Read majang Omoŋ Korontoosuk 16 Bible Online

Omoŋ Korontoosuk 16 - majang bible

Omoŋ Korontoosuk 16

¹Agut tolɛ wori tɔkɔny dooytaanakoŋk, in ɓɔrɔ ijaagɛɛ oko sekiyɛ sigɛkan gaɓa dooytaanaka Gɛlatiyaak.

²In iɗit a omoŋ omoŋ iinakɛ riiɓe wori nɛɛk Sambatɛyoŋk nyaki nɛɛkɛk oko sinɛkɔ laŋiɗik tuki nɛɛk, kɛnɔ mokɔɔ lakɛ iɗit sinɔkɔɔ tolɛ wori saakɔɔ mɛlɛrkiɗak.

³Saakɔɔ mɛlɛrkiɗa son lak iinakik, nɛkɔɔ kɔna wosɛyɛɛra a wargatɛ agut omoŋ joop sigɛkan daamarik a kɔna gaamur worik sinɛkan tolɛɛrik kɛnɔ ɗɔkarki Yorsaleema.

⁴Ɔkɔn kɔɔ dɛna a ɓɔrɛta gay a kɛɛɗaŋ, nɛkɔɔ kɔrii a sɛɛg agut omoŋ.

⁵Agut sinɔkɔ gaamiɗa kɛ kɛɛɗakɔɔ Mɛkedooniyaakaak, nɛkɔɔ kɔnu lɛɛwɛra a gopan.

⁶Ɔkɔn kaɗɛŋ kusa kɔɔ gaalaaka a diŋ ɔɔtɛ nɛɛkɛŋ, maŋk kɔɔ kaala baŋgi nɛɛk saadi. Inta ijaagɛɛ tɔkɔny sinɛta ɗɛyɛ ŋaawita naakaak nyon baŋɛkik.

⁷Sisɔ kaa ɗɛyɛ a kɔnu lɛɛwɛra a balaaŋ ma ɗeya a gopan. Ma ɔkɔn oko ɗɛyan Suumiyoŋkuŋ, nɛ saadi baŋiya laka ŋaadiyɛ sigɔ kookora kɛ beeɗaakɔɔ sooy lak iinakik a jeeɗo ɔɔtɛ nɛɛkɛŋɔŋk.

⁸Yakanakɔɔ beeɗaa Epesoone mɛlɛɛɗa Ba'aala Pentekosteek.

⁹Ɛɓɔrɛ tayɛɛkɔta tuga sinɔ bakaanyŋɔŋk sinɔ lak ijaag a obiiŋɔŋk, yakana ɓɔɔka joop sigɔ ɓooyɗiŋɔŋkuŋ.

¹⁰In kɔɔ wɔɔrɛɛ Timotiyoos, saakɔɔ mɛlɛrkiɗik kɛnɔ beeɗ sooy lak iinakik a kat lak keeny, agut sinɔ ijaag ɓɔrɛ ijaag Suumiyoŋkuŋ oko eet.

¹¹Nɛ agut sini kat lakɛ iɗit sinɔ sɛɛn daraayɛk kɛnɔ weeriiki bɔdɛɛɗ son lak eetik, kookorii murun nɛɛk a manyaakak eeta sigɛ dooytaanakik agut omoŋ.

¹²Kalɛykaayakan manya eteŋka Apiloos sɛɛn a manyaakak eteŋka sigɔ dooytaanakik kɛnɔ gun kɔtar son lak iinakik, nɛkɔ sɛŋk sise kiir mɛlɛ, yakana kɔɔ kɔru saakɔɔ yaageeɗik.

¹³In ɓeɗɛɛ, In ɛtɛɛ ŋaadiyɛɛkɛ, in moojanɛɛ, in ɓaŋkaawurɛɛ.

¹⁴In ijaagɛɛ mɛyin, any sinɛ ijaagiirik baŋɛ.

¹⁵Iinak manyaakak eeta sigɛ dooytaanakik, degerari joop wɛy Istipaanoosuk kɛ sɛɛg ɔɗɔweer dooytaanaka ɗook Akayaak ɛkan gaɓɛr ɛɛk kɛnɔ ijaagɗi joopa Waakoyotoŋk.

¹⁶Nɛkɔna rɔɔrɔka kɛ in tiiɗikɛɛ joopa sigɔɔga ɓɛɛlɛr oko sigik a joop sigɛ ijaagɗi jɛtik baŋɛ a sɛɛg agut omoŋ.

¹⁷Yaata jɛt mɛlɛ Istipaanoosuk a Pɛrdonatoosuk a Akayakoosuk son lak eetik, agut sinɔ kɔta enyɛrarɗi any sinɛ kɔte bitakɗi saakɔ kɔnu kiiɗɛkiŋ.

¹⁸In ɗegerɛɛ joop sigɔ ɓɛɛlɛr oko sigik. Gaɓɛrkɔ imiiny wɛɛŋaaka goŋk a wɛɛŋa gaŋkiŋ.

¹⁹Digoyɛrtarnɔ kɔnu dooytaanak sigɛ atu Isiyaakeek, digoyɛrtarnɔ kɔnu jɛt Suumii Yeesee dooytaana sigɛ tolɗi woy Akiilaak a Pirsikilaak baŋɛ.

²⁰Digoyɛrtarnɔ kɔnu dooytaana sigɛ atu seedik baŋɛ. In digogoyikɛɛ a samɓoɓoyikɛɛ ɛkanɛɛkɛ goŋk mɛyin masiikikeenoŋk.

²¹Eet Paawuloos taapɛɛrakɔ kɔna wargatɛ sini ariit naakɛk.

²²Ɔkɔn lakɛ iɗit sinɔ ki poriiɗ Suumi Yeeseekiŋ, in dakɛ a koonykan. In Suumi naŋk waɗik.

²³In wookan Suumi Yeese Kereseek a iinak agut omoŋ.

²⁴In mɛyin naak a iinak agut omoŋ Yeese Keresee. Ameen.