Read majang Pɛɛyeen Korontoosuk 12 Bible Online

Pɛɛyeen Korontoosuk 12 - majang bible

Pɛɛyeen Korontoosuk 12

¹Ɗɛyɛta a mera ɛɛk, ma kɛɛ any sinɔ laŋɛɛ ant sineenek. Mayakana saak tonɗiiɗa dɛnɛɛ koɓi Waakoyotoŋk a ɗɛyan Waakoyotoŋk sinɔɓa ɓuukiɗiiŋɔŋk.

²Ɗegera iɗit Kereseek a omoŋ sinɔɓa boŋɛɛ mɛlɛɛɗa dariya jiiteena nɛɛkaakik emeyikɛ sigɔɔgɛ aarin a aŋank jeemɛk. Kɛygunɓa boŋɛɛ taare kɛygunɓa moko taare, kaa ɗegerɔɔn, ɗegeera Waakoyo.

³Ɗegera iɗit sinɔ ito sinik sinɛɓa boŋɛɛ mɛlɛɛɗa Gɛnɛtaak. Nɛ kɛygunɓa boŋɛɛ taare kɛygunɓa moko taare, kaa ɗegerɔɔn, ɗegeera Waakoyo,

⁴nɛɓa tiyɛ sɛŋk sooy Gɛnɛte any sinɔ kɛɛ oolɛ a waasɛŋɔŋk, ɛ ki oolɛ a tonu iɗiŋɔŋk.

⁵Nɛ mera ɛɛk agut iɗit sinɔ ito sinik, ma kaa meriiɗ ɛɛk naak agut ɛɛk naak bɔɔlaakaat naakɛ sɔgɔɔsɔyk.

⁶Ɔkɔn ɗɛya meri ɛɛkoŋkuŋ, nɛ moko daka a gaagɛ, agut sinɔ toniiɗa eekeerik. Mayakana gaama ɛɛk naak a kaa meriiɗ ɛɛk, kɛɛ iɗit sinɔ koɓu a kaalɛ any sinɛ dɛnɛ eeteek a sinɛ tiyɛ agut eetik.

⁷Ɛ kɛnɔ koora ɛɛk ɓɔŋgɔɔrɛt ɛɛkoŋk, gaɓɛɛkanta any sinɔ mumuk taar naak wosɛytan setanik kɛnɔti ooɗɛɗ kɛnɔ koora ɛɛk naak ɓɔŋgɔɔrɛt ɛɛkoŋk.

⁸Kalɛyakan Suumi agut jiit kɛnɔungte ɔɔyɛ rakatɛ sini.

⁹Yakanata sɛŋk tonu kɛ, "Gayɛna wookan naakɛŋ, agut sinɔ ege ɓaŋkawuka naakɛ daktan bɔɔlaakaat nookɛk." Agut sini yaata a mera ɛɛk bɔɔlaakaat naakɛ kɛnɔte beeɗ ɓaŋkawuka Kereseek.

¹⁰Yaataaŋ agut sinɔ laŋa ɓaŋkawuka saa bɔɔlaaɗak, saa bɔɔlaaɗa agut Kereseek, saati nyɔɔnɗɛɛk, saa rakatɛɛɗak, saati epapayɗɛɛk, saa ɓakɛyɗiiɗak.

¹¹Ariirkanti iinak nɔ dakɛɗa a eet gaagɛk. Kɛygun aasiti kii kaayɛ ɗegerɔɔn kɛ eet wooɗuŋ, nɛkan kaa balaaka "Wosɛytaanakɛ sigaagɛ tonɛɛ kɛ boobɛrŋɔŋk".

¹²Ijaagɛɛkan iinakɛ kɔɔr ola sigɔ yaaŋɛr sinɔ kɛ eet wosɛytan sinɔ eekerkank. Sɛɛg sigɛkan dusana ɓaŋkaawurɔɔn oolaanik, a yaaŋtaanak, a ola sigɔ reemɗi ɓayɛk, a sɔɔriyɛ.

¹³Jikon sinɛkan kɔna kaa ijaagɛk, makan ijaaga godeyikɛ Sambatɛyɛɛkoŋk ɔgɔɔkɛk? Nɛ ɔkɔnkan kɔna daka a diiliŋ, nɛ inte ŋɔɗiirɛɛ agut tikiyɛ sigi.

¹⁴Ragadakɔ saak sisɔ ɛɛk kɛnɔ kɔra son lak iinakik, ɛnyɛ gut jiiteen nɛɛk, nɛ saakɔɔ kɔrurkuɗak kɛɛ any sinɔkɔɔ kɔna dakɛɗa a diilik. Ɗɛya iinak, ma kaa ɗɛyɛ wori noŋk. Tolɛr bɔɔlɔŋer wori tɔɔmɔka, ma kir tolɛɛɗ tɔɔmɔk wori bɔɔlɔŋeera.

¹⁵Yaata a kɛygun gaɓa wori sinɛ lakaak baŋɛ, a wɛɛŋa gaaŋk agut iinakiŋ. Anɛ ɔkɔn kɔnu pora a ɛtɛ oko sinikiŋ, nɛti poriir a balaaŋ?

¹⁶Gayɛkan any sinɛ ɓɛɛlɛk nɛ kɔna kaa dakɛ a diilik. Mayakana gayi kɔna a kan kɔnu kaŋa ɗegeej a raamiyɛɛkɛ.

¹⁷Laŋaakan aasi kɔne any sinɔ kɔnyɛɛɗa ɛɛkik goy joop sigɛkan wosɛyɛɛrakiŋ?

¹⁸Kalɛyakan Tiitoo kɛnɔ kɔru son lak iinakik, ɛkan ɓɔrɛ wosɛyɛɛra manya eteŋka om a sɛɛn agut omoŋ. Laŋkan kɔne Tiito any omoŋ? Mokokan weewerikii a sɛɛn agut omoŋ Wɛɛŋakɛ sigɔɔgɛ omoŋɔŋku? Mokokan ŋawit naŋk ɓɛɛlɛ a omoŋ?

¹⁹Koɓiir kɛ beeɗiikan iinakɛ taamɛkɛ a koolii ɛɛk naŋk mɛlɛɛɗa sisɔwa? Tonɗiikii taamɛkɛ Waakoyotoŋk a arkii Keresee. Iinak sigɛ kɔnu poraak, tona sini kɛnɔkɔnu aawoya.

²⁰Kaɗiigiɗa sinɔ kaɗɛɛŋ kiiɗa kɔnu laŋiiɗ oko sinɛ ɗɛyɛɛɗak, maɓɔrɛ kiirti laŋiiɗ oko sinɛ ɗɛyɛrɗɔk saakɔɔ kɔrurkuɗa son lak iinakik. Ɛɓɔrɛ omaay kaɗɛɛŋ lakɛ iinakɛ kɔɔr kaarin, a nyeken, a goopan, a giiman, a sɔɔkiyɛ tiriyaakoŋk, a laaganyɔn, a ɓɔŋgɔɔrɛt ɛɛkoŋk rakaayak, a any sinɔ kɛɛ ikomiit ɛɛkik.

²¹Saakɔɔ kɔrurkuɗa kɛkark, kaɗiigiɗa any sinɔ kaɗɛɛŋ gɔɔnyɛ kɔɔtu Suumii taamɛkɛ goŋkŋɔŋk. Ŋada agut joop sigɔkan ijaagir tikiyɛ jeemɛk nɛkan kirki weerit tikiyɛɛkɛ Waakoyotak agut somakɔ a ruunyikeen a molkotɔnk.