Read majang Omoŋ Korontoosuk 2 Bible Online

Omoŋ Korontoosuk 2 - majang bible

Omoŋ Korontoosuk 2

¹Iinak manyaakak eeta, Saaɓa mɛlɛrkiɗa son lak iinakik kaaɓa kɔna waasiɗiit agut Waakoyo a yaaŋa oolan toniiɗoŋk a ɗegerɔn ɛɛkoŋk.

²Agut sinɔ saaɓa arkiɗa sooy lak iinakik, ruumaɓa sinɔ kɛ kɛɛ any sinɔ ɗegera Yeese Keresee sinaanɛɓa laalawɛɛk laalawutant raŋk sɔgɔɔsɔyk.

³Saaɓa arkiɗa sooy lak iinakik, ɓɛɓɛlaaɓa a eet bɔɔl a ɓuɓuriika a piiɗa a obiiŋ.

⁴Yaaŋɛɛɓa pɛɛni sinɛkan totonaak kɛygun sinɛɓa rɔɔriyaaɗak ɓaŋkawukaat Wɛɛŋa Waakoyotoŋk, ma mokoɓa ŋaɗɛɛɗ pɛɛniyoŋk sinɛ taɓiɗɛɛ iɗitik,

⁵Kɛnɔ in ɛtɛr ŋaadiyɛ goŋk ɓaŋkawukaat Waakoyotoŋk, Ma moko tukiɗik ɗegerɔɔn etoŋk.

⁶Yakana tonɗiikii pɛɛnii ɗegerɔɔnoŋk joopa sigaaga aaɗiita ŋaadiyɛɛkɛk, ɛ moko tonii ɗegerɔn ɗoo sinik, maŋk ɗegerɔn joop sigɛ ɓalir ɗook sigɛ pedi nɛŋk badɛɛk.

⁷Yakana tonii ɗegerɔn sinɔ dugaaŋɔŋk Waakoyotoŋk sinɛɓa dugiɗi emeyikɛ jeemɛk, ɛɓa ragadi Waakoyot eemɛyɔɔna naŋk emeyikɛ jeemɛk.

⁸Kɛɛ iɗit sinɔɓa ɗeger ɗegerɔn sini joope sigeege ɓalir ɗook, ɔkɔnɓa ɗegerarŋ gunɓa kir laalawɔɔn Suumi eemɛyɔɔnoŋk.

⁹Tonu Wargatɛ Waakoyotoŋk kɛ "Ragadiɓa Waakoyot joopa sigaaga porur Sɛɛnik, any sinɛɓa ki taanta taama etoŋkuk, a sinɛɓa ki weenta weena etoŋkuk, a sinɛɓa kiiki koɓiiɗ ɓayɛ etoŋkuk."

¹⁰Yakanakan eteŋka yaaŋɛ Waakoyot any nɛɛk sinɛ dugaaŋɔŋk goy Wɛɛŋa gɛɛŋk Sigɔ Geetitaanakik, agut sinɔ mermenarɗi Wɛɛŋa gɛɛnɛ sigɔ Geetitaanakik any baŋɛ a aasi ki dakɛ any sinɛɓa gaamu Waakoyotuk sinɛ duga jɛtik.

¹¹Kɛɛ iɗit sinɔ ɗeger koɓi ɛɛk nɛɛkik wɛɛŋakɛ gɛɛnɛ sɔgɔɔsɔyk, maɓɔrɛ kɛɛ iɗit sinɔ ɗeger koɓi Waakoyotoŋkuk Wɛɛŋakɛ sigɔɔgɛ Geetitaanakik sɔgɔɔsɔyk.

¹²Kiikan boŋiiɗ wɛɛŋa ɗoo sinik, makan tina gaɓɛ Waakoyot Wɛɛŋa sigɔ Geetitaanakik kɛnɔ oolɛɛɗii a ɗegerii any baŋɛ.

¹³Agut sini rɔɔriyi joop sigɔ atu wɛɛŋakɛk ant wɛɛŋakoŋk pɛɛnii sinaanɛ tin rɔɔriyarɗ wɛɛŋakik, ma moko ɗegerɔɔn etoŋk.

¹⁴Iɗit sinɔ moko dooytank ki oolɛ a boŋu any sinɛ kus Wɛɛŋakɛ Waakoyotoŋkuk, agut sinɔ mermenɗɛɛ Wɛɛŋakɛk Waakoyotoŋkuk nɛ kiigeeɗ mɛlɛ, gayigeeɗ aasi sɛɛna any sini a gaagɛyikeen.

¹⁵Iɗit sinɔ lak Wɛɛŋa sigɔ Geetitaanakik oolɛ mermenɔn ola baŋɛk, ma sɛŋk kɛɛ iɗit sinɔ mermen sɛɛnik.

¹⁶Taapɛɛɓa Wargatɛɛ Waakoyotoŋk kɛ, "Wooɗ sinɛ ɗeger ɓayɛ Suumiyoŋkuk? wooɗ sinɛ oolɛ a rɔɔriyŋɔŋk?" Mayakana seek lakii ɓayɛ Kereseek.