Read majang Pɛɛyeen Korontoosuk 3 Bible Online

Pɛɛyeen Korontoosuk 3 - majang bible

Pɛɛyeen Korontoosuk 3

¹Tukii pɔɔsɛɛta ɛkan gaŋk kɛkar? Maŋk ɗɛyɛ tina wargatɛɛ pɔɔsiyɛɛkoŋk oko sinɛ ijaagirɗi joop ɔgɔɔkuk iinakɛk?

²Iinak ɔɗɔwa noŋk wosɛ naŋk sinɛɓa taapɛɛ ɓayaay naŋk kɛnɔ ɗegerar ɛ ambabɛr joop.

³Eekeer sinɔ kɛ iinak wosɛ Kereseek sigɔkan kurakɔ ijaag naŋk. Taapɛɛ wosɛ sini wɛɛŋakɛ Waakoyo sinɛ bɔdɛɛk, mamokoɓa booyiyaake, ɛɓaɓɔrɛ taapɛɛ ɓayaay etoŋk, mamokoɓa giɗeet raŋk.

⁴Tonii sini agut sinɔ lakiɗii ŋaadiyɛ sooy lak Waakoyok goy Kereseek.

⁵Kɛɛ tine any ara sinɔ tonii kɛ, "Gay eteŋkɛ oolaan naŋkik," ma oolan naŋk kus sooy lak Waakoyok.

⁶Ariɓa tin a gayii a eteŋk ijaageer kuumeet sinɔ tɔɔnuk, sinɛɓa tukiɗik Wɛɛŋakɛ sigɔɔgɛ Geetitaanakik, ma moko taaptaanakɛ raŋk, agut sinɔ ɗɔkarki taaptaana rer ma Wɛɛŋa sigɔ Geetitaanakik gaɓɛr bɔdɛ.

⁷Saaɓa gaɓɛɛɗɛ higi sinɛɓa taapɛɛ giɗeekɛ sigaagɛɓa pasɛɛk, nɛɓa gaɓɛɛ eemɛyɔn Waakoyotoŋk nyaalaan kɛygunɓa aasi widikɛ ɛɛk pɛɗɛrka sinɛɓa nyaalɛkiŋ, kirɓa oolɛ joop Israeelik a mermenar taamɛ Muuseek jɛtiŋ. A nɛ ɔkɔn sisɔ yaaŋɛ ɛɛk higi sinɛɓa ɗɔk rerk eemɛyɔn sinɔɔnɛ ito sinikiŋ,

⁸a nɛ ki kaalɗiit eemɛyɔn ijaag sinɔ laŋɛɛ Wɛɛŋakɛ sigɔɔgɛ Geetitaanakik?

⁹Ijaag sinɔ goopɗɛɛ joopuk ɔkɔn lak eemɛyɔn sinɔ ɛtɛ oko sinikiŋ, nɛ ijaag sinɔ etɛyɛrɗi joopk lak eemɛyɔn sinɔ kaalɗiŋɔŋk.

¹⁰Saa paariɗɛɛ eemɛyɔn sinɔ obiiŋɔŋk sinɛ sisɔk a sinɛkoy ɗoyuk, nɛ dakɛ eemɛyɔn sinɛkoy ɗoyuk a itoɓa kɛɛ.

¹¹Any sinɛɓa badɛk ɔkɔnɓa lak eemɛyɔn sinɔ ɛtɛ oko sinikiŋ, nɛ any sinɔkoy beeɗ nɔkoy nɔkoyk kiiɗɛ eemɛyɔn sinɔ kaalɗiŋɔŋk ɛk?

¹²Agut sinɔ lakiɗii ŋaadiyɛ sigɛ kookoriik sigɔ ɛtɛr oko sinikik, nɛ tonɗiikii a kii ɓuriit.

¹³Kii seek ariiɗ oko sinɛɓa ariiɗ Muuse sinɛɓa miinye taamɛ gɛɛŋk abiye kɛnɔ kat sɛɛn dɛnɛr joop Israeelik saaɓa badɛɛɗ nyaalan taamɛkɛ gɛɛnɛɛkik.

¹⁴Mayakana kilararɓa ɓayɛtun gɛŋk eekeerɛ, mɛlɛɛɗa ɓɛɛnyɔwase saa ambabɛɛɗɛɛ wargatɛ kuumeet sinɛ bɔɔlɔŋk, nɛ ɓɛɛlɛr a miinytaanak ant sinaanɛ, ege miinytan sini sinɔ widɛɛ Keresee dakɛɗak.

¹⁵Saa ambabɛrɗi wargatɛ higi Muuseek aasi mɛlɛɛɗa ɓɛɛnyɔwasek, nɛ miinyɗi miinytan ɓayɛtun gɛŋkik.

¹⁶Mayakana saa sɛɛg kurakiɗ ɓɛɛnyɔwɛ gɛɛŋk baŋɛ son lak Suumik, nɛ wide ɛɛk miinytan siniŋ.

¹⁷Ege Suumii Wɛɛŋa, soon lakiɗɛ Wɛɛŋa Suumiyoŋk nɛ lakɛ yaaka.

¹⁸Agut sini eteŋk baŋɛ arii eemɛyɔn Suumiyoŋk a nyaalɛŋ a ito dɛnɗiiɗɛɛ ɓɛɛrawoy taamɛkɛ sigɔɔgɛɓa kɛɛ sɛɛg miinyeetik, nɛ eemɛyɔn sini laŋɛɛ Suumii sinaanɛ Wɛɛŋak. Nɛ tin ari a weerii ɛɛk eemɛyɔɔn eemɛyɔɔna a gayikii a Suumi sinɛ Wɛɛŋak.