Read majang Pɛɛyeen Korontoosuk 1 Bible Online

Pɛɛyeen Korontoosuk 1 - majang bible

Pɛɛyeen Korontoosuk 1

¹Ege sini wargatɛ sinɔ taapɛɛrɛɛ seey lak Paawuloos sinɛ wosɛytan Yeese Kereseek ɗɛyaan Waakoyotoŋk a manya eteŋka Timotiyoos, tolɛɛɗa ŋaadtaanakoŋk Waakoyotoŋk sigaaga atu Korontooseek a ɓɔrɛ joopa sigaaga ŋaadtaanakik baŋɛ sigɛ atu Akayaakeek baŋɛk.

²In kɔna dakɛ a maariyeet a mɛyin Waakoyotoŋk a bɔdɛ sooy lak Ɛpɛn eteŋka Waakoyo a Suumi Yeese Kereseek.

³In dakɛr pɔɔsiyɛɛk Waakoyota a Ɛpɛna Suumiya naŋk Yeese Kereseya, ɛ Ɗumaata maariyeeta ɛ Waakoyota gaananitoŋk baŋɛk,

⁴sinɛ tin gaananɛ rakatɛɛ naŋk baŋɛ kɛnɔ oolii gaananit joop sigɛ atu rakatɛɛk gaananit sinaanɛkan boŋii Waakoyotek.

⁵Agut sinɔ kaasɛɛɗii rakatɛ Kereseek a obiiŋɔŋk, nɛɓɔrɛ laŋii gaananit sinɔ obiiŋɔŋk goy nɛɛkik.

⁶Saa laŋkiɗii rakatɛk, nɛ sɔɔk laŋiir gaananit a bɔdɛ. Ma saa ɓɔrɛ lakiɗii gaananitik, nɛ ɓɔrɔ laŋiir gaananit, nɛ boŋiir rakatɛ sinɛkan boŋiik ɓaŋkaawurɔn oolaanik.

⁷Nɛ ɓaŋkaawar ŋaadiyɛ gaŋk sigɛ kookoriik iinakɛ, agut sinɔ ɗegerɗii kɛ kaasɛɛr gaananit naŋk oko sinɛ kaasɛrɗɔ rakatɛ naŋkiŋ.

⁸Iinak manyaakak eeta sigɛ dooytaanakik, ɗɛyii a ɗegerari rakatɛ sinɛkan laŋkii saakan arkiɗii ɗook Isiyaakiŋ, laŋkiikan rakatɛ sinɔ ar sinaanɛ oolii a ɓatakiiŋɔŋk rakaayk nɛkan aasi tine yawuɗi ŋaadiyɛ sigɔ kɛ beeɗiikɔɔ wɛɛŋaakɛŋɔŋk.

⁹Yogukiikan a ito kan tin goopɛɛ ret ɛ kɛnɔ tina mɛlɛ kɛ, mokokan riiɓii ŋaadiyɛ ɛkanɛɛkɛ gaŋk raŋk, makan Waakoyote raŋk sinaanɛ boŋɗiik ret walasak.

¹⁰Ebɔdɛkan tin sini rakatɛɛ sinɔɔnɛ rɛɛrɛŋɔŋk sinɔɔnɛ obiiŋɔŋk ɛkoy tin ebɔdɛɗ. Nɛɓɔrɛ ŋaadiyɛ gaŋk sigɔ kɛ ebɔdɛkoy tin kɛkarŋɔŋk.

¹¹Nɛɓɔrɛ kɔna ɗɛyɛ a tin kɔnyɛɛr ɗanɗamɔɔnuŋ kɛnɔ pɔɔsɛr joop a ɓɔɔkaaŋ Waakoyo agut eteŋk agut tigi sinɛkan tina gaɓɛɛ wɛɛŋakɛk ɗanɗamɔɔn joop sigɔ ɓɔɔkaaŋɔŋk.

