Read majang Omoŋ Korontoosuk 5 Bible Online

Omoŋ Korontoosuk 5 - majang bible

Omoŋ Korontoosuk 5

¹Tiyaakɔ kɛ lakɛnɔ iinakɛ kɔɔr ruunyikeen sinɔ keerɛɛŋɔŋk. Kɛɛ aasi ijaagɛɛ ruunyikeen sinɔ ito sinik joope sigɔɔgɛ moko Ayuuduk kɔɔr. Lakɛnɔ iinakɛ iɗit sinɔ boŋu nyaki ɛmɛsaakiŋ.

²Anɛ ɓɔŋgɔɔrɛɛr ɛɛk agut jikon ma lakɛ any sinɔ keerɛɛŋɔŋk iinakɛ kɔɔruk? Gunkɔ aasi ɓakɛyɗiikari agut iɗit siniŋ. Nɛ gunkɔ boŋiitaarɔ iɗit sinɛkɔ ijaag any sinik tolɛɛɗ noŋk walasaaŋ.

³Kɛygun aasiti kiikaayɛɛ taare a iinak agut omoŋ ma wɛɛŋakɛ eet a iinak agut omoŋ, saa eet a iinak agut omoŋɔŋk pɛrɛda ete sinaanɛ ijaag somakɔ sigɔ ito sigik tiriyaakɛ Suumi Yeese Kereseek.

⁴Saa tolɗiiɗɔɔ ɓaŋkawukaat Suumi naŋk Yeeseek nɛ agut sinɔtu laŋiiɗɛɛ wɛɛŋakɛ iinakɛ kɔɔruk.

⁵Ɗɛyɛ kɔna a gaɓɛɛr buusɛ iɗit sinik setana kɛnɔ laŋki rakatɛ kɛnɔkoy bɔdɛr wɛɛŋa iɗit sinik ɓeny saakoy mɛlkiɗ Suumii pirdiyaak.

⁶Ki mentanka meri noŋk ɛɛkoŋk ɛkanɛɛkɛ goŋk. A kiir ɗegerɔɔn irso sinɔ tɛmŋɔŋk kɛ ari malɛytan nɛɛk baŋɛ a gupuuyeŋ?

⁷In orɛɛ irso sinɛ bɔɔlɔŋk kɛnɔ ɓɛɛlɛɛr oko malɛytan sinɔ tɔɔnuk kiiɗɛ irsook. Agut sinɔ uduŋɛɛɓa eteŋka Keresee sinɛ jiŋkuy Ba'aal Ɗoyiɗoŋk.

⁸Nɛ agut sini koy eemɛyii Ba'aal Ɗoyiɗoŋk naŋk nasiye sinɔɔnɛ kiiɗɛ irsook, sinɔɔnɛ mentanŋɔŋk a enyaakiɗ eekerk, ma moko irsooke sinɔɔnɛ bɔɔlɔŋk enyaakiɗ ɗɛgɛ a ŋɛɛwɛnkaatik.

⁹Tonakan kɔna wosɛ saakan kɔna taapɛɛra jeemɛk kɛnɔ kat ijaagɗiikari a joop sigɔ ruunykaanakik agut omoŋ.

¹⁰Moko tona sini kɛnɔ kat ijaagɗiikari a joop sigɛ ijaagir ruunyikeen ɗook sineene raŋkik, maŋk a joop sigɛ golɛrk, maŋk a agaltiir, maŋk a joop sigɛ ugumer raŋaawotakaak. Ɔkɔntɔ ɓɛɛlɛ oko sinikiŋ, nɛ gunkan kɔna ɗɛyɛ a ŋaararkɔɔ ɗook raŋkiŋ.

¹¹Yakanakɔ saak taapiɗiira kɔna kɛnɔ kat ijaagɗiikari agut omoŋɔŋk a joop sigɛ riyɛ sɛɛg kɛ dooytaanak nɔ, ma ibiɗiiŋɔŋk maŋk sigɛ golɛrk, maŋk sigɛ ugumer raŋaawotakaak, maŋk sigɛ laaganyaak, maŋk sigɛ pɔyark, maŋk sigɛ weeweelik. Kat ɗamari ɗama a joop sigɔ ito sigik agut omoŋ.

¹²Ijaag naak sinɔ pɛrɛdɛɗɛɛ joope sigɔɔgɛ atu tolɛɛɗ dooyanoŋk walasiki? A moko pɛrɛdɛɛr joope sigɔɔgɛ atu tolɛɛɗ dooyanoŋk takikiŋ?

¹³Pɛrɛdɛkoy Waakoyot agut any joop sigɛ atu dooyaan walasik oko sinɛ toniiɗ Wargatɛ Waakoyotoŋk kɛ, "In ɔɔyɛɛ iɗit sinɔ ŋɛɛwɛnŋɔŋk iinakɛ kɔɔruk."