Read majang Omoŋ Korontoosuk 8 Bible Online

Omoŋ Korontoosuk 8 - majang bible

Omoŋ Korontoosuk 8

¹Tona sisɔ sini agut taar sinɔkɔ uduŋɛɛ raŋaawotaak. Oko sinɛ toniiɗɛ kɛ, "Lakii ɗegerɔn ɛɛkoŋk baŋɛŋɔŋk." Arɗi ɗegerɔn ɛɛkoŋk a ɓɔŋgɔɔrɛɛ ɛɛk rakaaya, mayakana sɛŋk arɗi mɛyin a ɓaŋkaawurɛɛŋ.

²Ɔkɔn lakɛ iɗit sinɔ koɓu kɛ, "Ɗegera ɛɛkkiŋ," nɛ in ki ɗegerɔɔn a ɛtɛ oko sinɛ gun ɗegerɗik.

³Mayakana iɗit sinɛ poru Waakoyok ɗegerɛɛ sɛɛn sooy lak Waakoyokuŋ.

⁴Tona sisɔ oko sinik agut taar sinɔkɔ uduŋɛɛ raŋaawotaak. Ɗegerii kɛ kɛɛ wɛɛŋa raŋaawotakɛ sigaagɛ atu ɗook sineene raŋk, ɛ ege Waakoyot omoŋ dakɛɗa.

⁵Kɛygun lakaayɛ jookak a ɓɔɔkaaŋ sigɔ riyɛ sɛɛg kɛ joohkuŋ ɗook sineene raŋk maŋk dariŋ ɛ lakɛ joohkak a ɓɔɔkaaŋ a suumiyɛ a ɓɔɔkaaŋ,

⁶Nɛ lakii Baabɛ naŋk Waakoyo sinɔ omoŋɔŋk dakɛɗa sinɛɓa riiɓe ola baŋɛk ɛ sinɛ eteŋk gɛɛŋkik, ɛɓɔrɛ lakii Suumi Yeese Keresee sinɔ omoŋɔŋk sinɛɓa riiɓɛɛ ola baŋɛ Sɛɛnek ɛɓɔre beeɗii Sɛɛnek.

⁷Mayakana sigɛ ɗegerar sinik moko joop baŋɛ. Barɛrkɔ joop a omoŋ omoŋ ugumeet raŋaawotakaak. Saa ɗamarɗi taar sinɔ ito sinik, nɛ koɓur kɛ uduŋɛɛkɔ raŋaawotaka eekeerɛ, agut sinɔ kalbiyɛ gɛŋk bɔɔlakik nɛ sɔɔkiɗiŋ.

⁸Mayakana moko ɗama any sinɛ tin wideer son lak Waakoyok. Kɛɛ any sinɔ tine bitakɗik kɛygun kiikaayii ɗamitiŋ, ɛ kɛɛ any sinɔ tina tuukiɗiikik kɛygun ɗamikaayiiŋ.

⁹Mayakana in koorɛɛ ɛɛk kɛnɔ mokɔɔ any sinɛ ijaagiir oolaan noŋkuk dakɛ a gaŋtan joopa sigaaga kir ɓaŋkawuka ŋaadiyɛɛkɛk.

¹⁰Ɔkɔn tonun kɛ, "Laka ɗegerɔn sinɔ ito sinikiŋ," ɛ saani dɛnɛɛɗ iɗit sinɔ lak kalbi sinɔ bɔɔluk a ɗamikin woy raŋaawotoŋk, anɛ ki sɛɛn ariiɗ a ɗam taar sinɔkɔ uduŋɛɛ raŋaawotaak?

¹¹Nɛ agut sini iin sinɛ tonun kɛ, "Ɗegera ɛɛkik" badɛkɔɔ masookoy sinɛ in ki ɓaŋkaawurɔn ŋaadiyɛɛkɛk ɔɔtɛ nookɛk, sinɛɓa rɛrgeeɗ Kereseek.

¹²Saa tikerɗɔ masookoyak sigɛ dooytaanakik ɛ ariir kalbiyɛ gɛŋk sigɛ in kir ɓaŋkaawurɔn ŋaadiyɛɛkɛk a doosoyɛrŋɔŋk, ege sini sinɔ tikerɗɔ Kereseek.

¹³Nɛ agut sini ɔkɔn ari ɗamat manya eeta a gaŋiŋ, nɛ kaa ada taar adaktan kɛnɔ kat ara manya eeta a gaŋiŋ.