Read majang Omoŋ Korontoosuk 3 Bible Online

Omoŋ Korontoosuk 3 - majang bible

Omoŋ Korontoosuk 3

¹Iinak manyaakak eeta sigɛ dooytaanakik, kaakan oolɛ a kɔnu rɔɔriya a ito iinak joop sigɔ atu Wɛɛŋakɛk. Makan kɔnu rɔɔriya a ito iinak joop sigɔ atu taarek ɛ sɛɛg tɔɔmɔk sigɔ in kir ɓaŋkaawurɔnk.

²Gijakan kɔnu ɛrsɛɛ, ma moko ɗama sinɔ ɓaŋkawuŋɔŋk. Agut sinɔ kirɗɔ oolɛ ɗamata ɗama sinɔ ɓaŋkawuŋɔŋkuk. Kɛygun ɓɔrɛ sisɔ in kiir oolɛ ɗamata ɗama sinɔ ɓaŋkawuŋɔŋk.

³In ɓɔrɛ sisɔ iinak joop ɗookoŋk agut sinɔ a'ararɗɔ nyeken ɛ ɗaakiɗɔɔ ɛkanɛɛkɛ goŋkuk. Anɛ moko iinak joop ɗookoŋk? In aasi dakɛ sinɔ kɛ iinak joop Waakoyotoŋkuk, a moko iinak joop ɗookoŋku?

⁴Saa kɔne tonurɗu joop a omoŋ omoŋɔŋk kɛ, "Eet sɛŋk Paawuloosuk," maɓɔrɛ iɗit omaay tɔnu kɛ, "Eet sɛŋk Apiloosuk." In dakɛ sinɔ kɛ iinak joop Waakoyotoŋk, a moko iinak joop ɗookoŋku?

⁵A ege sɛŋk Apiloos wooɗ? Maɓɔrɛ Paawuloos wooɗ? Egetɔ sɛɛk ijaageer sigɛkan kɔnu arir kɛnɔ ŋaadiɗikarik. Ijaagɗiɗ sɛɛk ijaag sinɛkan sɛɛga gaamu Suumii a omoŋ omoŋɔŋk.

⁶Waayakan saak wɛykon, makan sawuɗi Apiloos, mayakana ari Waakoyot a ɓɔlɔɔrɛŋ.

⁷Iɗit sinɛ waayɗik a sinɛ sawuɗik moko dɔɔs sɛɛg, ma iɗit sinɛ ari any sinɛkan waayɛɛk a ɓɔlɔɔrɛŋɔŋk Waakoyo dakɛɗa.

⁸Iɗit sinɛ waayɗik a iɗit sinɛ sawuɗik ijaagir any sinɔ omoŋɔŋk. Boŋukoy iɗit a omoŋ omoŋ gati nɛɛk oko ijaag nɛɛk.

⁹Agut sinɔ eteŋk joop sigɛ ijaagɗikii a Waakoyo agut omoŋɔŋk. Ito iinak taawa ɛ ito iinak gode Waakoyotoŋk.

¹⁰Tukaakɔ wookaan sinaanɛ kanta gaɓɛ Waakoyotuk ɗoo sinɛ godeyoŋk oko iɗit sinɔ ɗeger ɛɛkik kɛny gode giɗekɛk. Ɛ ɓɔrɛ iɗit omaay kɛnyi sinaanɛkan tukaak raŋk. Yakana iɗit a omoŋ omoŋ in koorɛ ɛɛk nɛɛk kɛ kɛnyi ɛk.

¹¹Ɔkɔnkɔ tukɛɛ ɗook agut omoŋ, nɛɓɔ kɛɛ iɗit sinɔ oolɛ a tuke omk. Ege tuktan sini Yeese Keresee.

¹²Ɔkɔn lakɛ iɗit sinɔ kɛnyir tuktaana sineena raŋana workee, maŋk birii, maŋk giɗe sinɔɔnɛ eemɛytank, maŋk keet, maŋk ŋɔnyikɛ, maŋk ɛlti,

¹³mɛlkikoy ɓɛɛnyɔ pirdiyoŋk sinɔ yaaŋɛɛdɛɛ ijaag etoŋk a omoŋ omoŋ. Ɓeny saakoyk yaaŋɛɛkoy a paarɛɛ maɗ ijaag etoŋk a omoŋ omoŋ.

¹⁴Ɔkɔn koy iɗit sinɛ kɛny gode giɗekɛk ɓaŋkaawur ijaag nɛɛkɛ a ki aalɗiit maɗiŋ, nɛkoy boŋu ruukeet.

¹⁵Mayakana ɔkɔn koy moɗiɗ ijaag nɛɛkɛ maɗiŋ, nɛkoy dakɛɛɗ ruukeet nɛɛkɛŋ. Yakana koy sɛŋk bɔdɛ oko iɗit sinɔ ɗeyi rakatɛɛ sinɔɔnɛ maɗ takank.

¹⁶A kiir ɗegerɔɔn kɛ iinak Gode sinɔ Geetitank Waakoyotoŋk ɛ atu Wɛɛŋa sigɔ Geetitaanak iinakɛ taki?

¹⁷Ɔkɔn iɗit aalɛ Gode sinɔ Geetitank Waakoyotoŋkuŋ, aalɛkɔɔ sɛɛn Waakoyotuŋ. Ege Gode sinɔ Geetitank Waakoyotoŋk geetitan, ege Gode sini Geetitank iinak.

¹⁸Kat lakɛ iɗit sinɔ raamɛ ɛɛk nɛɛkik. Ɔkɔn lakɛ iɗit sinɔ dɛnɛ a gayigeeɗ a ito ɗeger ɛɛk ɗook sineene raŋkiŋ, in ikomu ɛɛk nɛɛk a gaagɛy kɛnɔkoy laŋi ɗegerɔn sinɔ eekerkank.

¹⁹Ege ɗegerɔn ɗoo sinik gaagɛyikeen taamɛkɛ Waakoyotoŋk. Agut sinɔ taapɛɛɓa Wargatɛɛ Waakoyotoŋk kɛ, "Kaŋi Waakoyot joop sigɛ ɗegerar ɛɛkik ɗegeej nɛŋk."

²⁰Ɛɓa ɓɔrɛ taapɛɛ kɛ, "Ɗeger Suumii kɛ ɓɛɛlɛ kalbi joop sigɛ ɗegerar ɛɛkik kanysɛya."

²¹Agut sini kat lakɛ iɗit sinɔ meri ɛɛk etek agut sinɔ ege any baŋɛ noŋkuk.

²²Ege any baŋɛ noŋk kɛygun Paawuloos, kɛygun Apiloos, kɛygun Petros, kɛygun ɗoo, kɛygun wɛɛŋa, kɛygun rer, kɛygun sinɛ sisɔk, kɛygun sinɛkoy mɛlkik.

²³Iinak ɓɔrɛ Kereseek, maɓɔrɛ Kerese Waakoyotoŋk.