Read majang Pɛɛyeen Korontoosuk 6 Bible Online

Pɛɛyeen Korontoosuk 6 - majang bible

Pɛɛyeen Korontoosuk 6

¹Kalɛyii kɔnu kɛ kat ŋɔɗɛɛ wookan Waakoyotoŋk sinɛkan boŋiirik kanysɛya oko sinɛ ijaagɗiɗii a Waakoyo agut omoŋɔŋk.

²Agut sinɔ toniiɗ Waakoyot kɛ, "Geleewakanna sayitii sinaanɛ likiikiŋ, kɔnyakanni ɓeny bɔdɛɗoŋkuŋ." Dɛnko, ege sisɔ sayiti sinɛ likiik, ege sisɔ ɓɛɛnyɔ bɔdɛɗoŋk.

³Kii dakɛ a gaŋtan kɛygun jikoy kɛygun wooɗa kɛnɔ kat laaganyɛɛ ijaag naŋk,

⁴mayakana yaaŋii ɛkan gaŋk gɔɔ baŋɛ oko ijaageer Waakoyotoŋk, ɓaŋkaawurɔɔn oolaanik, a rakatɛɛ, a san, a ooɗiyɛɛkɛ,

⁵a tiɗiŋ, a korkoɗɔɔn, a ɓooyaan, a ijaag sinɔɔnɛ tine ar rakaayk, a san ɗoŋoŋk, a san ɗamatoŋk,

⁶a mentankaat ɛɛkoŋk, a ɗegerɔɔn ɛɛkoŋk, a ɓaŋkaawurɔɔn oolaanik, a mentankaat, a Wɛɛŋakɛ sigɔɔgɛ Geetitaanakik, a mɛyin sinɔɔnɛ eekerkank,

⁷ege mentankaat taamɛkɛ Waakoyotoŋk any timatoŋk naŋk ɛ tina any kolanoŋk ɛɛkoŋk, Pɛɛnii eekeeroŋk, a ɓaŋkawukaat Waakoyotoŋk.

⁸Ragadiikan ɛɛk eemɛyɔɔna maŋk daraayɛya maŋk gɔɔnyiyɛɛka maŋk pɔɔsiyɛɛka. Ɛ kan tin riyɛɛ kɛ nyonkaanak, ma eteŋk eekerkaanak.

⁹Tonɛɛ kɛ kɛɛ tin ɗegerɔɔn, ma eteŋk joop sigɔ ɗegerɛɛŋɔŋk. Tonɛɛ kɛ rɛɛriiɓaŋ, ma ɓɛɛlii wɛɛŋakɛ ɗiŋɛɛ tin nɛkan tin kɛɛ ɓokootɛɛ.

¹⁰Kɛygun sanɗikaayiŋ nɛ tina yaa ɓɛɛnyɔwɛ gɛɛŋk baŋɛ, a eteŋk giroykaanak nɛ arii joop a ɓɔɔkaaŋ a worikaanak, a tine kɛɛ any ara ma ege any baŋɛ naŋk.

¹¹Iinak joop sigɛ beeɗir Korontooseek, toniikan kɔna kɛ ɗɔm, tayiikan ɓɔrɛ kɔna ɓayɛ naŋk a bakaanyiŋ.

¹²Kiikan kɔne koriiɗ ɓayɛ naŋk, makan tine sɔɔk koriir ɓayɛ noŋkuŋ.

¹³Tona kɔna kɛ in tina tayɛɛ ɓayɛ noŋk a bakaanyiŋ oko sinɛ ito iinak tɔɔmɔk gaaŋkik.

¹⁴Kat lotɛɛ ɛɛk a joop sigɔ kir ŋaadiɗiitik ɔɔtɛ sinɔɔnɛ ki yaakak. Any sinɔ mentan taamɛkɛ Waakoyotoŋkuk a tikiyɛ oolɛr a lotɛr ɛɛk ɛk? Pɛɗɛrka a nyuugur oolɛr a lotɛr ɛɛk agut omoŋ?

¹⁵Oolɛ a mɛyi Keresee a diyabiloos ɛk? Iɗit sinɔ ŋaadiɗiŋɔŋk a iɗit sinɔ ki ŋaadiɗiitik oolɛr a lotɛr ɛɛk jikoy?

¹⁶Gode sinɔ Geetitank Waakoyotoŋk a raŋaawo latu lalaŋ kɛ jikon? Agut sinɔ eteŋk Gode sinɔ Geetitank Waakoyo sinɛ bɔdɛɛk oko sinɛɓa toniiɗ Waakoyot kɛ, "Araakoy nyon naak beeɗitoŋk joope gaanɛ kɔɔr, nɛkoy weeweriiki a sɛɛg agut omoŋ. Dakakoy sɛɛga a Waakoyo nɛŋk, makoy ɓɔrɛ sɛɛg joop gaaŋk."

¹⁷Nɛ agut sini tonuɓa Waakoyot kɛ, "In ŋaarkɛɛ sɛɛge kɔɔr, in pakatɛɛ ɛɛk sɛɛge, kat kumɛɛ any sinɔ somkank, boŋaakoy kɔnuŋ,

¹⁸dakakoy kɔna a ɓaaɓa noŋk, makoy dakɛɛr a tɔɔmɔk gaaŋk sigɔ moojakik a sigɔ peetakik, tonu Waakoyo sinɛ Oolɛ ola Baŋɛk."