Read majang Pɛɛyeen Korontoosuk 5 Bible Online

Pɛɛyeen Korontoosuk 5 - majang bible

Pɛɛyeen Korontoosuk 5

¹Agut sinɔ ɗegerii kɛ ɔkɔn aalɛɛ buusɛ naŋk sinɛ ɓɛɛlɛ ɔɔtɛya sinɔɔna balaaŋɔŋk a ito duukaanoyk, nɛ lakii nyon beeɗitoŋk dari sinɔkoy ɓɛɛlɛ nɔkoy nɔkoyk sinɛɓa kɛnyɛɛ Waakoyotek ma mokoɓa ariit etoŋk.

²Bandurii ɗook sineene raŋk eekeerɛ, a lakii ŋaadiyɛ sigɛ kookoriik a lakii ŋɔɗɔ guugunyɔɔna nyona naŋk beeɗitoŋk sinaana ar darik,

³agut sinɔ saakoy kadiɗii ɛɛk wɛɛŋakoŋk, nɛ mokokoy ɓɛɛlii konaan.

⁴Saa beeɗiɗii buusɛɛ naŋk sineenek bandurɗii a tina ɗiliŋɔŋk, agut sinɔ kii ɗɛyɛɛ a karkaririi nyon naŋk beeɗitoŋk sinɛ ar darik, ma ɗɛyii a kadiiŋ kɛnɔ lokoosɛɛ sinɛɓa rɛrk sinaanɛ bɔdɛɛk.

⁵Waakoyo sini Sɛɛn sinɛkan tin ragadi anta sineenak, gaɓɛkan tina sɛŋk Wɛɛŋa gɛɛŋk a kabdi.

⁶Ɔkɔn degerii kɛ yowɛrkii Suumii ɔɔtɛya sinaana arkiɗii buusɛɛ naŋk ɗookoŋkuŋ, nɛ ŋaadiɗikii sɛɛne.

⁷Agut sinɔ beeɗii seek a ŋaadii Suumi, ma moko dɛnii Sɛɛniŋ.

⁸Beeɗii ŋaadiyɛɛkɛ a pakatii ɛɛk buusɛɛ naŋk sineene ito nyon beeɗitoŋkuk nɛ ɗɛyii a gun ɓɛɛlii a Suumi naŋk agut omoŋ.

⁹Kɛygun ɓɛɛlii a buusɛ naŋk sini maŋk kɛygun pakatiɗii ɛɛkiŋ, nɛ koɓi naŋk sinɔ ariiɗii Suumi a yaageeɗŋɔŋk.

¹⁰Agut sinɔ wideeriikoy ɛɛk eteŋk baŋɛ taamɛka barsum pirdiyoŋk Kereseek. Nɛkoy boŋu iɗit a omoŋ omoŋ any sinɔ mentanŋɔŋk maŋk ŋɛɛwɛnŋɔŋk sinɛɓa ijaag buusɛɛ nɛɛkɛkik.

¹¹Agut sinɔ ɗegerɗii kɛ tuɓur Waakoyotoŋk jikonkuŋ, nɛ kɔnyɛɗii joopuŋ. Ɗeger Waakoyot kɛ ɓɛɛlii ɛkiŋ, nɛ ŋaada kɛ ɗegerari kɛ ɓɛɛlɛɛr ɓayɛtunɛɛkɛ goŋk ɛkiŋ.

¹²Kii kɔna pɔɔsɛɛt ɛkan gaŋk kɛkar, makɔna gaɓii milki sinɔ merirɗɔ ɛɛk eteŋkɛɛk kɛnɔ oolɛɛr a gaɓɛɛr jumuran joopa sigaaga merir ɛɛk ant sinaanɛ dɛnɛɛk, ma moko merir ɛɛk ant sinɔɔnɛ ar ɓayaayk.

¹³Ɔkɔn eteŋk maratikaanakiŋ, nɛ agut Waakoyo. Ma ɔkɔn ɓɔrɛ ɗegerii ɛɛkiŋ, nɛ agut iinak.

¹⁴Dire tin mɛyin Kereseek ijaaga, agut sinɔ ege joop baŋɛ kaastaanak rer nɛɛkik nɛ tina mɛlɛ kɛ rɛrɓa Kerese agut joop baŋɛ agut omoŋ.

¹⁵Rɛrɓa Kerese agut joop baŋɛ kɛnɔ joop sigɛ beeɗirk kat beeɗir ɛkana gɛŋk, mayakana Sɛɛna dakɛɗa sinaanaɓa rɛr ɛɓa ŋaarki ret walasak wɛɛŋaka agut sɛɛgik.

¹⁶Agut sini a tukiɗi seedi son kɛygun wooɗ kiikɔɔ taanta koɓiiɗ etoŋk. Kɛygunɓa aasi jeemɛ dɛnii Keresee koɓiiɗ etoŋkuŋ, nɛ kɔɔɓɔ seedi son kii Sɛɛn taanta oko sinɛk.

¹⁷Agut sini ɔkɔn iɗit ar Kereseeŋ, nɛ sɛɛn riiɓ sinɔ tɔɔnuk. Ɗoyukan sinɛ bɔɔlɔŋkuŋ, maɓɔ ɓɛɛlɛ riiɓ sinɔ tɔɔnuk.

¹⁸Ɓɛɛlɛɓa sini baŋɛ Waakoyote sinaanaɓa tin taaki a ɛɛk nɛɛk goy Kereseek, ɛɓa tina gaɓɛ ijaag taakiiyɛɛkoŋkuk.

¹⁹Ege sini sinɔ kɛ taakiɗiɓa Waakoyot a joop a ɛɛk nɛɛk goy Kereseek, kiɓa sɛɛga ikomiit tikiyɛ gɛŋk, maɓa eteŋka gaɓɛ wosɛ nɛɛk taakiiyɛɛkoŋk.

²⁰Agut sinɔ riyɗi Waakoyot joop goy naŋkik nɛ eteŋk joop sigɔ ijaagɗi ɔɔtɛ Kereseek. Nɛ agut sini kalɛyii kɔnu tiriyaakɛ Kereseek kɛ, "In taakiɗiikɛɛ a Waakoyo."

²¹Ariɓa Waakoyot sɛɛn sinɛ kiiɗɛ tikiyɛɛk a tikiɗi agut eteŋk, nɛ dakii a mentankii taamɛkɛ Waakoyotoŋk Sɛɛne.