Read majang Omoŋ Korontoosuk 9 Bible Online

Omoŋ Korontoosuk 9 - majang bible

Omoŋ Korontoosuk 9

¹Amoko eet iɗit sinɔ arka yaakatik? A moko eet wosɛytan? A mokokan dɛna Suumi naŋk Yeese Kereseeŋ? A moko iinak taamɛ ijaag naakik Suumii Yeese Keresee?

²Kɛygun aasi moko eet wosɛytan joopa ɔgɔɔkaŋ, ma sɛŋk eet wosɛytan iinaka agut sinɔ ɗegeerakari iinak ijaag wosɛ naakik Suumiik.

³Jumura oko sinik joopa sigaagata tonur kɛ, "Kɛɛne oolan sinɔ iin wosɛytank".

⁴A kɛɛ tine oolan sinɔ ɗamiɗii ɛ utiɗiiɗiiki?

⁵Lakii oolan sinɔ koyoyowuɗii a jartiyatɔk gaŋk sigɔ dooytaanakik oko wosɛytaana ɔgɔ maŋk oko manyaakak Suumiya maŋk oko Keepaaŋ.

⁶Maŋk eet a Barnabaas dakɛɗa sigɛ ijaagɗikii a bɔɔlakii kɛnɔ beeɗiik?

⁷Wooɗ sinɛ ijaagɗi amaasinikent sɔkɔn worii nɛɛkɛkik? Wooɗ sinɛ waayi wɛyin nɔ ki ada taamɛ gɛɛŋkik? Wooɗ sinɛ lowu keeguk gɛɛŋk nɔ ki tuu ɛrsɛɛ gɛɛŋkik?

⁸Tona sini ɓaŋkawukaat etoŋku? A ki toniiɗ higi Muuseek oko siniki?

⁹Agut sinɔ taapɛɛɓa higii Muuseek kɛ, "Kat tusun ato jeguy sinɔ porootiɗiŋɔŋk," anɛ Waakoyot koɓigeeɗ jeguyaatɔk dakɛɗa?

¹⁰A mokoɓa tonu Waakoyot sini agut sinɔ koɓigeeɗ eteŋkik? Taapɛɛɓa sini agut eteŋk, kɛnɔ iɗit sinɔ kotiɗiŋɔŋk in kotiɗi ŋaadiyɛɛkɛ sigaagɛ kookork. Ma iɗit sinɛ porotiɗik in porootiɗi ŋaadiyɛɛkɛ sigaagɛ kookork, kɛnɔ laŋir sɛɛg baŋɛ ɗama sinɛkan ijaagirk.

¹¹Ɔkɔn seek kɔna soowii any Waakoyotoŋk ɓayɛtunɛɛkɛ goŋk takiŋ, nɛ ɔkɔn ɗootii geet noŋk taaroŋkuŋ. Nɛ ege sini any sinɔ obiiŋɔŋku?

¹²Ɔkɔn joop ɔgɔɔk latu ɓaŋkawuka[1] iinakɛŋ, anɛ eteŋkɛ kɛɛ ɓaŋkawuka sinɔ kaalɛ sinik ɛk? Yakana kiikɔ ijaagɗit ɓaŋkawukaat sineene, ma ɓaŋkaawurii oolaan ant baŋɛ kɛnɔ kat dakii a gaŋtan Pɛɛniya sinɔɔna Ɓɛlkɛɛstank Kereseek.

¹³Kiir ɗegerɔɔn kɛ joop sigɛ ijaagɗi Godeey sinɔɔnɛ Geetitank kɛ laŋir ɗama nɛŋk Godeey sinaanɛ Geetitank ɛ joop sigɛ uduŋɗi nyon sinaanɛ uduŋeetoŋk kaasɛrkoy any sinɛ uduŋɛɛkiŋ?

¹⁴Ɛɓa ɓɔrɛ sekɛ Suumii kɛ "Joop sigɛ waasɛr Pɛɛni sini Ɓɛlkɛɛstank laŋir ɗama nɛŋk ijaag sinaanɛ nɛŋk.

