Read majang Pɛɛyeen Korontoosuk 11 Bible Online

Pɛɛyeen Korontoosuk 11 - majang bible

Pɛɛyeen Korontoosuk 11

¹Ŋaada kɛ ɓaŋkaawurar oolaan gaagɛyikeena naaka a tɛm. Inti koorɛɛ eekeerɛ.

²Ara nyeken sinɔ kus sooy lak Waakoyok agut iinak. Toorakan kɔnu mooja sinɔɔna omoŋɔŋk Kereseya oko peet sinɔ mentanŋɔŋk inɓa kir ɗuŋun a mooyk.

³Kaɗiigiɗa any sinɔ sɔɔkiɗi kalbiyɛ goŋk nɛ kiir boŋiiɗ mentanka nyeken sinaanɛ latukari Kereseyaak oko sinɛɓa raamɛɛɗ kookoo Heewan nyonɛk.

⁴Ɔkɔn lakɛ iɗit a omoŋ sinɔ kus nɛkɔna waasɛ Yeesee om a moko sinɛkan kɔna waasiikiŋ, maŋk boŋiir Wɛɛŋa sigɔ Geetitaanakik ɔgɔ a moko sigɛkan boŋiirkiŋ, maŋk boŋiir pɛɛni sinɔ ɓɛlkɛɛstank om a moko sinɛkan boŋiirkiŋ, nɛ ito kɔɔta ŋaadiir any sinɛ kɔna tonɛɛk baŋɛ.

⁵Yakanata kir gayit a lakɛ any sinɔ tɛmkuɗa "wosɛytaanakɛ Yeeseek sigeege boobɛrŋɔŋkuŋ".

⁶Kɛygun aasite kii kaayɛ toni sinɔ mentanŋɔŋkuŋ nɛte ki bitakɗit ɗegerɔɔn, toniikan kɔna sini a mɛlɛŋ agut ɓɔɔkaaŋ gopakɛ sigɔɔgɛ ɓɔɔkaaŋɔŋk.

⁷Kɛɛ any sinɔta koyɛɛk saakɔna waasɛɛɗa Pɛɛni sinɔ Ɓɛlkɛɛstank. Nɛ rikita ɛɛk naak ɗooka kɛnɔ kɔnyɛ iinak. Anɛkanta sini ikomɛɛ a tikiyɛ?

⁸Anɛkan weeweela godeyik Sambatɛyɛɛkoŋk ɔgɔ kɛnɔ boŋa sɛɛge wori kɛnɔ kɔna ijaagɗiikaa sɔkɔn a kɛɛ any sinɔta koyɛɛk?

⁹Saakan arkiɗa sooy lak iinakik kaakan kɔna dakɛ a diil nɔtu kɔnyɛɛ saakan ɗɛyɛɛɗa worik. Ɗɔkarkikanta tɔkɔny manyaakak eeta sigɛkan kurak Mɛkedooniyaakeek kɛnɔti kɔnyɛr. Nɛ kɔna kaa dakɛ a diil kɛygun sinaanɛkan ɗoyuk kɛygunkɔɔ ɔɗɔɔkak.

¹⁰Eekeerɛ Kereseek sigaagɛ atu eete takik, kɛɛ iɗit sinɔtu kaaɓu nɔ kaa meriiɗ ɛɛk ɗokanɛɛkɛ Akayaak baŋɛk.

¹¹Ma agut jikon? Agut sinikɔnu kiiɗa poriiɗik? Pora kɔnu a ɗegeera Waakoyo.

¹²Ijaagaakɔɔ ɓɔrɛ ɔɗɔɔka any sinɛ ijaaga sisɔk kɛnɔ sanɛr joop sigɔ tonur kɛ sɛɛgnɔ wosɛytaanakik any sinɔ merirɗi ɛɛk a tonur kɛ ijaagɗi oko sinɛ ɓɔrɛ ijaagɗiiɗik sɛɛkik.

¹³Ege joop sigɔ ito sigik wosɛytaanak sigɔ nyonkaanakik, ɛ ijaageer sigɔ raamkaanakik sigɛ weerɛr ɛkan gɛŋk, a gayi a wosɛytaana Kereseek.

¹⁴Moko sini any sinɔ reemɗigeeɗ ɓayaayk, agut sinɔ weerɛ aasi ɛɛk setan a gayi a wosɛytan pɛɗɛrkaatoŋkuŋ.

¹⁵Nɛ agut sini ki reemɗiit ɓayaay ɔkɔn weerɛr ɛɛk ijaager setanik a gayi a ijaageer mentankaatoŋkuŋ, laŋir koy gati ijaag nɛŋkik pediyaaŋ.

¹⁶Tona kɛkar kɛ, "Kat lakɛ iɗit sinɔ gayigiɗii a gaagɛk." Kɛygun aasi kɔna gayikaayii a gaagɛŋ nɛ inti ikomɛɛ a ito eet gaagɛ kɛnɔ mera ɛɛk ant sinɔɔnɛ tɛmŋɔŋk.

