Read majang Omoŋ Korontoosuk 6 Bible Online

Omoŋ Korontoosuk 6 - majang bible

Omoŋ Korontoosuk 6

¹Ɔkɔn ɗaaki iɗit omaay a manya sinɔ dooytank iinakɛ kɔɔruŋ, nɛ in mermenargeeɗ rakatɛ nɛɛk joop Waakoyotoŋk, ɔɔtɛ sɔgun kɛɛɗ daariya son lak joop sigɔ gaɓɛr woorank.

²Kiir ɗegerɔɔn kɛ pɛrɛdɛrkoy joop Waakoyotoŋk ɗook sineene raŋkiŋ? Anɛ saa pɛrɛdɛrɗɔ ɗook sineene raŋkik, nɛ kɔnu ooɗɛ pɛrɛdɛ ant sineene balaaŋɔŋk ɛk?

³Kiir ɗegerɔɔn kɛ pɛrɛdiikoy aasi wosɛytaanakɛ Waakoyotoŋk raŋkiŋ? Anɛ kii oolɛ a pɛrɛdii olaatɛ ɗoo sini raŋan nɛɛkik a kaalɛŋ ɛk?

⁴Saa ɗaakiɗɔɔ ɛkanɛɛkɛ goŋkuk, anɛ daamari joop sigɔ kɛɛ sɛɛg eemɛyɔɔn godeey Sambatɛyoŋkuk kɛnɔ pɛrɛdɛr kɔneŋ?

⁵Tona sini kɛnɔ latukari keeny, a kɛɛ kɔne kɔɔr iɗit sinɔ ɗeger ɛɛkik gayɛ a pɛrɛdɛŋɔŋk?

⁶Anɛ dooytan omaay daariyɗi dooytaana omalta nɛ diilɛɛ godeya wooranoŋk joop sigɔ moko dooytaanakiŋ?

⁷Daraayɛ aasi kɔna daririi ɛkanɛɛkɛ goŋk. Dɔɔs aasi a kɔnu tikɛɛ ɛ kɔnu raamɛɛ.

⁸Yakana aasi sɔɔk ijaagiir any sinɔ moko likik a raamiyɛ masookoyakɛ sigaagɛ dooytaanakik raŋk.

⁹Kiir ɗegerɔɔn kɛ kirkoy tikitaana moonɛɛt Burɛ Waakoyotoŋku? Kat boŋiir any sinɔ kɔna tonu iɗit omaayk, joop sigɔ ibiɗiiŋɔŋk, maŋk sigɔ ugumer raŋaawotakaak, maŋk ruunykaanak, maŋk moojak sigɔ arir ruunyikeen a moojakik, maŋk peetak sigɔ arir ruunyikeen a peetakik,

¹⁰maŋk agaltiir, maŋk goltekaanak, maŋk tɔpɔytaanak, maŋk joop sigɔ laaganyaŋɔŋk, maŋk joop sigɔ weeweliŋɔŋk. Joop sigɔ ito sigik kirkoy moonɛɛt Burɛ Waakoyotoŋk

¹¹Ɓɛɛlɛɛrɓa ɓɔrɔ oko sinik iinak a omoŋ omoŋ. Mayakana sisɔ aadiirɛɛkɔ kɔne tikiyɛ tiriyaakɛ Suumi naŋk Yeese Kereseek a Wɛɛŋakɛ sigɔɔgɛ Geetitaanakik Waakoyo naŋkiŋ, iinak joop sigɔkɔ pakatɛɛ Waakoyota a geetitaanakik, ɛkɔ mentaanirari taamɛkɛ Waakoyotoŋk.

¹²"Pɛgɛdɛɛɓata ola baŋɛ," mayakana kir kɔnyɗiit olaat baŋɛ. Pɛgɛdɛɛɓata ola baŋɛ, mayakana kiira toŋoɗ ɛɛk olaata baŋɛ nɔtu ɓalir."

¹³Toniir kɛ, "Ɗama amɗa, maɓɔrɛ amɗ ɗamata." Liki, yakana aalɛkoy Waakoyot ola sigi pɛɛykiŋ. Nɛ tina ki ɗɛyɛ a ŋɔɗurii ɛɛk naŋk ruunyikeenaŋ. Agut sinɔ ɛɛk naŋk Suumiya Yeeseyaak, maɓɔrɛ Suumi Yeese ɛɛka naŋkik.

¹⁴Boŋkuɓa Waakoyot Suumi Yeesee ret walasaaŋ, nɛkoy ɓɔrɛ tin boŋku ret walasa ɓaŋkawukaat nɛɛkɛkiŋ.

¹⁵Kiir ɗegerɔɔn kɛ ege ɛɛk noŋk kaakastaana nyonitaak ɛɛk Kereseek? Anɛ ɗɛyɛ a boŋa kaakastaana nyonitaak ɛɛk Kereseek, nɛ ara a kaakastaana nyonitaak ɛɛk peet sinɔ ruunykankiŋ? Ki gayɛ a daktan!

¹⁶Kiir ɗegerɔɔn kɛ iɗit sinɔ ɗeegarar a peet sinɔ ruunykank kɛ sɛɛg omoŋ? Agut sinɔ taapɛɛɓa Wargatɛɛ Waakoyotoŋk kɛ, "Sigɛ pɛɛyk sɛɛg koy ɛɛk omoŋ."

¹⁷Mayakana iɗit sinɔ ijaagɗi a Suumi Yeese agut omoŋɔŋk sɛɛg ɛɛk omoŋ wɛɛŋakɛ.

¹⁸Agut sini in yowɛɛɗirɛɛ ruunyikent, tikiyɛ ɔgɔ baŋɛ ijaag sɛɛg iɗit eek nɛɛkɛ walas, mayakana iɗit sinɔ ijaag ruunyikeenk ijaag tikiyɛ eek nɛɛkɛk raŋk.

¹⁹In ɗegerɛɛ ɛɛk noŋk kɛ Gode sinɔ Geetitank Wɛɛŋa sigɔ Geetitaanakik sigɛ atu iinakɛ takik, sigɛɓa kɔna gaɓɛ Waakoyotuk. Iinak Waakoyotoŋk, ma moko iinak ɛkan goŋkuk.

²⁰Ɓaliɓa sɛŋk kɔnu gatii, nɛ agut sini in eemɛyɛɛ Waakoyo taare noŋk.