⁵³Agut sinɔ ɗɛygeeɗ a kadi sinikoy badɛk sinɛkoy ki badɛɛk, maɓɔrɛ kadi sinikoy rɛrk sinɛkoy ki rerink.

⁵⁴Ɓeny saakoy kadiiɗ sinikoy badɛɛk sinɛkoy ki badɛɛk, ma kadi sinɛkoy rɛrk sinɛkoy ki rerink, nɛkoy dusanɛɛ sinɛɓa taapɛɛ Wargatɛɛ Waakoyotoŋk kɛ, "Lokoosɛkɔ lɔsɛɛɗ rer."

⁵⁵Ɛɓa ɓɔrɛ taapɛɛ kɛ "Iin rer, Lɔsɛ nook eet? Iin rer, Keenɔn nook eet sinɛ suusuwuɗun joopuk?"

⁵⁶Keenɔn retoŋk tikiyɛ sinɛ suusuwuɗu joopuk, maɓɔrɛ ɓaŋkawuka tikiyɛɛkoŋk higi.

⁵⁷Yakana in dakɛr pɔɔsiyɛɛk Waakoyota sinaanaɓa tina gaɓɛ lɔsɛ goy Suumi naŋk, Yeese Kereseek.

⁵⁸Iinak manyaakak eeta sigɛ dooytaanakik sigɛ porɛɛk, In ɛtɛɛ a ɓaŋkawuŋ. Kat ɓeesiɗiikari ant omalte. In ɓaŋkaawurɛɛ otoop kɛnɔ ijaagiir ijaag Suumiyoŋk, a kat yawɛɛriɗ a ɗegerari kɛ moko bɔɔlakari ijaaga Suumiyoŋk kanysɛya.