Read majang Pɛɛyeen Korontoosuk 10 Bible Online

Pɛɛyeen Korontoosuk 10 - majang bible

Pɛɛyeen Korontoosuk 10

¹Eet Paawuloos kalɛya kɔnu rikiteet ɛɛkoŋk a mentankaat Kereseek. Saa eet a iinakik agut omoŋ nɛti tonɛɛ kɛ leemkank, ma saa yowɛrkiɗa kɔnek nɛti tonɛɛ kɛ diirkank.

²Kalɛya kɔnu kɛ saakɔɔ kɔrurkuɗak nɛkɔɔti kat kaar ariir a tonɗiika diirikent iinakɛ kɔɔr oko sinɛ tonɗiiɗa diirikent joope a omoŋ omoŋ sigaagɛ beeɗir koɓiiɗ ɗookoŋkuk.

³Kɛygun beeɗii ɗook sineene raŋk, mayakana moko timaakii oko joop, ma timaakii ɓaŋkawukaat wɛɛŋakoŋk.

⁴Maɓɔrɛ beya sinɛ timaaɗiik moko beya ɗoo sinik, mayakana sinɔ lak ɓaŋkawuka taamɛkɛ Waakoyotoŋk sinɔ aalɛɛɗɛ nyon sinɛ ɓaŋkawu ɛ dɔɔs kaarinak.

⁵Aalii palamɛ a koɓi etoŋk sinɛ ɓɔŋgɔɔrɛ ɛɛk ɗegerɔɔna Waakoyotoŋk baŋɛ, gaamii kalbiyɛ baŋɛ, nɛ arii sɛɛg kɛnɔ tiiɗi Kereseya.

⁶Saakɔɔ ege tiyan naŋk daktank, nɛkɔɔ eteŋk ragadtaanak kɛnɔ goopii any sinɔ kɛɛ tiiɗitik Kereseyaak.

⁷In mermenɛɛ any sinɛ kɔne ar ɔɗɔɔkɛk. Ɔkɔn lakɛ iɗit sinɔ ŋaadi kɛ eet Kereseekiŋ nɛ in koɓuɗ, eteŋk ɓɔrɛ Kereseek oko sinɛ sɛɛn Kereseek.

⁸Kɛygun mera ɛɛk jɛt agut ɓaŋkawuka sinɛkan tina gaɓɛ Suumiikiŋ kɛnɔ kɔnu kɛnyii, ma moko kɛnɔ kɔnu aalii, nɛte kɛɛ keeny.

⁹Kat koɓiir kɛ ara kɔnu wargatɛɛ naakɛ kɛnɔ ɓuriikariɗ.

¹⁰Tonur kɔne joop ɔgɔɔk kɛ, "Ɗilatu wosɛyɛ gɛɛnɛɛk ɛ ɓaŋkaawar jɛt, mayakana ɛɛk nɛɛkɛ bɔɔlaaŋ ɛ ki oolɛ toni."

¹¹In ɗegerar joop sigɛ tonur sinik kɛ kɛɛ pakakat wosɛyɛɛkɛ sigaagɛ taapɛɛrii ma arkii a yowɛɛɗŋɔŋk a ant sinaanɛ ijaagii ma arkii jɔk a iinak agut omoŋɔŋk.

¹²Kii paariit ɛɛk a joop sigɔ pɔɔsɛr ɛɛk nɛŋkiŋ. Rɔmɛr sɛɛk ɛkan gɛŋk a ɛkan gɛŋk, ɛ paarir ɛkan gɛŋk a ɛkan gɛŋk, nɛ moko ɗegerar ɛɛk.

¹³Yakana kii meriiɗ ɛɛk a kaalii saan kan tina gaamɛɛk, mayakana merii ɛɛk ijaag sinaanɛkan tina gaɓɛ Waakoyotuk kɛnɔ mɛlɛɛrii son lak iinakik.

¹⁴Kiikan kaalɛt nyon ijaagoŋk sinɛkan tina gaɓɛɛk, agut sinɔ eteŋk joop sigɛkan diileerii Pɛɛni sinɔ Ɓɛlkɛɛstank Kereseek son lak iinakik.

¹⁵Kii meriiɗ ɛɛk a kaalɛ saankan tina gaamɛɛk ant sinɔɔnɛkan ijaagir joop ɔgɔɔkuk. Mayakana lakii ŋaadiyɛ sigɛ kookoriik sigɔ kɛ ɓɔlɔɔrɛr ɓɔrɛ ŋaadiyɛ goŋkŋɔŋk ɛ bakaanyir a obiiŋ ijaag naŋk iinakɛ kɔɔr.

¹⁶Kii oolɛ a waasii Pɛɛni sinɔ Ɓɛlkɛɛstank ɗokanɛɛkɛ sigaagɛ atu iinakɛ walasikiŋ, maɓɔrɛ kii meriiɗ ɛɛk ijaag sinɔɔnɛkan ijaagɛɛ jeemɛ nyon iɗit omuk.

¹⁷Mayakana oko sinɛ toniiɗ Wargatɛ Waakoyotoŋk kɛ, "Iɗit sinɔ meri ɛɛkik, in meri ɛɛk Suumii."

¹⁸Agut sinɔ pɔɔsɛɛ iɗit saa sɛɛn pɔɔsɛɛɗ Waakoyotuk, ma moko saa pɔɔsɛɛɗ ɛɛk nɛɛk ɗumaak.