¹⁵Mayakana kaakan saak ijaagɗit ɓaŋkawukaatakɛ sigeege, moko taapɛɛra sini sinɔɔnɛ kɛ kɛɛta eemɛyɔɔn ɓaŋkawuka naak agut jikonk. Dɔɔsta a rɛɛraaŋ ɔɔtɛ saagunte iɗit boŋiiɗ any sinɛ meriiɗa ɛɛkik.

¹⁶Agut sinɔta remɛ waasi pɛɛni sinɔ Ɓɛlkɛɛstank, nɛ kiiɗa meriiɗ ɛɛk. Maɓɔrɛta ɗɛyɛ jɛt a in waasa any sini. Durita ɔkɔn daka a kaa waasɛɛt pɛɛni sinɔ ɓɛlkɛɛstankiŋ.

¹⁷Ɔkɔn waasa Pɛɛni sinɔ Ɓɛlkɛɛstank ɗɛyaan naakɛ ata kɛɛ remɛɛɗiŋ, nɛkoy laŋa ruukeet. Mayakana ɔkɔn ijaaga remɛɛɗiŋ nɛkɔɔ laŋa ruukeet kɛ jikon?

¹⁸Anɛ koyi naak jikon? Waasa Pɛɛni sinɔ Ɓɛlkɛɛstank sɔkɔn ata kɛɛ koyɗiit. A kaa kɔnyɛɛɗ ɛɛk ɓaŋkawukaat naakɛk waasiyɛɛkɛ.

¹⁹Eet iɗit sinɔ laka yaakak. Mayakana daka a laaŋoyen joopa baŋɛ kɛnɔ kɔnya joop.

²⁰Dakakɔ a iɗit Ayuuduk saakɔ arkiɗa sooy lak joop Ayuuduk kɛnɔ ebɔda sɛɛg. Kɛygun aasi moko arka higii Muuseek goyse ɗeekikiŋ, nɛkɔ daka oko joop sigɔ atu higii Muuseek goyse ɗeekik kɛnɔ ebɔda sɛɛg.

²¹Ɔkɔn laka higi Waakoyotoŋk ɛ kɛygun arkaaya higii Kereseek goyse ɗeekiŋ, nɛkɔ daka ate kɛɛ higi, kɛnɔ ebɔda joop sigɔ moko Ayuuduk sigɔ kɛɛ sɛɛge higik.

²²Dakakɔ a ito eet bɔɔl joope sigaagɛ bɔɔla ŋaadiyɛɛkɛk kɔɔr kɛnɔ ebɔda sɛɛg. Dakakɔ oko sɛɛg sooy lak joop sigɔ ɓɛɛlɛr kundiyaakɛk kɛnɔ ebɔda sɛɛge tak joop a omoŋ omoŋ.

²³Ijaaga sini baŋɛ kɛnɔ waasa Pɛɛni sinɔ Ɓɛlkɛɛstank, kɛnɔ laŋa yaaka sinɛ laŋɛɛ wookaan Pɛɛni sinɔ Ɓɛlkɛɛstank.

²⁴A kiir ɗegerɔɔn kɛ joope sigaagɛ reerir a arir arampɛɛk kɛ boŋɗiikɔɔ sɛɛge ruukeet nɛɛk a iɗit omoŋ dakɛɗa? Nɛ agut sini in ɓɔrɔ reerɛɛ kɛnɔ kɛɛɗɛɛ boŋɛɛ ruukeet.

²⁵Joop sigɛ reerir a arir arampɛɛk baŋɛ arir barɛ ɛɛkoŋk sinɔ ɓaŋkawuŋɔŋk kɛnɔ laŋir ruukeet sinɔkoy badɛŋɔŋk. Mayakana seek bɔɔlaakii kɛnɔkoy laŋii ruukeet sinɛ koy ɓɛɛlɛ nɔkoy nɔkoyk.

²⁶Mayakana saak kaa reeran kanysɛya oko iɗit sinɔ kɛɛ soon mɛlgeeɗik, moko ito eet iɗit sinɔ bite walɛɛk.

²⁷Saa waasɛɛɗa pɛɛni nɛɛkik baŋiya, nɛ ikoma ɛɛk naak a ara ata tiiɗiŋ, kɛnɔ maŋk daka reeraan nɛɛkɛ walas.