¹⁷Saa tonɗiiɗa meriiɗ ɛɛkoŋkuk nɛ moko tonɗiika ɓaŋkawukaat Suumiyoŋk, mayakana tonɗiika okokɔ gaagɛyoŋk.

¹⁸Mera ɓɔra ɛɛkiŋ, agut sinɔ merirɗi ɛɛk joop sigɔ ɓɔɔkaaŋɔŋk ant taaroŋkuk.

¹⁹Ɓaŋkaawurari oolaan agut joop sigɔ gaagɛyɛɛk agut sinɔ ɗegerarɗɔ ɛɛkik?

²⁰Kɛygun wooɗ ɔkɔn kɔnu ari a laaŋoyen, ɛ ɔkɔn kɔnu weewelŋ, ɛ ɔkɔn kɔnu kaŋiŋ, ɛ kɔnu daraayɛŋ, ɛ kɔnu sɔɔbɛŋ, nɛ koorikari oolaan.

²¹Kɛygun lakaaya keeny saa toniiɗa sinik, nɛ kɔna yaaŋa kɛ kii ɓaŋkawuka a kookorikii oolaan oko iinak. Nɛ tona sini a ito eet gaagɛ. Yakana kɛygun wooɗ ɔkɔn meri ɛɛk diriikentiŋ, nɛɓɔra mera ɛɛk oko sɛɛn.

²²Sɛɛg joop Ibirawiik? Eet ɓɔrɛ iɗit Ibirawiik. Sɛɛg joop Israeelik? Eet ɓɔrɛ iɗit Israeelik. Sɛɛg komoy Abrahamuku? Eet ɓɔrɛ komoy Abrahamuk?

²³Sɛɛg ijaageer Kereseeki? Eet ɓɔrɛ ijaagen Kereseek a kaala sɛɛg. Tona sini okokɔ maratikaanoŋk. Bɔɔlaakakan ijaag agut ɓɔɔkaaŋ a kaala sɛɛg, korkoɗɛɛkanti agut ɓɔɔkaaŋ a kaala sɛɛg, ɗiŋɛɛkanti agut ɓɔɔkaaŋ, ŋayɗiikakan rakatɛɛ retoŋk agut ɓɔɔkaaŋ,

²⁴Mamalɛɛkanti joope Ayuuduk teeɓɛɛ agut ruumer iɗit a aarin a tula aŋan agut tuul.

²⁵Malɛɛkanti agut jiit gumboy, baalɛɛkanti agut omoŋ giɗeekɛ, laŋkaakan ɓadɛyit emɗoŋk agut jiit, arkaakan goroo sinɔɔnɛ obiiŋɔŋk raŋk a kaay omoŋ a waawuy omoŋ.

²⁶Laŋkaakan rakatɛ gopɛ ŋawiitoŋk agut ɓɔɔkaaŋ, a rakatɛ gɔrɔ sinɔ obiiŋɔŋk, a rakatɛ mujikoŋk, a rakatɛ joope gaanɛk, a rakatɛ joope sigɔɔgɛ moko Ayuuduk, a rakatɛ katamɛɛ, a rakatɛ paaton, a rakatɛ goroo sinɔɔnɛ obiiŋɔŋk raŋk, a rakatɛ ŋaadtaanakɛ sigɔɔgɛ nyonkaanakik,

²⁷Arkaakan ijaag sinɔɔnɛ obiiŋɔŋk a bɔɔlaakaat, a san ɗoŋoŋk agut ɓɔɔkaaŋ, a ŋaaw a paar, a beeɗit a kaa ɗamitik agut ɓɔɔkaaŋɔŋk, a yaa a konaanikeen.

²⁸Ɓakɛkɛyikaakan ɓɛɛnyɔwɛ gɛɛŋk baŋɛ agut godeyi Sambatɛyɛɛkoŋk baŋɛ, a kaa koɓiiɗ any om.

²⁹Saa bɔɔlaaɗ iɗit omaayk, nɛ ɓɔra kaa bɔɔlaati? Saa gaŋiiɗ iɗit omaay tikiyɛɛkɛk, nɛ ɓɔra kaa ŋadi?

³⁰Ɔkɔn ɗɛyɛɛ meri ɛɛkoŋkuŋ nɛ ɓɔra mera ɛɛk olaatɛ sigaagɛ yaaŋɛr bɔɔlaaka naakik.

³¹Moko tona nyon a ɗegeera Waakoyo sinɛ Ɛpɛn Suumiya naŋk Yeese Kereseya sinɛ koy pɔɔsɛɛ nɔkoy nɔkoyk.

³²Saakan arkiɗa Dɛmaaskoweek nɛkan ari iɗit sinɛ ɓali joopuk sinɛ ar tapaɗe sinaanɛ kɛ Aretasik goyse ɗeek a koorɛr koortaana tugaateer sigɛ katamɛ nɛɛkik kɛnɔtu gaamɛɛ,

³³yakanakanti soosowukɛɛ melt kante tool sinaanɛ rektant keer katamɛ nɛɛkik, nɛkan porda ariit nɛɛkɛkiŋ.