¹²Nɛ any sinɛ meriiɗii ɛɛkik sɛɛn sini. Yaaŋɛtina kalbi naŋk kɛ ege any sini eekeer, nɛ tin diile mentankaat a ɓɛɛlɛt kɛ ɗɔmk sinɛkan laŋii Waakoyotek lalaŋ sinaanɛkan lakii a joop ɔgɔɔk ma kɛ ɗɔm a iinak agut omoŋɔŋk, mokokan sini gayɛ ɗegerɔɔn etoŋk makan maariyeet a mɛyin Waakoyotoŋk.

¹³Taapɛɛrii kɔna any sinɔ oolɛɛr a ambabɛɛr ɛ kɔna mɛlɛk dakɛɗa, ɛ ŋaada kɛ mɛlɛkɔɔ kɔna any sinɛ a pedtan.

¹⁴Any sinɛ ɗegerarik sisɔk a kaastan agut eteŋkik, nɛ agut sinɔ ɓeny saakɔɔ mɛlkiɗ Suumi Yeeseek mɛlɛkɔɔ kɔna baŋɛ nɛkɔɔ meriir ɛɛk eteŋkɛ maɓɔre meriiɗii ɛɛk iinak.

¹⁵Nɛ ŋaadiɗika ant sineene, nɛkɔ gaama kɛ gun kɔra tuki son lak iinakik kɛnɔ laŋiir geet pɛɛyeen nɛɛk.

¹⁶Gaamakan kɛ lɛɛwɛɛrakɔɔ kɔnu saakɔɔ kɛɛɗa Mɛkedooniyaakiŋ. Nɛkan koɓa kɛ kɔnyɛɛrkɔɔtu ŋawit naakɛ Yuudaakaak saakɔɔ weerikiɗa Mɛkedooniyaakeekiŋ.

¹⁷Gayi kɔna a kan gaama any sini makan kaa koɓiiɗ, maŋk gayi kɔna a kan gaama barɛɛɗ ɗookoŋk? Walwaatikent a ara kɛ, "Ii," ma ɓɛɛnyɔ om ara kɛ, "Moko"?

¹⁸Yakana oko sinɛ ege Waakoyot eekerkank nɛ pɛɛni sinɛ tonii kɔnak moko pɛɛni sinɔ weewerɛɛ kɛ, "Moko", Ɛɓɔrɛ kɛ, "Iik''.

¹⁹Agut sinɔ kɛygun eet kɛygun Timotiyoos a Siilaas sinɛkan kɔna waasiik agut Tɔɔn Waakoyotoŋk, Yeese Keresee. Nɛ moko sinɔɔnɛkan kɛ, "Ii", ma ɓɛɛnyɔ om kɛ, "Moko." Mayakana Sɛɛne ɓɛɛnyɔwɛ gɛɛŋk baŋɛ sinɔ kɛ, "Iik."

²⁰Gayɛr kuumiyɛ sigɛɓa gaɓɛ Waakoyotuk baŋɛ kɛ, "Ii" Keresee. Nɛ arii kɛ, "Ameen" eemɛyɔɔna Waakoyotoŋk goy Kereseek agut sini.

²¹Ege sini Waakoyo sinɛkoy tin ari a ɛtii eteŋk a iinak agut omoŋɔŋk goy Kereseek, ɛɓa tin ɗonyɛk,

²²ɛkan riiɓe tine dikoy nɛɛk taapiyɛɛkoŋk raŋk, ɛ kan tina gaɓɛ Wɛɛŋa sigɔ Geetitaanakik ɓayɛtunɛɛka takana a kabdi.

²³Kɛɛ Waakoyota sinaana ɗeger ɓayɛ naakik, kiira weerit Korontoosa kɛnɔ maŋk kɔnu kɛɛɗa ara a ɓakɛyɗiikariŋ.

²⁴Moko kɔne arii suumiikeen ŋaadiyɛɛkɛ goŋk raŋk, ma ijaagɗikii agut omoŋ kɛnɔ kɔna yaa, agut sinɔ ɓaŋkaawurarɗɔ ŋaadiyɛɛkɛ goŋkŋɔŋk.